1. E ko te rua o to matou akakoroanga, koia oki kia rave i te oire ko Manitai, ina ra, kare e ravenga kia arataki ei matou ia ratou ki vao i te oire ma to matou pupu meangiti, no te mea, kua akamaara oki ratou i ta matou i rave; e no reira kare e rauka ia matou i te arataki ia ratou mei to ratou au punanga.

2. E maata ake oki ratou i to matou nuku, e kua mataku oki matou i te aere atu i te tamaki ia ratou i roto i to ratou au punanga.

3. E mea tau oki kia tuku atu matou i to matou au tangata katoatoa kia mou rai oki matou i te au enua tei nooia e matou ra e no reira e mea tau ia matou kia tiaki matou e penei ake ka rauka mai te tauturu maata ia matou mei te enua maira ko Zarahemela, e pera katoa tetai kai ou.

4. E kua unga atura au i tetai karere ki te kavana o to matou enua, ma te akakite atu i te au mea no to matou au tangata ra. E kua tiaki atura matou i te kai e te tauturu mei te enua maira ko Zarahemela.

5. Ina ra, kare te reira i riro ei puapinga maata no matou no te mea, te akamaroiroiia ra te ngati Lamana i tera ra, e tera ra, e pera katoa te kai, ko to matou tu ïa i taua tuatau ra.

6. E te inangaro tamaki maira te ngati Lamana kia matou i tera taime, e i tera taime, ma te kimi i te au ravenga kikite e te pikikaa kia akapou ia matou, e kare oki e rauka ia matou kia aere e tamaki atu ia ratou no ta ratou au ngai maroiroi e to ratou au punanga ketaketa katoa.

7. E kua noo oki matou i roto i taua au tumatetenga ra no tetai au marama, e kua vaitata rava matou i te mate no te kore e kai.

8. Ina ra, kua tae mai tetai kai na matou, ko tei apainaia mai e tetai nuku, e rua tausani tangata i roto, e ko teia ua oki te tauturu tei rauka ia matou, ei paruru ia matou e to matou enua kia kore oki matou e topa ki roto i te rima o to matou au enemi, e kia tamaki atu i te enemi tei kore e rauka i te tarē.

9. E teianei, kare matou i kite i te tumu no to matou au pekapeka, me kore, te tumu i kore ei ratou e tuku mai i te tauturu kia matou, e no reira kua mii matou ma te mataku e ko te tae aea mai te akautunga anga a te Atua ki rungao i to matou enua, kia takoreia e kia akapouia matou.

10. E no reira, kua pure atu matou ki te Atua, kia akamaroiroi mai aia ia matou ma te akaora mai ia matou mei te rima o to matou au enemi e ma te oronga katoa mai i te maroiroi kia matou kia rauka ia matou i te tāpū i to matou oire, e to matou enua, e ta matou apinga, kia riro te reira ei tauturu i to matou au tangata.

11. E kua aravei mai oki te Atu to matou Atua ia matou ma te akapapu mai e, ka akaora aia ia matou, e kua tuatua katoa mai aia ma te au kia matou, e kua akamaata katoa mai oki aia i to matou akarongo, e ma te akakite mai kia matou kia irinaki e ka akaora aia ia matou.

12. E kua akamaroiroi iora matou ma te nuku meangiti tei rauka ia matou ra, e kua tinamou oki matou i te akakoroanga kia arai i to tatou enemi, e kia vai rai to matou enua, e ta matou apinga, e ta matou au vaine, e ta matou tamariki, e te akakoroanga o te au.

13. E kua aere oki matou ma to matou ririnui katoa kia tamaki atu i te ngati Lamana i roto i te oire ko Manitai, e kua patu matou i to matou au puakapa ki te pae i te metepara i vaitatao i te oire.

14. E ao akera, kia kite maira te ngati Lamana e te noo ra matou i te ope o te metepara i vaitatao i taua oire ra, kua tono maira ratou i to ratou au tangata akara kia matou ra, kia kite oki ratou i te maata e te ririnui katoa oki o to matou nuku.

15. E kite akera ratou e, kare i te aronga maata, e te mataku ra ratou ko te araiia aea ratou i to ratou tauturu, mari ra kia aere mai ratou e tamaki mai ia matou e e ta katoa ia matou ra, e kua manako katoa oki ratou e, ka pou ngoie ua matou i to ratou nuku maata, e kua akamata oki ratou i te akapapa kia tamaki mai ia matou.

16. E kite akera matou e, te akateateamamao ra ratou no te tamaki mai ia matou, i na, kua akaue atura au ia Kiti, ma tetai pupu tangata meangiti kia oro tapuni atu ki roto i te metepara, e kia tapuni katoa atu a Teomena e tetai pupu tangata meangiti e kia oro katoa atu ki roto i te metepara.

17. I na, tei te pae katau oki a Kiti e tona au tangata, e ko tetai pae, tei te pae kaui; e kia ngaro ratou i te tapuni, i na, kua noo rai au, ma te toenga o toku nuku ki taua ngai rai, koia te ngai mua i patu ei matou i to matou au puakapa i te taime ka aere mai ei te ngati Lamana ka tamaki mai ia matou.

18. E kua aere maira te nuku maata o te ngati Lamana kia tamaki mai ia matou. E tae maira ratou, e kua vaitata i te ta ia matou ki ta ratou au koke kua akaue atura au i toku au tangata kia oro atu ki te metepara.

19. E kua arumaki maira te ngati Lamana ia matou ma te viviki tikai kua inangaro oki ratou kia opu ia matou, e kia ta katoa ia matou, no reira oki ratou i arumaki mai ei ia matou ki roto i te metepara ra, e kua na rotopu oki matou ia Kiti e Teomena i te aereanga, e kare rava ratou i kiteaia e te ngati Lamana.

20. E kia na te pae mai te ngati Lamana, me kore ra, i te na te pae anga mai te nuku ra, kua tu maira a Kiti raua ko Teomena mei to ratou ngai muna mai, e kua opu atura i te au tangata akara o te ngati Lamana kia kore oki ratou e oki atu ki te oire.

21. E tipu ke akera ratou ia ratou ra, kua oro atura ratou ki te oire ra e kua ta atura i te au tiaki e kua rave iora ratou i taua oire ra.

22. Kua tupu oki teia no te mea kua akatika te ngati Lamana i to ratou nuku katoatoa, mari ua ra, ko tetai pae tiaki ua, kia aratakiia ki roto i te metepara.

23. E no reira i raukaʼi ia Kiti e Teomena to ratou ra akapuanga ketaketa. E kua rauka oki ia matou ta matou i inangaro, i aere ei matou i te aerenga mamao na roto i te metepara ki te enua ko Zarahemela.

24. E kite akera te ngati Lamana e, te aere tika atu nei ratou ki te enua ko Zarahemela, kua mataku iora ratou, penei ake e, e ravenga tetai i akanooia kia akapou ia ratou, e no reira, kua akamata iora ratou i te oro atu ki roto i te metepara, na taua mataara rai i aere mai ei ratou.

25. E i na, e po oki, e kua pātū ratou i to ratou au puakapa, e kua manako oki te au rangatira mamaata o te ngati Lamana e, kua roiroi te ngati Niphai no to ratou aerenga, e ma te manako katoa e, kua arumaki ratou i to ratou nuku katoatoa, e no reira oki ratou i kore ei i manako akaou atu i te oire ko Manitai.

26. E i te po anga, kua akaue atu au i toku au tangata e, auraka ratou e moe, ina ra, kia aere atu ratou na tetai mataara ke ki te enua ko Manitai.

27. E no to matou aereanga i te po ra, i na, kia ao akera, kua tae maira matou ki muao i te ngati Lamana, e kua tae oki matou na mua ake ia ratou ki te oire ko Manitai.

28. E na roto i teia ravenga kikite nei kua rauka ia matou te oire ko Manitai ma te kore e akamaringianga toto.

29. E kia akavaitata mai te nuku o te ngati Lamana ki te pae oire, e ma te kite mai e kua papa matou i te aravei atu ia ratou, kua poitirere tikai ratou ma te mataku maata, e kua oro atu ratou ki roto i te metepara.

30. E kua oro atura te nuku o te ngati Lamana mei roto mai i te au tuanga katoa o te enua. Ina ra, e manganui ta ratou au vaine i apai e te tamariki katoa mei roto atu i te enua.

31. E ko taua au enua ra tei raveia ana e te ngati Lamana, tei roto anake ïa i to matou tuanga, e ko to matou au metua tane, e ta matou au vaine e te tamariki te oki nei ratou ki to ratou ngutuare, mari ua ra ko tei riro tuikaa atu e tei apainaia e te ngati Lamana.

32. Ina ra, e meangiti ua to matou nuku i te mou mai i te au oire e te au enua mamaata ra.

33. Te irinaki nei ra matou ki to matou Atua tei oronga mai i te re kia matou ki rungao i taua au enua ra kia rauka ia matou taua au oire ra, e te au enua katoa o matou ra.

34. E teianei, kare matou i kite i te tumu i kore ei te kavamani e oronga mai i te tauturu maata kia matou, e kare katoa taua au tangata tei aere mai kia matou i kite i te tumu i kore ei e rauka ia matou te maroiroi maata.

35. I na, kare matou i kite e, kua manuia kore paa kotou e kua aere atu te nuku ki tera pae o te enua, me kua pera, kare e tau ia matou kia manamanata.

36. E mei te mea e kare, i na, te mataku nei matou e, penei ake te vai nei tetai pupu tangata i roto i te kavamani i kore ei ratou i tono maata mai i te tangata kia tauturu ia matou, no te mea, kua kite oki matou e, e maata atu to ratou i ta ratou i tono mai.

37. Ina ra, kare e manamanata, te irinaki nei matou e ka akaora te Atua ia matou, no atu te apikepike o to matou nuku, e ma te akaora ia matou mei te rima o to matou au enemi.

38. I na, ko te rua ngauru ma iva o te mataiti teia, e vaitata ki te openga, e tei roto rai matou i to matou tuanga enua, e kua oro atu te ngati Lamana ki te enua ko Niphai.

39. E ko taua au tamaroa a te au tangata o Amona, ko taku i tuatua akameitaki ake nei, e tei ko nei ratou iaku nei i roto i te oire ko Manitai, e kua tauturu oki te Atua ia ratou, e ma te kopae ia ratou mei te koke, e kare rava tetai tangata i taiaia.

40. E manganui tikai to ratou au puta, ina ra, kua tu a toa rai ratou i roto i taua au rā, ta te Atua i akarangatira ia ratou e kua maroiroi oki ratou i te akamaara anga i te Atu to ratou Atua mei tetai ra ki tetai ra, e kua akono meitaki oki ratou i tana au ture, e tana tuatua, e tana au akaueanga, e kua maroiroi to ratou akarongo no te au totou te ka tupu.

41. E teianei e taku taeake akaperepere, e Moronai, kia akarangatira mai to tatou Atu ko te Atua ia tatou ko tei akaora ia tatou e kia noo tamou ua atu rai koe ki tona ra aroaro, e kia akameitaki mai aia i tona iti tangata, e kia akamanuia mai aia ia kotou i te rauka anga i te au enua ta te ngati Lamana i rave atu mei ia tatou, koia oki to tatou ra tauturu. E teianei, i na, te akamutu nei au i taku episetole. E ko Hilamana au te tamaiti a Alama.