1. E taku tamaiti, e akarongo mai ana ki taku nei tuatua, te akakite atu nei au kia koe e, me ka akono koe i te tuatua a te Atua, ka manuia koe i runga i te enua.

2. Te inangaro nei au kia rave koe mei taku rai i rave ana, i te akamaara anga i te tuikaaanga o to tatou ai tupuna, i noo ana oki ratou ki roto i te tuikaaanga e kare e tangata i akaora ia ratou mari ua ra ko te Atua o Aberahama, e te Atua o Isaaka, e te Atua o Iakoba e nana tikai oki i akaora ia ratou i roto i to ratou au tumatetenga.

3. E teianei, e taku tamaiti e Hilamana, te vai mapu ua ra koe, e no reira, te ako atu nei au ia koe e kia akarongo meitaki mai koe i taku tuatua, e apii katoa koe i taku nei tuatua, kua kite oki au e, ko tei irinaki ki te Atua ra ka tauturu mai aia ia ratou i to ratou au tumatetenga, e to ratou au manamanata, e to ratou au mate, e ka akateiteiia ratou i te rā openga.

4. Eiaa koe e manako e kua kite au i te reira iaku uaorai, kare i te kopapa nei, na roto ra i te vaerua, kare e na roto i te manako tangata nei na roto ra i te Atua.

5. E i na, te karanga atu nei au kia koe e, naringa kare au i anauia ki te Atua, kare au e kite i teia au mea nei, ina ra, na te Atua rai, na roto i te vaa o tana au angela tapu, i akakite mai i teia au mea nei kiaku, e kare e no tetai mea meitaki noku ra.

6. I aere katoa ana au e te au tamaroa a Mosaia ra, i te kimi anga kia takino atu i te akonoanga a te Atua, ina ra, kua tono mai te Atua i tana angela tapu kia tāpū ia matou i te pae mataara.

7. E i na, kua tuatua mai aia kia matou mei te reo o te mangungu, e kua ruketekete te enua i raro i to matou vaevae, e kua topa pouroa matou ki runga i te one, kua tae mai oki te mataku o te Atua kia matou.

8. Ina ra, kua na ko maira te reo kiaku nei e, ka tu, e kua tu maira au ki runga, e kite atura au i te angela.

9. E kua na ko maira aia kiaku e me te inangaro ra koe i te mate, eiaa koe e titau akaou atu i te tamate atu i te ekalesia a te Atua.

10. Topa atura au ki runga i te one, e ko te roa oki, e toru po, e toru oki ao e kare e rauka iaku i te amama i toku vaa, e kare oki e rauka iaku te maroiroi ki toku au paupauanga.

11. E manganui oki te au mea ta te angela i tuatua mai kiaku ra, e kua akarongoia e toku au taeake, ina ra, kare au i rongo atu ia ratou, e i toku rongo anga i te tuatua e, me te inangaro ra koe i te mate, auraka e tamate atu i te ekalesia a te Atua, kua ki tikai oki au i te mataku maata e te umere, mei te mea ra e ka mate au, kua topa atura au ki runga i te one, e kare atura au i rongo akaou atu i tana tuatua.

12. Kua akamamaeia ra au ki te mamae mutu kore, e taitaia akera toku ngakau no taku ra au ara.

13. I na, kua maara iaku taku au ara e taku au tuatua tika kore, e kua mamae toku ngakau i te mamae maata o ade ra, e kua kite au e, kua patoi au i toku Atua, e kare oki au i akono i tana au akaueanga tapu ra.

14. E kua ta oki au i tana au tamariki e manganui, me kore, kua arataki atu au ia ratou ki te mate, e kua maata oki taku ara i rave ana e no te manako e ka aere atu au ki mua i te aroaro o taku Atua, kua mamae takiri toku ngakau, i te vinivini aite kore.

15. E kua manako au i roto iaku e, naringa ka tika kia tuaruia au e kia akakoreia i te vaerua e i te kopapa katoa, e kia kore au e tu ki mua i te aroaro o toku Atua e kia akavaia no taku au angaanga i rave.

16. E teianei, e toru rā e toru po i toku mamaeanga, e kua aite tikai ki tetai vaerua akaapaia ra.

17. E kua akaperaia oki au i te mamae, e kua tumatetenga katoa au i te akamanako anga i taku au ara e manganui, i na, kua akamanako au e, i rongo ana au i toku metua tane i te totou anga atu ki te tangata no te tae anga mai o te tai, ko Iesu Mesia, te tamaiti a te Atua ei tarangaara no to te ao nei.

18. E i toku opu anga i teia manako nei, kua kapiki atura au i roto i toku ngakau e, e Iesu e, te tamaiti a te Atua ra, e aroa mai koe iaku nei, tei roto au i te au mamae kavangu ra, e kua koropiniia au e te tapeka mutu kore o te mate ra.

19. E teianei, i toku akamanakoanga i teia, kare au i akamaara akaou i toku au mamae e kare oki au i akamaara akaou i taku ra au ara.

20. Aue oki te rekareka e te marama umere taku i kite, i na, kua ki tikai toku ngakau i te rekareka, kua tae atura ïa ki te aite o toku ra mamae maata.

21. E te karanga atu nei au kia koe e taku tamaiti, kare e mea mamae atu e te kavangu atu mei toku au mamae. E te karanga akaou atu nei au kia koe e taku tamaiti, e i tetai tua mai, kare atu e mea e aite ki te vene e te reka mei toku rekareka.

22. E kua manako au e, te kite ra au, mei to tatou metua ra ko Lihai i kite i te Atua i te noo anga ki runga i tona ra terono, e kua koropiniia aia e te urupu angela e kare e rauka kia tarē, te imene ra ma te akapaapaa i to ratou Atua, e kua inangaro akera au kia noo ki reira.

23. I na, kua rauka akaou te maroiroi i toku au mero, e kua tu au ki runga i oku nga vaevae, ma te akakite atu ki te au tangata e, kua anauia au ki te Atua ra.

24. E mei reira e tae rava mai ki teianei, kua rave au i te angaanga ma te akangaroi kore, kia arataki mai oki au i te tangata kia tataraara, e kia tongi oki ratou i te rekareka maata taku i tongi ra, e kia anau katoaia oki ratou ki te Atua, e kia ki oki i te Vaerua Tapu.

25. E i na, e taku tamaiti, te oronga mai nei te Atua i te rekareka maata kiaku nei no te ua o taku nei angaanga.

26. E no te tuatua oki tana i tuku mai kiaku nei, i na, e manganui i reira tei anau mai ki te Atua, e kua tongi mei taku rai i tongi, e kua kite te mata e te mata mei taku i kite ra, e no reira, kua kite ratou i teia au mea nei taku i tuatua atu e mei taku oki i kite ra, e ko taku e kite nei, no ko mai ïa i te Atua ra.

27. E kua tauturuia oki au i roto i te au tu tumatetenga e te taitaia, e te au tu mate, e na te Atua i akaora iaku i te tapekaanga, e te tuikaaanga, e mei te mate, e te irinaki nei au iaia, e ka akaora rai aia iaku.

28. E te kite nei au e, ka akatu mai aia iaku ki runga i te rā openga, kia noo ma ïa katoa ki tona ra kaka, e ka akameitaki au iaia e tuatau ua atu, e nana oki i arataki mai i to tatou ai tupuna mei Aiphiti maira, e nana oki i tamate i te ngati Aiphiti i roto i te Tai Muramura, e kua arataki mai aia ia ratou na roto i tona mana ki te enua taputou, e kua akaora aia ia ratou mei te tuikaaanga i tera tuatau, i tera tuatau.

29. Nana oki i apai mai i to tatou ai tupuna mei te enua mai ko Ierusalema, e na roto katoa i tona mana mutu kore i akaoraʼi aia ia ratou mei te tuikaaanga ra i tera tuatau, i tera tuatau, e tae rava mai ki teia ra nei, e kua tamou meitaki au ma te akamaara i to ratou tuikaaanga, e kua tau oki ia koe kia tamou ma te akamaara i to ratou tuikaaanga, mei taku oki i akamaara ra.

30. E i na, e taku tamaiti, kare e ko teia ua, e mea tau oki kia kite koe mei taku i kite ra e, me akono meitaki koe i te au akaueanga a te Atua ka manuia koe i runga i te enua, e kia kite katoa koe e, e mei te mea e kare koe e akono meitaki i te au akaueanga a te Atua, ka tipu keia koe mei mua i tona aroaro. Kua tau oki teia ki tana ra tuatua.