1. E i na, kua oki maira a Alama mei te enua maira mei Kitiona, i muri ake i tona apii anga atu i te au tangata i reira i te au mea e manganui tei kore i tataia ra, ma te akatinamou i te akaaereanga o te akonoanga mei tana rai i rave i mua ana ki te enua ko Zarahemela, ma te oki ki tona ngutuare tikai i Zarahemela kia akangaroi mei te angaanga tana i rave ana.

2. E pou akera te iva o te mataiti, i te tutaraanga o te au akava ki rungao i te au tangata o Niphai.

3. E i na, i te akamataanga o te ngauru o te mataiti, i te tutaraanga o te au akava ki rungao i te au tangata o Niphai, kua aere atu a Alama, ki te enua ko Mireke i te opunga o te kauvai ko Sidona, e te opunga i vaitatao ki te kena o te metepara.

4. E kua akamata aia i te apii atu i te au tangata i te enua ko Mireke kia tau ki te akaaereanga tapu a te Atua, i kapikiiaʼi aia, e kua akamata aia i te apii i te tangata i roto i taua enua ra, ko Mireke.

5. E i reira, kua aere mai te au tangata kiaia mei te au kena o te enua i te pae i te metepara. E kua bapetizo iora ratou katoatoa i roto i taua enua ra.

6. E oti akera tana angaanga i Mireke, kua oki atura aia e aere atura e toru rā na te tuanga apatokerau o te enua ra ko Mireke e tae maira aia ki te oire tei karangaia e ko Amoniha.

7. E ko te tu rai ïa o te tangata o Niphai me kapiki i to ratou enua, e to ratou au oire, te vira, e to ratou au tapere rikiriki, ka kapikiia ki te ingoa o te tangata i noo mua ana ki reira, e pera katoa ki te enua ko Amoniha.

8. E tae maira a Alama ki te enua ko Amoniha, kua akamata aia i te ako atu i te tuatua a te Atua kia ratou.

9. Kua mou piri tikai oki a Satani te au ngakau o te au tangata o Amoniha, e no reira kare atura ratou i akarongo mai ki te tuatua a Alama.

10. Kua angaanga pakari rai a Alama ki roto i te vaerua ma te kaku atu ki te Atua na roto i te pure pakari anga atu kiaia, kia riringi mai aia i tona vaerua ki rungao i te tangata i roto i taua oire ra, e kia rauka iaia i te bapetizo atu ia ratou ma te tataraara.

11. Kua marokiakia rai to ratou ngakau, ma te na ko atu kiaia e, kua kite matou e, ko Alama koe, e kua kite matou e, e taunga teitei koe ki rungao i te akonoanga taau i akatumu ki roto i te au tuanga o te enua, kia tau ki to kotou papaanga, e kare matou i roto i taau akonoanga, e kare matou e irinaki ki te reira au apiianga neneva.

12. E teianei, kua kite matou e, kare oki matou no taau akonoanga, e kua kite matou i reira e, kare oou mana kia matou, e kua oronga atu koe i te nooanga akavaanga kia Niphaiha, e no reira kare koe i te akavanui ki rungao ia matou.

13. E oti akera te au tangata i te tuatua i teia ma te patoi i tana au tuatua, e te akakino atu iaia, e te tutua atu iaia, e ma te tuaru atu iaia mei roto i taua oire ra, kua aere atura aia ki tetai oire tei karangaia e ko Aarona.

14. E iaia e aere atu ei ki reira, kua teimaa tukituki aia e te tumatetenga, i te na roto anga i te au tu kino e te taitaia i te vaerua, no te kino maata o te tangata i roto i te oire ko Amoniha, e i na, mei ia Alama i teimaa tukituki ma te taitaia, kua tae mai te angela a te Atu kiaia ma te na ko mai e,

15. E ao toou e Alama, e no reira e akateitei i toou upoko ma te rekareka, e tikaanga maata oki toou kia rekareka, e kua akono oki koe i te au akaueanga a te Atua mei te taime i oronga mai ei aia i te tuatua mua kia koe. E i na, ko au oki tei oronga atu i te reira kia koe.

16. E i na, kua akaungaia mai au kia akaue atu kia koe kia oki ki te oire ko Amoniha e ako akaou atu ia ratou. E ako atu ia ratou e karanga atu kia ratou e, me kore ratou e tataraara ka takore te Atua ia ratou.

17. E i na, kua apii ratou i teia taime nei kia takinga kino i te au o toou iti tangata, (te tuatua maira te Atua) e me patoi te reira i te ture, e te akavaanga e te au akaueanga tana i oronga mai ki tona iti tangata.

18. E muri akera i to Alama akarongoanga i teia au tuatua mei ko mai i te angela a te Atua, kua oki viviki atu aia ki te oire ko Amoniha. Kua tomo atu aia ki roto i te oire na tetai mataara ke, na te mataara i te tuanga apatonga o te oire ko Amoniha.

19. E i tona taeanga ki roto i te oire, kua mate aia i te pongi, e kua na ko atu aia ki tetai tangata e, ka omai ainei koe ki te tavini akaaka o te Atua i tetai apinga kia kai?

20. Kua karanga atura taua tangata ra e, e tangata Niphai au, e kua kite au e, e peroveta tapu koe na te Atua, e ko koe oki te tangata ta te angela i akakite mai na roto i te orama. E ariki koe iaia. E no reira e aru mai iaku ki roto i toku are, e ka oronga atu au i taku kai naau, e kua kite au e, ka riro koe ei akameitakianga noku e no toku ngutuare.

21. Kua ariki rekareka iora teia tangata nei iaia ki tona ngutuare, e ko teia tangata nei ko Amuleka, e kua apai mai aia i te varaoa e te puakatoro kia kai a Alama.

22. Kua kai iora a Alama i te varaoa e pangea iora, e kua akameitaki iora aia ia Amuleka e tona ngutuare, e kua akameitaki atu aia i te Atua.

23. E oti akera aia i te kaikai, kua karanga atura aia kia Amuleka e, ko Alama au, e e taunga teitei oki au no te akonoanga a te Atua i roto i te enua.

24. E i na, kua kapikiia au ei tutu i te tuatua a te Atua ki teia au tangata kia tau ki te vaerua o te eeuanga e te totou; e no roto atu ana au i teia enua e kare ratou i ariki mai iaku, kua tuaru ra ratou iaku, e kua vaitata rai e ka uritua au mei konei e tuatau ua atu.

25. Ina ra, kua akaue akaouia mai au kia oki akaou mai ki konei e ako atu i teia au tangata, e ma te akamatakite atu no ta ratou au ara.

26. E teianei e Amuleka, kua angai mai koe iaku, e kua akatika iaku ki roto i toou are, kia akameitakiia koe, no te mea e pongi oki au e e manganui oki te au rā i akakore ana au i te kai.

27. E manganui oki te au rā i noo ei a Alama ki ko ia Amuleka, e mua ake ka akamataʼi a Alama i te ako atu i te au tangata.

28. E i na, kua marokiakia atu rai te tangata i te rave i te ara.

29. Kua tae maira te tuatua kia Alama, i te na ko anga mai e, e aere e karanga katoa atu ki toku tavini ko Amuleka kia ako atu i teia au tangata nei i te na ko anga atu e, e tataraara, te tuatua maira te Atu, e me kore ratou e tataraara ka aere tikai atu au ka atoro i teia au tangata ma toku riri, e kare oki toku riri e uri ke mei ia ratou.

30. Aere atura a Alama raua ko Amuleka ki te au tangata i te akakite atu i te tuatua a te Atua kia ratou, e kua ki oki raua i te vaerua tapu.

31. E e mana oki tei orongaia mai kia raua, kia kore oki raua e rokoia e te kino, e kia kore oki tetai tangata e ta atu ia raua. Ina ra, kare raua i taangaanga i to raua mana, kia tapeka ravaia raua e e tiriaia atu ki roto i te are auri. Kua tupu oki teia e raukaʼi oki i te Atua i te akaari mai i tona mana na roto ia raua.

32. Kua aere atura raua ma te akamata atu i te tutu atu ma te totou aere atu kia tau oki ki ta te vaerua e te mana ta te Atua i oronga mai kia raua.