1. E teianei, e taku tamaiti e Hilamana, te akaue atu nei au ia koe kia rave koe i te papa tuatua tei tukuia mai kiaku.

2. E te akaue katoa atu nei au ia koe kia tata i tetai papa tuatua no teia iti tangata nei, mei taku i tata ra ki runga i te papa a Niphai, e kia akatapu i teia au mea nei mei taku i akono ra, e mei taku i akono ra, no tetai akakoroanga puapinga oki ratou i akonoiaʼi.

3. E teia papa veo nei, tei runga i te reira te au kotikotianga tapu, ko tei akakite mai i te akapapaanga o to tatou ai tupuna mei muatangana mai.

4. E i na, kua totouia e to tatou ai metua e, ka akonoia ratou e ka tukuia atu oki ki tera uki ki tera uki, e ka akonoia oki e te rima o te Atua e tae rava atu ki te tuatau e tukuia atu ei ki te au enua katoa, e te au reo, e te au kopu, e te au iti tangata, kia kite oki ratou i te au tuatua ngaro i roto ra.

5. E i na, me akono meitakiia taua au papa ra, ka vai rai to ratou kanapanapa, i na, ka vai atu rai to ratou kanapanapa e ka pera katoa oki te au papa tei vairanga i te au tataanga tapu.

6. Ka manako paa koe e, e mea neneva te reira kiaku nei, ina ra, te karanga atu nei au kia koe na, na roto i te mea iti e te mama ua e akatupuiaʼi te au mea maata, e na te au mea rikiriki e taakama atu i te aronga pakari ra.

7. Te angaanga katoa nei te Atu ko te Atua na roto i te au ravenga kia akatupu i tona au akakoroanga mamaata e te mutu kore, e na roto i te au ravenga rikiriki e taakama atu ei te Atua i te aronga pakari ra, e ka akatupu oki aia i te akaoraanga no te au tangata e manganui.

8. E teianei, i mua ake nei, kua inangaro te Atua kia akono meitakiia teia au mea nei, i na oki, te akamaata ra te reira i te manako o teia aronga, e kua akakite mai kia ratou e manganui i ta ratou au ara, e kua arataki maira ia ratou ki te kite o te Atua e tae roa atu ki te ora o to ratou vaerua.

9. I na, te karanga atu nei au kia koe, naringa kare teia au mea i tataia ki roto i teia papa tuatua, kare e rauka ia Amona e tona ra au taeake i te akaariu mai i te tausanianga o te ngati Lamana mei te au tuatua pikikaa tei tukuia mai e to ratou ai metua, e na teia au papa tuatua, e na ta ratou au tuatua i arataki mai ia ratou ki te tataraara, i na, kua aratakiia mai ratou ki te kite o te Atu to ratou Atua, e kia rekareka ia Iesu Mesia to ratou Akaora.

10. Koai oki tei kite e, ka riro paa te reira ei ravenga i te arataki anga mai ia ratou e manganui, e to ratou au taeake ngakau ketaketa e manganui ra, e ko te ngati Niphai te akaketaketa nei i to ratou ngakau ki roto i te kino e te akono kore i te kite o to ratou Akaora.

11. E teianei, kare taua au tuatua ngaro i akakite papuia mai kiaku nei, no reira, otira ua.

12. E ka rava ua paa me karanga au e, kua akonoia taua au papa ra no tetai akakoroanga pakari, ko te Atua anake oki tei kite i taua akakoroanga ra e te akaaere ra oki aia ma te pakari ki rungao i tana au angaanga, e tika oki tona au mataara, e ko tona aereanga e mea mutu kore ïa.

13. E akamaara, e akamaara, e taku tamaiti e Hilamana i te pakari o te au akaueanga a te Atua. Kua na ko mai oki aia e, me akono kotou i taku au akaueanga ka manuia kotou i runga i te enua, me kore ra kotou e akono i tana au akaueanga, ka tipuia kotou mei mua i tona aroaro.

14. E teianei, e akamaara e taku tamaiti kua oronga mai te Atua i teia au mea tapu kia koe, e nana oki i akono i te reira e i akatapu, e nana katoa i akono ei vairanga no tetai akakoroanga pakari nana ra, kia tika iaia kia akaari mai i tona ra mana ki te uki a muri ake.

15. E teianei, te tuatua atu nei au kia koe, ma te vaerua o te totou e, me akaapa koe i te au akaueanga a te Atua, i na, ko teia au mea tapu nei ka rave keia ïa mei ia koe e te mana o te Atua, e ka tukuia atu koe kia Satani, kia pueu ke atu koe mei te ota e pueu ke atu i te matangi ra.

16. Ina ra, me akono koe i te au akaueanga a te Atua, e kia rave oki koe i teia au mea tapu nei mei ta te Atu i akaue mai kia koe, (e kia pati oki koe ki te Atua i te au mea taau ka rave ra e tau ei) i na, kare rava e rauka i te mana o te ao nei, e to ade i te rave atu i te reira mei ia koe, tei te Atua oki te mana kia akatupu i tana ra tuatua.

17. E ka akatupu pouroa oki aia i te au tuatua tana i taputou atu kia koe na, e kua akatupu katoa aia i tana au taputouanga tana i oronga mai ki to tatou ai metua.

18. Kua taputou mai oki aia kia ratou e, ka vai meitaki ua teia au mea nei no tetai akakoroanga puapinga iaia ra, e kia akaari mai aia i tona mana ki te uki a muri ake.

19. E teianei, kua akatupu aia i tetai akakoroanga, koia oki, i te akaokianga mai i te au tangata Lamana e manganui ki te kite o te tuatua mou, e kua akaari mai oki aia i tona mana kia ratou, e ka akakite katoa mai aia i tona mana kia ratou ki te au uki a muri ake, e no reira, ka vai meitaki rai ratou.

20. E tenana, te akaue atu nei au ia koe e taku tamaiti e Hilamana, kia maroiroi koe i te akatupu anga i taku tuatua, e kia maroiroi oki koe i te akono anga i te au akaueanga a te Atua mei tei tataia ra.

21. E teianei, ka tuatua atu au kia koe no nga papa e rua ngauru ma ā, kia akono koe, kia akakiteia ki teia iti tangata nei i te au mea ngaro, e te angaanga poiri ra, e ta ratou au angaanga muna, koia oki, ko te angaanga muna a taua aronga i akakoreia ra, kia akakiteia ta ratou ta tangata, e ta ratou keia, e te aru, e ta ratou au angaanga kino e te viivii ki teianei iti tangata e kia akono meitaki koe i teia uri reo.

22. I na, te akara maira oki te Atu, ki tona ra au tangata i to ratou rave anga i te angaanga poiri, kua rave ngaro oki ratou i te ta tangata e te au angaanga viivii, e kua karanga mai oki te Atu e, me kore ratou e tataraara ka akapouia ratou i te enua nei.

23. Kua na ko maira te Atu, ka akapapa au i tetai toka na taku tavini ra ko Katelema, te ka marama i te poiri ei turama e kia akakite atu au ki toku ra au tangata tei tavini mai iaku nei i te angaanga a to ratou au taeake, koia oki, ta ratou au angaanga ngaro, e ta ratou angaanga poiri e te viivii.

24. E teianei, e taku tamaiti, kua akapapaia teia uri reo nei ei akatupu i te tuatua a te Atua i te na ko anga mai e,

25. Ka apai mai au mei te ngai poiri mai ki te marama ta ratou au angaanga ngaro e te viivii, e me kore kotou e tataraara, ka takore au ia ratou mei te ao nei, e ka akaari mai au ki te marama i ta ratou au angaanga muna e te viivii ki te au enua ravarai te ka noo ki te enua a muri atu.

26. E teianei e taku tamaiti, te kite nei tatou e, kare ratou i tataraara, e no reira, kua akapouia ratou, e kua tupu te tuatua a te Atua, e kua akakiteia mai te marama ta ratou au angaanga poiri, e kua kite oki tatou.

27. E teianei, e taku tamaiti, te akaue atu nei au ia koe, kia tāpū koe i ta ratou au taputou, e ta ratou ture, e ta ratou akatikaanga, i roto i ta ratou au angaanga viivii, e ta ratou au akairo, e te piri, auraka kia tukuia atu ki teia iti tangata nei, kia kore oki ratou e kite, ko te topa aea ratou ki roto i te poiri, e ko te mate aea.

28. I na, te vai nei tetai taumaa i runga i te enua, e ka tae mai te mate ki te katoatoa o te aronga rave angaanga poiri, kia tau ki te mana o te Atua, e kia tae ki te tuatau e tau ei ratou i te mate no to ratou kino, e te inangaro nei au kia kore teia nei aronga e tamateia.

29. E no reira, e tāpū marie koe i teia au ravenga muna nei e te taputou, mei teia iti tangata nei, e ka akakite mai oki koe i ta ratou au ara, e te ta tangata e te au mea viivii, e ka apii oki koe ia ratou kia rikarika i taua kino ra, e te angaanga kikino, e te ta tangata, e apii katoa atu koe ia ratou e, kua tamateia teia aronga nei no to ratou au tu kino, e te au angaanga viivii e ta ratou ta tangata.

30. E i na, kua ta ratou i te au peroveta a te Atu tei aere mai i te akakite mai kia ratou i to ratou au tarevake, e ko te toto o te aronga i taiaia ra, kua kapiki atu te reira ki te Atu, to ratou Atua kia akaoko mai i te aronga i ta ia ratou ra, e kua tae mai te akaapaanga a te Atua ki rungao i te aronga rave angaanga poiri ra, e te au angaanga muna e te viivii ra.

31. E ka taumaaia te enua nei e tuatau ua atu i te aronga rave angaanga poiri e te kikino ra, e mate ua atu ratou, kia tataraara rava ra ratou i mua ake ka ki ei ratou i te ara.

32. E teianei e taku tamaiti, e akamaara i te au tuatua taku i tuatua atu kia koe, auraka e tuku atu ki teia iti tangata nei i teia au ravenga muna nei, ina ra, e apii atu kia ratou i te riri mutu kore no te kino e te ara.

33. E ako atu ia ratou kia tataraara, ma te akarongo ki te Atu ko Iesu Mesia, apii atu ia ratou kia maru ma te akaaka o te ngakau, apii atu ia ratou kia autu i te au timataanga a te tiaporo, ma to ratou akarongo ki te Atu ko Iesu Mesia.

34. Apii atu ia ratou kia kore e roiroi i te au angaanga meitaki, ina ra, kia akaaka te ngakau, e ka rauka oki te akangaroianga no to ratou vaerua.

35. E akamaara, e taku tamaiti e apii i te pakari i toou ou anga, e apii i toou ou anga ra i te akono i te au akaueanga a te Atua.

36. E pati atu ki to Atua kia tauturu mai aia ia koe i te au mea ravarai, e te au mea katoa taau e rave ra, kia riro ïa na te Atu, e te au ngai taau ka aere ra, kia riro ïa no te Atu, kia riro toou manako e na te Atu e akaaere, e kia tuku oki koe i te aroa o toou ngakau ra ki runga i te Atu e tuatau ua atu.

37. E ui atu ki te Atu i te au mea ravarai taau ka rave, e nana e arataki ia koe ki te meitaki, e me takoto koe ki raro i te po, e takoto ma te pure atu ki te Atu, kia tiaki mai aia ia koe i toou moeanga, e me tu mai koe ki runga i te popongi, kia ki oki toou ngakau i te rekareka ma te akameitaki atu i te Atua e me rave koe i teia, ka akateiteiia koe me tae ki te ra openga.

38. E teianei, e taku tamaiti, e tuatua taku ka tuatua atu kia koe no runga i te apinga ta to tatou ai metua i karanga, e poro, me kore, e kaveinga e kua kapiki to tatou ai metua e, e Liahona, ko tei uriia e ko te kaveinga, e na te Atua oki i akateateamamao i te reira.

39. E i na, kare rava e rauka i te tangata kia rave i te angaanga tuke mei te reira te tu. E i na, kua akapapaia te reira, kia akakite atu ki to tatou metua i te kaveinga ka aere ei ratou na roto i te metepara.

40. Kua angaanga oki te reira kia tau ki to ratou akarongo ki te Atua ra, no reira, kia irinaki ratou ma te akarongo e, ka akatano te Atua i taua nga auri meangiti ra ki te ngai e aereia e ratou ra, i na, kua tupu oki te reira, e no reira, kua riro teia ei semeio kia ratou e e manganui atu oki te semeio tei raveia e te mana o te Atua i tera ra, e i tera ra.

41. E no tei raveia teia au semeio nei na roto i te au ravenga iti, i na, kua akakiteia mai i tetai au angaanga umere maata kia ratou. Kua kope ra ratou, e te ngaropoina i te taangaanga i to ratou akarongo e te maroiroi, e ko taua au angaanga umere ra, kua ngaro ke, e kare to ratou tere i aere ki mua.

42. Kua noo ratou ki roto i te metepara, koia oki, kare i aere tika atu, e no ta ratou au ara i mate ei ratou i te pongi e te kaki vai.

43. E teianei, e taku tamaiti, te inangaro nei au kia kite koe e, e taipe te reira au mea, e kua kope oki to tatou au metua i te akono i teia kaveinga nei, (i na, e au mea teia no te kopapa nei,) i kore ei ratou i akameitakiia, koia katoa ïa i to te vaerua.

44. I na, e mea ngoie ua i te akarongo ki te tuatua a te Mesia, te ka akakite mai kia koe i te mataara tika e tae atu ei ki te rekareka mutu kore, koia katoa ïa, e mea ngoie ua no to tatou au metua kia akarongo ki teia kaveinga nei, te ka akakite mai kia ratou te ara tika e tae ua atu ei ki te enua taputou.

45. E teianei, te karanga atu nei au e, kare ainei te reira i te taipe? Mei ta teia kaveinga tikai i arataki mai i to tatou au metua i te aru anga i taua akakiteanga ra ki te enua taputou, ka na reira oki te tuatua a te Mesia ra i te arataki anga ia tatou kia o atu mei teia nei ngai kino ki tetai ngai meitaki roa atu.

46. E taku tamaiti, auraka tatou e kope no te mama ua o te ara, kua na reira oki to tatou au metua, kua tukuia mai oki te ravenga kia ratou, e me akara ratou, ka oraia ratou, e pera katoa kia tatou. Kua akateateamamaoia te ara, e me akara tatou, ka ora tatou e tuatau ua atu.

47. E teianei e taku tamaiti, kia akono meitaki koe i teia au mea tapu, koia oki kia akara ki te Atua e oraʼi. E akakite atu ki teia iti tangata i teia tuatua ma te akono meitaki. E taku tamaiti, kia orana koe.