1. I roto i te ono o te mataiti i te tutaraanga o te au akava ki runga i te au tangata o Niphai, e kare oki e tamaki e e pekapeka i roto i te enua ko Zarahemela.

2. Ina ra, kua tumatetenga maata te au tangata no tei mate to ratou ai taeake, e pera katoa oki no te mate o ta ratou au anana manu, e pera katoa no ta ratou one sitona, tei takatakaiia, e tei takinga kinoia e te ngati Lamana.

3. Kua tumatetenga maata tikai ratou, e kua mii te au tangata katoatoa, kua irinaki katoa ratou e, ko te akavaanga teia a te Atua tei tukunaia mai kia ratou no ta ratou angaanga kino, e ta ratou ara, i reira kua akaaraaraia ratou kia akamaara i ta ratou angaanga.

4. E kua akamata akaou ratou i te akatumu i te akonoanga ki tona kikianga tikai, e manganui oki tei bapetizoia ki roto i te vai ko Sidona, e kua piri mai ki te akonoanga a te Atua, e kua bapetizoia ratou e te rima o Alama, tei akatakaia ei taunga teitei no te au tangata o te Akonoanga e tona metua ko Alama.

5. E i na, i roto i te itu o te mataiti i te tutaraanga o te au akava, mei te toru tausani e rima anere tangata tei piri mai ki te Akonoanga a te Atua e kua bapetizoia. E ope akera nga mataiti e itu i te tutaraanga o te au akava ki runga i te au tangata o Niphai, kua tupu rai te au i taua au tuatau katoa ra.

6. E i roto i te varu o te mataiti i te tutaraanga o te au akava ra, kua akamata te au tangata o te akonoanga i te ngakau parau, no te mea kua apinga nui ratou, mei to ratou kakau tirika, e to ratou kakau paoeoe, e no te maata i ta ratou au anana manu, e ta ratou auro, e te ario, e te au tu apinga memeitaki katoatoa tei rauka mai na roto i ta ratou angaanga, e kua riro oki teia ei mea ngakau parau na ratou, e kua akamata ratou i te aao i te au kakau oko maata.

7. I na, kua riro tikai teia ei taitaia maata kia Alama, e pera katoa ki te au tangata ta Alama, e akataoonga ei au puapii, e e au taunga, e e ereta no te Akonoanga, e maata oki ratou tei mii no te kino ta ratou i kite ki rotopu i to ratou iti tangata.

8. Kua kite oki ratou ma te taitaia maata e, te akamata nei te au tangata o te Akonoanga i te rave i to ratou tu ngakau parau, e kia tamou katoa i to ratou ngakau ki runga i te au mea e apinga nui ei, e ki te au mea kino o te ao nei, kia akamata ratou i te riri tetai ki tetai, ma te takinga kino atu i te aronga tei kore i ariki mai i to ratou anoano.

9. E i roto rai i te varu o te mataiti, i te tutaraanga te au akava, kua tupu tetai pekapeka ki rotopu i te au tangata o te akonoanga, kua tupu te tauetono, te maro, manako kikino, e te takinga kino, te ngakau parau, e maata ua atu ki te aronga tei kore i roto i te akonoanga a te Atua.

10. E ope akera te varu o te mataiti i te tutaraanga o te au akava, e kua riro te kino maata o te akonoanga ei toka turorianga ki te aronga tei kore i piri mai ki te akonoanga, e i reira kua akamata te akonoanga i te paruparu i tona tupuanga.

11. E i te akamataanga o te iva o te mataiti, kua kite a Alama i te kino maata o te akonoanga, e kua kite katoa aia e, ko te akaraanga o te akonoanga, kua riro te reira ei arataki i te aronga irinaki kore ki tetai mea viivii, ma te akatupu i te mate ki te tangata.

12. Kua kite aia i te kino maata ki rotopu i te au tangata, te akateitei ra tetai pae ia ratou ma te ngakau parau, ma te akakino atu i tetai ke, te uri anga atu i to ratou mokotua ki tei ngere, e te takaua, e tei pongi e tei kaki vai, e tei maki, e tei mii katoa.

13. Kua riro tikai teia ei taitaia maata ki te tangata, e tetai pae te taakaaka ra ia ratou uaorai e te tauturu ra ia ratou tei ngere i te tauturu, mei te oronga anga atu i to ratou apinga na tei ngere e tei putaua, e te angai anga atu i tei pongi, e te akakoromaki i te au tu kino ravarai no te Mesia nei, te ka oki mai mei tei totouia mai e te vaerua ra.

14. I te akara tamou anga atura ki taua au rā ra, e rauka ei te tataraara anga o ta ratou au ara, ma te ki katoa i te rekareka no te tuakaouanga o tei mate ra, kia tau oki ki te mana, e te tika, e te tataraanga a Iesu Mesia i te au tapeka o te mate ra.

15. E i na, i te kiteanga a Alama i te tu kino i tukuia ki runga i te au tavini maru o te Atua, e te au takinga kino tei akaputuia ki rungao ia ratou e te toenga o tona au tangata, ma te kite i to ratou au kino ravarai, kua taitaia tikai aia, ina ra, kare te Vaerua o te Atua i akaruke iaia.

16. E kua iki oki aia i tetai tangata pakari i roto i te au ereta o te akonoanga, ma te oronga atu i te mana kiaia kia tau ki te reo o te au tangata, kia rauka oki iaia te mana kia maani i te au ture, kia tau ki te au ture tei orongaia mai ra, ma te taangaanga atu i te reira ki te kino e te ara a te tangata nei.

17. E ko te ingoa o teia tangata nei ko Niphaiha, koia oki tei ikiia ei akavanui, e kua noo oki aia ki runga i te terono o te akavaanga ei akava ma te akaaere i te au tangata.

18. Kare ra oki a Alama i oronga atu kiaia i te taoonga o te taunga teitei o te akonoanga, kua vao ra aia i taua taoonga taunga teitei ra kiaia uaorai, ina ra, kua oronga atu aia i te terono o te akavaanga kia Niphaiha.

19. Kua rave oki aia i teia, kia rauka iaia i te aere atu ki rotopu i tona iti tangata, me kore ra, ki te au tangata o Niphai, kia tutu atu oki i te tuatua a te Atua kia ratou, ei akaaraara na ratou i ta ratou angaanga, e kia rauka oki iaia i te uuti mai ki raro no roto i te tuatua a te Atua, i te ngakau parau, e te riri, e te au manamanata ravarai o tona iti tangata, e kare oki ana mataara ke e raukaʼi iaia i te ako atu ia ratou, mari ua ra, na roto i te ako anga atu i tona kite papu tikai kia ratou.

20. E no reira i roto i te akamataanga o te iva o te mataiti i te tutaraanga te au akava ki rungao i te iti tangata o Niphai, kua oronga atu a Alama i te terono akavaanga kia Niphaiha, ma te akono atu iaia ki te mana kautaunga tapu o te Atua, ki te kite o te tuatua tei tau ki te vaerua o te eeuanga e te totou.