1. E i na, i roto i te ngauru ma tai o te mataiti i te tutaraanga o te au akava ki rungao i te iti tangata Niphai, e i te rima o te ra, i te rua o te marama, kua tupu te au ki roto i te enua ko Zarahemela, e tae rava atu ki te rima o te rā i roto i te rua o te marama i te ngauru ma tai o te mataiti, i reira kua rongoia tetai rongo tamaki.

2. E i na, te aere maira oki te vaeau o te ngati Lamana na te tua mai o te metepara ki te au kena o te enua, e ki roto katoa i te oire ko Amoniha, ma te akamata i te ta i te tangata e te takore i te oire.

3. E kare e rauka i te ngati Niphai i te akaputuputu i to ratou vaeau ei tuaru atu ia ratou mei roto i te enua, kua tamate ratou i te au tangata i roto i te oire ko Amoniha, e pera katoa ki tetai pae i te pae kena o Noa, e kua rave tuikaa i tetai pae ki roto i te metepara.

4. E i na, kua inangaro tikai te ngati Niphai i te akaora i te aronga tei apaina tuikaaia atu ki roto i te metepara.

5. E no reira, ko tei ikiia ei rangatira maata no te pupu vaeau o te ngati Niphai, (e ko te ingoa ko Zoroma, e e rua ana tamaroa ko Lihai e Aha) i na, ko Zoroma e ana puke tamaroa, i to ratou kiteanga e, e taunga teitei a Alama no te akonoanga, e kua rongo e, tei iaia te vaerua o te totou, no reira kua aere atu ratou kiaia i te pati atu, kia kite e me ka akatika te Atu ia ratou kia aere atu ki te metepara kia kimi i to ratou au taeake tei apaina tuikaaia e te ngati Lamana.

6. E no reira, kua ui atu a Alama ki te Atu no teia akakoroanga nei. Kua oki maira a Alama e kua na ko atu kia ratou e, i na, ka tikoti te ngati Lamana i te kauvai ko Sidona ki te tuanga apatokerau i mamao atu i te kena o te enua ko Manitai. E ka aravei oki kotou ia ratou ki te itinga o te kauvai ko Sidona e i reira oki te Atua ka oronga atu ei i to kotou au taeake tei apaina tuikaaia e te ngati Lamana.

7. Kua tikoti atura a Zoroma e ana puke tamaroa i te kauvai i Sidona, e to ratou au vaeau, ma te aere atu ki te kena o Manitai ki te tuanga apatokerau o te metepara, i te tuanga itinga o te kauvai i Sidona.

8. Kua tae atura ratou ki te au vaeau o te ngati Lamana, e kua tuaruia oki te vaeau o te ngati Lamana, e kua tuaruia oki ratou ki roto i te metepara. E kua apai katoa oki ratou i to ratou au taeake tei riro tuikaa atu ki te ngati Lamana, e kare rava oki tetai o ratou i ngaro tei apaina tuikaaia ana. E kua apainaia mai ratou e to ratou au taeake kia noo ki to ratou uaorai enua.

9. E ope akera te ngauru ma tai o te mataiti o te au akava, kua tuaruia oki te ngati Lamana ki vao i te enua, e kua tairi potiia te au tangata o Amoniha, te au tangata katoatoa o te enua ko Amoniha kua tamateia, e pera katoa to ratou oire, kua takoreia koia ta ratou i tuatua e, kare e rauka i te Atua i te tairi poti no te maatamaata roa.

10. Ina ra, i roto i te rā okotai, kua vai tanea ua te enua, e kua kaingaia te au kopapa mate e te puakaoa, te au manu taae o te metepara.

11. E i te au rā i muri mai, kua akaputuia to ratou au kopapa mate ki runga i te enua e kua tapoki papaku uaia ratou. I na, no te maata o te aunga kino, kare te tangata i aere atu kia noo ki te enua ko Amoniha no tetai tuatau roa. E kua kapikiia e, ko te Akataneaanga o Nihora, no te mea e uanga ratou no Nihora tei taiaia, e kua vai tanea ua to ratou enua.

12. Kare te ngati Lamana i kai tamaki akaou mai ki te ngati Niphai e tae rava atu ki te tai ngauru ma a o te mataiti i te tutaraanga o te au akava ki rungao i te au tangata o Niphai. E e toru oki mataiti i te noo au ua anga te au tangata o Niphai ki runga i te enua.

13. Kua aere atura a Alama raua ko Amuleka i te ako atu i te tataraara ki te au tangata i roto i to ratou au iero e to ratou au are tapu e i roto i to ratou au sunago, tei akatuia mei ta te ngati Iuda.

14. E ko tei inangaro i te akarongo ki ta raua tuatua, e kua ruru atu raua i te tuatua a te Atua kia ratou, ma te kore akono i te tu o te tangata.

15. E kua akapera atu rai a Alama e Amuleka, e kua pera katoa te aronga tei ikiia ei rave i te angaanga, kia akakite atu i te tuatua ki roto i taua enua ra. E kua totoa tikai e kua akatinamouia te akonoanga ki roto i te au enua katoa e te au tuanga e pini ua ake i rotopu i te au tangata o te ngati Niphai.

16. E kare oki tetai i rotopu ia ratou i teitei ake i tetai. Kua riringi mai oki te Atua i tona vaerua ki runga i te tua o te enua katoatoa, ei teateamamao i te manako o te tamariki a te tangata nei, me kore ra, kia akapapa i to ratou ngakau kia ariki i te tuatua a te Atua te ka apiiia atu kia ratou me tae ki tona aereanga mai.

17. Kia kore oki ratou e marokiakia ki te tuatua, e kia kore oki ratou e irinaki kore e aere katoa atu ki te mate, mari ra, kia ariki ratou i te tuatua ma te rekareka, mei tetai atava tei pauia mai ki runga i te vine mou, e kia ō oki ratou ki te akangaroianga o te Atu, to ratou Atua.

18. I na, ko teia au taunga tei aere atu ki te au tangata, kua ako atu ratou e, auraka e pikikaa, auraka e vavare, auraka e vareae, auraka e karo auraka e maro, auraka e taitoito, auraka e keia auraka e rave ua, auraka e morimori, auraka e ta tangata e auraka e akaturi e auraka e rave i te au mea tau kore e te viivii, kare ïa i te mea tau.

19. E te akakite atura i te au mea tei vaitata i te tupu, ma te akakite atu i te tae anga mai o te Tamaiti a te Atua, tona mamae, e tona mate e te tuakaouanga o tei mate ra.

20. E manganui oki te au tangata tei ui mai i te ngai e aere mai ei te tamaiti a te Atua, e kua apiiia atu kia ratou e, ka tae mai aia kia ratou i muri ake i tona tuakaouanga; kia rongo te tangata i teia, kua ki tikai i te rekareka e te mataora.

21. Kia oti te akatinamou anga i te akonoanga ki roto i te enua katoatoa, e kua autu oki ki rungao i te tiaporo, e kua tutu aereia te tuatua a te Atua ma te tiama ki roto i te au enua, e kua riringi katoa mai te Atua i tona au akameitakianga ki runga i te tangata e ope ua akera te tai ngauru ma ā o te mataiti i te tutaraanga o te au akava ki rungao i te tangata o Niphai.