1. E tae akera ki te akamataanga o te toru ngauru o te mataiti i te tutaraanga o te au akava, e i te rua o te rā i te marama mua, kua tae mai te episetole a Hilamana kia Moronai i te akakite anga mai i te tu o te au tangata i taua tuanga o te enua ra.

2. E ko teia oki te tuatua tana i tata i te na ko anga e, e taku taeake akaperepere e Moronai, toku taeake i te Atu e i te au ngai tumatetenga o te tamaki anga katoa, i na, e taku taeake akaperepere, e manga tuatua taku ka akakite atu kia koe no runga i te tamakianga i roto i teia tuanga o te enua.

3. I na, e rua oki tausani tamaroa a taua au tangata ra ta Amona i arataki mai ki raro mei te enua mai ko Niphai, e teianei kia kite koe e, e uanga ratou no Lamana koia te tamaiti mataiapo a to ratou metua ko Lihai.

4. Kare e tau kia akakite atu au kia koe i ta ratou au peu taito, me kore to ratou irinaki kore, e kua kite oki koe i teia au mea katoatoa.

5. E no reira, te rauka nei iaku i te akakite atu e, e rua tausani o teia au mapu tane nei tei rave i ta ratou au apinga tamaki, e kua inangaro oki ratou iaku ei arataki no ratou, e kua aere mai nei matou i te paruru i to matou enua.

6. E kua kite oki koe i te tuatua tei papauia e to ratou ra au metua e, auraka ratou e rave akaou i te apinga tamaki ka tamaki atu ei i to ratou au taeake, ma te akamaringi i te toto.

7. Ina ra, i roto i te rua ngauru ma ono o te mataiti i kite ei ratou i to matou tumatetenga ia ratou, e kua vaitata tikai ratou i te aati i te koreromotu ta ratou i papau ma te rave i ta ratou apinga tamaki kia tauturu ia matou.

8. Ina ra, kare au e akatika kia aati ratou i te koreromotu ta ratou i papau ra, penei ake ka akamaroiroi mai te Atua ia tatou kia kore oki tatou e rokoia akaou e te tumatetenga no te taputou ta ratou i rave ra.

9. Ina ra, te vai nei tetai mea kia rekareka maata tatou. E i na, i roto i te rua ngauru ma ono o te mataiti, kua arataki atu au ko Hilamana i teia rua tauasani mapu tane ki te oire ko Iudea, kia tauturu ia Anitipa, taau i iki ei arataki ki rungao i te tangata i taua tuanga enua ra.

10. E kua kapiti katoa atu au ki taku au tamariki tamaroa e rua tauasani (e kua tau oki ratou kia kapikiia e, e tamariki tamaroa naku) ki te nuku o Anitipa, e no te ririnui, kua rekareka maata akera a Anitipa, i na, kua akameangitiia mai to ratou nuku e te ngati Lamana no te mea, kua taiaia to ratou nuku e to ratou au tangata e manganui ra, e kua mii tikai matou no te reira.

11. Kareka ra e mea tau ia tatou kia pumaana no teia e kua mate oki ratou, no to ratou enua e no to ratou Atua, e kua mataora oki ratou.

12. E manganui oki ta te ngati Lamana mou auri i tapeka, e e au rangatira mamaata anake, e kare oki ratou i akaora i tetai ke. E te manako nei matou e, tei roto ratou i teianei i te enua ko Niphai, mei te mea e kare ratou i mate.

13. E ko te au oire teia tei rauka i te ngati Lamana na roto i te akamaringianga i te toto o to matou au taeake mataku kore e manganui ra.

14. Te enua ko Manitai me kore ko te oire ko Manitai e te oire ko Zezorama, e te oire ko Kumeni, e te oire ko Anitipara.

15. E ko teia te au oire ta ratou i rave ka tae atu ei au ki te oire ko Iudea, e kua kite au ia Anitipa e tona au tangata i te angaanga anga ma te ririnui tikai kia akaketaketa i te oire.

16. E kua maromaroa oki ratou i te kopapa e te vaerua katoa, no te mea kua tamaki pakari tikai ratou i te ao ma te angaanga pakari i te po kia paruru i to ratou au oire e kua pera oki ratou i te akakoromakianga i te au tu tumatetenga katoa ra.

17. E teianei, kua manako papu tikai ratou e ka noo tamou ratou ki taua ngai ra, e me kore ra ka mate, ka rauka ia koe kia manako e na taua nuku meangiti taku i arataki mai, koia oki taua au tamaroa aku ra, kua oronga atu ïa i te akamaroiroi kia ratou, e ma te akatupu katoa i te rekareka.

18. E kite akera te ngati Lamana e, kua rauka ia Anitipa te maroiroi maata ki tona nuku. Kua akaueia ratou e te tuatua a Amorona kia kore e aere mai ki te oire ko Iudea, me kore kia matou kia tamaki.

19. E kua aroaia mai matou e te Atu, e naringa oki ratou i tamaki mai kia matou i to matou tu apikepike ra, kua mou paa ia ratou to matou nuku meangiti, kua peraia matou i te akaoraangaia.

20. Kua akaueia oki ratou e Amorona kia mou piri i taua au oire ra tei rauka ia ratou. E ope akera te rua ngauru ma ono o te mataiti. E i te akamataanga o te rua ngauru ma itu o te mataiti kua akapapa matou i to matou oire e matou katoa no te tamaki.

21. E kua inangaro matou kia aere mai te ngati Lamana e tamaki mai ia matou no te mea, kare oki matou e inangaro i te tamaki atu ia ratou i roto i to ratou au punanga.

22. E kua tuku matou i tetai au tangata akara ei akarakara i te au aerenga o te ngati Lamana kia kore oki ratou e aere na to matou ngai i te po e te ao ma te tamaki atu ki tera pae oire o matou i te pae i apatokerau ra.

23. E kua kite oki matou e, i roto i taua au oire ra, kare e rava roa to ratou maroiroi i te tamaki atu ia ratou, e no reira matou i inangaro ei, kia na ko nei ratou ia matou i te aere kia tamaki atu matou na muri, e kia na reira i te tamaki kapitianga i to muri e to mua katoa. Kua manako matou e, ka rauka ia matou i te akavi atu ia ratou, ina ra, kua popoa matou i to matou inangaro.

24. Kua mataku oki ratou i te aere mai na to matou ngai ma to ratou ra nuku, kare oki e ko tetai pae ua, e ko te kore oki e rava to ratou maroiroi, e ka inga oki ratou.

25. Kua mataku katoa ratou i te tamaki atu ki te oire ko Zarahemela, e kare oki e rauka ia ratou kia na te kapuaanga i Sidona ra i te aere ki te oire ra ko Niphaiha.

26. E no to ratou au nuku ra i raukaʼi ia ratou i te tāpū pakari i taua au oire ra i rauka ia ratou.

27. I te rua o te marama i taua mataiti rai, e maata te kai tei apainaia mai kia matou mei ko mai i te au metua tane o taua au tamairki tamaroa e rua tausani naku ra.

28. E kua tono katoaia mai e rua tausani tane kia matou mei te enua mai ko Zarahemela. E kua papa oki matou e tai ngauru tausani tane, ma te kai katoa na ratou e pera katoa na ta ratou au vaine e te tamariki.

29. E kite akera te ngati Lamana i to matou nuku i te tupu anga ki te maata i te au rā katoatoa e ma te kai katoa i te tariia anga mai ei tauturu ia matou, kua mataku iora ratou ma te akamata akera i te aere rikiriki mai penei ake ka rauka ia ratou i te akakore i te rauka anga mai te kai e te maroiroi ia matou.

30. E kite akera matou e, kua akamata te ngati Lamana i te taitaia kua inangaro iora matou i te kimi i tetai ravenga akavare ia ratou, e no reira, kua akaue mai a Anitipa kia aere atu au e taku au tamariki tamaroa ki tetai oire i vaitata mai mei te mea ra e te apai ra matou i tetai kai ki tetai oire.

31. E ka aere oki matou kia vaitatao ki te oire ko Anitipara, mei te mea ra e te aere atu nei matou ki te oire i mua atu ki te kotinga i te pae tai ra.

32. E i na, kua aere tika atura matou, e mei te mea ra e, e kai ta matou e apai ra i te aereanga ki taua oire ra.

33. E kua aere atura oki a Anitipa e tetai pae o tona ra nuku, e kua vaioia te toenga ei paruru i te oire. Ina ra, kare aia i aere atu kia aere roa au e toku nuku meangiti e e vaitata atura ki te oire ko Anitipara.

34. Ei roto oki i te oire ko Anitipara i akamouiaʼi te nuku ririnui rava atu o te ngati Lamana, e ko te nuku maata rava atu ïa.

35. E akakiteia iora te reira kia ratou e to ratou au tangata akara ra, kua aere tika maira ratou e to ratou nuku kia matou ra.

36. E kua oro atura matou mei mua atu ia ratou ra ki apatokerau ra. E kua na reira oki matou i te arataki ke anga i te nuku maata o te ngati Lamana ra.

37. E tae atura ratou ki tetai ngai mamao rai, kua kite akera ratou i te nuku o Anitipa e te arumaki maira ia ratou ma to ratou ririnui, kare rava ratou i uri atu ki te katau e te kaui, ina ra, kua aere tika mai na muri ia matou, e kua manako matou e, ko to ratou inangaro kia ta ia matou i mua ake ka rokoia mai ei ratou e Anitipa, e kia kore ratou e koropiniia e to matou ra au tangata.

38. E kite akera a Anitipa i to matou tumatetenga, kua akaviviki atura aia i te aere i tona ra nuku. Ina ra, e po oki e kare matou i rokoia e ratou e kare katoa ratou i rokoia e Anitipa, e no reira, kua pātū iora matou i to matou puakapa no taua po ra.

39. E i mua ake i te mamaiata i taua popongi ra, i na, te arumaki maira te ngati Lamana ia matou. E kare oki matou i ririnui tikai i te tamaki atu kia ratou, e kare katoa au e inangaro kia opu ratou i taku au tamaroa rikiriki, e no reira, kua aere atu rai matou, e kua aere atu matou ki roto i te metepara.

40. E kua mataku oki ratou i te uri anga ki te tua katau, e ki te tua kaui ko te koropiniia ratou, kare katoa oki au i ariu atu ki te tua katau e te tua kaui ko te rokoia aea au e ratou, e kare e rauka ia matou i te tamaki atu ia ratou ko te taiaia aea mai matou e kua kimi oki ratou i ta ratou ravenga kia oro, e kua oro matou i taua rā ra ki roto i te metepara, e poiri iora.

41. E ao akera i te popongi roa kua kite akera matou e tei rungao te ngati Lamana ia matou e kua oro atura matou mei mua atu ia ratou.

42. Kare atura ratou i arumaki mai ia matou ki te ngai mamao e kua akangaroi iora ratou. Ko te popongi oki ïa o te rā toru i te itu o te marama ra.

43. E teianei kare oki matou i kite e me kua rokoia ratou e Anitipa kua tuatua atu ra au ki toku ra au tangata, i na, kare tatou i kite e penei ake kua akangaroi ratou kia aere atu tatou kia tamaki atu ia ratou e kia mou tatou i ta ratou puereere.

44. E no reira, eaa ta kotou tuatua e taku au tamariki tamaroa, ka aere ainei kotou ka tamaki atu kia ratou?

45. E te karanga atu nei au kia koe, e taku taeake akaperepere e Moronai e, kare rava au i kite ana i tetai tu ngakau toa mei teia i roto i te ngati Niphai nei.

46. E kua kapiki oki au ia ratou e, ko taku au tamariki tamaroa (e au mapu ou ua oki ratou) e kua karanga mai oki kiaku e: E te metua, i na, tei ia tatou oki to tatou Atua, e kare oki aia e akatika ia tatou kia inga, e no reira ka aere tatou. Kare tatou e ta i to tatou au taeake naringa ka akaruke ua mai ratou ia tatou ma te au, e no reira, ka aere tatou ko te akavi aea ratou i te nuku o Anitipa.

47. E teianei, kare rava ratou i tamaki ana, ina ra, kare oki ratou i mataku i te mate e kua maata oki to ratou manako ki te tu rangatira o to ratou au metua e ki to ratou oraanga, e kua apii katoaia ratou e to ratou au metua vaine e, me kore ratou e ekoko, ka akaora te Atua ia ratou.

48. E kua akakitekite mai ratou kiaku i te tuatua a to ratou metua vaine i te na ko anga e, kare rava matou i ekoko e kua kite oki to matou au metua vaine i te reira.

49. E kua oki atu au ma toku au tangata e rua tausani ki taua au tangata Lamana ra tei arumaki mai ia matou. E i na, kua rokoia ratou e te nuku o Anitipa, e kua akamata tetai tamakianga rikarika tikai.

50. E kua roiroi tikai te nuku o Anitipa i te mamao o to ratou aereanga i taua taime poto ra, e kua vaitata roa i te opukiaia e te rima o te ngati Lamana e naringa kare au i oki ma taku au tamaroa e rua tausani ra, kua tupu to ratou akakoroanga.

51. E kua mate oki a Anitipa i te koke, e pera katoa tona au arataki e manganui no to ratou roiroi maata no te viviki i to ratou aereanga, e no te mate o to ratou au rangatira maata, kua akamata ratou i te paruparu ki mua i te ngati Lamana.

52. Kua akamaroiroi iora te ngati Lamana e kua akamata i te arumaki ia ratou. Te arumaki atura oki te ngati Lamana ia ratou ma te ririnui maata e kia tae a Hilamana katoa ki runga ia ratou ma tona rua tausani tangata, ma te tamate viviki atu ia ratou, e kua akangaroi iora te nuku o te ngati Lamana e kua ariu maira kia Hilamana.

53. E kite akera te au tangata o Anitipa e kua ariu te ngati Lamana, kua akaputuputu iora ratou i to ratou au tangata, e kua aere atura na muriao i te ngati Lamana ra.

54. E ko matou, ko te au tangata o Niphai, e te au tangata o Anitipa, e ko au e toku rua tauasani tangata, kua koropini atu matou i te ngati Lamana e kua tamate atu ia ratou, e kua maroia ratou kia oronga mai i ta ratou au apinga tamaki e pera katoa ia ratou uaorai ei tuikaa.

55. E tuku iora ratou ia ratou uaorai kia matou, i na, kua tarē au i taua au mapu tane ra tei tamaki ana i te pae iaku, e kua mataku oki au, penei ake e maata ratou tei taiaia.

56. Ina ra, kua ki tikai au i te rekareka maata, no te mea kare rava okotai o ratou i mate, e kua tamaki oki ratou mei te mea e tei roto ia ratou te maroiroi o te Atua e kare rava i kiteaia ana te au tangata ririnui maata i te tamaki mei ia ratou rai, e no taua mana ririnui ra i tamaki atu ei ratou ki te ngati Lamana ra, e kua mataku oki ratou e no reira oki te ngati Lamana i tuku mai ei ia ratou ei tuikaa no te tamaki ra.

57. E no te mea e kare o matou ngai no te tapeka atu i ta matou au tuikaa e kia raukaʼi oki ia matou i te tiaki ia ratou mei te au nuku o te ngati Lamana, e no reira kua tuku atu matou ia ratou ki te enua ko Zarahemela, e na tetai pae tangata o Anitipa tei kore i taiaia i aru ia ratou, e ko te toenga, kua rave au ia ratou e kua tauru ia ratou ki roto i toku nuku mapu no te ngati Amona e kua oki atu matou ki te oire ko Iudea.