1. I na, ia Amona e apii ei i te au tangata o Lamoni ma te tukumoe kore, ka oki tatou ki te tuatua o Aarona e tona au taeake, i muri ake oki i tona akaruke anga i te enua ko Mitioni, kua aratakiia aia e te vaerua ki te enua ko Niphai, ki te ngutuare oki o te ariki tei tutara ki rungao i te au enua katoatoa, mari ua ra ko te enua ko Isemaela, e koia oki te metua o Lamoni.

2. E kua aere atura aia e tona au taeake ki roto i te are ariki, ma te tupou atu ki mua i te ariki ma te na ko atu e, I na, e te ariki, ko matou te au taeake o Amona, taau i akaora mei roto mai i te are auri.

3. E teianei e te ariki, mei te mea e ka akaora koe ia matou mei te mate mai, ka riro matou ei au tavini noou. Kua karanga atura te ariki kia ratou e, E tu, ka akaora au ia kotou, e kare rava oki au e akatika kia riro kotou e au tavini noku, ka pati ra au kia kotou kia tauturu mai iaku no te mea, kua manamanata toku manako no te aroa e te puapinga maata o te tuatua a toou taeake ko Amona, e kua inangaro au i te kite i te tumu i kore ei aia i aere mai mei Mitioni mai ra.

4. Kua karanga atura a Aarona ki te ariki e, I na, kua arataki keia aia e te vaerua o te Atu, kua aere atu aia ki te enua ko Isemaela kia apii atu i te iti tangata o Lamoni.

5. Kua karanga atura te ariki kia ratou, eaa tena ta kotou e tuatua nei no te vaerua o te Atua? I na, teia oki te mea tei tamanamanata iaku.

6. E pera katoa, eaa teia ta Amona i tuatua ake nei, me tataraara koe, ka ora koe, e me kare koe e tataraara, ka tipu keia koe i te rā openga.

7. Kua pau atura a Aarona ma te na ko atu kiaia e, Te irinaki ainei koe e e Atua tetai? Kua na ko atura te ariki e, kua kite au e, kua karanga ana te ngati Amaleki e, e Atua tetai, e kua akatika oki au ia ratou kia akatu i tetai au are tapu, kia rauka ia ratou i te akaputuputu ki te ngai okotai akamori atu iaia. E mei te mea e, ka tuatua koe e e Atua tetai, ka irinaki au.

8. I te rongo anga a Aarona i teia, kua pumaana tona ngakau, ma te na ko e, I na, te ora ra koe e te ariki, te vai nei rai oki te Atua.

9. Kua karanga atura te ariki e, ko te Atua ainei taua Vaerua Maata tei arataki mai i to tatou ai metua mei roto mai i te enua ko Ierusalema?

10. Kua karanga atura a Aarona kiaia e, Ae, koia taua Vaerua Maata ra, e nana oki i anga i te au mea katoatoa i te ao ra e te enua nei.

11. Kua karanga atura aia e, ae te irinaki nei au e, na taua Vaerua Maata ra i anga i te au mea katoatoa, e te inangaro nei au kia akakite mai koe kiaku i teia au mea katoatoa, e ka irinaki au i taau tuatua.

12. I te kiteanga a Aarona e ka irinaki te ariki i tana tuatua, kua akamata aia mei te angaia anga mai o Adamu, ma te tatau atu i te tuatua tapu ki te ariki, i akapeea te Atua i anga ai i te tangata kia aite ki tona uaorai tu, e kua oronga katoa mai te Atua i te au akaueanga kiaia, e no te ara oki, kua inga te tangata nei.

13. E kua apii atu a Aarona kiaia i te au tuatua i tataia mei te angaia anga mai o Adamu ma te tuku atu ki mua iaia i to te tangata nei inga anga, e to ratou tu mate ua, e te ravenga katoa o te akaoraanga, tei akateateamamaoia mei te akatumu angaia mai o te ao nei na roto i te Mesia, e te aronga katoa tei irinaki ki tona ra ingoa.

14. E no te inga anga o te tangata nei, kare e rauka iaia te puapinga nona uaorai, ina ra, ko te mamae e te mateanga o te Mesia tei akakore i ta ratou au ara, na roto i te akarongo e te tataraara e pera atu, e nana oki i tatara i te au tapeka o te mate, kia kore oki te vaarua e re, e kia apukuia oki te tara o te mate na roto i te tatarianga i te kaka, kua apii atura a Aarona i teia au mea ki te ariki.

15. E i muri ake i to Aarona akakite anga i teia au mea kia ratou, kua na ko akera te ariki e, ka akapeea au nei e raukaʼi iaku te ora mutu kore mei taau i tuatua ake nei? E ka akapeea au nei e anau akaouia mai ei e te Atua, kia tuaruia atu teia vaerua kino mei roto mai i toku ngakau, e kia rauka iaku tona vaerua e kia ki oki au i te rekareka, e kia kore oki au e tipu keiaʼi i te rā openga? Kua karanga katoa maira aia e, I na, e akaruke ua atu au i toku puapinga katoatoa, e ka akaruke katoa atu au i toku basileia, kia rauka oki iaku teia rekareka maata.

16. Ina ra, kua tuatua atura a Aarona kiaia, me inangaro koe i teia mea nei, e me ka tupou atu koe ki mua i te Atua, e me ka tataraara koe i taau au ara ma te tuturi atu ki mua i te Atua ma te kapiki i tona ra ingoa i te akarongo, ma te irinaki e ka rauka mai ia koe, ka rauka i reira ia koe i taau e tatari nei.

17. E oti akera a Aarona i te tuatua i teia au tuatua nei, kua tuturi atura te ariki ki mua i te Atua, kua topa roa aia ki runga i te one, ma te kapiki maata atu i te na ko anga e, Ka irinaki ainei koe i teia?

18. E te Atu, kua akakite mai a Aarona kiaku e, e Atua tetai, e mei te mea e te vai ra te Atua, e ko te Atua koe, e akaari mai ana koe ia koe kiaku, e ka akaruke pouroa au i taku au ara kia kite au ia koe ra, e kia aka tuakaouia mai au mei te mate mai, e kia akaoraia i te rā openga. E oti akera te ariki i te tuatua i teia au mea nei, kua riro aia mei te mea ra e, kua mate aia.

19. Kua oro atu tona au tavini i te akakite atu ki te ariki vaine i tei tupu ki te ariki. E kua aere maira aia ki te ariki, e i tona kite anga iaia mei te mea ra e, kua mate, e kia kite aia ia Aarona e tona au taeake i te tu ua anga mei te mea ra e, na ratou i akatupu i teia angaanga, kua riri tikai aia ia ratou, kua akaue atura i tona au tavini, koia oki ko te au tavini o te ariki kia tamate atu ia ratou.

20. I na, kua kite oki te au tavini i te tumu i topaʼi te ariki, e no reira, kare ratou i arapaki atu i to ratou rima ki runga ia Aarona e tona au taeake, e kua pati atu ratou ki te ariki vaine i te na ko anga e, eaa koe i akaue mai ei ia matou kia tamate i teia au tangata nei, e ririnui ake tetai o ratou ia matou katoatoa, e no reira ka topa matou ki mua ia ratou.

21. I te kite anga te ariki vaine i te mataku o te au tavini, kua akamata katoa aia i te mataku, ko te tupu mai aea tetai kino kiaia. Kua akaue atura aia i tona au tavini kia aere e kia kapiki mai i te au tangata kia ta ia Aarona e tona au taeake.

22. E kite akera Aarona i te maroiroi o te ariki vaine, e kua kite katoa aia i te ketaketa o te ngakau o te au tangata, kua mataku aia e, ko te aere mai aea tetai urupu maata e ko te tupu aea tetai pekapeka maata e te tamaki ki rotopu ia ratou. E no reira kua akatika atura aia i tona rima e kua akatu i te ariki mei te one mai, ma te na ko atu kiaia e; E tu. Kua tu iora aia ki runga i ona nga vaevae ma te maroiroi.

23. Kua raveia teia ki mua i te aroaro o te ariki vaine e tona au tavini. E i to ratou kiteanga i teia kua umere tikai ratou ma te mataku. Kua tu maira te ariki ma te akamata i te tuatua mai kia ratou. E kua tuatua rai aia kai ratou, e akaariu rava akera tona ngutuare tangata katoatoa ki te Atu.

24. I na, kua akaputuputu maira tetai urupu maata no te akaueanga a te ariki vaine, e kua tupu te koumuumu maata ki te au tangata no Aarona e tona au taeake.

25. I na, kua tu maira te ariki ki rotopu ia ratou e kua ako maira ia ratou. Kua rekareka iora ratou ia Aarona e ratou katoa iaia ra.

26. E kite akera te ariki e, kua rekareka ratou ia Aarona e tona au taeake, kua akaue atura aia ia Aarona e tona au taeake kia tu ki rotopu i te urupu tangata, e kia ako atu i te tuatua a te Atua.

27. Kua tuku atura te ariki i tetai tuatua akakite na roto i te au enua, e ki tona iti tangata i roto i tona au enua, ravarai, e te au tangata katoa e pini ua ake, e tei noo ki te ope o te tai i te itinga, e te opunga, e tei taka ke mei te enua ko Zarahemela, e tetai ngai kokota i te pae i te metepara ra, tei tae mai mei te tai o te itinga ki te tai i te opunga e pini ua ake te ope o te pae ki tai, e to te metepara i te apatonga o te enua ko Zarahemela, e ki te au kena o Manitai, e ki te akamataanga o te kauvai ko Sidona, i te tae anga mai mei te itinga ki te opunga, kua na reira oki te tuaia anga o te ngati Lamana, e te ngati Niphai.

28. I na, ko te tuanga kino o te ngati Lamana, i noo ana ratou ki te metepara, i roto i te au puakapa, e kua purara ratou ki roto i te metepara i te opunga, e ki te enua ko Niphai, e ki te opunga o te enua ko Zarahemela i te pae ki tai, e ki te opunga i te enua ko Niphai ko te ipukarea mua o to ratou ai metua, e kua noo atu na te pae ki tai.

29. E maata katoa te ngati Lamana i te pae ki tai i te itinga o te ra, te ngai i tuaruiaʼi ratou e te ngati Niphai. Kua vaitata e, ka takapiniia oki te ngati Niphai e te ngati Lamana, ina ra, kua noo te ngati Niphai ki te au tuanga o te pae apatokerau o te enua vaitata atu ki te metepara, ki te akamata anga o te kauvai ko Sidona, mei te itinga ki te opunga e pini ua ake te metepara, ki te pae tokerau, e tae rava akera ratou ki te enua tei karangaia e ko Bounetifula.

30. E kua noo oki ratou ki te enua tei karangaia e, ko Desolationa i te pae apatokerau ra, e kua tae rava atu ia ki te enua tei nooia e te tangata, e tei takoreia, e to ratou ivi, kua tuatuaia ana e matou, e tei kiteaia e te au tangata o Zarahemela, e ko te ngai ia i to ratou taeanga mua.

31. Kua aere maira ratou mei reira mai ki runga i te metepara i te apatonga. E kua karangaia te enua i te pae apatokerau ra e, ko Desolationa, e te enua i te pae apatonga ko Bounetifula, ko te metepara teia tei ki i te au tu manu taae katoatoa, e tetai pae, no te pae apatokerau mai i te aereanga i te kimi kai

32. I na, ko te mamao, e tai ra e te apa i te aereanga no te tangata Niphai, na te kotinga o Bounetifula e te enua ko Desolationa, mei te itinga ki te opunga o te tai, e kua vaitata te enua ko Niphai, e te enua ko Zarahemela i te takapiniia e te tai, te vai ra tetai manga ngai meanigiti ua e te kokota i rotopu i te enua i te pae apatokerau, e te enua i te pae apatonga.

33. E kua nooia oki te enua ra ko Bounetifula e te ngati Niphai mei te itinga ki te opunga o te tai, e i to ratou pakari, kua paruru atu to ratou au tiaki e to ratou au vaeau i te ngati Lamana i te pae apatonga, kia kore oki ratou e aere na runga i te enua i te pae apatokerau.

34. E no reira, kare o te ngati Lamana noo anga ki runga i te enua, mari ua ra ko te enua ko Niphai e te metepara e pini ua ake. I na, e pakari oki to te ngati Niphai, e e enemi oki te ngati Lamana kia ratou, e kare oki ratou e akapekapeka i tera ngai, i tera ngai, e kua na reira ratou, kia rauka mai ia ratou tetai enua e kia aere ratou mei ta ratou rai i inangaro.

35. E teianei, e oti akera iaku, i teia au tuatua, ka oki akaou au ki te papaanga o Amona e Aarona, Omona e Kinunai e to ratou au taeake.