1. Kua noo iora ratou, e kua oki atura ratou ki muri i tetai manga. Kua tuatua atura a Moronai kia Zerahemena, i na, e Zerahemena, kare matou e inangaro kia riro matou ei au tangata akamaringi toto. Te kite nei kotou e, tei roto kotou anake i to matou rima, kare ra matou e inangaro i te ta ia kotou.

2. I na, kare matou i aere mai kia ta atu ia kotou, e kia akamaringi i to kotou toto kia rauka te mana, e kare oki matou e inangaro kia apai i tetai o kotou ki te tuikaaanga ra, ko te mea ra teia i aere mai ei kotou kia matou nei, koia oki no to matou akarongo i riri mai ei kotou ia matou nei.

3. E teianei ra, te kite nei kotou e, tei ia matou te Atu, e te kite nei oki kotou e, nana oki kotou i tuku ki roto i to matou rima. E te inangaro nei au kia kite mai kotou e, kua peraia matou no to matou akonoanga e to matou akarongo oki ki te Mesia ra. E te kite nei matou e, kare e rauka ia kotou kia akakore i to matou akarongo.

4. E te kite nei kotou e, ko te akarongo mou teia o te Atua, e te kite nei kotou e, na te Atua matou e tauturu e akono, e e tiaki, mei te mea e akono matou iaia, e ki to matou akarongo e ki ta matou akonoanga, e kare rava oki te Atua e akaruke ua ia matou kia taiaia, mari ua ra kia topa matou ki roto i te ara, e ma te akataruri ke i to matou akarongo.

5. E teianei, e Zerahemena, te akaue atu nei au ia koe na roto i te ingoa o taua Atua mana katoatoa ra, tei akaketaketa mai i to matou au rima i raukaʼi ia matou te mana ki rungao ia kotou na roto i to matou akarongo, e ta matou evangelia e te tu o ta matou akamorianga, e ta matou akonoanga e te aroa tapu tei tau ia matou kia akakite atu ki ta matou au vaine, e ta matou au tamariki, e na taua au ra i tapekaia matou ki to matou au enua, e i te akatikaanga i te tuatua tapu a te Atua ra, e no reira mai oki to matou rekareka, e ki te au mea katoa tei inangaro ravaia e matou.

6. E kare e ko te reira ua, te akaue atu nei oki au ia koe, ma to kotou katoa ra inangaro kia rauka ia kotou te ora, kia vaio mai kotou i ta kotou au apinga tamaki kia matou nei, e kare rava matou e titau atu i to kotou toto, mari ra ka akaora matou ia kotou, me ka aere kotou ki to kotou aereanga ma te kore rava e oki mai e tamaki mai ia matou.

7. E teianei, me kore kotou e akapera, i na, tei roto kotou i to matou rima, e ka akaue au i toku ra au tangata kia ta ia kotou, e kia akaputu i to kotou au kopapa putaputa e te mate, e pou roa ake kotou, ei reira tatou e kite ei e, noai te mana i rungao i teia nei aronga, e kite katoa ei tatou e koai te ka riro ei tuikaa.

8. E rongo akera a Zerahemena i taua tuatua ra, kua aere maira aia e kua oronga mai ra i tana koke e te simetera, e tana ana ki roto i te rima o Moronai ra, e kua tuatua maira kiaia, i na, tera mai ta matou au apinga tamaki, te oronga atu nei matou i te reira kia kotou, ina ra, kare matou e rave i tetai taputou kia kotou, kua kite oki matou e ka aati matou i te reira e pera katoa ki ta matou au tamariki, e rave ra kotou i ta matou au apinga tamaki ma te tuku atu ia matou kia aere atu ki roto i te metepara, e me kore ra, ka tāpū matou i ta matou au apinga tamaki no atu e ka mate matou, me ka autu.

9. I na, kare matou i to kotou akarongo, e kare matou e irinaki e na te Atua i tuku ia matou ki roto i to kotou rima, ina ra, kua irinaki matou e, na to kotou kikite i akaora ia kotou mei ta matou au koke. I na, no to kotou au tapoki umauma e te paruru i oraʼi kotou.

10. E i to Zerahemena akaoti anga i taua tuatua ra, kua akaoki atura a Moronai i te koke e te au apinga tamaki tei orongaia mai kiaia e Zerahemena, kua na ko atura, i na, ka akaoti tatou i te tamaki.

11. E teianei, kare e rauka iaku i te akakore i te tuatua taku i tuatua ake nei, e no reira, te ora ra te Atu, kare kotou e oki, mari ra, kia na mua kotou i te taputou mai e, kare kotou e oki akaou mai e tamaki mai ia matou. E tei roto kotou i to matou nei rima, e ka akamaringi matou i to kotou toto ki runga i te one, me kore kotou e akatika mai i te tuatua taku i tuatua ake nei.

12. E oti akera taua tuatua ra i te tuatuaia e Moronai, kua tāpū a Zerahemena i tana koke, kua riri akera aia ia Moronai, kua oro maira aia ma te inangaro i te ta atu ia Moronai, ina ra, i tona taki anga i tana koke ki runga, i na, kua rutu mai tetai vaeau o Moronai i te reira e kua topa atu ki runga i te one e kua ati te pu o te koke e kua tairi katoa atu aia i te pakiri upoko o Zerahemena e kua topa atu ki te one, e kua oro atura a Zerahemena mei mua atu ia ratou ki rotopu i tona au vaeau.

13. E kua rave iora te vaeau tei tu ki te pae, e tei tipu i te pakiri upoko o Zerahemena i taua pakiri upoko ra ki te rauru mei runga i te one e kua tamou atura ki runga i te keo o tana koke, ma te akaari atu kia ratou ma te na ko anga atu ma te reo maata e,

14. Mei teia pakiri upoko i topa ki runga i te one, koia te pakiri upoko o to kotou rangatira, e mei te reira rai to kotou topaanga ki te one me kore kotou e oronga mai i ta kotou au apinga tamaki, ka aere ei ma te koreromotu o te au.

15. E akarongo akera te au tangata e manganui i taua tuatua nei, e kite akera oki ratou i te pakiri upoko ra i runga i te koke, kua mataku iora ratou, kua aere maira te au tangata e manganui, e kua vaio maira i ta ratou au apinga tamaki ki te pae vaevae o Moronai, e kua papau atura i te koreromotu o te au. E ko te manganuianga tei tomo ki roto i taua koreromotu o te au ra, kua aere atu ratou ki roto i te metepara.

16. Kua riri maata rava akera a Zerahemena, e kua akatupu akera aia i te toenga o te vaeau kia riri, e kia tamaki atu ma te ririnui tikai ki te ngati Niphai.

17. Kua riri akera a Moronai no te marokiakia i te ngati Lamana, e no reira, kua akaue akera aia i tona au tangata kia ta ia ratou, e kua akamata iora ratou i te tamaki, e kua tamaki atu te ngati Lamana ma ta ratou koke e to ratou maroiroi.

18. Ina ra, kare e paruru no to ratou pakiri taaka ua e pera katoa no to ratou au upoko tapoki koreia, kua ū anake te reira ki te koke kokoi a te ngati Niphai, kua putaputa ratou, e kua matemate viviki akera ratou i te koke a te ngati Niphai, e kua matemate ratou mei tei totouia e te vaeau o Moronai ra.

19. I te kite anga a Zerahemena e kua vaitata ratou pouroa i te matemate, kua kapiki maata maira aia kia Moronai na ko maira, te taputou atu nei au e toku au tangata kia koe me ka akaora mai koe i te toenga o matou, e kare rava matou e oki akaou mai e tamaki atu ia kotou.

20. E kua akaoti iora a Moronai i te tamaki i rotopu i te au tangata. Kua rave ke atura aia i te au apinga tamaki mei te ngati Lamana ra, e oti akera ia ratou i te maani i te ture o te au ma ïa ra, kua akatika atura aia ia ratou kia aere ki roto i te metepara.

21. E kare oki i tarēia to ratou aronga i mate no te maata oki, e kua maata tikai oki to ratou aronga i mate ra, to te ngati Niphai e pera katoa ki to te ngati Lamana.

22. Kua uri iora ratou i to ratou aronga i mate ra ki roto i te kauvai i Sidona ra, e panu atura ratou ki tai, e kua tanuia ratou ki raro i te takere o te moana.

23. E kua oki atura te ngati Niphai, me kore ra, te au tangata o Moronai ki to ratou au ngutuare, e ki to ratou enua.

24. E ope akera te tai ngauru ma varu o te mataiti i te tutaraanga o te au akava ki rungao i te tangata o Niphai. E ope akera te papaanga o Alama, tei tataia ki runga i te papa a Niphai.