1. E teianei, e taku tamaiti, e tuatua taku kia koe no te akaokianga mai tei tuatuaia ana, e i na, kua taruri ke tetai pae tangata i te tuatua tei tataia, e no reira kua aere ke ratou. E te papu nei iaku e kua taitaia toou manako no teia au mea nei. Ina ra, ka akamarama atu au kia koe.

2. Te karanga atu nei au kia koe, e taku tamaiti kua tau meitaki te ravenga o te akaokianga ki te tuatua tika a te Atua, e mea tau meitaki oki, e te tika, mei tei tau ki te mana e te tuakaouanga o te Mesia, kia kapiti akaou te vaerua o te tangata ki tona kopapa, e kia akaoki akaouia te au mero ravarai ki tona tu tikai.

3. E kua tau oki ki ta te Atua ra tuatua tika e, kia akautungaia te au tangata mei tei tau ki ta ratou uaorai angaanga i rave ra, e mei te mea, e meitaki ta ratou angaanga i teia oraanga nei, e meitaki katoa te inangaro o to ratou ngakau, e ka akaokiia ratou i te rā openga ki te au mea meitaki ra.

4. E mei te mea e e kino ta ratou angaanga, ka akaokiia rai ratou ki te mea kino. E no reira, ka akaokiia te au mea katoatoa ki tona tu tikai, ka tuakaou te kopapa pe ua ei kopapa pe kore, te mea pe ua ei mea pe kore, e akatu akaouia te reira ki te rekareka mutu kore, kia noo ki te basileia o te Atua ra, me kore ra ki te mamae mutu kore, kia noo ki te basileia o te tiaporo, tetai ki tetai tua, e tetai, ki tetai tua ïa.

5. Ka akatuia tetai ki te rekareka, kia tau ki tona inangaro i te rekareka e te meitaki, mei tei tau ki tona ra inangaro i te meitaki, e tetai pae ki te kino mei tei tau ki tona inangaro i te mea kino, e mei tana oki i anoano i te rave i te mea kino mei te popongi e po ua ake, mei te reira katoa oki e raukaʼi iaia tana utunga kino me tae ki te po.

6. Kua pera katoa ki tetai tua. Me tataraara aia i tana au ara, ma te anoano atu i te tuatua tika e tae rava atu ki te openga o tona ra puke rā, ka pera katoaia aia i te tutaki angaia ki te tuatua tika.

7. Ko te aronga teia tei akaoraia e te Atu, e ko teia oki te aronga tei rave keia, e tei akaoraia i taua po poiri mutu kore ra, no reira, ka tu ratou, me kore ra, ka inga, e i na, ko ratou rai to ratou au akava, me ka rave ratou i te kino me e meitaki.

8. E teianei kua akanoonooia te au akaueanga a te Atua, e kare e rauka kia akatukeia, e no reira kua akateateamamaoia te mataara, e ko te tangata tei inangaro i te aere na reira e ora ïa.

9. E i na, e taku tamaiti, auraka rava koe e rave i tetai mea kia akaapa atu i te Atua no runga i te au tuatua taau i akatika ake nei, e apaʼi koe.

10. Auraka koe e manako e, no te mea e kua tuatuaia ana no te akaokianga e, ka akaokiia mai koe mei te ara ki te rekareka. I na, te karanga atu nei au kia koe, kare rava te angaanga viivii i te rekareka mou.

11. E teianei, e taku tamaiti, ko te au tangata e vai i te pae kopapa nei, me kore ra, te karanga nei au e, ko te aronga tei aru i te au inangaro tau kore o te kopapa nei, tei roto ratou i te vaarua kavangu e te tapekaanga o te ara, e kua ngere ratou i te Atua i te ao nei, e kua aere ke ratou mei te inangaro o te Atua, e no reira, tei roto ratou i te ao rekareka kore.

12. E i na, ko te aiteanga ainei teia o te tuatua akaokianga mai, koia oki, ko te rave anga i te mea o tona tu tikai e te akariro anga i te reira ei mea tuke mei tona tu tikai?

13. E taku tamaiti, kare e ko te tu teia, ko te aiteanga oki o te akaokianga mai, koia oki, ko te akaokianga mai i te kino ei kino, e te mea no te kopapa nei, ei mea kopapa, e te mea no te tiaporo ei mea tiaporo, ei meitaki no te mea meitaki, te tuatua tika no te au mea tuatua tika, te tika ki te mea tuatua tika, te aroa, ei aroa.

14. E no reira, e taku tamaiti, kia aroa koe i to au taeake e akaaere ia ratou ma te au, akava ma te tika, e ma te rave ua atu rai i te meitaki kia ratou, e me rave koe i teia au mea nei, ka rauka toou tutaki, e ka akaoki akaouia mai te aroa ua kia koe, e ka akaoki akaouia mai te tika kia koe, e te akavaanga tika, e te tutaki meitaki katoa kia koe.

15. Ko taau ka tuku atu, ka oki mai rai te reira kia koe, e ka akaokiia mai, e no reira, na te tuatua e, akaokianga mai, e akaapa mai i te aronga rave ara, e kare rava ïa e akatikaia e tuatau ua atu.