1. E te au tangata tei kore i akarongo ki te tuatua a Hilamana e tona ra au taeake, kua akaputuputu mai ratou ki te ngai okotai kia patoi atu i to ratou au taeake.

2. E i na, maata akera to ratou riri, kua opu akera ratou ia ratou e ta.

3. E ko te rangatira oki o taua au tangata ra tei riri atu ki to ratou ra au taeake e tangata maatamaata aia e te ririnui, e ko tona ingoa ko Amalikaia.

4. E kua inangaro iora a Amalikaia kia riro aia ei ariki, kua inangaro katoa iora te au tangata tei riri ra kia akatikaia aia ei ariki no ratou, e ko te maataanga oki o taua au tangata ra, ko te au akava rikiriki ïa o te enua, e te kimi katoa ra ratou kia rauka ia ratou te mana.

5. I aratakiia oki ratou e te au tuatua taparu a Amalikaia ko tei na ko e, kia pange mai e kia akatika iaia ei ariki no ratou, e ka akariro oki aia ia ratou i reira ei aronga mana ki rungao i te au tangata.

6. E i na oki, kua arataki keia ratou e Amalikaia kia akatupu i te pekapeka ma te kore roa e ariu mai ki te ako a Hilamana e tona au taeake, tei tiaki meitaki atu i te akonoanga, i na, e au taunga teitei ratou i rungao i te akonoanga.

7. Tei roto i te akonoanga te au tangata e manganui tei irinaki ki te au tuatua taparu a Amalikaia e kua akaruke atura ratou i te akonoanga, e ko te reira oki te tu o te pekapeka tei tupu ki te maataanga i rotopu i te au tangata o Niphai ra, e no atu rai ki te re maata tei rauka ia ratou ki rungao i te ngati Lamana ra, e to ratou rekareka maata tei kiteaia e ratou, ko ratou tei akaoraia e te rima o te Atu ra.

8. E te kite nei tatou i te tu ngaropoina viviki o te tamariki a te tangata i te Atu to ratou Atua, e te viviki i te rave i te ara, e te tuku katoa ia ratou kia arataki keia e taua mea kino ra.

9. E te kite katoa nei tatou i te kino maata ta te tangata okotai ka akatupu ei kino maata no te tamariki a te tangata nei.

10. E kua kite oki tatou e, e tangata ravenga pakari e te tuatua taparu e manganui a Amalikaia, kua arataki ke oki aia i te ngakau o te au tangata e manganui kia rave i te au angaanga kino, e te kimi nei oki ratou kia akapou i te akonoanga a te Atua, e kia akakore i te tikaanga o te au ta te Atua i tuku mai kia ratou, ko te meitaki ïa i akonoia mai e te Atua ra ki rungao i te enua ei meitaki no te aronga tuatua tika.

11. I te rongo anga a Moronai, te rangatira maata o te au nuku o te ngati Niphai ra i te au mārōanga, kua riri iora aia ia Amalikaia.

12. Kua vetevete iora aia i tona pereue, e kua rave iora i tetai mea potonga e kua tata ki rungao e, ei akamaaraanga i to tatou Atua, e ta tatou akonoanga, e to tatou rangatiraanga, e to tatou au, e ta tatou au vaine, e ta tatou au tamariki, e kua tamou atura aia i te reira ki te ope o tetai rakau.

13. E kua rave atura aia i tona paruru upoko, e tona paruru umauma, e tana paruru, e tatua atura i tana au apinga tamaki ki tona ra taukupu, e rave iroa aia i te rakau i tamouia tona ra pereue, i te na ko anga e, (kua karanga akera aia i te reira e, ko te reva o te au), kua tupou iora aia ki runga i te one e kua pure atura ki te Atua kia vai mai tona akameitakianga o te au ki rungao i tona au taeake koi vai ei te pupu Keresitiano tei noo ki runga i te enua ra.

14. E kua peraia oki te aronga tei irinaki ki te Mesia ra, e tei piri ki te akonoanga a te Atu ra, i te kapikiangaia e te aronga tei kore i piri mai ki te akonoanga.

15. E ko te aronga tei piri ki te akonoanga, kua tinamou tikai to ratou akarongo, e kua rave iora ratou ki rungao ia ratou uaorai i te ingoa o te Mesia ma te rekareka maata, me kore ra, e Kerisetiano, mei tei kapikiiaʼi ratou no to ratou irinaki i te Mesia te ka tae mai.

16. E kua pure atura a Moronai i reira no te akakoroanga o te Kerisetiano, e kia rangatira ua te enua.

17. E oti akera aia i te pure atu ki te Atua, kua tarē maira aia i te au enua i te pae apatonga o te enua ra ko Desolationa, e ko te au enua i te pae apatokerau, e te pae apatonga katoa oki, ei enua meitaki, e ei enua no te au.

18. Kua karanga mai aia e, kare rava te Atua e tuku ia tatou, ko tei akakinoia no te mea e kua rave tatou ki rungao ia tatou uaorai i te ingoa o te Mesia, kia takatakaiia tatou ki raro, e kia akakoreia, mari ra, kia rave tatou i te reira ki rungao ia tatou uaorai no ta tatou au ara.

19. E akaoti akera a Moronai i taua tuatua ra, kua, aere tika atura aia ki rotopu i te au tangata ma te tarevareva atu i te ngai ngaangaae o tona pereue ki roto i te reva, kia kite mai oki te katoatoa i te tataanga tana i tata ki te ngai ngaangaae o tona pereue, e i te kapiki anga atu ma te reo maata i te na ko anga e.

20. I na, ko te aronga te ka akatika i teia nei reva ki runga i te enua, kia aere ua mai ratou ma te maroiroi o te Atu, e kia tomo ratou ki roto i tetai koreromotu, kia paruru ratou i to ratou tika, e ta ratou akonoanga, e kia akameitaki mai te Atu to ratou Atua ia ratou.

21. E oti akera taua tuatua nei i te akakiteia atu e Moronai, i na, kua oro maira te au tangata ma ta ratou au apinga tamaki i te tatua anga ki to ratou taukupu e ma te aeae i to ratou kakau ei akakiteanga, e ei taputouanga e, e kare ratou e akaruke i to ratou Atu ra ko te Atua, e me akaapa ratou i te au akaueanga a te Atua, e kia inga ki roto i te ara, e kia akama i te rave ki rungao ia ratou i te ingoa o Iesu, ei reira, kia aeaeia ratou e te Atu mei ta ratou i aae i to ratou kakau.

22. E ko te ture taputou ta ratou i papau, e kua uri ratou i to ratou au kakau ki te pae o Moronai, na ko maira, Te papau nei matou ki to matou Atua e, kia tamateia matou mei to matou taeake rai i apatokerau ra i pou, i na, kia inga matou ki roto i te ara, kia uri katoa oki aia ia matou ki te pae vaevae o to matou au enemi ra mei ta matou i uri i to matou au kakau ki te pae vaevae kia takatakaiia e te vaevae, me inga matou ki roto i te ara.

23. Kua tuatua atura a Moronai kia ratou, i na, e toenga tatou no te uanga a Iakoba, e e toenga oki tatou no te uanga a Iosepha e nona oki te pereue i aeaeia e tona ra au taeake, e teianei, kia akamaara tatou i te akono i te au akaueanga, a te Atua ra, e me kore ra, ka aeaeia to tatou kakau e to tatou au taeake e ka uriia oki tatou ki roto i te tapekaanga me kore ra, ka okoia tatou, e me kore ra ka taiaia.

24. Kia akatika oki tatou te uanga a Iosepha ra i to tatou tu rangatira, e kia akamaara tatou i ta Iakoba i tuatua mai i mua ake i tona mateanga. I na, te kite ra oki aia e ko tetai tuanga i te pereue o Iosepha te vai rai te reira e kare i kino. E kua na ko akera aia e, E mei te toenga iti o te kakau o taku tamaiti i akonoia, ka pera katoa te uanga o taku tamaiti, ka akonoia e te rima o te Atua, e ka raveia kiaia, e ka mate oki te toenga o te uanga a Iosepha mei te toenga o tona ra kakau.

25. I na, te mamae nei toku ngakau i te reira kareka ra kua rekareka toku ngakau i taku tamaiti no tetai pae o tana uanga te ka riro ki te Atua ra.

26. E i na, ko te reo teia o Iakoba.

27. E koai oki tei kite e, ko te toenga o te uanga a Iosepha te ka mate mei tona kakau rai i aeaeia, e ko te au tangata tei aere ke mei ia tatou nei? E ko tatou oki taua aronga ra, me kore tatou e mou piri ki roto i te akarongo o te Mesia ra.

28. E oti akera to Moronai tuatuaanga i teia au tuatua nei, kua aere atura, e kua tono atura i te karere ki te au ngai katoa o te enua i vai ei te maro ra, e kua akaputuputu maira i te au tangata tei inangaro i te akatika atu i to ratou tu rangatira, kia patoi atu ia Amalikaia, e ratou oki tei ariu ke, kua karangaia e, ko te ngati Amalikaia.

29. E kite akera a Amalikaia e, kua maata to Moronai tangata i to te ngati Amalikaia, e kua kite katoa aia i te ekoko o tona au tangata no runga i te tikaanga o te au mea ta ratou i akamata i te rave, e no reira te mataku ra aia ko te kore e manuia, kua kimi atura aia i tona au tangata tei akatika mai, aere atura ratou ki te enua ra ko Niphai.

30. E kua manako iora a Moronai e, kare e tau kia maata atu te maroiroi o te ngati Lamana, e kua manako akera aia kia akataka ke i te ngati Amalikaia me kore ra, kia raveia ratou ma te akaoki mai e kia tamate atu ia Amalikaia, no te mea kua kite oki aia e, ka akatupu aia i te riri o te ngati Lamana kia ratou, kia tamaki mai ia ratou, e kua kite oki aia e, ko ta Amalikaia ïa ka rave kia tupu tona akakoroanga.

31. Kua manako a Moronai e, ko te mea tau rava ïa kia arataki aia i tona au nuku, tei akaputuputu mai ia ratou uaorai, e tei rakei ia ratou ki te au apinga tamaki, e tei papau i tetai koreromotu kia vai rai te au, e arataki atura aia i tona nuku e aere tika atura ki te metepara, e kia arai atu i te aerenga o Amalikaia ki roto i te metepara.

32. E kua aere tika atura aia ki te metepara mei tana i akakoro ra, e ma te arai atu i te au nuku o Amalikaia.

33. Kua oro ke atura a Amalikaia e tetai o tona puke tangata ra, kua tukuia iora te toenga ki te rima o Moronai ra, e kua akaokiia maira ratou ki te enua ra ko Zarahemela.

34. Kua ikiia oki a Moronai e te au akavanui, e te reo katoa o te au tangata, e no reira, e mana tona kia tau ki tona inangaro ki te au nuku o te ngati Niphai, kia akatika, e kia aka-tere katoa ia ratou.

35. E te au tangata o te ngati Amalikaia, tei kore i papau i tetai koreromotu kia turu atu i te au, e kia noo ratou ma te akatereanga au, nana i akaue kia taiaia ratou, ina ra, e toko iti ua tei patoi i te ture o te au.

36. E akaue atura oki aia i te ta pao o te au kia utiia ki runga i te au patu teitei i roto i te au enua katoatoa, tei nooia e te ngati Niphai ra e kua na reira oki a Moronai i te tanu anga i te tapao o te au ki rotopu i te ngati Niphai.

37. E tupu akaou atura te au ki roto i te enua e i na reira oki ratou i te akatupu anga i te au ki runga i te enua ra, e vaitata rava atu ra ki te openga o te ngauru ma iva o te mataiti i te tutaraanga o te au akava.

38. E na Hilamana e te au taunga teitei i akatupu i te au ki roto i te akonoanga, e e ā oki mataiti i to ratou noo au ua anga ma te rekareka i roto i te akonoanga.

39. E manganui oki tei mate, e ma te irinaki pu tikai e, ka akaoraia to ratou au vaerua e te Atu ko Iesu Mesia, no reira kua aere atura ratou ki vao ake i teianei ao ma te rekareka.

40. E mate atura tetai pae tangata i te fiva tei tupu putuputu i tetai tuatau o te mataiti ki roto i te enua, ina ra, kare i maata roa tei mate i te fiva no te mea e maata te au mea memeitaki o te au apinga tanu e te au aka ta te Atua i akapapa kia akataka ke i te maki mei te tangata nei no te tu o te reva.

41. E manganui oki tei mate i to ratou ruauanga, e ko ratou tei mate ma te akarongo ki te Mesia ra, te rekareka ua ra ratou iaia, mei ta tatou i manako.