Te Puka a Alama
Te Tamaiti a Alama

1. I te mataiti mua i te tutaraanga o te au akava ki te ngati Niphai, mei reira e aere atu, kua aere te ariki ko Mosaia na te ara e aereia e to teia nei ao, ma te tamaki i te tamaki meitaki ma te tau tona aerenga ki mua i te Atua, e kare oki i akaruke i tetai tangata ei mono iaia, kua akamou ra aia i tetai ture, e kua akatikaia e te tangata, e no reira kua akono ratou i te ture tana i maani ra.

2. Ei reira ra, i te mataiti mua i tutaraʼi a Alama ki runga i te terono akavaanga, kua apainaia mai tetai tangata ki mua iaia kia akavaia; e tangata maata e te rongonui ma te maroiroi maata.

3. E kua aere atu aia ki te au tangata i te tutu anga atu kia ratou i te tuatua a te Atua, ma te akakino i te akonoanga e te tuatua ra aia ki te tangata i te na ko anga e, kia riro te au taunga e te au puapii ei aronga maata, e tikai, e kare oki i te mea tika kia angaanga ratou ki to ratou uaorai rima, kia tauturuia ra ratou e te au tangata e tikai.

4. Kua akakite papu atura aia ki te au tangata e, ka akaoraia te au tangata katoatoa me tae ki te au rā openga ra, eiaa oki ratou e mataku, e eiaa katoa e ruketekete, ka akateitei ra ratou i to ratou upoko ma te rekareka, e kua anga oki te Atua i te tangata katoatoa ra, e kua akaora katoa i te au tangata ravarai, e i te openga ra, ka rauka i te katoatoa te ora mutu kore.

5. E kua apii rai aia i teia au mea e manganui e e maata katoa tei irinaki ki tana tuatua, e maata katoa tei oronga atu i te moni nana.

6. E kua akateitei tona ngakau na te ngakau parau, ma te aao i te kakau oko maata, e ma te akamata katoa i te akatumu i tetai akonoanga nana kia tau ki tana uaorai apiianga.

7. E iaia e akamata ra i te apii atu ki te aronga tei akarongo ki tana ra tuatua, kua aravei aia i tetai tangata o te akonoanga a te Atua, koia oki ko tetai o te au puapii, e kua akamata aia i te tuatua pakari atu kiaia e ka arataki ke atu oki aia i te tangata o te akonoanga, ina ra, ko te tangata tei tu mai kiaia kua ako mai iaia ki te tuatua a te Atua.

8. E ko te ingoa o taua tangata ra ko Kitiona, e koia katoa oki te rima rave o te Atua, i te akaoraanga te Atua i te iti tanagta o Limihai mei roto mai i te tuikaaanga.

9. E teianei, kua ako atu a Kitiona iaia ma te tuatua a te Atua, kua riri aia ia Kitiona, ma te kiriti mai i tana koke no te ta atu iaia. E no te mea kua pakari a Kitiona, kare atura i rauka iaia i te paruru iaia uaorai, e no reira, kua mate atura aia.

10. Kua raveia akera te tangata i ta iaia ra e te aronga o te akonoanga e kua aratakiia mai ki mua ia Alama kia akavaia no tana ara i rave ra.

11. Kua tu iora aia ki mua ia Alama ma te tuatua atu ma te mataku kore.

12. Kua tuatua akera a Alama e, ko te taime mua teia i tupu ei te angaanga pikikaa ki rotopu i teianei iti tangata. E i na, kare ko te angaanga a te orometua pikikaa anake ra, kua tamata oki ra koe i te akatika i te angaanga a te taunga purepure ra na roto i te koke, kia akatikaia te angaanga taunga purepure ki teia aronga nei, e ka pou rava ratou i te reira.

13. E kua akamaringi oki koe i te toto o te tangata tuatua tika ra. I na, tetai tangata tei rave i te meitaki maata no te aronga nei, e kia akaora matou ia koe na, e ka riro tona toto ki runga ia matou.

14. E no reira kua akaapaia koe kia mate kia tau ki te ture i oronga ia mai kia tatou e Mosaia to tatou ariki openga, e kua akatikaia te reira e teia aronga nei, e no reira kia akono teia aronga nei i teia ture e tikai.

15. E ko Nihora oki tona ingoa. Kua apai atu ratou iaia ki te take o te tuaivi ko Manitai, kua akaueia aia i reira kia tuatua koia oki kua akakite ma te akapapu mai i te tikaanga tikai ki mua i te rangi e te enua e, e mea tau kore oki tana i apii atu ki te au tangata, e e mea tarevake ïa i te tuatua a te Atua, e kua mate aia i te mate akama.

16. Kare ra teia i riro ei akamutuanga no te puraraanga o te angaanga a te au orometua pikikaa i roto i taua enua ra, e maata oki tei inangaro i te au mea kino o teianei ao, e kua aere atu ratou ma te ako aere i te apiianga pikikaa, kua rave oki ratou i teia no te moni e te tu ngateitei.

17. Kare oki ratou e pikikaa me kiteaia ake no te mataku i te ture, e ka akaapaia oki te aronga pikikaa. E no reira kua akamata ua ratou i te apii kia tau ki to ratou uaorai irinaki, e kare oki e mana o te ture ki rungao i tetai tangata no tona irinakianga.

18. E kare oki ratou i keia no te mataku i te ture, ka akautungaia oki, e kare katoa oki i keia, e kare katoa oki i ta ua, e ko te tangata te ka ta ua e utunga mate tona.

19. E ko te tangata kare i roto i te akonoanga a te Atua kua tamata ratou i te takinga kino i te au tangata i roto i te akonoanga a te Atua ko tei rave katoa i te ingoa o te Atu.

20. E kua takinga kino katoa ratou ia ratou ma te tuatua atu i te au tu tuatua ravarai, e no to ratou maru, e kare katoa e tuatua i to ratou uaorai manako, e kua akakite katoa i te tuatua a te Atua tetai ki tetai ma te kore e moni e te oko.

21. E ture pakari oki tei orongaia mai ki te au tangata o te akonoanga kia kore oki tetai tangata i roto i te akonoanga e tu mai ki runga e takinga kino mai i te aronga kare i roto i te Akonoanga, kia kore katoa oki e kino e tupu kia ratou.

22. Ina ra, e tupu akera ki rotopu ia ratou te ngakau parau, e kua akamata katoa i te akakino atu, e ka ta oki ratou ma tetai ki tetai to ratou puku rima.

23. I te rua o te mataiti i te tutaraanga o Alama i tupu ei teia, e e tumu teia no tetai takinga kino maata ki te akonoanga, e e timataanga maata ki te akonoanga.

24. Kua ketaketa atu rai te ngakau o te tangata e kua tipu keia to ratou ingoa ki vao, e kare rava oki ratou e akamaara akaouia atu e te iti tangata o te Atua. E manganui katoa oki tei akaatea ia ratou uaorai mei roto mai ia ratou.

25. E kua riro oki teia ei timataanga maata ki te aronga tei irinaki tamou tikai ma te akarongo, no te mea oki e, kua mou piri ratou ma te ngaueue kore i te akono anga i te au akaueanga a te Atua, ma te akakoromaki i te au tu takinga kino te ka tupu kia ratou.

26. E i te akaruke anga te au taunga i ta ratou angaanga kia akakite atu i te tuatua a te Atua ki te au tangata, kua akaruke katoa te au tangata i ta ratou au angaanga no te akarongo atu ki te tuatua a te Atua. E i muri ake i to te au taunga akakite anga atu kia ratou i te tuatua a te Atua, kua oki atu ratou ki ta ratou angaanga ma te maroiroi, e kare o te taunga manako, kua meitaki atu aia i te tangata i akarongo iaia ra, e kare katoa e meitaki atu to tei apii atu i to tei apiiia, e aiteite ua oki, e kua rave ratou katoatoa i te angaanga te tangata ki tona uaorai maroiroi.

27. E kua tua atu ratou i to ratou au apinga te tangata ki tana i rauka, ki tei ngere, e tei putaua, e tei maki, e tei takinga kinoia, e kare katoa ratou i aao i te kakau oko maata, ina ra, te ma ua ra ratou e te manea.

28. E kua akamou ratou i te au angaanga o te akonoanga, e kua akatupu katoa ratou i te au, ma te autu i te au tu takingakino ravarai.

29. E no te ngaueue kore o te akonoanga, kua apinga nui oki ratou, ratou i anoano, kua maata ta ratou kua tu ratou i te au mea ravarai ta te au manu, te anana puakatoro e te au tu mea katoatoa, e pera katoa te sitona, e te auro, e te ario e te au mea memeitaki ravarai. E manganui to ratou au tu kakau manea tikai, e te au tu kakau memeitaki ravarai.

30. Kua pera katoa ki roto i to ratou puapingaanga, kare ratou i tuaru atu i tei ngere, e tei pongi, e pera katoa tei kaki vai, e tei maki, e tei kore i angaiia ana, e tei kore i tuku i tona ngakau ki te au mea e apinga nui ei, kua aroa atu i te katoatoa, ki te tamariki e te aronga pakari, te tuikaa e te tuikaa kore, te tane e te vaine, tei vao e tei roto i te akonoanga, ma te kore e akara atu i te tu o te tangata, tei ngere.

31. E kua tupu ratou ma te puapinga maata e kua riro ei aronga apinga nui atu, i te aronga tei kore i roto i te Akonoanga.

32. Ko tei kore oki i roto i ta ratou akonoanga, kua ō ratou ki roto i te au tu morimori, e te akamori idolo, te kōpe, e te au tuatua puapinga kore, e te akaparau, ma te aao i te au kakau oko maata, e te tu ngakau parau e te akateitei i to ratou mata, e te pikikaa, keia, te akaturi, ta tangata, e te au tu kino ravarai, ina ra, kua taangaangaia te ture ki runga i te aronga tei aati i te reira ki te ngai e rauka ia ratou.

33. E no te ture i tukunaia mai ki runga ia ratou kia tutaki te tangata no tana i rave, kua meitaki mai ratou ma te kore rava e kino akaou mei tei kiteaia ana, kua tupu tikai te au ki te iti tangata Niphai e tae rava mai ki te rima o te mataiti i te tutaraanga o te au akava.