1. E i te raukaanga mai ia Amalikaia te basileia, kua akatupu iora aia i te riri ki roto i te ngakau o te ngati Lamana ki te ngati Niphai e kua iki aia i tetai au tangata kia tuatua atu ki te ngati Lamana mei to ratou patu teitei atu ma te tuatua akaapa i te au tangata Niphai.

2. E kua na reira oki aia i te akariri anga i to ratou ngakau ma te akaapa atu i te ngati Niphai, e kua ope oki tana au ravenga i te tupu e tae rava mai ki te openga o te tai ngauru ma iva o te mataiti i te tutaraanga o te au akava, e no te mea e kua riro aia ei ariki ki rungao i te ngati Lamana, e kua inangaro katoa aia kia riro aia ei ariki no te au enua katoatoa, e kia akaaere i te tangata katoatoa ko te ngati Lamana e te ngati Niphai.

3. E teianei, kua tupu tona inangaro, kua akaketaketa oki aia i te ngakau o te ngati Lamana ma te akapoiri i to ratou manako e ma te akariri atu oki ia ratou, kua akaputuputu iora oki aia i tetai nuku maata kia aere e tamaki atu i te ngati Niphai ra.

4. E kua tinamou tona inangaro no te maata o tona ra au tangata kia akavi aia i te nagti Niphai, e e akariro oki ia ratou ei tuikaa.

5. Kua iki iora aia i tetai au rangatira mamaata no roto i te ngati Zoroma ra, ko ratou oki tei kite meitaki i te ririnui o te ngati Niphai, e to ratou au akapuanga, e te ngai paruparu oki no to ratou au oire, e kua iki oki aia ia ratou ei au akaaere mamaata no tona ra au nuku.

6. Kua rave iora ratou i to ratou au puakapa, e aere maira ki te enua ra ko Zarahemela ki roto i te metepara.

7. I raukaʼi ia Amalikaia te mana, na roto i te pikikaa e te tuatua taparu, i na, te akamaroiroi ra a Moronai i te ngakau o te tangata kia akono meitaki ratou i te Atu to ratou ra Atua.

8. E kua akamaroiroi aia i te au nuku o te ngati Niphai ma te kimi i tetai ngai paruruanga, e te akapuanga ma te akaputu i te one e pini ua ake ki tona nuku vaeau, e kua patu ratou i te patu toka e pini ua ake to ratou au oire e te kotinga o te enua, i na, e pini ua ake te enua katoatoa.

9. Tei to ratou au paruruanga paruparu te maataanga o te au tangata e kua na reira oki aia i te akaparuru anga e te akamaroiroi anga i te enua tei nooia e te ngati Niphai ra.

10. E te na reira ra aia i te akapapa ma te turu atu i to ratou tu rangatira, to ratou enua, e ta ratou au vaine e ta ratou au tamariki, e to ratou au, kia ora ratou i te Atu i to ratou ra Atua, e kia paruru oki ratou i tei tuatuaia e to ratou au enemi i te akakoroanga o te Kerisetiano.

11. E tangata maroiroi e te ririnui a Moronai e e tangata kite tikai, kare ra aia i rekareka i te angaanga akamaringi toto, e tangata ngakau rekareka oki te au o tona enua, e te tuikaa kore o tona au taeake.

12. E tangata ngakau ki i te akameitaki i tona Atua, no te au mea meitaki e te tikaanga tana i oronga mai ki tona ra au tangata, e tangata maroiroi oki i te angaanga no te meitaki e te ora o tona ra au tangata.

13. E e tangata akarongo tinamou oki aia ki te Mesia e kua tuatua aia ma te taputou e, ka paruru aia i tona au tangata, e tona tu rangatira, e tona enua, e tana akonoanga e tae rava atu ki te akamaringianga i tona ra toto.

14. E teianei kua apiiia te ngati Niphai kia paruru ia ratou uaorai mei to ratou au enemi, e tae rava atu ki te akamaringianga toto mei te mea e kare e ravenga ke, e kua apiiia oki ratou e, auraka e akakino e auraka oki e taki i te koke mari ua ra, kia patoi atu i te enemi e kia akaora ia ratou uaorai.

15. E ko teia to ratou akarongo, kia na reira ratou, ka akameitaki mai te Atua ia ratou i te enua nei, koia oki, kia maroiroi ratou i te akono anga i te au akaueanga a te Atua, e ka akameitaki mai aia ia ratou i te enua nei, e akamatakite atu ia ratou kia oro, me kore, kia akateateamamao no te tamaki mei tei tau ki te tu o te mate e vaitata mai nei.

16. E na te Atua e akakite mai kia ratou i te ngai e aere ei ratou, e paruru atu ia ratou uaorai mei to ratou au enemi, i na reira oki te Atu i te akaora anga ia ratou, e ko te akarongo teia o Moronai, e kua rekareka oki tona ngakau i te reira, kare no te akamaringianga toto, ina ra, no te rave anga i te au mea meitaki, e i te akaora anga i tana au tangata, e te akono anga i te au akaueanga a te Atua, e te patoi anga i te kino.

17. E tika tikai taku e karanga atu kia kotou, naringa te tangata katoatoa i ora ana, e te ora nei, e ka ora a muri atu mei ia Moronai rai te tu, i na, kua ngaueue takiri te mana o ade e tuatau ua atu, e kare oki te tiaporo e mana akaou ki rungao i te tamariki a te tangata nei.

18. I na, e tangata aia mei ia Amona rai te tamaiti a Mosaia, e mei te au tamariki a Mosaia ra, e mei ia Alama e tana au tamaroa, e au tangata oki ratou no te Atua ra.

19. E teianei, kare a Hilamana e tona au taeake i meangiti ake ia Moronai i te tauturu i te au tangata. Kua ako katoa oki ratou i te tuatua a te Atua, e kua bapetizo oki ratou i te tangata katoatoa tei tataraara e tei akarongo ki ta ratou tuatua.

20. E kua na reira ratou i te rave anga i te angaanga, e no ta ratou tuatua i taakaakaʼi te ngakau o te au tangata ra, e kua akameitakiia ratou e te Atu, e kare atura te tamaki e te maro i tupu ki roto ia ratou ra, e ope roa ake nga mataiti e ā ra.

21. I na, mei taku i tuatua ake nei, kia tae ki te openga o te ngauru ma iva o te mataiti, kua au akera ratou ia ratou uaorai, e no atu rai i te au i rotopu ia ratou uaorai, e no atu i to ratou inangaro i te au, kua maroia ratou kia tamaki ki te ngati Lamana to ratou au taeake.

22. E kare i kore ta ratou angaanga tamaki no tetai tuatau roa ki te ngati Lamana.

23. E teianei e tangi maata to ratou me rave ratou i te au apinga tamaki kia tamaki atu ki te ngati Lamana, kare oki ratou e mareka i te akamaringianga toto, e kare ko te reira anake ua, kua mii ratou i te tono anga i to ratou au taeake e manganui ki vao ake i teianei ao ki te ao mutu kore, ma te papa kore i te aravei atu i te Atua.

24. Kare ra i tika ia ratou kia oronga atu i to ratou ora kia taiaia ta ratou au vaine, e ta ratou au tamariki i te au ravenga kino e te rikarika a tei karangaia ana e, e au taeake no ratou, e kua aere ke mei ta ratou akonoanga, e kua akaruke ia ratou, e tei piri atu ki roto i te ngati Lamana, ei akapou ia ratou.

25. Kare e tika ia ratou kia akakoromaki i te rekareka o to ratou au taeake i te toto o te ngati Niphai i akamaringiia ra, e ka vai ei ki te aronga tei akono i te au akaueanga a te Atua ra, e ko teia oki te taputou a te Atua, koia oki, me ka akono ratou i te au akaueanga a te Atua, ka manuia ratou i runga i te enua.