1. I na, kua riro akera te enua ko Ieresona ei noo anga no te au tangata o Amona ra, kua tuaru keia te ngati Lamana ki vao i te enua, e kua tanumia to ratou aronga i mate e te au tangata o te enua.

2. Kare oki i tareia to ratou aronga i mate no te maata roa, e kare katoa i tareia to te ngati Niphai i mate. E oti akera to ratou au tangata i mate ra i te tanumia e ratou, e i muri ake katoa i te au ra akakoreanga kai, e te mii, e te pure, (Ko te ngauru ma ono ïa o te mataiti i te tutaraanga te au akava ki rungao i te au tangata o Niphai,) kua tupu te au ki roto i te enua.

3. E kua akono meitaki te tangata i te au akaueanga a te Atua, kia tau ki te ture a Mose, e kua apiiia oki ratou kia akono i te ture a Mose, e kia tae ki te tuatau e akatupuiaʼi te reira.

4. E kare atura e pekapeka i tupu i rotopu i te au tangata i roto i te ngauru ma ono mataiti i te tutaraanga o te akava ki rungao i te au tangata o Niphai.

5. E tae akera ki te mataiti tai ngauru ma itu, i te tutaraanga te au akava te vai rai te au.

6. Tei te openga o te mataiti tai ngauru ma itu, kua tae mai tetai tangata ki te enua ko Zarahemela, e Patoi-Mesia oki aia, e kua akamata atura oki aia i te ako atu i te au tangata i te patoi anga atu i te au totou tei tuatuaia mai e te au peroveta ra, no te taeanga mai o te Mesia ra.

7. Kare atura e ture no runga i te irinakianga o tetai tangata, e mea tau kore ïa i te au akaueanga a te Atua kia vai tetai ua atu ture tei akatupu i te tu aiteite kore i rotopu i te tangata nei.

8. Kua na ko mai te irava e, e akataka ana kotou i teia nei ra, i ta kotou ka akamori.

9. E teianei, me e inangaro tetai tangata kia akamori i te Atua, ko tona tikaanga rai ïa; me kore ra, me kua irinaki aia i te Atua, ko tona tika ïa kia akamori iaia, me kore ra aia e irinaki iaia ra, kare te ture e akaapa iaia.

10. Ina ra, me ta tangata aia, e utunga mate tona, e me aru aia, ka akautunga katoaia aia, e me keia aia, ka akautunga katoaia aia, e me akaturi aia, ka akautunga katoaia aia, e no tei a au ara nei, kua akautungaia ratou.

11. Te vai ra oki tetai ture ka akautungaia te tangata no ta ratou au ara. Kareka ra, kare e ture tei akaapa mai i te irinaki o te tangata nei, e no reira, kua akautungaia te tangata nei no te ara tana i rave, e no reira kua aiteite te tangata katoatoa.

12. E ko teia patoi-Mesia, koia oki ko Korihora te ingoa, (e kare e rauka i te ture i te mou iaia) kua akamata aia i te ako atu i te tangata e, kare e Mesia. E kua na reira aia i te akoanga atu i te na ko anga e,

13. E kotou, ko tei tapekaia ki raro ake i te tatarianga neneva, e te puapinga kore ra, eaa kotou i tapekaʼi ki raro ake i tena au mea neneva na? Eaa kotou i tiaki ei i te Mesia? No te mea, kare rava e tangata e kite i te au mea te ka tupu a muri ake.

14. I na, ko teia au mea ta kotou e manako nei e, e totou, e ta kotou oki e karanga nei e na te au peroveta tapu i tuku mai, i na, ko te au tuatua neneva anake ia tei tukuia mai e to kotou ai tupuna.

15. Eaa kotou i kite ei e, e tuatua tika te reira? Kare e tika ia kotou kia akara ki te au mea kitea koreia e kotou na, e tenana, kare rava e tika ia kotou kia kite e, e Mesia tetai.

16. Te akara atea ua atu nei kotou ki te mataraanga o ta kotou au ara. Ina ra, no te ngakau neneva te reira, ko te manako neneva ïa no te au tuatua e te au peu kikino a to kotou ai tupuna, tei arataki ia kotou kia akarongo i te au mea pikikaa ra.

17. E kua maata atu oki te au mea mei te reira te tu, tana i akakite atu kia ratou ra, i te akakite anga atu kia ratou e, kare rava e tarangaara e orongaia mai no te ara a te tangata nei, te manuia ra te tangata katoatoa i teia oraanga nei mei tei tau ki tana i akono i te kopapa nei, e no reira te puapinga ra te tangata mei tei tau ki tona pakari, e te riro katoa ra te re i te tangata kia tau ki tona maroiroi, kia rave oki te tangata i to ratou inangaro, kare te reira i te ara.

18. E i akapera ana oki aia i te ako anga atu ia ratou, i te akaariu ke anga atu i te ngakau o te tangata e manganui. kua akateitei oki ratou i to ratou au upoko i ta ratou au tuatua tika kore, i te arataki ke anga i te au vaine e manganui e te tane katoa oki i te akaturi e ma te akakite atu e, me mate ana te tangata ko te openga rai ïa.

19. E kua aere atura taua tangata nei ki te enua ko Ieresona, kia ako atu i taua mea nei ki te au tangata o Amona ra, no te ngati Lamana ratou i te taime i mua.

20. Kua maata atu to ratou pakari i to te au tangata e manganui o te ngati Niphai, no te mea, kua rave atu ratou iaia e kua tapekapeka iora, e kua apai atura ratou iaia ki mua ia Amona ra, ki te taunga maata i rungao i taua au tangata ra.

21. Kua akaue atura aia kia apai keia atu taua tangata ra mei taua enua ra. Kua tae maira aia ki te enua ko Kitiona, akamata iora aia i te ako atu i te reira au tangata, kare ra i manuia i reira, no te mea, kua opuia aia e kua tapekapekaia, e kua aratakiia atu ki mua i te taunga maata, e ki te akavanui o te enua.

22. E kua tuatua atura te taunga maata kiaia, Eaa te tumu i aere ei koe i te akatarevake i te au ravenga a te Atu? Eaa ra koe i apii ei i teia au tangata e, kare e Mesia, i te akakino i to ratou rekareka? Eaa koe i patoi ei i te au totou a te au peroveta tapu ra?

23. E ko te ingoa o te taunga teitei ko Kidona. E kua pau maira a Korihora kiaia na ko maira, Te akapera nei au no te mea kare au i apii i te au tuatua neneva a to kotou ai metua ra, e no te mea kare au i apii i te iti tangata kia tapeka ratou ia ratou uaorai ki raro ake i te au tuatua neneva e te au peu puapinga kore i tukuia maira e te au taunga taito ra, kia rauka ia ratou te mana e te tikaanga ki rungao ia ratou, kia vai ua rai ratou ki roto i te kite kore, e kia kore oki ratou e akateitei i to ratou upoko ki runga, kia kauraro ra ratou i taau au tuatua.

24. Te na ko ra kotou e, ko te au tangata teia tei rauka te au, I na, te karanga atu nei au kia kotou e, tei roto ratou i te tuikaaanga. Te na ko ra oki kotou e, e au tuatua tika anake te au totou i te tuatau taito ra. I na, te karanga atu nei au e, kare kotou i kite me e tika.

25. Te na ko ra kotou e, e au tangata ara tei inga no te ara a tetai metua. I na, te karanga atu nei au e, kare a te tamariki ara, no tona nga metua ra.

26. E te na ko ra kotou e, ka tae mai te Mesia, ina ra, te karanga atu nei au e, kare kotou i kite e, ka tae mai te Mesia. Te na ko katoa ra kotou e, ka taiaia aia no te ara a to teia nei ao.

27. Te na reira ra kotou i te arataki ke anga i teia iti tangata ki te au mataara neneva o to kotou ra au metua, tei tau oki i to kotou ra au inangaro, e te tuku ra oki kotou ia ratou ki raro mei te tuikaa ra, e kia kai oki kotou i te puapinga o to ratou rima, e kia kore e tika ia ratou kia akara atu ma te mataku kore, kia kore oki ratou e rekareka i to ratou au tikaanga.

28. Kua mataku oki ratou i te rave i ta ratou uaorai, ko te riri aea to ratou au taunga ia ratou, ko tei akateimaa ia ratou ki te zugo mei tei tau i to ratou inangaro, e kua maani oki ia ratou kia irinaki, i ta ratou au peu, e ta ratou moemoea, e ta ratou au tuatua puapinga kore, e ta ratou au orama, e ta ratou au tuatua muna, e me kore ratou e rave mei ta ratou i tuatua mai, ka akariri tetai mea kitea koreia mei ta ratou i tuatua, ko te Atua, tei kore rava i kiteaia ana, tei kore i vai ana, e te ka kore oki e vai e tuatau ua atu.

29. E kite akera te taunga maata e te akava maata i te ketaketa o tona ra ngakau, e kite atura oki ratou e, ka patoi aia i te Atua, kare atura ratou i pau atu i tana tuatua kua akaue atu ra ratou kia tapekaia aia, tuku atura ratou iaia ki te rima o te aronga taoonga, e kua akaunga atura iaia ki te enua ko Zarahemela kia apainaia atu oki aia ki mua ia Alama e te akava maata, ko tei tutara ki runga i te enua katoa ra.

30. E kua apainaia aia ki mua i te aroaro o Alama, e te akava maata ra, kua tamou rai aia mei te tu rai tana i rave i te enua ko Kitiona, te mou katoa ra aia i te akakno i te Atua.

31. E kua akatupu atura aia i te au tuatua kino ki mua ia Alama, i te akakino i te au taunga e te au puapii, e kua akaapa pikikaa maira aia ia ratou na ko maira, te arataki ke ra ratou i te au tangata ki te au peu neneva a to ratou ra ui tupuna, kia kai ratou i te puapinga a te au tangata.

32. Kua tuatua atura a Alama kiaia, te kite ra koe e, kare matou i noinoi ana i te angaanga a teia nei aronga. E i na, kua angaanga oki au mei te akamataanga mai o te tutaraanga o te au akava e teia noaʼi, e kua angaanga tikai toku rima i oraʼi au nei, e no atu te maata o toku au aaereanga na te au enua ravarai i te akakite atu i te tuatua a te Atua ki toku iti tangata.

33. E maata katoa oki taku angaanga i rave no te akonoanga, kare rava i rauka iaku te senine okotai, no te angaanga taku i rave ana, e kare oki a toku ra au taeake moni i rauka, mari ua ra no te angaanga, akavaanga, e mei tei tau ki taua moni i rauka ia ratou ra no te ture e no to matou taime.

34. E teianei, me kore e rauka mai ia matou tetai moni no ta tatou angaanga i roto i te akonoanga, eaa ïa to matou puapinga kia angaanga matou na te akonoanga, mari ra, kia akakite atu matou i te tuatua mou kia rauka oki ia matou te rekareka e te rekarekaanga o to matou au taeake?

35. Eaa oki koe i tuatuaʼi e, te ako nei matou i teia aronga kia rauka mai tetai tutaki no matou, e kua kite tikai oki koe e, kare a matou tutaki? E teianei, te irinaki ainei koe e kua pikikaa matou i teia aronga, kia ki oki to ratou ngakau i te rekareka?

36. E kua pau maira a Korihora kiaia e, Ae.

37. Kua tuatua atura a Alama kiaia e, Te irinaki ainei koe e Atua tetai.

38. E kua pau maira aia e, kare.

39. E kua tuatua atura Alama kiaia, ka patoi akaou ainei koe i te Atua e pera katoa i te Mesia? E i na, te karanga atu nei au kia koe na e, kua kite oki au e, e Atua tetai, e pera katoa ka aere mai te Mesia.

40. Eaa oki toou kite e, kare e Atua e me kore ra, kare te Mesia e aere mai? Te karanga atu nei au kia koe e, kare aau, mari ra, taau tuatua.

41. Ina ra oki, ko te au mea katoatoa e kite ia noku e, e tika teia au mea nei, e kua rauka oki ia koe te au mea ravarai ei kite e kua tika teia au mea nei, e ka patoi ainei koe e kua tika teia au mea nei?

42. I na, te kite nei au e, te irinaki nei koe, tei roto ra ia koe te vaerua pikikaa e kua kopae atu koe i te vaerua o te Atua, kia kore o te vaerua ngai e noo ei i roto ia koe, e mana ra oki to te tiaporo ki rungao ia koe na, e te arataki ra oki aia ia koe na te au ngai ravarai, ma te rave i te au angaanga pikikaa, kia mate te au tamariki a te Atua ra.

43. E kua tuatua maira a Korihora kia Alama e, me ka akakite mai koe kiaku i tetai akairo kia kite au e, e Atua rai tetai, e kia akakiteia mai kiaku e, e mana tona, ei reira au e irinaki ei e, e tuatua tika taau.

44. Kua tuatua atura a Alama kiaia, kua rava oki taau akairo; ka timata ainei koe i toou Atua? Ka karanga ainei koe e, e akaari mai i tetai akairo kiaku, mei te mea e, tei ia koe te kite no teia au mea katoatoa no toou au taeake e pera katoa no ta te au peroveta tapu ra? Kua tukuia mai te au tuatua tapu ki mua ia koe na, e kua akakite meitaki mai te au mea katoatoa e, e Atua tetai; ko te enua nei e te au mea katoa i runga i te enua ra, e te tu o te takaanga o te au etu, na te reira i akakite mai e, te vai ra Tei Anga i te au mea katoatoa.

45. E te aere ainei rai koe i te akaariu ke i te ngakau o teia au tangata, ma te akakite atu kia ratou e, kare e Atua? E ka patoi i teia au kite nei? Kua na ko atura aia e, Ae ka patoi au, kia akaari roa mai ra koe i tetai akairo kiaku.

46. Kua tuatua atura a Alama kiaia, I na, kua taitaia au no te marokiakia o toou ngakau, e ka patoi oki koe i te vaerua o te tuatua mou kia mate oki toou vaerua.

47. Ina ra, e ngari ake kia riro ke toou vaerua, e i te arataki ke koe i teia aronga ki raro i te mate na roto i te au tuatua pikikaa, e te au tuatua taparu katoa, e no reira me ka patoi akaou koe, ka taumaa te Atua ia koe e ka murare oki koe, e kare koe e rauka akaou i te tuatua, kia kore oki koe e pikikaa akaou i teia aronga.

48. Kua na ko atura a Korihora kiaia e, kare au e karanga e, kare e Atua, ina ra, kare au e irinaki ana e e Atua tetai, e kua karanga katoa atu au e, kare koe i kite e, e Atua tetai e me kore koe e akaari mai i tetai akairo kare rai au e irinaki.

49. E kua na ko atura a Alama kiaia, ko teia taku akairo ka oronga atu kia koe, ka murare koe, mei taku i tuatua ake nei e te tuatua nei au na roto i te ingoa o te Atua, kia murareia koe, e kare rava oki koe e tuatua akaou.

50. E oti akera a Alama i te tuatua atu i teia au tuatua, kua murare a Korihora, e kare aia e rauka akaou i te tuatua, mei tei tuatuaia e Alama.

51. E kite akera te akava maata i tei tupu, kua akatoro iora aia i tona rima, e kua tata atura kia Korihora, na ko atura, Te irinaki ainei koe e, e mana to te Atua? I inangaro ei koe kia akaari mai a Alama i te akairo kia koe. Kua inangaro ainei koe kia akamamae katoaia atu tetai aronga ke, kia akakite i te akairo kia koe? I na, kua akaari atu aia i te akairo kia koe, e teianei ka patoi atu ainei koe?

52. Kua akatoro atura a Korihora i tona rima ma te tata atu na ko atura, kua kite au e, kua murareia au e kare au e rauka akaou kia tuatua, e kua kite au e kare e mea ke atu mari ra ko te mana o te Atua tei akapera mai kiaku, e kua kite katoa ana au e, e Atua tetai.

53. Ina ra, na te tiaporo i pikikaa mai iaku, e kua tae mai ana aia kiaku mei te tu o te angela, ma te na ko mai kiaku e, ka aere ana ka akaariu mai i teia aronga, kua aere ke oki ratou ki tetai Atua kitea koreia. E kua na ko maira aia kiaku, kare e Atua, e kua apii aia iaku i taku ka tuatua atu, e kua apii katoa au i te reira, no te mea, kua mareka te kopapa nei e kua manuia atura au e kua irinaki tikai au e, e tika, e no reira oki au i patoi ei i te tuatua mou, e tae rava mai nei teia taumaa maata ki rungao iaku nei.

54. E oti akera aia i te tata i te reira, kua pati atura aia kia Alama kia pure atu aia ki te Atua kia peke atu te taumaa i runga iaia.

55. Ina ra, kua karanga atura a Alama kiaia, me akataka keia ake teia taumaa ia koe, ka akaariu ke akaou rai koe i te ngakau o teia aronga nei, e no reira ei rungao ia koe mei ta te Atua e inangaro.

56. E kare atura te taumaa i rave keia ia Korihora, kua tuaruia ra oki aia, e kua aere atura aia mei tera are ki tera are i te patipati kai nana.

57. I na, ko te angaanga tei tupu kia Korihora kua rongoia te reira i roto i te enua katoatoa, e kua tuku katoaia atu te tuatua akakite e te akava maata ki te au tangata katotoa i roto i taua enua ra, i te akakite anga atu ki te au tangata tei irinaki ki te tuatua a Korihora, e kia tataraara viviki ratou ko te tae aea mai taua kino maata ra kia ratou.

58. E kua kitea uaia te ara a Korihora e ratou, e kua akaariu ratou katoatoa ki te Atu, e kua akaoti te reira i te ara ta Korihora i rave ra. E kua aere atura a Korihora mei tera are i te patipatianga i tetai kai nana.

59. Kua aere atura aia ki rotopu i tetai aronga tangata, ki tetai tei akataka keia ratou mei te ngati Niphai, e kua kapikiia ratou e, e ngati Zoroma. kua aratakiia aia e tetai tangata ko Zoroma tona ingoa, e kia aere aia ki rotopu ia ratou, i na, kua u aia e kua inga ki raro, kua takatakaiia e te vaevae tangata e mate atura.

60. E te kite nei tatou i te openga o te tangata tei taruri ke i te ravenga a te Atu, e te kite nei oki tatou e, kare te tiaporo e tauturu i tana tamariki me tae ki te rā openga, ka arataki viviki ra aia ia ratou ki raro ia ade.