1. E teianei, i te tae anga teia episetole kia Moronai, kua maroiroi iora tona ngakau, e ma te ki katoa i te rekareka maata no te akarongo o Pahorana, e kare katoa oki aia i riro ei pikikaa i te akatupu anga i te au o te enua.

2. E kua mii maata tikai aia no te kino o te aronga tei tuaru ia Pahorana mei te nooanga akava ra, no te aronga tei orurueau i to ratou enua e to ratou Atua katoa.

3. Kua rave iora a Moronai i tetai pupu tangata meangiti ona, kia tau ki te inangaro o Pahorana, ma te akaue atu ia Lihai e Teanekuma kia akaaere atu i te toenga o te nuku, ma te aere atu ki te enua ko Kitiona.

4. E kua akatu katoa aia i te reva o te au no atu e, eaa te ngai ta ratou ka tomo, e kua rave katoa aia i te nuku tei rauka iaia kia rave i tona aereanga ki te enua ko Kitiona.

5. E tauasani iora tei takiruru mai ki raro i tana ra reva, ma te rave katoa i ta ratou koke ei paruru i to ratou au, kia kore oki ratou e riro ki te tuikaaanga.

6. E kia akaputuputu maira a Moronai i te au tangata tei rauka mai iaia i tona aereanga, kua aere maira aia ki te enua ko Kitiona i te taokotai i tona nuku, ki to Pahorana, e kua riro mai ïa ei mea maroiroi tikai, e maroiroi atu i te au tangata o Pakati, koia oki te ariki o te aronga orureau tei tuaru atu i te au tangata inangaro au mei te enua atu ko Zarahemela, e kua rave oki i taua enua ra.

7. E i na, kua aere atu a Moronai raua ko Pahorana ki raro ma to raua nuku ki te enua Zarahemela, e kua aere katoa atu ki te oire, e kua aravei atu i te au tangata o Pakati, e kua aere katoa mai ratou kia tamaki.

8. E i na, kua tamateia a Pakati, e kua apainaia atu tona au tangata ei mou auri, e kua akaoki akaouia a Pahorana ki tona nooanga akava.

9. E kua akavaia te au tangata o Pakati kia tau ki te ture, e pera katoa te au tangata inangaro ariki tei tiriaia ki roto i te are auri, e kua tamateia rotou kia tau ki te ture, e ko te au tangata o Pakati, e te au tangata inangaro ariki tei kore i rave i te au apinga tamaki ei paruru i to ratou enua, ina ra, ka tamaki atu i te reira, kua tamateia.

10. E mea tau rava oki kia akono meitakiia taua ture ra, ei meitaki no to ratou enua ra, e me kitea ake tetai i te pikikaa anga i to ratou au, ka akautunga vivikiia ïa kia tau ki te ture.

11. E ope akera te toru ngauru o te mataiti i te tutaraanga o te au akava ki rungao i te au tangata o Niphai. E kua akaoki mai oki a Moronai, e Pahorana i te au ki te enua ko Zarahemela ki to ratou uaorai iti tangata, e kua tamate atu i te tangata tei kore e inangaro i te au.

12. E tae akera ki te akamataanga o te toru ngauru ma tai o te mataiti i te tutaraanga te au akava ki rungao i te au tangata o Niphai kua akaue viviki atura a Moronai kia tukuia atu tetai kai, e pera katoa tetai nuku e ono tauasani tangata kia tonokia atu kia Hilamana ei tauturu iaia i te mou anga i taua pae o te enua ra.

13. E kua akaue katoa aia kia tonokia atu tetai nuku e ono tauasani tangata e ma tetai putunga kai maata ki te nuku o Lihai e Teanekuma. Kua raveia oki teia ei paruru i te enua mei te ngati Lamana ra.

14. Kua akaruke maira a Moronai e Pahorana i tetai urupu tangata maata ki te enua ko Zarahemela, e kua aere atura raua e tetai urupu maata katoa ki te enua ko Niphaiha, ma te akakoroanga kia tuaru i te ngati Lamana mei taua enua ra.

15. E i to ratou aereanga atu ki te enua, kua rave mai ratou i tetai urupu tangata maata o te ngati Lamana, ma te tamate atu ia ratou e manganui, ma te rave katoa mai i ta ratou kai, e pera katoa ta ratou au apinga tamaki.

16. E i muri ake i to ratou rave anga atu i te reira, kua akaue atura ratou ia ratou kia papau i tetai koreromotu koia oki, kare rava ratou e rave akaou i te au apinga tamaki ka tamaki atu ei i te ngati Niphai.

17. E oti akera ia ratou i te papau i taua koreromotu ra, kua tonoia atura ratou kia noo ma te au tangata o Amona ra, e mei te a tauasani o ratou tei kore i taiaia.

18. I muri ake i to ratou tono anga atu ia ratou, kua akamata akaou ratou i to ratou tere ki te enua ko Niphaiha. E tae akera ratou ki te enua ko Niphaiha, kua pātū iora ratou i to ratou au puakapa ki te enua papu i Niphaiha i vaitatao ki te oire ko Niphaiha.

19. E teianei, kua inangaro a Moronai kia aere mai te ngati Lamana ki vao e tamaki mai kia ratou i runga i te enua papu, ina ra, kua kite oki te ngati Lamana i to ratou maroiroi maata, ma te kite katoa i te maata ia ratou, e no reira, kua mataku ratou i te aere mai ki vao ia ratou ra, e no reira oki ratou i kore ei i aere mai ki vao e tamaki ia ratou i tau rā ra.

20. E po iora, kua aere atura a Moronai na roto i te poiri o te po, e kua kake atura ki runga i patu ma te akarakara atu e, tei teea tuanga o te enua te ngai i noo ei te ngati Lamana e to ratou nuku.

21. Tei te pae oki ratou i te itinga o te ra i vaitatao ki te ngutupa ra, e kua varea pouroa ia ratou e te moe. E kua oki atura a Moronai ki tona au nuku, ma te akaue atu kia teateamamao viviki ratou i tetai au taura ketaketa, e tetai au arakakenga, ei tuku atu ki raro mei te take mai o te patu ki roto i te aua.

22. E kua akaue atura a Moronai i tona au tangata kia aere atu ki runga i te patu e ma te tomo atu ki roto i taua oire i te pae opunga o te ra ki te ngai tei kore te ngati Lamana i noo ana ma to ratou au nuku.

23. E kua ekeeke pouroa atu ratou ki roto i te oire i te po ma ta ratou au taura pakari e te arakakenga, e tae iora ki te popongi anga, tei roto pouroa ratou i te aua o te oire.

24. E teianei, i te ara anga mai o te ngati Lamana ma te kite e, tei roto te nuku o Moronai i te aua, kua mataku tikai ratou, e kua oro atura na te ngutupa ra.

25. E kite akera a Moronai e te oro atura ratou na mua iaia, kua akaue atura aia i tona au tangata kia aere e tamaki atu ia ratou, e kua taiaia ratou e manganui, e kua koropini atu ia ratou e manganui. E kua rave katoa ia ratou ei au mou auri, e ko te toenga o ratou kua oro atu ratou ki te enua ko Moronai i te pae tai ra.

26. E kua na reira oki a Moronai e Pahorana i te rauka anga i taua oire ra ko Niphaiha, e kare rava tetai tangata i mate, e manganui oki to te ngati Lamana i taiaia.

27. E teianei, e manganui oki te mou auri o te ngati Lamana tei inangaro i te piri atu ki te au tangata o Amona, e kia riro mai ei au tangata rangatira.

28. E ko tei inangaro ra, kua orongaia atu mei tei tau ki ta ratou i anoano.

29. E no reira, kua piri katoatoa te au mou auri o te ngati Lamana ki te au tangata o Amona, e kua akamata i te angaanga ma te maroiroi i te akapuapinga anga i te enua, ma te akatupu i te au tu ua sitona, e te au tu anana manu ravarai, e kua akakoreia te apainga teimaa a te ngati Niphai, e kare e manamanata akaou i te au mou auri o te ngati Lamana.

30. E kia rauka maira ia Moronai te oire ra ko Niphaiha, e kua rave oki aia i te au mou auri e manganui i meangiti mai ei te nuku o te ngati Lamana, e kua rauka katoa mai iaia te au tangata Niphai tei apaina tuikaaia, e kua riro ei akamaroiroi i te nuku o Moronai, e no reira, kua aere atu a Moronai mei te enua atu ko Niphaiha, ki te enua ko Lihai.

31. E kite akera te ngati Lamana e, te aere mai nei a Moronai i te tamaki ia ratou, kua mataku akaou akera ratou, e kua oro atura mei mua atu i te nuku o Moronai.

32. E i na, kua arumaki .atura a Moronai e tona nuku ia ratou mei tera oire ki tera oire, e kua araveiia maira ratou e Lihai raua ko Teanekuma, e kua oro atu te ngati Lamana mei mua atu ia Lihai raua ko Teanekuma ki te kotinga i te pae tai, e tae rava atu ki te enua ko Moronai.

33. E kua akaputuputu oki te au vaeau o te ngati Lamana ki te ngai okotai, e kua riro oki ratou ei okotai i roto i te enua ko Moronai. E tei reira katoa a Amorona te ariki o te ngati Lamana.

34. E kua noo iora a Moronai, e Lihai, e pera katoa a Teanekuma ma to ratou au nuku katoa, ma te takapini i te kotinga o te enua ko Moronai, e kua takapini katoa te ngati Lamana i te kotinga i te pae i te metepara i te pae i apatonga, e i te pae katoa i te kokotinga i te pae i te metepara i te itinga.

35. E kua noo ratou i taua po ra, E i na, kua roiroi oki te ngati Niphai e te ngati Lamana katoa no te mamao o to ratou aereanga, e no reira, kare rava ratou i akatupu i tetai ravenga akavare i taua po ra, mari ua ra ko Teanekuma, no te mea kua riri tikai aia ia Amorona, e kua manako oki aia e, na Amorona e Amelikaia tona taeake i akatupu i taua tamaki maata ra ki rotopu ia ratou e te ngati Lamana ra, e kua tupu oki te tamakianga maata e te akamaringianga toto, e te onge katoa.

36. Kua aere atura a Teanekuma ma tona riri maata ki roto i te ngai o te ngati Lamana, e kua kake atura aia na runga i te patu o te oire ra. E kua aere atura aia ma te taura, mei tetai ngai ki tetai ngai, e kitea atura e ïa te ariki, e kua ko iaia ki te korare, e kua puta atu ki te pae rava i tona pukuatu. Ina ra, kua akaara te ariki i tona au tavini i mua ake ka mate ei aia, e kua arumaki atu ratou ia Teanekuma e kua ta iaia.

37. E kite akera a Lihai e Moronai e kua mate a Teanekuma, kua taitaia iora raua, i na, koia oki te tangata tei tamaki ana no tona enua, e e oa piri tikai oki aia no te au, e kua akakoromaki ana oki aia i te au tumatetenga e manganui, Ina ra, kua mate aia, e kua aere na te ara o to teianei ao.

38. E i tera mai ra, kua aere atura a Moronai e tamaki i te ngati Lamana, e kua ta oki ratou ma te mate maata, e kua tuaru oki ratou ia ratou mei runga i te enua ra, e kua oro atu ratou e kare rava ratou i oki akaou atu kia tamaki i te ngati Niphai.

39. E ope akera te toru ngauru ma tai o te mataiti i te tutaraanga o te au akava ki rungao i te au tangata o Niphai, e manganui oki ta ratou tamaki, e te akamaringianga toto, e te onge, e te tumatetenga no tetai au mataiti e manganui.

40. E kua tupu oki te ta tangata, te tauetono, te akakino e te au tu ara katoatoa i roto i te ngati Niphai, ina ra, no te tuatua tika, e no te pure a te aronga tuatua tika i oraʼi ratou.

41. I na, no te roa o te tamaki anga i rotopu i te ngati Niphai e te ngati Lamana e manganui tei ketaketa, no te roa i te tamakianga, e manganui katoa tei apikepike no to ratou au tumatetenga, e kua taakaaka ratou ia ratou uaorai ki mua i te Atua ma te akaaka tikai.

42. E i muri ake i to Moronai paruru anga i taua au tuanga o te enua ra tei vaitata atu ki te ngati Lamana, e kia ketaketa meitaki oki, kua oki atu aia ki te enua ko Zarahemela, e kua oki katoa atu a Hilamana ki tona ipukarea, e kua akatinamou akaouia te au ki rotopu i te au tangata o Niphai.

43. E kua oronga atu a Moronai i te akaaere i tona au nuku ki roto i te rima o tana tamaiti e ko tona ingoa oki ko Moroniha, e kua oki atu aia ki tona ngutuare kia noo oki aia ma te au i te toenga o tona au ra.

44. E kua oki atura oki a Pahorana ki tona nooanga akava, e kua akamata akaou a Hilamana i te ako atu i te tuatua a te Atua ki te au tangata ra, e no te au tamakianga e te maro, i riro ei e mea tika kia akanoo akaouia tetai akatikatikaanga ki roto i te akonoanga.

45. E no reira, kua aere atura a Hilamana e tona au taeake i te ako atu i te tuatua a te Atua ma te mana maata, i te akakite anga atu ki te tangata, e kua tataraara iora ratou i ta ratou au ara, e kua bapetizoia ki te Atu to ratou ra Atua.

46. E kua akatinamou akaou ratou i te akonoanga a te Atua ki roto i te au enua ravarai.

47. E kua akamouia tetai akatikatikaanga kia tau ki te ture. E kua ikiia to ratou au akava e te au akavanui katoa.

48. E kua akamata akaou te au tangata o Niphai i te puapinga i runga i te enua, e kua uangaia ma te maroiroi tikai i runga i te enua, e kua riro oki ratou ei aronga apinga nui.

49. E no atu oki e to ratou apinga nui, me kore to ratou maroiroi me kore to ratou puapinga, kare rava ratou i akateitei i te reira ma te ngakau parau, e kare katoa ratou i marie i te akamaara i te Atu to ratou Atua, ina ra, kua taakaaka ratou ia ratou uaorai ki mua iaia.

50. E kua akamaara katoa ratou i te au mea mamaata ta te Atua i rave no ratou, e kua akaora oki aia ia ratou mei te mate mai, e te tuikaaanga e te mou auri katoa.

51. E kua pure putuputu atu ratou ki te Atu to ratou Atua, e kua akameitaki mai oki te Atua ia ratou kia tau ki tana tuatua, kia maroiroi oki ratou ma te manuia i runga i te enua.

52. E kua oti anake teia au mea katoa i te raveia, e kua mate atu a Hilamana i roto i te toru ngauru ma rima o te mataiti i te tutaraanga o te au akava ki rungao i te au tangata o Niphai.