1. E i na, kua akaueia atu a Alama raua ko Amuleka kia akaruke atu i taua oire ra, e kua akaruke atu raua, e kua aere atu ki te enua ko Sidoma, e i na, kua kite pouroa raua i te au tangata tei akaruke atu i te enua ko Amoniha, tei tuaruia ki vao, e tei peiia ki te toka, no tei irinaki ratou kite tuatua a Alama.

2. E kua akakite atu raua kia ratou i tei tupu ki ta ratou au vaine e te tamariki, e pera katoa kia raua tikai, e te mana i oraʼi raua.

3. E kua rokoia katoa a Zezorama e te maki i Sidoma, e fiva vera, ko tei tupu mai no tona au manako kino, e no tona au tu kino katoatoa, e kua manako katoa aia e, kua mate a Alama raua ko Amuleka, e kua manako katoa aia e, kua taiaia no tona kino. E ko teia ara maata, e tetai atu au ara ana, kua akaturori i tona manako e riro ua ake ei mamae nona e kare rava e ora, e no reira kua akamata tona ngakau i te ka.

4. I na, i tona rongo anga e, tei roto a Alama raua ko Amuleka i te enua ko Sidoma, kua akamata tona ngakau i te maroiroi, e kua unga atu aia i tetai karere kia raua, ma te pati atu kia raua kia aere mai kiaia.

5. E i na, kua aere viviki atura raua ma te āriki i te karere tei kaveaia atu kia raua, e kua aere atura raua ki te ngutuare o Zezorama e tei runga oki aia i tona roi maki, kua rokoia tikai e te maki e e kino tikai, e fiva vera, e kua tumatetenga tikai tona manako no te ara tana i rave, e i tona kite anga ia raua, kua akatika atura aia i tona rima ma te pati atu kia raua kia akaora mai iaia.

6. I na, kua karanga atura a Alama kiaia, ma te mou ki tona rima, te irinaki ainei koe i te mana o te Mesia no te akaoraanga?

7. Kua pau atura aia e, ae, te irinaki nei au i te au tuatua pouroa taau i apii.

8. Kua na ko atura a Alama e, mei te mea e ka irinaki koe i te akaoraanga a te Mesia ka ora koe.

9. Kua karanga atura aia e, ae, ka irinaki au i taau tuatua.

10. E i reira kua pati atu a Alama ki te Atua i te na ko anga e, e te Atu to matou Atua, e aroa mai i teia tangata e akaora mai iaia kia tau ki tona akarongo i roto i te Mesia.

11. E i te otianga a Alama i te tuatua i teia au tuatua nei, kua tu mai a Zezorama ki runga i tona vaevae ma te akamata i te aere, e kua tupu teia ei umere anga no te au tangata, e kua totoa teia kite nei ki roto i te enua katoa o Sidoma.

12. Kua bapetizo iora a Alama ia Zezorama ki te Atu, e kua akamata aia mei reira mai i te ako atu i te au tangata.

13. I reira, kua akatinamou iora a Alama i tetai akonoanga ki roto i te enua ko Sidoma, ma te iki i tetai au taunga, e te au puapii ki roto i taua enua ra, kia bapetizo atu ki te Atua i te aronga tei inangaro i te bapetizo.

14. E e manganui tikai tei akaputuputu mai mei te au tuanga mai o Sidoma e kua bapetizoia.

15. Ina ra, ko te au tangata i roto i te enua ko Amoniha, kua vai marokiakia rai to ratou ngakau e e iti tangata maro ratou e te ketaketa e kare rava ratou e tataraara i ta ratou ara, ma te tuatua e, to Alama raua ko Amuleka mana no te tiaporo, e kua vare oki ratou i te apii anga a Nihora, e kare rava e irinaki kia tataraara i ta ratou au ara.

16. E i na, ko Alama e Amuleka, ko Amuleka ra, kua akaruke aia i tana auro, e te ario, e tana au apinga memeitaki i roto i te enua ko Amoniha no te tuatua a te Atua, e kare aia i arikiia e tona au taeake tikai, pera katoa ki tona metua, e tona kopu tangata;

17. E no reira, i muri ake i to Alama akatinamou anga i te akonoanga ki Sidoma, ma te kite i te tataraara maata, e ma te kiteanga e, kua tataraara te au tangata i te parau o to ratou ngakau, e kua akamata i te taakaaka ia ratou ki mua i te Atua, e ma te uipa mai ia ratou ki to ratou au are pure no te akamorianga atu i te Atua ki mua i te atarau, i te tatari anga, ma te pure anga atu kiaia, kia akaora ia mai ratou mei ia Satani, e te mate katoa, e te takinga kino.

18. I na, mei taku i karanga atu e, kua kite a Alama i teia au mea nei e no reira kua rave aia ia Amuleka ma te aere atu ki te enua ko Zarahemela ma te arataki atu iaia ki tona ngutuare ma te tauturu atu iaia i roto i tona au manamanata, ma te akamaroiroi atu iaia kia irinaki ki te Atu.

19. E ope akera te ngauru o te mataiti i te tutaraanga te au akava ki rungao i te au tangata o Niphai.