1. I na, tei roto oki i te ture a Mosaia, ko te au tangata katoatoa tei riro ei akava no te ture, me kore tei ikiia ei akava, ka tutakiia ratou kia tau ki te ora i angaangaʼi ratou i te akavaanga i te au tangata tei apainaia mai ki mua ia ratou no te akavaanga.

2. I na, me kaiou tetai tangata ki tetai e kare aia e tutaki i tana kaiou, ka apainaia aia ki te akava, e ko te akava e mana tona, ka akaunga atu aia i tona aronga taoonga kia arataki mai i taua tangata ra ki mua iaia, e ka akava aia i taua tangata ra kia tau ki te ture e te akaapaanga tei kavea mai kiaia, e ka maroia taua tangata ra kia tutaki i tana i kaiou, me kore ra, ka papaia, me kore ra ka tiriaia ki vao mei rotopu i te au tangata, e tangata keia oki aia.

3. E kua rauka mai oki i te akava tana tutaki no tona taime i pou, e tai senine auro i te rā okotai, me kore ra, e tai senuma ario tei aiteite oki ki te senine auro okotai, kua tau oki teia ki te ture i orongaia maira.

4. E ko te ingoa teia o ta ratou au moni auro, e te ario, kia tau ki to ratou vaito. E na te ngati Niphai i oronga mai i teia au ingoa. E kare oki ratou i tarē mei ta te ngati Iuda tei noo ana ki Ierusalema, e kare ra ratou i vaito mei ta te ngati Iuda ra, kua akatuke ra ratou i ta ratou moni e te vaito, kia tau ki te manako e te tu o te tangata i tera uki e i tera uki, e tae rava atu ki te tutaraanga o te au akava, tei akamouia e te ariki ra ko Mosaia.

5. E ko teia te tarēanga, e senine auro, semona auro, e suma auro, e te limena auro.

6. E senuma ario, e amenora ario, e esoroma ario, e e oneti ario.

7. Kua aite oki te senuma ario okotai ki te senine auro, e pera katoa ki te vaito okotai o te sitona, e ki te vaito okotai katoa o te au tu ua katoatoa.

8. I na, kua aite te seona auro ki nga senine e rua ra.

9. Kua aite te suma auro okotai ra ki nga seona e rua ra.

10. E ko te limena auro ra, kua aite ïa ki taua au mea katoa ra.

11. E aite te amenora ario okotai ki nga senuma e rua ra.

12. E aite te esoroma ario ki nga senuma e ā ra.

13. E aite te oneti i taua au mea katoa ra.

14. I na ko te vaito teia o te mea meangiti i to ratou tarēanga.

15. Ko te sibalona ko te apa ïa o te senuma e kua aite te sibalona ki te apa o te vaito sitona ra.

16. E ko te sibuluma ra, kua aite ïa ki te apa o te subalona ra.

17. E ko te lea, ko te apa ïa o te sibalona.

18. Ko te numero teia, mei tei tau ki to ratou tarēanga.

19. Kua aite te anetiona auro okotai ki nga subalona e toru ra.

20. I na, no te akakoroanga okotai kia rauka mai te puapinga, no te mea kua rauka mai to ratou tutaki kia tau ki ta ratou angaanga, e no reira, kua akakoko ratou i te tangata kia pekapeka ratou tetai ki tetai e kia akatupu i te au tu manamanata e te angaanga viivii, kia maata oki ta ratou angaanga, e kia maata katoa ta ratou moni kia tau ki te au akaapaanga tei apainaia mai ki mua ia ratou, e no reira kua akakoko ratou i te tangata kia riri ia Alama e Amuleka.

21. E ko teia ta Zezorama i akamata i te ui atu kia Amuleka i te na ko anga e, ka pau mai ainei koe i tetai nga uianga taku ka ui atu kia koe? I na, e tangata kite pakari oki a Zezorama i roto i te au angaanga a te tiaporo, e ka takinga kino oki aia i te au mea meitaki, e no reira kua karanga atu aia kia Amuleka, ka pau mai ainei koe i te au uianga taku ka tuku atu kia koe?

22. E kua karanga a Amuleka e me ka tau ïa ki te vaerua o te Atua i roto iaku, e kare oki au e tuatua i tetai mea tei kore i tau ki te inangaro o te Atua. Kua karanga atura a Zezorama kiaia, i na, e ono ïa oneti ario, e ka oronga pouroa atu au i teia naau me ka karanga koe e kare e Atua.

23. I na, kua karanga atura a Amuleka e, Aue koe e te tamaiti a ade e, eaa koe i timata mai ei iaku? Kare koe i kite e, kare te aronga tuatua tika e inga i te timataanga?

24. Te irinaki ana koe e e kare Atua? Te karanga atu nei au kia koe, kare, kua kite koe e, e Atua tetai, ina ra, e maata ake toou inangaro i te moni, iaia.

25. E i na, kua pikikaa koe ki mua i te Atua e iaku, Kua karanga mai oki koe kiaku e, i na, ko teia oneti e ono nei, e mea puapinga maata, e ka oronga atu au naau, ina ra, te inangaro ua ra koe i roto i toou ngakau i te moni kia rave atu mei konei iaku, e ko toou inangaro oki kia akaapa au i te Atua tika e te ora, kia raukaʼi oki ia koe i te takinga kino iaku. E i na, no teia kino maata, ka rauka ia koe i te tutaki.

26. Kua karanga atura Zezorama kiaia, kua karanga mai koe kiaku e, e Atua tika tetai e te ora.

27. Ae, i na Amuleka ei, e Atua tika tetai e te ora.

28. Kua karanga atura a Zezorama e, e maata atu ainei i te Atua okotai.

29. Kua pau atura aia, kare.

30. Kua karanga akaou atura a Zezorama kiaia e, I akapeea koe i kite ei i teia au mea nei?

31. Kua karanga atura aia e, na te angela i akakite mai kiaku.

32. Kua karanga akaou atura Zezorama kiaia e, Koai aia te ka aere mai? Ko te tamaiti ainei a te Atua?

33. Kua tuatua atura aia e, Ae.

34. Kua na ko akaou atura a Zezorama e, ka akaora ainei aia i tona iti tangata mei ta ratou au ara? Kua pau atu a Amuleka ma te na ko atu kiaia e, te karanga atu nei au e, kare, e kare oki e rauka iaia i te pikikaa i tana tuatua.

35. Kua karanga atura a Zezorama ki te au tangata e, kia matakite kia akamaara i teia au mea nei, no te mea kua karanga aia e, e okotai rai Atua, e kua karanga katoa aia e, ka aere mai te tamaiti a te Atua, ina ra, kare aia e akaora i tona iti tangata mei te mea e tikaanga oki tona i te akaue atu i te Atua.

36. Kua tuatua akaou atura aia kiaia e, i na, kua pikikaa koe, no te mea kua karanga oki koe e, kua tuatua au mei te mea e e tikaanga toku kia akaue i te Atua no te mea kua karanga au e, kare aia e akaora i tona iti tangata i roto i ta ratou ara.

37. E te karanga akaou atu nei au kia koe e, kare e rauka iaia i te akaora ia ratou mei ta ratou au ara, e kare oki e rauka iaku i te akaapa i tana tuatua, e kua karanga katoa aia e kare e mea viivii e noo ki te basileia o te Ao ra, e no reira ka akapeea koe e oraʼi mari ra, kia o ki te basileia o te ao? E no reira kare kotou e akaoraia i roto i ta kotou au ara.

38. I na, kua tuatua akaou atura a Zezorama kiaia, ko te tamaiti ainei a te Atua te Metua Mutu kore?

39. Kua karanga atura a Amuleka kiaia, Ae, koia te Metua Mutu kore o te ao ra e te enua nei, e te au mea katoatoa, koia te muatangana, e te akaopengaanga, e te mua e te openga.

40. E ka aere mai aia ki te ao nei kia akaora i tona iti tangata, e ka apai oki aia ki rungao iaia i te ara a te aronga i irinaki ki tona ingoa, e ko ratou oki te ka rauka te ora mutu kore, e kare oki e rauka te ora i tetai ke.

41. E no reira ka noo ua rai te aronga kino mei te mea ra e, kare e akaoraanga i akamouia ana, mari ua ra ko te tataraanga i te au tapeka o te mate, e i na, ka tae mai te rā e tuakaou ei te tangata katoatoa nei mei te mate e ka akavaia kia tau ki ta ratou angaanga.

42. I na, te vai ra tetai mate ko tei karangaia e, ko te mate kopapa, e na te mateanga o te Mesia e tatara i te au tapeka o taua mate kopapa ra, e ka tuakaou oki te katoatoa mei taua mate kopapa ra.

43. Ka kapiti akaouia oki te kopapa e te vaerua ki to raua tu tikai, te au ivi e te au paupauanga katoa ka oki ki tona ngai tikai, mei ia tatou rai i teia nei, e ka aratakiia oki tatou ki mua i te Atua, e ka kite mei ta tatou e kite i teianei, e ka akamanako papu oki tatou i ta tatou au ara.

44. I na, ka tae mai teia akaokianga mai ki te katoatoa, ki te aronga pakari e te mapu, te tuikaa e tei tuikaa kore, te tane e te vaine, te aronga kino e te aronga tuatua tika, e kare oki e ngaro te rauru o to ratou upoko, mari ra, ka akaokiia mai te au mero katoatoa ki tona tu tikai, mei teianei nei rai, i te kopapa nei oki, e ka apai naia atu e kia akavaia ki mua i te akavaanga o te Mesia te Tamaiti a te Atua Metua, e te Vaerua Tapu, koia oki te Atua Mutu kore, kia akavaia kia tau ki ta ratou angaanga, me e mea meitaki, me e mea kino.

45. I na, kua tuatua atu ana au kia kotou no te mate kopapa, e pera katoa ki te tuakaouanga o te kopapa nei. I na, te karanga atu nei au e, ka akatuia teia kopapa nei, ei kopapa pe kore mei te mate mai, mei te mate mua mai, ki te ora, kia kore oki e mate akaou, ka kapiti oki to ratou vaerua e te kopapa e kare rava e taka ke akaou, e ka riro ïa ei mea pe kore, e kare rava ia e kite akaou i te pe.

46. I muri ake i to Amuleka tuatua anga i teia au tuatua nei, kua poitirere ratou, e pera katoa a Zezorama, kua akamata aia i te ruketekete. E kua ope te tuatua a Amuleka, me kore ra, ko teia ua rai taku i tata.