1. Ko te au tangata Niphai tei kore i mate i te tamakianga, kia oti ia ratou i te tanu i tei matemate, e kare i tarēia mai te aronga i mate no te maata roa ia ratou. I muri ake i te tanumanga o tei mate, kua oki atu ratou ki to ratou enua, ki to ratou ngutuare, ki ta ratou au vaine e te tamariki.

2. E manganui oki te au vaine e te tamariki tei tamateia ki te koke, e maata katoa ta ratou au anana manu, e te au one kai i takinga kinoia, no te mea kua takatakaiia e te urupu tangata.

3. E i na, e manganui oki to te ngati Lamana e te ngati Amelikai tei mate i te nia o te kauvai ko Sidona, e tei tiriaia ki roto i te vai i Sidona e to ratou au ivi, tei raro ia i te takere o te moana e e manganui oki.

4. Kua taka oki te ngati Amelikai mei te ngati Niphai, no te mea, kua akairo oki ratou i to ratou au rae ki te akairo muramura, mei tei matauia e te ngati Lamana, e kare ra ratou i mangore i to ratou au upoko mei te ngati Lamana.

5. E kua varuia te upoko o te ngati Lamana e kua vai taaka ua ratou mari ra e pakiri manu tei tatuaia ki to ratou taukupu, e pera katoa ta ratou rakei tamaki tei tatuaia kia ratou, e te ana, e te kakao, e ta ratou toka, e te maka e tetai atu.

6. E pakiri kerekere oki to te ngati Lamana kia tau oki ki te akairo tei tukuia ki runga i to ratou ai metua, koia oki e taumaa no ratou, no te marokiakia ia ratou i te rave ara, e te kino ki to ratou ai taeake, koia oki kia Niphai, e Iakoba, e Iosepha, e Samu, ko ratou oki te au tangata tika e te tapu.

7. E kua kimi oki to ratou ai taeake kia tamate atu ia ratou, e no reira kua taumaaia ratou e kua tuku mai oki te Atua i tetai akairo ki rungao ia ratou, e ki runga katoa ia Lamana e Lemuela, e te au tamaroa katoa a Isemaela.

8. Kua tupu oki teia, kia taka ta ratou uanga mei te uanga a to ratou ai taeake, ei reira oki e raukaʼi i te Atua i te akaora mai i tona iti tangata, kia kore oki ratou e kairo ma te irinaki i te au akaaereanga tarevake te ka riro mai ei mate no ratou.

9. E no reira, ko tei kapiti i tona uanga ki te ngati Lamana, kua apai mai aia i te taumaa ki runga i tana uanga.

10. E no reira, ko te aronga tei inangaro i te aru i te ngati Lamana ka kapikiia ki taua upoko ra, e e akairo oki te ka tukunaia ki runga i tona upoko.

11. E ko te aronga tei kore e irinaki ki te akonoanga a te ngati Lamana, ina ra, e irinaki ki te au akapapaanga tei apainaia mai mei Ierusalema mai, e pera katoa ki te papaanga o to ratou ai metua, ko te mea tika ïa, e tei irinaki ki te au akaueanga a te Atua ma te akono katoa, ko ratou oki tei karangaia e ko te ngati Niphai, me kore ra, ko te iti tangata Niphai mei reira mai, e teia noaʼi.

12. E ko ratou oki teia tei akono i te au papaanga tika o to ratou iti tangata, e pera katoa ki te iti tangata Lamana.

13. I na, ka oki akaou ki te ngati Amelikai, e akairo to rungao ia ratou, koia te akairo muramura i runga i to ratou rae.

14. E kua tupu oki te tuatua a te Atua, e ko teia oki te au tuatua tana i tuatua atu kia Niphai, i na, ka oronga au i tetai akairo ki rungao ia ratou kia taka oki ratou e ta ratou uanga mei ia koe e taau uanga, e teia nei e tuatau ua atu, mari ra, kia tataraara ratou i to ratou au tu kino, ma te ariu mai kiaku, kia raukaʼi iaku i te akameitaki atu ia ratou.

15. E ka tuku akaou atu au i tetai akairo ki runga iaia tei kapiti i tana uanga ki ta toou ai taeake, kia taumaa katoaia ratou.

16. E ka tuku akaou atu au i te akairo ki rungao iaia te ka tamaki maira ia koe e taau uanga.

17. E te karanga atu nei au kia koe, ko te ka akaruke ia koe, kare rava e kapiki akaouia e, e uanga naau, e ka akameitaki au ia koe, e tei karangaia e, e uanga naau e teianei e e tuatau ua atu, e teia oki te au taputou a te Atu kia Niphai e ki tana uanga.

18. E kare rava oki te ngati Amelikai i kite e, te akatupu nei ratou i te tuatua a te Atua i to ratou akamataanga i te akairo i to ratou rae, kua akamata ra ratou i te akakino atu i te Atua, e kua tau oki e kia tukunaia mai te taumaa ki rungao ia ratou.

19. E teianei, te anoano nei au kia kite kotou e, kua tae te taumaa kia ratou, e te au tangata katoatoa tei taumaaia, tei iaia rai tona akaapaanga.

20. Kare i maata roa te au rā i muri ake i te tamaki tei raveia ki te enua ko Zarahemela e te ngati Lamana e te ngati Amelikai, kua aere katoa mai tetai nuku vaeau ke o te ngati Lamana ki te iti tangata Niphai ki taua ngai rai i aravei ei te nuku mua i te ngati Amelikai.

21. Kua unga katoaia atu tetai nuku vaeau ei tuaru atu ia ratou mei to ratou enua atu.

22. E no te mea oki e kua puta a Alama i te tamakianga, e kare aia i aere ana ki te tamaki i teia nei ki te ngati Lamana.

23. Ina ra kua tono atu aia i tetai nuku maata kia ta ia ratou, e e manganui oki to ratou i pou i te mate, e kua tuaru atu i te toenga o taua aronga ra ki vao i taua enua ra.

24. I reira, kua oki atu ratou i te akatupu i te au ki runga i taua enua ra, e kare oki ratou i pekapeka akaou ana no to ratou enemi.

25. I na, kua rave pouroaia teia au mea nei, e kua tupu teia au tamaki e kua akamutu atu rai i roto i te rima o te mataiti i te tutaraanga o te au akava.

26. I roto i te mataiti okotai, kua oki atu ki te ao mutu kore, e tausani e te ngauru o te tausani tangata tei oki atu kia kokoti i ta ratou au tutaki kia tau ki ta ratou angaanga i rave, no atu e kino, e no atu e meitaki, kia rauka oki te mataora mutu kore, me kore ra, te mamae mutu kore kia tau ki te vaerua, ta ratou i akarongo e i akono, mei te mea, e vaerua meitaki, me e kino.

27. Ka rauka i te au tangata katoatoa te tutaki kia tau ki te tangata tana i akarongo ana, e i akono, kia tau oki ki te tuatua a te vaerua o te totou, kia tau rai oki te reira ki te tuatua mou. E ope akera nga mataiti e rima o te tutaraanga o te au akava.