1. E i na, e aku au taeake akaperepere, kua akatikaia au kia aere mai ki ko ia kotou na, no reira te inangaro nei au i te tuatua atu kia kotou ki toku uaorai reo, e toku uaorai vaa, e no te mea oki e ko te taime mua teia i tuatua atu ei au kia kotou i te tuatua a toku nei vaa, kua manamanata oki au i te terono o te akavaanga ma te au akatikatika anga e manganui me kore au e tae mai kia kotou nei.

2. Kare au e tae mai i teia taime nei, mari ra kua orongaia taua nooanga akavaanga ra ki tetai ke ei mono iaku, e no te aroa maata o te Atua, kua unga mai aia iaku kia kotou.

3. E i na, kua aere mai au ma te manakonako e te inangaro e, kia kite au ia kotou ma te tu akaaka ki mua i te Atua, e kia pati ua atu rai kotou i tona aroa, ma te apa kore ki mua iaia, kia kore oki au e kite ia kotou i roto i te kino, mei to tatou au taeake i Zarahemela.

4. Ina ra, kia akameitakiia te ingoa o te Atua no te mea kua akatika aia iaku kia kite, e ma te oronga mai kiaku i te rekareka maata i te kite anga e, kua akatinamouia ratou ki tona mataara tuatua tika.

5. E te irinaki nei au i te vaerua o te Atua tei vai ki roto iaku, kia rekareka katoa au ia kotou, kare ra au e inangaro kia riro mai te reira na roto mai i te kino maata e te tumatetenga mei tei tupu ana kiaku e te au taeake i Zarahemela, e i na, kua rauka mai toku rekareka no roto mai i te aue e te tumatetenga.

6. Ina ra, te irinaki nei au e, kare kotou i roto i te ngai irinaki kore mei to kotou ai taeake rai, te irinaki nei au e, kare kotou i akatietie ki to kotou au ngakau ma te ngakau parau, ma te irinaki katoa e, kare kotou i akamou i to kotou au ngakau ki te au mea e apinga nui ei, e te au mea neneva o te ao nei, te irinaki katoa nei au e, kare kotou i te aronga morimori idolo, ina ra, te akamori nei kotou i te Atua tika tikai e te ora, ma te tapapa atu no te akakoreanga i ta kotou au ara ma te akarongo openga kore te ka tae mai.

7. E i na, te karanga atu nei au kia kotou e, e manganui te au mea te ka tae mai, e i na te vai nei tetai mea puapinga rava atu i te au mea katoatoa, e i na, kare e roa atu ana te taime ka tae mai te Akaora ki tona iti tangata tikai.

8. I na, kare oki au e karanga atu ana e, ka aere mai aia kia tatou i te taime te noo mai nei aia i te kopapa nei, kare oki te vaerua i tuatua akapera mai ana kiaku. E ko teia mea kare au i kite, i na, ko teia ua, kua kite au e, e mana to te Atua kia rave i te au mea katoatoa mei tei tau ki tana i tuatua.

9. Ina ra, kua tuatua mai te vaerua i teia au mea kiaku i te na ko anga e, e kapiki atu ki teia aronga ma te na ko atu e, e tataraara kotou, e e akateateamamao i te mataara o te Atu, ma te aru i tona mataara tika, e i na, te vaitata mai nei te basileia o te Ao, e ka aere mai te tamaiti a te Atua ki te ao nei.

10. E i na, e na Maria oki aia e anau mai ki Ierusalema i te enua o to tatou ai tupuna, e e paretenia manea oki aia, e mea ikiia, kua akauruia e ka toia aia na roto i te mana o te Vaerua Tapu, e ka anau mai tetai tamaiti, i na, ko te Tamaiti ïa a te Atua.

11. E ka aere oki aia, e ka akakoromaki i te mamae e te tumatetenga, e te au timataanga katoa, e ka riro teia ei akatupu i te tuatua tei na ko mai e, ka apai aia ki rungao iaia te mamae e te tumatetenga o tona iti tangata.

12. Ka apai aia ki rungao iaia te mate, kia matara oki te au tapeka o te mate tei tapeka i tona iti tangata, e ka rave katoa aia ki rungao iaia i to ratou au apikepike kia ki tona ngakau i te aroa ua o te kopapa nei, kia kite oki aia i te tauturu i te apikepike o te tangata i te kopapa nei.

13. I teianei kua kite oki te vaerua i te au mea katoatoa, ina ra, ka mamae te tamaiti a te Atua i te kopapa nei, kia rauka oki iaia i te apai i te ara a tona iti tangata, kia rauka oki iaia i te akakore atu i ta ratou au ara ki tona mana akaora, e teianei, ko te kite oki teia i roto iaku.

14. E teianei te karanga atu nei au kia kotou e tataraara kotou, e kia anau akaouia; no te mea, te tuatua maira te Vaerua e, kia kore kotou e anau akaouia, kare kotou e ō ki te basileia i te Ao ra. E no reira, aere mai e bapetizo ma te tataraara kia oreiia kotou mei ta kotou au ara, kia rauka oki te akarongo i te Punua Mamoe a te Atua tei apai ke atu i te ara a to teia nei ao, tei maroiroi i te akaora e te tāmā i te tangata mei te au mea tarevake katoatoa.

15. Te karanga atu nei au kia kotou, aere mai, e eiaa e mataku, e akaruke i te au tu tarevake ravarai tei tamanamanata ia kotou, tei tapeka ia kotou ki roto i te kino, aere mai e aere ki mua ma te akaari atu ki mua i to kotou Atua e, te inangaro tikai nei kotou i te tataraara ma te akaou i to kotou ngakau e te inangaro i te akono i tana au akaueanga ma te akakite atu kiaia na roto i te tomo anga ki roto i te vai o te bapetizoanga.

16. E ko tei rave i teia ma te akono i te akaueanga a te Atua, mei teianei e tuatau ua atu, koia te ka akamaara, e kua karanga atu au kiaia e ka rauka iaia te ora mutu kore, kia tau ki te kite o te Vaerua Tapu tei akakite mai kiaku.

17. E teianei e aku au taeake akaperepere, te irinaki ainei kotou i teia au mea nei? I na, te karanga atu nei au e, ae, no te mea kua kite au e te irinaki nei kotou. E te ravenga i kite ei au e kua irinaki kotou, na roto ïa i te akakite anga mai a te vaerua tei vai ki roto iaku. E no te pakari o to kotou akarongo i te reira, i te au mea tei tuatuaia e au, kua rekareka maata au.

18. E mei taku rai i tuatua atu kia kotou mei muatangana mai e, e inangaro maata toku kia kore kotou e o ki roto i te ngai kino mei to kotou au taeake rai, e kua kite oki au e, kua akatikaia mai toku akakoroanga.

19. Te kite nei au e, tei runga i te mataara tika tikai kotou, e tei runga kotou i te mataara e tae atu ei ki te basileia o te Atua, e te papu nei iaku e, te maani nei kotou i tona mataara kia tika.

20. Te papu nei iaku e, kua akakiteia mai kia kotou na roto i te kite o tana tuatua, e kare oki aia e aere na te mataara taipa, e kare oki aia e akaruke i tana i tuatua, e kare rava e uri ki te tua kaui e te katau, e mei te mea tika, ki te mea tarevake, e ko tona akakoroanga okotai ïa mea mutu kore.

21. E kare oki aia e noo ki roto i te nao viivii, e kare katoa te au tu viivii e te repo e tae ki te basileia o te Atua, e no reira te karanga atu nei au kia kotou e te vaitata mai nei te taime koia oki ko te rā openga, e ko tei viivii, ka noo rai aia ki roto i tona tu viivii.

22. E teianei e aku taeake akaperepere, te tuatua atu nei au i teia au mea kia kotou ei akaaraara ia kotou i ta kotou au angaanga ki te Atua, kia kore oki kotou e akaapaia mai i mua i te aroaro o te Atua, e kua aru oki kotou i te akaaereanga tapu a te Atua tei rauka ia kotou na.

23. E te inangaro nei au ia kotou kia maru, e kia akaaka, ma te kauraro, e te akarongo i te tuatua, ma te ki i te akakoromaki, e te kauraro i te au mea katoatoa, ma te maroiroi i te akono anga i te au akaueanga a te Atua i te au taime ravarai, ma te pati atu i te au mea i ngere ei koe i te pae vaerua e te kopapa nei, ma te akaoki atu i te au akameitaki anga ki te Atua no te au mea tei rauka ia kotou.

24. E kia rauka oki ia kotou te akarongo, te manakonako, e te aroa, i reira ka rauka ua ia kotou te angaanga meitaki.

25. Kia akameitaki mai te Atua ia kotou, ka mā to kotou kakau i te au mea viivii, e me tae ki te openga ra kia noo oki kotou ma Aberahama Isaaka e Iakoba, e pera katoa ki te au peroveta tapu ra tei vai ana mei te kapuaanga mai o te ao nei, kia ma to kotou au kakau e te titoutou kore mei to ratou rai te ma i roto i te basileia o te ao ra e kare oki e aere akaou ki vao.

26. E teianei e aku au taeake akaperepere, kua tuatua atu au i teia au tuatua kia kotou mei ta te vaerua i akauru mai ki roto iaku, e kua mataora tikai oki toku vaerua no to kotou maroiroi e te akarongo mai ki taku nei tuatua.

27. E teianei kia vai mai te au o te Atua kia kotou, e ki to kotou au ngutuare, e te enua, e pera katoa ki ta kotou au anana manu, e ta kotou au mea katoatoa, ta kotou au vaine e te tamariki, kia tau ki to kotou akarongo e te angaanga, mei teianei e tuatau ua atu. Mei taku rai i tuatua atu. Amene.