1. E teianei, e taku tamaiti, e maata atu taku ka tuatua atu kia koe, e i taku i tuatua atu ki to tuakana, e i na, kare ainei koe i kite i te tu tika o to tuakana, e tona tu akono meitaki ki te au akaueanga a te Atua, i na, kare ainei aia i tuku mai i tetai akaraanga meitaki noou?

2. E kare oki koe i akarongo meitaki ki taku tuatua mei to tuakana ra i rotopu i te au tangata ngati Zoroma ra. E teianei, teia taku tuatua patoi kia koe ra, kua aere rai koe ma te akapaapaa i toou uaorai maroiroi e toou uaorai pakari.

3. E kare e ko teia ua e taku tamaiti. Kua rave oki koe i te au mea tau kore kiaku, e kua akaruke koe i te angaanga apii evangelia ra, e kua aere koe ki roto i te enua ko Sirona e ki roto i te au ope o te ngati Lamana, i te aru anga i te vaine akaturi ko Isabela.

4. E kua akaariu ke aia i te ngakau o te au tangata e manganui, e kare rava e tika kia pera koe e taku tamaiti. E mea tau kia rave koe i te angaanga i orongaia atu kia koe.

5. Kare koe i kite e taku tamaiti e, e mea viivii teia ki mua i te mata o te Atu, e ko te ara maata atu ïa i te au ara katoa, koia oki, ko te ta tangata, e te akakino i te Vaerua Tapu.

6. E i na, me akakino koe i te Vaerua Tapu e vai ra ki roto ia koe, e te kite ra koe e te rave nei koe i te reira, i na, ko te ara matara kore te reira, e te ta tangata ma te patoi i te marama e te kite o te Atua, kare e rauka ngoie iaia te akakoreanga no tana ara, e te karanga atu nei au kia koe, e taku tamaiti, kare e rauka ngoie iaia te akakoreanga ara.

7. E teianei e taku tamaiti, naringa kare koe i tarevake i teia au ara maata. Kare au e inangaro i te tuatua atu no taau au ara, kia akakino i toou ngakau, mei te mea e kare e riro ei meitaki noou.

8. Ina ra, kare e rauka ia koe i te uuna i taau au ara mei te Atua e me kore koe e tataraara ka riro ïa ei akaapaanga noou me tae ki te rā openga ra.

9. E teianei e taku tamaiti, te inagaro nei au kia tataraara koe e kia akaruke atu i taau au ara, e kia kore koe e aru akaou i te inangaro o to mata ra, e akataka ke ia koe mei teia au mea nei, e me kore koe e rave i teia kare koe e o ki te basileia o te Atua. E akamaara koe kia akataka ke mai ia koe mei teia au mea nei.

10. E te akaue atu nei au ia koe, kia rave koe i teia, ma te ui atu i to ai tuakana i te au angaanga taau ka rave ra, i na, te vai ou ua rai koe, e mea tika oki kia turuia koe e to ai tuakana ra. E akarongo meitaki ra koe i ta ratou ka ako atu kia koe na.

11. Auraka koe e tuku ua ia koe kia arataki keia e te au mea puapinga kore e te neneva ra, auraka e akatika i te tiaporo kia arataki ke i toou ngakau ma te aru akaou i taua vaine akaturi ra. E i na, e taku tamaiti, e manganui tikai toou au tarevake i akatupu ki te ngati Zoroma ra, e i to ratou kite anga i toou tu, kare rava ratou i reira e irinaki mai ki taku tuatua.

12. E te tuatua mai nei te vaerua o te Atu i roto iaku e, E akaue atu i to au tamariki kia rave ratou i te angaanga meitaki, e te arataki ke nei ratou i te ngakau o te au tangata e manganui ki te mate, e no reira te akaue atu nei au ia koe, e taku tamaiti, kia mataku i te Atua ra, e kia akaruke koe i te rave i taau au angaanga kino ra.

13. Kia ariu mai koe ki te Atu ma toou manako katoa, e toou ririnui, e toou maroiroi katoa, e auraka koe e arataki ke akaou i te ngakau o te au tangata kia rave i te au mea kikino, ina ra, e oki koe kia ratou e e aaki i taau au ara e te kino taau i rave.

14. Auraka e kimi i te au mea e apinga nui ei koe e te au mea puapinga kore o te ao nei, e i na, kare koe e apai i te reira me mate koe.

15. E teianei e taku tamaiti, te tuatua atu nei au kia koe no te taeanga mai o te Mesia, i na, te karanga atu nei au e, koia tikai oki te ka aere mai kia apai ke i te ara a to teianei ao, e ka tae mai oki aia i te apai mai i te tuatua mataora e te ora ki tona ra iti tangata.

16. E teianei, e taku tamaiti, ko teia oki te angaanga i kapikiiaʼi koe, kia akakite i teia tuatua mataora ki teia au tangata, kia akapapa i to ratou ngakau, e ka tae mai te ora kia ratou ra, e kia akateateamamao katoa ratou i te ngakau o ta ratou au tamariki kia akarongo ki te tuatua me tae ki tona aereanga mai.

17. E teianei, ka akakore au i te teimaa o toou ngakau, te umere nei koe i te mea, e kua kiteaia taua mea ra i mua ake ka tupu ei. Te karanga atu nei au kia koe e, kare ainei e ko to te Atua ïa inangaro i tetai vaerua i teia tuatau kia aiteite ki tetai i te tuatau ka aere mai ei aia?

18. Kare ainei i te mea tika ki akakiteia teia ravenga ora ki teia nei aronga, e pera katoa ki ta ratou au tamariki?

19. Kare ainei i te mea ngoie ua i teia tuatau nei kia unga mai te Atu i tana au angela kia akakite mai i teia au tuatua mataora kia tatou e ki ta tatou au tamariki, i muri ake i te tuatau o tona taeanga mai?