1. E teianei, e taku tamaiti, te kite nei au e, te vai nei tetai mea tei tamanamanata i toou ngakau, e kare i kite papuia e koe, koia oki, ko te tuatua tika a te Atua i te akautunga anga i te aronga ara ra, te inangaro nei oki koe kia manako e, kare i te mea tika kia tukuia atu te aronga ara ki te ngai mamae ete mii.

2. I na, e taku tamaiti, ka akamarama atu au i teia au mea kia koe. I na, i to te Atu to tatou Atua tuaru anga i to tatou nga metua mua ki vao i te kainga i Edene kia tanu i te enua, no reira mai oki raua, e kua rave mai aia i te tangata, e kua tuku atura ki te itinga o te kainga i Edene, te kerubi e te koke mura i te koraparapa anga e te tiakianga i taua pu rakau o te ora ra.

3. E teianei, te kite nei tatou e, kua aite te tangata nei mei te Atua rai te tu, i te kite i te kino e te meitaki, e ko te akatoro atu aea aia i tona rima ka rave mai ei i taua rakau ora ra kai, e ora aia e tuatau ua atu, kua tuku mai oki te Atu ko te Atua, i te kerubi e te koke mura kia kore aia e kai i taua ua ra.

4. Kua kite tatou i reira e, e tuatau tetai i orongaia mai ki te tangata nei kia tataraara, e i na, ei taime timataanga iaia kia tataraara, e kia akamori i te Atua.

5. E i na, naringa oki a Adamu i akatoro viviki mai i tona rima e kai i taua rakau ora ra, ka ora aia e tuatau ua atu mei ta te Atu i tuatua maira, e kare ona taime kia tataraara, i na, kua puapinga kore te tuatua a te Atua, e kua akakoreia oki te ravenga maata o te akaoraanga.

6. Ina ra, kua akonoia te mate no te tangata, e mei ia ratou i tipu keia mei te pu rakau o te ora ka peraia rai ratou i te tipu keia anga mei te ao nei, e kua ngaro ke te tangata nei e tuatau ua atu, e riro atura ratou ei au tangata ngaro.

7. No reira, te kite nei tatou e kua tipu keia to tatou nga metua mua i te kopapa nei, e pera katoa i te pae vaerua, mei mua i te aroaro o te Atua ra, e kua kite oki tatou e, kua riro atura raua ki raro ake i to raua uaorai inangaro.

8. E teianei, kare i te mea tau kia akaoraia te tangata i tona mate anga kopapa nei, no te mea ka akakore te reira i te ravenga rekareka maata.

9. Kare te vaerua e mate, kua tupu ra i reira mate vaerua ki te au tangata katoatoa, e pera katoa te mate kopapa nei, koia oki kua tipuia ratou mei mua i te aroaro o te Atu, e e mea tika oki kia akaoraia te tangata i taua mate vaerua ra.

10. E no te mea kua riro te tangata nei ei aronga akono i ta te kopapa nei e te au mea puapinga kore, e ta te au demoni, ki tona tu tikai kua riro atura teia nei ngai timataanga ei taime akateateamamao no ratou, koia oki ei taime kia akateateamamao.

11. E teianei, e akamanako ana koe e taku tamaiti e naringa kare e ravenga o te akaoraanga, me mate te tangata, ka vai te mamae maata ki to ratou vaerua, kua tipu keia ratou mei mua i te mata o te Atu.

12. E teianei, kare atura e ravenga e oraʼi te tangata nei mei taua ngai kino ra ta te tangata i apai ki rungao iaia, no tona tu akono kore oki.

13. E teianei, kare atura e ravenga e tupu ei te ravenga o te akaoraanga ra kia tau ki te tuatua tika, mari ua ra, na roto i te tataraara a te tangata nei i roto i teia ao timataanga nei, koia oki teia ao akateateamamao nei, e naringa kare taua ravenga nei, kare o te aroa mana, mari ra na roto i te akakoreanga i te tuatua tika. Kare oki e tikaia kia akakore i te tuatua tika, e naringa ka rauka, kua kore te Atua.

14. E no reira, te kite nei tatou e, kua inga pouroa te tangata nei, e tei roto ratou i te rima o te tuatua tika koia oki te tuatua tika a te Atua, ko tei arai atu ia ratou mei tona ra mata e tuatau ua atu.

15. E teianei, kare te ravenga o te aroa i tupu, mari ra, na roto i te tarangaara e no reira, na te Atua rai e akakore mai i te ara a to teianei ao, e kia tupu oki te ravenga o te aroa, kia akatupu i te tuatua tika katoa, kia riro aia ei Atua apa kore, ei Atua tuatua tika, e ei Atua aroa ua.

16. E teianei, kare te tataraara e tae ki te tangata nei, mari ra kia vai rai te akautungaanga i tetai pae, e te ravenga mataora i tetai pae, e kia riro ia ei mea mutu kore, mei te oraanga vaerua ra e i te mutu kore.

17. E tenana, eaa te tangata ka tataraaraʼi, mari ra, kia ara aia? Eaa aia ka araʼi, naringa kare e ture? E eaa oki te ture e vai ei, mari ra, e akautungaanga tetai?

18. I na, kua akamouia tetai akautungaanga, e kua orongaia tetai ture tika, ko tei akatupu i te mii ki roto i te ngakau o te au tangata ra.

19. I na, naringa kare te ture i tukuia mai, e me ta tetai tangata i tetai, ka tamateia aia, ka mataku ainei aia i te mate i te mea e kua ta aia i te tangata?

20. E naringa kare e ture no te ara, kare i reira te tangata e mataku i te rave i te ara.

21. E naringa kare te ture i tukuia mai, e me ara te tangata, eaa ta te tuatua tika, e ta te aroa ravenga, kare oki o te reira mana ki rungao i te tangata nei?

22. Kua tukuia mai te ture, e kua akatinamouia te akautungaanga, e kua akonoia te tataraara, e na roto i te tataraara e raukaʼi to te aroa mana, e naringa kare ïa, kua vai to te tuatua tika mana ki runga i te tangata, e ka akatika oki te reira i te ture, e na te ture e akatika i te utunga, naringa kare, kua kore i reira te angaanga a te tuatua tika, e kare te Atua i te Atua akaou.

23. Te vai ra oki te Atua, e e mana to te aroa ki rungao i te aronga i tataraara, e no te tarangaara i tae mai ei te aroa, e no te tarangaara i raukaʼi te tuakaouanga o tei mate ra, e no te tuakaouanga o tei mate ra, e oki akaou ei te tangata nei ki mua i te aroaro o te Atua ra, e i na reira ratou i te akaoki angaia ki mua i tona aroaro, kia akavaia mei tei tau ki ta ratou angaanga i rave, e mei tei tau oki i te ture e te tuatua tika.

24. E i na, te akatika ra te tuatua tika i tana uaorai, e te rave ra te aroa i tana uaorai, e no reira, ka ora anake te aronga tataraara ra.

25. Eaa ra, kua manako ainei koe e, ka tika i te aroa kia keia i ta te tuatua tika? Te karanga atu nei au kia koe e, kare, kare roa tetai mea iti ake. E naringa i na reira, kare te Atua i te Atua akaou.

26. Kua na reira te Atua i te akatupu anga i tana ravenga maata, e te mutu kore, tei akapaapaaia mei te akatumuangaia mai o te ao nei. E no reira i tupu ei te ora, e te akaoraanga ki te tangata nei, e to ratou mate, e te mamae katoa.

27. E tenana, e taku tamaiti, ko tei inangaro i te aere mai i te inu i teia vai ora nei, e aere ua mai, e ko tei kore e inangaro i te aere mai kare aia e maroia, i te rā openga ra aia e akaokiiaʼi kia tau ki te angaanga tana i rave.

28. Me inangaro aia i te rave i te kino, e kare aia e tataraara, e ope ua ake ona au puke rā i teia oraanga nei, i na, ka akaokiia rai aia ki te kino, kia tau ki te akaokianga a te Atua.

29. E teianei, e taku tamaiti, te inangaro nei au kia kore taua au mea nei e tamanamanata akaou ia koe, e kia riro ua taau ara ei tamanamanata ia koe ko te manamanata te ka riro ei apai mai ia koe kia tataraara.

30. E taku tamaiti, kua inangaro oki au e, eiaa koe e uuna akaou i te tuatua tika a te Atua. E auraka rava oki koe e akatika ia koe uaorai ki taau ra au ara, ma te uuna i te tuatua tika a te Atua, ka tuku ua atu ra i toou ngakau ki te tuatua tika e te aroa ua, e te akakoromakianga roa o te Atua ra, e kia riro te reira ei taakaaka ia koe ki raro i te one ra.

31. E teianei e taku tamaiti, kua ikiia koe e te Atua kia ako atu i te tuatua ki teia au tangata nei. E teianei e taku tamaiti, ka aere koe ki toou tere, e akakite atu i te tuatua ma te tuatua mou e te akono meitaki, kia arataki mai koe i te tangata kia tataraara, kia rauka oki ia ratou te ravenga maata o te aroa ra. E kia oronga mai oki te Atua kia koe te au mei taku i tuatua atu. Amene.