1. I na, kua tuku atura te ariki o te ngati Lamana i tetai tuatua akakite ki tona iti tangata e, auraka rava ratou e arapaki atu ia Amona e ko Aarona, e ko Omena, e ko Himinai, e tetai o to ratou au taeake te ka tuatua atu i te tuatua a te Atua, no atu e, eaa ta ratou ngai ka aere, e i te au tuanga o to ratou enua.

2. I na, kua tuku atura aia i tetai akaueanga ki rotopu ia ratou e, auraka rava to ratou rima e arapaki atu, e ma te tapekapeka atu ia ratou, me kore, e titiri atu ia ratou ki roto i te are auri, e auraka e tutua atu i te uavare ki runga ia ratou, e auraka e ta ia ratou, e auraka e tuaru atu ia ratou mei roto i to ratou au , auraka e papa ia ratou, auraka e pei ia ratou ki te toka, ina ra, kia aere au ua ratou ki to ratou au ngutuare, e ki to ratou au iero, e ki to ratou au are tapu ra.

3. E kia tika oki ia ratou kia aere atu ma te ako atu i te tuatua mei ta ratou i anoano, no te mea kua akaariuia mai te ariki ki te Atua, e tona ngutuare tangata katoatoa, e no reira kua tuku atu aia i tana tuatua akakite ki roto i te au enua e ki tona iti tangata, kia kore oki te tuatua a te Atua e patoiia, kia tupu ra ki te au enua ravarai, kia akaruke oki tona iti tangata i te au mataara kino a to ratou ai metua, e kia ariu mai oki ratou, e kia kite oki ratou e e taeake oki ratou, e kare oki i te mea tau ia ratou kia ta i te tangata, kia aru, kia keia, kia akaturi, e kia rave atu i tetai au mea kino.

4. Kia tuku atu te ariki i teia tuatua akakite, kua aere atura a Aarona e tona au taeake ki tera oire ki tera oire, e ki tera are pure e ki tera are pure, i te akatinamou anga i te akonoanga, ma te akatainu atu i tetai au taunga e te puapii i roto i taua enua ra no te ngati Lamana, kia ako, e kia apii atu i te tuatua a te Atua kia ratou, e kua manuia oki ratou.

5. E kua tausani oki tei ariki i te kite o te Atu, e tausani katoa tei irinaki i te papaanga o te ngati Niphai, e kua apii ia ratou ki te au papaanga e te totou tei orongaia mai, e tae rava mai ki teia taime nei.

6. E te ora ra te Atu, e manganui tei irinaki, e manganui katoa tei akaariuia mai ki te kite i te tuatua mou na roto i te apiianga a Amona e tona au taeake kia tau ki ta te vaerua o te eeuanga, e te mana o te Atua i te rave anga i te au semeio na roto ia ratou, e te karanga atu nei au kia kotou e, te ora nei te Atu, e manganui te au tangata Lamana i irinaki i ta ratou apiianga, e kua ariu mai ki te Atua, e kare rava ratou i topa akaou.

7. Kua riro mai oki ratou ei aronga tuatua tika, e kua akaruke oki ratou i ta ratou au apinga tamaki, e kare rava ratou i tamaki akaou atu i te Atua, e kare katoa ki to ratou au taeake.

8. E teianei, teia te au tangata tei ariu atu ki te Atu ra.

9. Te au tangata o te ngati Lamana tei noo ki te enua ra ko Isemaela.

10. E pera katoa te au tangata Lamana tei noo ki te enua ko Mitioni.

11. E pera katoa te au tangata Lamana, tei noo ki te enua ko Niphai.

12. E pera katoa te au tangata Lamana tei noo ki te enua ko Siloama e tei roto katoa i te enua ko Semeroni, e i roto i te oire ko Lemuela, e i roto katoa i te oire ko Seminaloma

13. Ko te au ingoa te reira o te au oire o te ngati Lamana tei akaariuia mai ki te Atua ra, e ko ratou oki tei akaruke i ta ratou au apinga tamaki, ae, ko ta ratou au apinga tamaki katoatoa e e ngati Lamana pouroa oki ratou.

14. Kare oki te ngati Amaleki i ariu mai, mari ra, okotai ua, e kare katoa o te ngati Amulona, kua ketaketa rai to ratou ngakau, e pera katoa te ngakau o te ngati Lamana i roto i taua tuanga o te enua ra, e te ngai tei nooia e ratou, e to ratou au oire rikiriki, e to ratou au oire mamaata.

15. Kua akakite matou i te au ingoa o te au oire o te ngati Lamana tei tataraara, e tei kite i te tuatua mou e tei akaariuia maira.

16. Kua inangaro iora te ariki e te au tangata katoa tei akaariuia maira, kia topaia ki tetai ingoa, kia taka ratou mei to ratou au taeake, e no reira kua uriuri te ariki e Aarona i tona au taunga no te ingoa ta ratou ka rave ki runga ia ratou kia taka ratou.

17. Kua kapikiia iora i to ratou ingoa ko te ngati Aniti-Lihai-Niphai e kua tuatuaia ratou ki taua ingoa ra, e kare atura ratou i karanga akaouia e, ko te ngati Lamana.

18. Riro akera ratou ei au tangata ririnui, e tupu akera te au ki rotopu ia ratou e te ngati Niphai, e kua akamata iora ratou i te akaoa ia ratou e kare oki te taumaa a te Atua i iri mai ki runga ia ratou.