1. Kua tae maira tetai episetole kiaku mei i te ariki maira ko Amorona i te na ko anga mai e, me ka oronga atu au i te au mou auri o te tamaki tei rauka mai ia matou, ka oronga mai aia i te oire ko Anitipara kia matou.

2. Ina ra, kua tuku atu au i tetai episetole ki te ariki ma te akapapu atu e, kua rava to matou au nuku i te rave mai i te oire ko Anitipara, e kia tuku atu matou i ta matou au tuikaa ei taui no taua oire ra, kua riro ia matou mei te neneva ra.

3. E kua patoi mai a Amorona i taku episetole, e kare oki aia e inangaro i te taui mou auri, e no reira, kua akateateamamao matou no te aere atu ki te tamaki ki te oire ko Anitipara.

4. I na, kua akaruke atu te au tangata o Anitipara i te oire, e kua oro atu ki tetai au oire ke o ratou tei peke mai ia ratou kia paruru ia ratou; e kua peke mai te oire ko Anitipara ia matou.

5. E ope akera te rua ngauru ma varu o te mataiti i te tutaraanga o te au akava.

6. E i te akamataanga o te rua ngauru ma iva o te mataiti i raukaʼi ta matou kai e pera katoa kua maata mai te au tangata ki to matou nuku mei te enua mai ko Zarahemela, e mei te au enua e pini ua ake, e kua taenaia ki te ono tausani tane, ma te ono ngauru tamaroa a te ngati Amona tei aere mai ma te piri atu ki to ratou au taeake koia oki taku pupu e rua tausani. E i na, e maroiroi oki matou, e maata katoa te kai tei apainaia mai kia matou.

7. E kua inangaro oki matou kia tamaki atu ki te au nuku tei akanooia ei tiaki i te oire ko Kumeni.

8. E teianei, ka akakite atu au kia kotou e, kua tupu to matou inangaro, i na, kua aere to matou nuku ririnui e me kore ra, tetai pae o to matou nuku, e kua koropini katoa matou i te po i taua oire ra ko Kumeni, i mua ua ake ka raukaʼi ta ratou kai.

9. E kua noo iora matou ki roto i te au puakapa takapini i te oire i tetai au po, e kua moe oki matou ki rungao i ta matou au koke ma te tiaki anga kia kore te ngati Lamana e aere mai i te po e tamate ia matou, mei ta ratou i tamata ana i te au taime e manganui, ina ra, kia tamata ratou, kua maringi to ratou toto.

10. Kare i roa rava atu, kua apainaia mai ta ratou kai, e kua vaitata oki ratou i te tomo ki roto i te oire i taua po ra. E ko matou, kare i te ngati Lamana, e ngati Niphai ra e no reira, kua apai matou ia ratou e ta ratou kai atu.

11. E no atu e kua tipu keia te ngati Lamana mei to ratou tauturu, kua maroiroi rai ratou i te mou anga i taua oire ra, e no reira, kua rave matou i taua kai ra ma te akau atu i te reira ki Iudea, e ta matou au mou auri katoa ki te enua ko Zarahemela.

12. Kare i maata rava te au rā i topa ki muri mai i ngaro ei te au manako o te ngati Lamana e, ka rauka i te tauturu, e no reira kua tuku mai ratou i te oire ki roto i to matou rima, e kua manuia akera to matou inangaro kua peke iora te oire ra ko Kumeni ia matou.

13. E no te maata i ta matou au mou auri e no atu e kua maata rava atura to matou tangata kua inangaroia to matou nuku katoatoa ei tiaki no ratou e me kore ra, kia taiaia ratou.

14. E i na, kua pueu ratou ki te pupu maata, e ka tamaki atu ma te toka, e ma te rakau e te tu mea ravarai ta ratou ka rave mai ki to ratou rima e kua ta matou e rua tausani tangata, e i muri ake kua tuku ratou te au, e kia riro oki ratou ei au mou auri no te tamaki.

15. E no reira, kare e ravenga mari ra, kia takore i to ratou oraanga me kore, ka tiaki ia ratou ma te koke i roto i te rima ka aere ei ki raro i te enua ko Zarahemela; e kua rava ua ta matou kai na to matou au tangata no atu e kai ta matou i rave mei te ngati Lamana ra.

16. E i taua au taime manamanata ra, kua riro ïa ei mea pakari kia kite matou e, eaa ta matou ka rave ki taua mou auri ra. Ka akakoro ra matou kia arataki atu ia ratou ki te enua ra ko Zarahemela; e kua iki matou i tetai tangata o matou ei akaaere ki rungao i ta matou au mou auri kia aere atu ki raro i te enua ko Zarahemela.

17. Ina ra, i terao mai rā, kua oki mai ratou. E kare matou i ui atu kia ratou no runga i te au mou auri, e i na, kua tae mai te ngati Lamana ki rungao ia matou, e kua oki atu ratou kia kore oki matou e topa ki roto i to ratou rima. E i na, kua tuku mai a Amorona i te kai ei tauturu ia ratou e tetai nuku tangata maata katoa.

18. E kua tae taua au tangata tei tonokiaia atu ei tiaki i te au mou auri i te tamaki atu ia ratou no te mea kua vaitata ratou i te akavi ia matou.

19. Ina ra, kua tamaki toku pupu meangiti e rua tauasani e ono ngauru ma te ririnui, e kua tu oki ratou ki mua i te ngati Lamana e kua tupu te mate ki te katoatoa rava tei patoi ia ratou.

20. E vaitata akera te toenga o to matou nuku i te tuku i te au ki mua i te ngati Lamana, ina ra, ko taua rua tauasani e ono ngauru ra, mea ririnui ïa e te mataku kore.

21. I na, kua akono meitaki ratou i te au tuatua e te au akaueanga katoa ma te apa kore, e i raveia kia ratou kia tau katoa ki to ratou akarongo, e te maara katoa nei au i te tuatua ta ratou i tuatua mai kiaku e, kua apiiia ratou e to ratou au metua vaine.

22. E i na, no taku au tamaroa nei e toku au tangata katoa tei ikiia ei arataki i te au mou auri i autu ei matou ra, e ko ratou oki tei ta atu i te ngati Lamana, e no reira kua akaokiia atu ratou ki te oire ko Manitai.

23. E kua mou rai matou i to matou oire ko Kumeni, e kare rava e akapou takiriia ana ki te koke, e mate maata ra to matou.

24. E i muri ake i te oroanga o te ngati Lamana, kua akaue viviki atura au kia apainaia toku au tangata i putaputa mei roto mai i te aronga mate ma te akaue atu kia vairakauia to ratou au puta.

25. I na, e rua oki anere mei roto mai i te rua tausani e ono ngauru tei matapoiriia no tei maringi te toto, e no te meitaki oki o te Atua, e i to matou poitirere maata, e pera katoa ki to matou nuku tangata, e kare rava okotai o ratou tangata i mate. E kare rava oki tetai o ratou tei kore i puta i te au putaputa e manganui.

26. E teianei, kua riro to ratou akaoraangaia ei mea umere ki to matou nuku katoatoa, e kia akaoraia ratou, e ka taiaiaʼi to ratou au taeake e tai tausani. E kua tika rava ta matou tuatua e, no te mana maata o te Atua, e no to ratou akarongo maata i te mea tei apiiia atu kia ratou kia irinaki e, te vai nei tetai Atua tikai, e ko tei kore e ekoko ka akaoraia aia e tona ra mana maata.

27. E teianei, teia oki to ratou akarongo taku i tuatua ake nei, e mapu ou ua ratou, e e manako papu tikai to ratou, e kua irinaki tamou tikai ratou ki te Atua.

28. E oti akera ia matou i te akono i to matou au tangata i putaputa e ma te tanu i to matou tangata i matemate e pera katoa ki to te ngati Lamana i mate e manganui, i na, kua ui atura matou kia Kiti no runga i te au tuikaa ta ratou i akamata i te arataki ki raro i te enua ra ko Zarahemela.

29. I na, ko Kiti oki te rangatira maata tei ikiia ei tiaki ki rungao i te nuku i to ratou aereanga ki raro i te enua.

30. E teianei, ko teia oki te au tuatua ta Kiti i tuatua mai kiaku. I na, kua akamata oki matou i te aere ki raro ki te enua ko Zarahemela ma ta matou au mou auri. E i na, kua aravei oki matou i te au tangata tutaka o to matou au nuku, tei tonokia ia atu ki vao kia akara i te au puakapa o te ngati Lamana.

31. Kua kapiki maira ratou kia matou i te na ko anga e, i na, te aere tika mai nei te au nuku o te ngati Lamana ki te oire ko Kumeni, e i na, ka tamaki oki ratou ki reira, e ka pou to tatou au tangata.

32. E kua akarongo oki ta matou au mou auri i ta ratou kapikianga, e kua ririnui iora ratou, e kua orureau maira ia matou.

33. E no to ratou orureau, kua tamate matou ia ratou ki ta matou koke. E i na, kua oro pu ua maira ratou no atu rai ta matou koke, e kua mate iora ratou e manganui, e ko te toenga o ratou, kua oro atura mei mua atu ia matou.

34. I na, kua oro ratou e kare atura i mou ia matou, kua aere viviki atura matou ki te oire ko Kumeni, e i na, kua tae matou i te taime tikai kia tauturu i to matou au taeake i te paruru anga i taua oire ra.

35. E i na, kua akaora akaouia matou mei te rima o to matou au enemi. E kia akameitakiia te ingoa o to matou Atua e koia oki tei akaora ia matou, e tei rave i teia mea maata no matou.

36. I toku akarongo anga ko Hilamana i teia tuatua na Kiti, kua ki tikai au i te rekareka no te meitaki o te Atua i te akaora anga ia matou e kia kore matou katoatoa e mate, e te irinaki nei au e, ko te au vaerua o ratou tei mate, kua o ïa ki te akangaroianga o to ratou Atua.