1. E i na, i muri ake i to ratou akatinamouanga i tetai ekalesia ki roto i taua enua ra, kua manako te ariki ko Lamoni e, kia aru a Amona iaia ki te enua ko Niphai, kia akaari oki aia iaia ki tona metua.

2. Kua tae maira te reo o te Atua kia Amona e, auraka koe e aere ki te enua ko Niphai, no te mea ka inangaro te ariki i te tamate ia koe; ina ra, e aere koe ki te ko Mitioni, no te mea ko toou teina ko Aarona e pera katoa ko Muloki, e Ama, tei roto ratou i te are auri.

3. I te rongo anga a Amona i teia, kua karanga atura aia kia Lamoni, e i na, tei roto toku teina e toku au taeake i te are auri i Mitioni, e ka aere au ka akaora ia ratou.

4. Kua karanga atura a Lamoni kia Amona e, kua kite au e, na roto i te maroiroi o te Atu a rauka ia koe i te rave i te au mea ravarai. Ina ra, ka aru rai au ia koe ki te enua ko Mitioni no te mea ko te ariki o Mitioni ko Anitiomono tona ingoa, e taeake aia noku, no reira ka aere au ki te enua ko Mitioni, penei ake ka rauka iaku i te taparu i te ariki o te enua, penei ake ka tuku mai i toou ra au taeake mei roto mai i te are auri. Kua na ko atura a Lamoni kiaia e, Naai i akakite atu e, tei roto toou au taeake i te are auri?

5. Kua karanga atura a Amona kiaia e, kare e tangata i akakite mai ana kiaku mari ra, ko te Atua, e kua tuatua mai kiaku e, e aere e akaora i toou au taeake, tei roto oki ratou i te are auri i te enua ra ko Mitioni.

6. I te rongo anga a Lamoni i teia, kua unga atu aia i tona au tavini kia akapapa i tona au oroenua e te kariota.

7. Kua karanga atura aia kia Amona e, aere mai, ka aru au ia koe ki te enua ko Mitioni e i reira ka pati akatenga au ki te ariki kia tuku mai i toou au taeake ki vao mei roto mai i te are auri.

8. E i to Amona aereanga raua ko Lamoni, kua aravei atu raua i te papa o Lamoni koia oki te ariki o te au enua.

9. E i na, kua karanga atura te papa o Lamoni kiaia e, Eaa i kore ei koe i aere mai ki te umukai i taua ra maata i maani ei au i tetai umukai no taku au tamaroa, e no toku iti tangata?

10. Kua karanga katoa aia e, te aere nei korua kiea? Ko koe e teia tangata Niphai koia oki ko tetai o te tamariki a te pikikaa?

11. Kua akakite atura a Lamoni kiaia i tona tere, no te mea kua mataku aia i te akariri atu iaia.

12. E kua akakite atu aia kiaia i te au tumu no tona noo ua anga i roto i tona basileia e kare oki aia i aere ana ki tona papa no te umukai tana i akapapa ana.

13. E i te akakitekiteanga a Lamoni i teia au mea ki tona papa, e i na, kua poitirere tikai aia no te mea, kua riri tona papa iaia ma te na ko mai e, e Lamoni, te aere nei koe kia akaora i teia au tangata Niphai koia oki te tamariki a te pikikaa. E i na, kua keia ratou i to tatou ai metua, e ko tana au tamariki, kua aere katoa mai ratou kia tatou kia pera ratou, na roto i to ratou kikite e te pikikaa kia vare tatou, e kia rauka katoa ia ratou i te keia i to tatou au apinga.

14. I na, kua akaue tona papa iaia kia tamate ia Amona ki te koke. E kua akaue katoa aia iaia, eiaa e aere ki te enua ko Mitioni, kia oki ra aia e ïa katoa ki te enua ko Isemaela.

15. Ina ra, kua karanga atura a Lamoni kiaia e, kare au e ta ia Amona e kare katoa au e oki ki te enua ko Isemaela, ina ra, ka aere rai au ki te enua ko Mitioni kia akaora mai i te au taeake o Amona, no te mea kua kite au e, e aronga tangata tika ratou e, e au peroveta tapu na te Atua tika.

16. I te ronga anga tona papa i teia au tuatua nei, kua riri tikai aia iaia, e kua kiriti maira aia i tana koke kia rauka iaia i te tamate atu iaia.

17. Ina ra, kua tu ua atu a Amona ma te na ko atu kiaia e, Kare rava koe e ta mai i taau tamaiti, e ngari ake me topa aia, auraka ra e ko koe, i na, kua tataraara oki aia i tana au ara, e mei te mea e ka topa koe i teianei i roto i toou riri, kare toou vaerua e akaoraia.

18. E teianei, e mea tau oki kia akakoromaki oki koe i te ta atu i taau tamaiti, e tangata ara kore oki aia, e ka kapiki mai oki tona toto mei te one mai ki te Atu, tona ra Atua, kia tae mai te utunga kia koe, e penei ake ka peke atu toou vaerua.

19. I na, kia oti a Amona i te tuatua atu i teia au tuatua kiaia, kua pau atura aia na ko atura, kua kite au e me ta au i taku tamaiti, kua akamaringi au i te toto ara kore, e ko koe oki tei inangaro kia mate aia.

20. Kua akatika atura aia i tona rima i te ta atu ia Amona. Ina ra, kua kape a Amona i tana tamaki anga, e kua rutu atu i tona rima kia kore e rauka iaia i te taangaanga atu i te reira.

21. I to te ariki kiteanga e, ka mate aia ia Amona, kua pati taparu atu aia kia Amona kia akaora mai iaia.

22. Kua taki a Amona i tana koke ki runga ma te na ko atu kiaia e, ka ta au ia koe, me kore koe e akatika mai iaku kia akaora i toku au taeake mei roto mai i te are auri.

23. No te mataku o te ariki ko te mate aea aia, kua na ko atu aia e, Mei te mea e ka akaora koe iaku, ka oronga atu au i taau apinga i anoano e tae rava atu ki te apa o toku basileia.

24. I to Amona kiteanga e, kua ariu mai te ariki ruau kia tau ki tona inangaro, kua na ko atu aia kiaia e, mei te mea e ka akatika mai koe kia akaoraia mai toku au taeake mei roto mai i te are auri, e pera katoa kia noo rai a Lamoni ki roto i tona basileia, e kare koe e riri akaou iaia ma te akatika iaia kia rave i tana uaorai i anoano e tana ua atu rai i manako, i reira ka akaora au ia koe, me kore ra ka tamate au ia koe, e kia tipu atu ki te one.

25. I te otianga a Amona i te tuatua i teia au tuatua nei, kua rekareka iora te ariki no tona ora.

26. E kite akera aia e, kare a Amona e inangaro i te ta iaia, e kite katoa akera aia e, e aroa maata tona i tana tamaiti ko Lamoni, kua poitirere tikai aia ma te na ko e, no te mea, e ko teia ua taau i anoano, e kia akaora au i toou au taeake, e ma te akatika i taku tamaiti ia Lamoni kia noo ki roto i tona basileia, i na, te akatika nei au e kia noo rai taku tamaiti ki roto i tona basileia mei teianei e tuatau ua atu, e kare au e akaaere akaou iaia.

27. E ka akatika katoa atu au ia koe kia akaora i toou au taeake mei roto mai i te are auri, e kia aere mai koe e toou au taeake kiaku nei, i roto i toku basileia, e ka inangaro maata tikai au i te kite ia kotou, no te mea, kua poitirere tikai te ariki i te tuatua tana i tuatua atu, e pera katoa ki te tuatua a tana tamaiti ko Lamoni, e no reira, kua inangaro tikai aia i te kite ua atu i te reira.

28. I reira, kua aere atura a Amona raua ko Lamoni ki to raua tere ki te enua ko Mitioni. E kua rekareka akera te ariki o te enua ia Lamoni, e no reira kua apainaia maira te au taeake o Amona i vao mei roto mai i te are auri.

29. E i to Amona aravei anga ia ratou, kua taitaia tikai aia, no te mea, kua vai taaka ua ratou, e kua pakikokiko tikai to ratou pakiri no tei tapekapekaia ana ratou ki te taura pakari. E kua mate ratou i te pongi, te kaki vai, e te au tu tumatetenga ravarai, ina ra, kua maru tikai ratou i roto i to ratou au tumatetenga.

30. E kia tupu teia, kua riro atura ratou ki roto i te rima o te aronga ngakau ketaketa e te maro, no reira i kore ei ratou i akarongo mai i ta ratou tuatua, kua tuaru ra ratou ia ratou ki vao, e kua papa ia ratou e kua arumaki ia ratou ki tera are ki tera are, e i tera ngai i tera ngai e tae rava atura ratou ki te enua ko Mitioni, e ki reira ratou ki raveiai ma te tiriaia atu ki roto i te are auri, e kua tapekapeaia ki te taura pakari, ma te noo ki roto i te are auri no tetai au puke rā, e kua akaoraia e Lamoni raua ko Amona.