1. E tae akera ki te akamataanga o te toru ngauru ma ono o te mataiti i te tutaraanga o te au akava ki rungao i te tangata o Niphai, i rave ei a Sibiloni i taua au mea tapu ra tei orongaia mai kia Hilamana e Alama.

2. E tangata tika oki aia, e kua aere oki aia ma te tiratiratu ki mua i te Atua, e kua rave oki aia i te mea meitaki i te au taime ravarai kia akono oki i te au akaueanga a tona Atua, e pera katoa ki tona taeake.

3. E kua mate iora a Moronai. E ope akera te toru ngauru ma ono o te mataiti i te tutaraanga o te au akava.

4. E i roto i te toru ngauru ma itu o te mataiti i te tutaraanga o te au akava, te vai ra tetai urupu tangata maata mei te rima tausani e ā anere tane ma ta ratou au vaine e te tamariki tei akaruke i te enua ko Zarahemela no te aere atu ki te enua ki apatokerau.

5. E tangata kimi matatio oki a Akata, e no reira, kua aere atu aia ki te maani i tetai pai maatamaata nona i runga i te ope o te enua ko Bounetifula, i te pae i te enua ko Desolationa, e kua tuku atura ki roto i te tai i te pae opunga o te ra i te pae i te enua kokota e tae atu ei ki te enua i te pae i apatokerau.

6. E i na, e manganui oki to te ngati Niphai tei tomo mai ki roto e kua tere atu ma ta ratou kai, e maata katoa te au vaine e te tamariki, e kua aere atu ratou ki apatokerau. E ope akera te toru ngauru ma itu i te mataiti.

7. E i roto i te mataiti toru ngauru ma varu kua maani akaou teia tangata i tetai au pai ke. E kua oki mai oki te pai mua, e maata katoa te au tangata tei tomo atu ki roto, e kua apai katoa ratou i te kai e kua aere akaou atu ki te enua i apatokerau ra.

8. E kare atura ratou i kitea akaouia. E kua manako matou e, kua maremoia ratou ki roto i te tai, e kua aere katoa atu tetai pai na reira kare ra matou i kite e me kua aere kiea.

9. E i roto i taua mataiti ra, e manganui tikai te tangata tei aere atu ki te enua ki apatokerau. E ope akera te toru ngauru ma varu o te mataiti.

10. I roto i te toru ngaru ma iva o te mataiti i te tutaraanga o te au akava, kua mate a Sibiloni, e kua aere atu a Korianetana ki te enua i apatokerau na runga i tetai pai kia apai atu i tetai kai ki te au tangata tei aere atu ki taua enua ra.

11. E no reira, kua riro ei mea tau ia Sibiloni kia oronga atu i taua au mea tapu ra i mua ake i tona mateanga ki te tamaiti a Hilamana, ko tei kapikiia e ko Hilamana, i kapikiia oki aia ki te ingoa o tona metua tane.

12. E teianei, i na, ko te au kotikotianga i roto i te rima o Hilamana, kua tataia, e kua tukunaia atu ki te tamariki a te tangata nei i roto i te au enua katoatoa mari ra, ko te au tuanga tei akaueia atu e Alama e auraka e aere atu.

13. Kia akonoia ra teia au mea nei ei mea tapu, e kia orongaia atu mei tetai uki ki tetai uki, e no reira i teia mataiti nei kua orongaia atu te reira kia Hilamana i mua ake i te mateanga o Sibiloni.

14. E i roto i taua mataiti rai kua akaruke atu tetai au tangata, e kua aere ki te ngati Lamana e kua akatupu atu i te riri ki te ngati Niphaia.

15. E i roto i taua mataiti ra, i aere mai ei ratou ma te nuku maata kia tamaki atu i te au tangata o Moroniha, me kore ra, te nuku o Moroniha, e kua taiaia ratou ma te tuaru katoaia atu ki to ratou uaorai enua, ma te mate maata.

16. E ope akera te toru ngauru ma iva o te mataiti i te tutaraanga te au akava ki rungao i te tangata o Niphai.

17. E ope akera te tuatua a Alama e tana tamaiti ko Hilamana, e pera katoa a Sibiloni, tana tamaiti.