1. Kia akatinamouia te au tangata o Amona i te enua ko Ieresona, e kia akatinamou katoaia te akonoanga ki reira, e kua akanooia te au vaeau o te ngati Niphai e pini ua ake te enua ko Ieresona, e ki te au ope takapini i te enua ra ko Zarahemela, i na, kua aru te nuku o te ngati Lamana i to ratou au taeake ki te metepara.

2. E kua tupu te tamaki maata, mei tei kore rava i kiteaia ana i rotopu i te au tangata o te au enua, mei te tuatau mai i akaruke ei a Lihai ia Ierusalema, e kua ngauru te tausani o te ngati Lamana tei taiaia e tei akapueurikirikiia atu.

3. I na, e maata tikai te tamate anga tangata i te pae o te ngati Niphai, ina ra, kua tuaruia te ngati Lamana, e kua pueurikiriki ke atu, e kua oki atura te au tangata Niphai ki to ratou enua.

4. E teianei, ko tetai taime teia i tupu ei te mii e te eva kaku e pini ua ake te enua ra i te au tangata o Niphai.

5. E kua eva te au vaine takaua no ta ratou au tane, e te au metua tane i te eva anga i ta ratou au tamaroa, e te tuaine no te tungane, e te tungane no te metua tane, e kua rongo te katoatoa i teia mii e te eva maata no to ratou iti tangata tei taiaia.

6. E kua riro tikai teia ei ra tumatetenga, e taime mii, e te taime akakoreanga kai, e te pure.

7. E ope akera te ngauru ma rima o te mataiti i te tutaraanga o te au akava ki rungao i te tangata o Niphai.

8. E ko te tuatua teia no Amona e tona ra au taeake, no to ratou aereanga na roto i te enua ra ko Niphai, e to ratou mamae maata i roto i taua enua ra, to ratou mii, to ratou mate, e to ratou rekareka aite kore, e te noo anga au o te au taeake i roto i te enua ko Ieresona. E teianei, kia akameitaki mai te Atu, te Akaora o te au tangata katoatoa i to ratou au vaerua e tuatau ua atu.

9. Ko te tuatua teia o te tamaki, e te maro i rotopu i te ngati Niphai, e te tamaki katoa i rotopu i te ngati Niphai e te ngati Lamana, e ope akera te ngauru ma rima mataiti o te tutaraanga o te au akava.

10. E mei te mataiti mua, e tae rava atu ki te ngauru ma rima mataiti, kua tupu te mate maata o te tausani anga o te tangata, e kua akatupuia te akamaringi anga toto rikarika rava atu.

11. E kua tanumiaia te au kopapa e manganui ki raro i te one, e ko tetai pae kopapa e tausani ua atu, te vai rai i te putunga maata ki runga i te tua o te enua, e e manganui oki tei mii ra i te mate o to ratou kopu tangata, no te taputou a te Atua e tumu tetai kia mataku ratou e, kua akautungaia ratou ki te mamae mutu kore ra.

12. E kua eva tikai tetai pae e tausani ua atu no te mate o to ratou iti tangata, kareka ra kua rere ua ratou i te rekareka no te irinaki e te kite, kia tau ki te taputou a te Atu, e ka akateiteiia ratou, e ka noo ki te rima katau o te Atua ra, e i reira e noo ei ma te rekareka mutu kore, kia tau ki ta te Atu i tuatua maira.

13. E kua kite oki tatou e, kare rava to tetai pae tangata meitaki i aite ki to tetai pae i te ara e te akono kore, e te mana o te tiaporo tei tupu mai na roto i tana au ravenga pakari tana i akatupu e mou ei te ngakau o te tangata nei.

14. E kua kite oki tatou e, e mea tau rava i te tangata nei kia rave maroiroi i te angaanga i roto i te aua vine a te Atu, e kua kite oki tatou i te tumu o te mii maata, e te rekareka maata; e ko te mii no te mate e te pou maata o te tangata, e te rekareka, no te marama o te Mesia i te ora.