1. Kia oti te au tamaki e manganui a te ngati Lamana kia akapou atu i te ngati Niphai, kua kite akera ratou e, e mea puapinga kore i te kimi ua atu rai i te takinga kino ia ratou, e kua oki atu ratou ki te enua ko Niphai.

2. Kua riri rava akera te ngati Amaleki no to ratou mate maata. E kite akera ratou e, kare e rauka ia ratou kia akaoko i te ngati Niphai, kua akatupu iora ratou i te riri ki te au tangata no to ratou au taeake, e ki te au tangata o Aniti-Lihai-Niphai, e i reira kua akamata akaou ratou i te ta atu ia ratou.

3. E kare atura teia au tangata i rave akaou mai i ta ratou au apinga tamaki, e kua tuku ua ia ratou kia taiaia mai ratou kia tau ki te inangaro o to ratou au enemi.

4. E kite akera Amona e tona au taeake i teia angaanga takinga kino i rotopu i te aronga tei inangaro maataia e ratou, e ki te aronga tei inangaro maata mai ia ratou, e kua akaaiteia ratou mei te au angela tei tonokia mai mei ko mai i te Atua kia akaora ia ratou mei te mate mutu kore, e kite akera Amona e tona au taeake i teia angaanga takinga kino, kua tupu iora te aroa i roto ia ratou, e kua na ko atura ki te ariki,

5. E akaputuputu tatou i teia nei au tangata o te Atua, ka aere atu ei tatou ki te enua ra ko Zarahemela, ki to tatou au taeake ko te ngati Niphai, e kia oro ke tatou mei te rima o to tatou au enemi kia kore tatou e takinga kinoia mai.

6. Ina ra, kua karanga atura te ariki kia ratou e, i na, ka takinga kino te ngati Niphai ia tatou, no te ta tangata e te ara ta tatou i rave kia ratou.

7. E kua karanga atura a Amona e, ka aere atu ka ui ki te Atu, e mei te mea e karanga mai aia e, e aere tatou ki ko i to tatou au taeake, ka aere ainei tatou?

8. E kua tuatua maira te ariki kiaia, Ae, me karanga mai te Atu kia tatou e aere, ka aere oki tatou ki raro ki to tatou au taeake ra, e ka riro matou ei tuikaa na ratou, kia akakore matou i te tangata, e te au ara ta matou i rave atu kia ratou ra.

9. Kua karanga atura a Amona kiaia, kare ïa e tau ki te ture a to tatou au taeake, tei akatinamouia e toku metua, kia vai tuikaa te tangata ki rotopu ia ratou, e no reira ka aere tatou ki raro ka irinaki ei ki te aroa o to tatou au taeake.

10. Kua karanga atura te ariki kiaia, e, e ui atu ki te Atu, e me karanga mai aia kia tatou e aere, ka aere tatou, me kore, ka mate tatou i te enua nei.

11. Aere atura Amona i te ui atu ki te Atu ra e kua karanga maira te Atu kiaia e,

12. E arataki ke atu i teia au tangata mei teia enua kia kore ratou e akapouia, kua mou pakari oki a Satani i te ngakau o te ngati Amaleki, ko tei akakoko i te ngati Lamana kia riri atu i to ratou au taeake, e kia ta ia ratou, e no reira e akaatea ia ratou mei teia enua, e ao oki to teia nei au tangata, e naku oki e akaora ia ratou.

13. Kua oki maira a Amona e kua akakite atu i te au tuatua ta te Atu i akakite mai kiaia ra.

14. Kua akaputuputu iora ratou i to ratou au tangata, koia oki, te au tangata o te Atua ra, e kua akaputuputu katoa ratou i ta ratou au anana mamoe e te anana puakatoro, akaruke atura i taua enua ra, aere atura na te metepara tei akataka ke i te enua ra ko Niphai e te enua ra ko Zarahemela e tae rava atura ki te ope o taua enua ra.

15. E kua karanga atura a Amona kia ratou, I na, ka aere ana au e toku au taeake ki te enua ra ko Zarahemela, e e noo ana kotou ki konei kia oki mai matou, ka timata oki matou i te ngakau o to matou au taeake me ka akatika ratou ia kotou kia aere ki to ratou enua, me kare.

16. E te aere ra a Amona ki roto i taua enua ra, kua aravei atu aia e tona au taeake ia Alama ki te ngai tei tuatuaia i mua ana, e i na, e araveianga mataora tikai te reira.

17. Kua ki rava akera a Amona i te rekareka, e kua ki rava akera aia i te rekareka o tona Atua, kia pou tona maroiroi, e kua topa akaou atura aia ki runga i te one.

18. Kare ainei te reira, i te rekareka maata? I na, ko te rekareka maata teia, tei kore e rauka i te tangata nei, mari ra, ko te tangata tataraara, i tei kimi i te rekareka ma te akaaka.

19. E kua maata akera to Alama rekareka i te araveianga i tona ra au taeake, e kua rekareka katoa a Aarona, e Omona, e Himinai, ina ra, kare to ratou rekareka i maata atu i to ratou maroiroi.

20. E kua arataki maira a Alama i tona ra au taeake ki te enua ra ko Zarahemela, e ki tona ra ngutuare. Aere atura ratou i te akakite ki te akavanui i te au mea tei tupu kia ratou i te enua ra ko Niphai, i rotopu i to ratou au taeake ko te ngati Lamana.

21. Kua tuku atura te akavanui i tetai tuatua akakite ki te au enua ravarai, ma te inangaro i te reo o te tangata no runga i te arikianga i to ratou au taeake, te au tangata o Aniti-Lihai-Niphai.

22. E kua tae maira te reo o te tangata i te na ko anga mai e, I na, e oronga atu tatou i te enua ra ko Ieresona, i te pae i te itinga o te ra i te pae tai, tei tukati atu ki te enua ko Bounetifula, e ko teia enua ko Ieresona, ko te enua ïa ta tatou ka oronga atu ei ipukarea no to tatou au taeake.

23. E i na, ka akanoo tatou i to tatou au vaeau ki rotopu i te enua ko Ieresona e te enua ko Niphai kia rauka oki ia tatou i te paruru i to tatou au taeake i runga i te enua ko Ieresona, e ka rave tatou i teia no to tatou au taeake no to ratou mataku i te tamaki atu i to ratou au taeake, ko te ara aea ratou, e kua tupu to ratou mataku maata no te mea, kua tataraara tikai ratou no ta ratou ta tangata, e no ta ratou au ara rikarika i maataʼi to ratou mataku.

24. E ka akapera tatou ki to tatou au taeake, kia rauka ia ratou kia noo ki te enua ra ko Ieresona, e na to tatou au nuku e tiaki ia ratou mei to ratou au enemi, kia oronga mai ra ratou i tetai tuanga o ta ratou au apinga ei tauturu ia tatou no to tatou au nuku.

25. I to Amona akarongo anga i te reira, kua oki atura aia e Alama katoa ki te au tangata o Aniti-Niphai-Lihai i te metepara ra, ki te ngai i patiaʼi ratou i to ratou au puakapa, e kua akakitekite atura kia ratou i teia au mea nei. E kua akakite katoa atu a Alama kia ratou i tona ariuanga mai, e to Amona, e to Aarona, e tona katoa au taeake.

26. Kua tupu akera te rekareka maata ia ratou, e kua aere atura ratou ki raro i te enua ra ko Ieresona, e noo atura ki taua enua ra ko Ieresona e kua kapikiia ratou e te ngati Niphai e, ko te au tangata o Amona e no reira kua kapikiia ratou ki taua ingoa ra e tuatau ua atu.

27. E tei rotopu ratou i te ngati Niphai, e kua tāre katoaia ki te au tangata o te akonoanga a te Atua. Kua kitea katoaia ratou no to ratou maroiroi i ta te Atua, e ta te tangata katoa oki, e aronga tuatua tika e te akono meitaki oki ratou i te au mea katoatoa, e kua akatinamou oki ratou i to ratou akarongo ki te Mesia, e tae rava atu ki te openga.

28. E mea rikarika maata oki ia ratou te akamaringianga i te toto o to ratou au taeake, e kare rava e tika akaou ia ratou kia rave akaou i te au apinga tamaki, ka tamaki atu ei ki to ratou au taeake, e no to ratou tatarianga, e to ratou akarongo i te Mesia ra, e te tuakaouanga, e no reira, kua apukuia to ratou mataku e te mate no te re i rauka i te Mesia ki rungao i te reira.

29. Kua tika rava ia ratou i te akakoromaki i te mate rikarika e te mamae tei tukuia mai e to ratou au taeake, i mua ake ka rave ei ratou i te koke e te simeta ka ta atu ei ia ratou.

30. Kua riro ratou ei aronga maroiroi e te inangaroia, e e aronga akameitaki maataia oki e te Atu ra.