1. E i na, maata atura te riri o te ngati Lamana, no te mea, kua ta ratou i to ratou au taeake, e kua tuatua akera ratou ma te taputou atu ki te ngati Niphai i to ratou riri, e kare rava ratou i inangaro akaou i te ta i te tangata Aniti-Lihai-Niphai i taua taime ra.

2. E kua arataki atura ratou i te au nuku ki te ope o te enua ra ko Zarahemela, kua ta atura ratou i te au tangata i te enua ra ko Amoniha, e tamate rava atura ia ratou.

3. E maata akera ta ratou au tamaki i te ngati Niphai, kua tuaruia, e kua taiaia ratou.

4. E tei roto i te ngati Lamana i taiaia ra te maataanga o te uanga a Amulona e tona ai taeake, koia oki te au taunga o Noa, e kua taiaia ratou e te ngati Niphai.

5. Oro atura te toeanga o ratou ki te metepara ra ki te itinga o te ra, rave iora ratou i te mana e te tikaanga i rungao i te ngati Lamana, e akapou iora ia ratou ki te ai no to ratou irinakianga.

6. E manganui oki to ratou i muri ake i teia ruti anga maata e te tumatetenga maata, kua maara mai ia ratou te tuatua ta Aarona e tona au taeake i ako mai kia ratou i roto i to ratou enua, e kua akamata iora ratou i te kore e irinaki akaou i te tuatua a to ratou ai metua, e kua irinaki ratou ki te Atua, e kua oronga mai aia i te mana maata ki te ngati Niphai, e maata oki tei akaariuia mai i to ratou noo anga i te metepara.

7. E kua akaue atura te au akaaere, ko te tamariki a Amulona e kia taiaia te aronga tei irinaki i teia au mea nei.

8. Na taua tamateanga ra i akatupu i te riri maata ki roto i to ratou au taeake, e kua tupu iora te pekapeka i roto i te metepara, e kua kimi iora te ngati Lamana i te uanga o Amulona e tona au taeake e akamata atura i te ta ia ratou, e oro atura ratou ki te metepara ki te itinga o te rā ra.

9. E i na, kua kimiia ratou e te ngati Lamana e tae mai ki teianei. Kua na reira oki ta Abinadaia tuatua i te tupuanga, tana i tuatua atu no te uanga a te au taunga, tei akaue kia tamateia aia ki te ai.

10. Kua karanga atura aia kia ratou, Ta kotou ka rave mai kiaku nei, e taipe ïa no te au mea te ka tupu a muri ake.

11. Ko Abinadaia, ko te tangata mua ïa i mate i te ai, no tona akarongo i te Atua ra, e teia tona aiteanga, e maata te tangata ka mate i te ai, mei iaia katoa i mate ra.

12. Kua tuatua atura aia ki te au taunga o Noa ra, na ta ratou uanga e ta te au tangata kia mate mei iaia rai, e ka akapueurikirikiia ratou e ka taiaia, mei te mamoe kare e tiaki, ka arumakiia e ka taiaia e te manu taae, e i na, kua tupu teia tuatua nei, kua tuaruia ratou e te ngati Lamana, e kua kimiia ratou, e kua taiaia.

13. E kia kite te ngati Lamana e, kare e rauka ia ratou i te akavi atu i te ngati Niphai, kua oki atura ratou ki to ratou enua, e maata katoa to ratou tei noo atu ki te enua ra ko Isemaela, e te enua ra ko Niphai, e kua piri atu oki ratou ki te iti tangata o te Atua, koia oki ko te au tangata o Aniti-Niphai-Lihai.

14. E kua tanu katoa ratou i ta ratou au apinga tamaki mei ta to ratou au taeake i tanu ra, e kua riro akera ratou ei aronga tuatua tika ma te aru i te au mataara o te Atua e kua akono oki ratou i tana au akaueanga, e tana au ture.

15. E kua akono katoa ratou i te ture a Mose, e mea tika oki kia akono ratou i te ture a Mose, kua akaueia oki ratou kia akono i te ture a Mose e kare oki i tupu pouroa. Ina ra, no atu i te ture a Mose, kua akara atu ratou no te aereanga mai o te Mesia ma te manako e, e taipe te ture a Mose no te aereanga mai o te Mesia, e ma te irinaki e, ka akono ratou i taua au mea ra e tikai, e tae rava atu ki te taime e akakiteia mai ei aia kia ratou.

16. Kare ratou i manako e, ka tae mai te akaoraanga i te ture a Mose, kua akamaroiroi ra te ture a Mose i to ratou ki te Mesia ra, kua rauka ia ratou te irinaki na roto i te akarongo i te ora mutu kore ma te irinaki ki te vaerua o te totou tei tuatua mai i taua mea te ka tupu ra.

17. E teianei e rekareka maata to Amona, to Aarona, to Omona, e to Emenai, e pera katoa ki to ratou au taeake, no te manuia tei rauka ia ratou i te ngati Lamana ra, e kua kite oki ratou e, na te Atua i oronga mai kia tau ki ta ratou pure, e kua akatupu oki aia i tana tuatua e kare e ngai toe.