1. E kua aere atura te au tamariki tamaroa a Alama ki rotopu i te tangata kia akakite atu i te tuatua kia ratou. E kare oki e rauka ia Alama kia akangaroi, kua aere katoa atu rai aia.

2. I na, kare matou e tuatua akaou no ta ratou akoanga, tera ua ra, kua ako atu ratou i te tuatua, e te tuatua mou, kia tau ki te vaerua o te totou e te eeuanga, e kua ako atu ratou mei tei tau ki te akaaereanga tapu a te Atua i kapikiia ʼi ratou ra.

3. E teianei, te oki nei au ki te tuatua o te tamakianga i rotopu i te ngati Niphai e te ngati Lamana i roto i te tai ngauru ma varu o te mataiti i te tutaraanga o te au akava.

4. I na, kua riro mai to Zoroma ei ngati Lamana, e no reira, i roto i te akamataanga o te tai ngauru ma varu o te mataiti i kite ei te au tangata o Niphai e, te aere mai nei te ngati Lamana i te tamaki mai ia ratou, no reira kua teateamamao ratou no te tamaki, e kua akaputuputu mai ratou i to ratou au vaeau ki roto i te enua ko Ieresona.

5. E tae maira te ngati Lamana ma to ratou au tangata e manganui, kua aere maira ratou ki roto i te enua ko Anitionamu, te enua ïa o te ngati Zoroma, e ko tetai tangata ko Zerahemena to ratou arataki.

6. E teianei, no te mea e aronga kino e te inangaro i te ta tangata te ngati Amaleki ki te ngati Lamana, no reira kua iki ratou ia Zarahemena no roto mai oki ratou i te au rangatira mamaata i rungao i te ngati Lamana ra, e no roto mai oki ratou i te nagti Amelikai e te ngati Zoroma katoa.

7. E kua na reira oki aia kia vai rai to ratou riri ki te ngati Niphai, e kia akakauraro aia ia ratou i te akatupuanga i tona au akakoroanga.

8. I na, ko tona akakoroanga koia oki kia akariri atu i te ngati Lamana ki te ngati Niphai. Kua rave aia i teia kia rauka te mana maata ki rungao ia ratou, e kia vai katoa te mana ki rungao i te ngati Niphai na roto i te akatuikaa anga ia ratou.

9. E teianei, ko teia te akakoroanga o te ngati Niphai kia paruru i to ratou enua, e to ratou au are, e ta ratou au vaine, e ta ratou au tamariki kia paruru ia ratou mei to ratou au enemi, e kia akono i to ratou au tikaanga, e pera katoa to ratou rangatiraanga, e kia rauka ia ratou i te akamori i te Atua kia tau ki to ratou inangaro.

10. Kua kite oki ratou e, me topa ratou ki roto i te rima o te ngati Lamana, e ko te ka akamori i te Atua i te vaerua e te tuatua mou, te Atua ora e te tika, ka tamate te ngati Lamana ia ratou.

11. E kua kite oki ratou i te riri makitakita o te ngati Lamana ki to ratou au taeake, koia te au tangata o Aniti-Lihai-Niphai, ko tei tuatuaia e ko te au tangata Amona, e kare ratou e rave i te au apinga tamaki, e kua akamou oki ratou i tetai ture e kare e rauka ia ratou kia aati, e no reira me topa ratou ki roto i te rima o te ngati Lamana ka taiaia ratou.

12. E kare te ngati Niphai e inagaro kia taiaia ratou, e no reira kua oronga atu ratou i tetai enua ei ipukarea no ratou.

13. E kua oronga mai te au tangata o Amona i tetai tuanga maata o ta ratou apinga no te ngati Niphai ei tauturu i to ratou au vaeau, e no reira, kua tamaki te ngati Niphai anake ki te ngati Lamana, koia oki to Lamana e to Lemuela, e te au tamaroa a Isamaela, e te katoatoa tei pueu atu mei te ngati Niphai, ko te ngati Amaleki e te ngati Zoroma, e te uanga o te au taunga o Noa.

14. E ko taua au uanga ra kua aite tikai ratou ki te ngati Niphai rai i te maata, e no reira, kare e ravenga ke, mari ra kia tamaki atu te ngati Niphai i to ratou au taeake ma te akamaringianga toto.

15. E kua akaputuputu maira te au nuku o te ngati Lamana ki te enua ra i Anitionamu, i na, kua papa te nuku o te ngati Niphai i te aravei atu ia ratou ki roto i te enua ko Ieresona.

16. E teianei, te arataki o te ngati Niphai, koia oki te tangata i ikiia ei rangatira maata ki rungao i te ngati Niphai, e ko te rangatira maata i te akaaere i te au nuku o te ngati Niphai, e ko tona ingoa ko Moronai.

17. E tei ia Moronai te mana e te akatere i to ratou au tamaki. E e rua ngauru ma rima rai ona mataiti i ikiiaʼi aia ei rangatira akaaere i te nuku o te ngati Niphai.

18. E kua aravei aia i te ngati Lamana ki te kotinga o Ieresona, e kua papa tona au tangata ma te koke e ma te simetera, e te au tu apinga tamaki katoa.

19. E kite akera te au nuku o te ngati Lamana e, kua akapapa te ngati Niphai, me kore kua akateateamamao a Moronai i tona au tangata ki te paruru umauma, te paruru rima, e te paruru upoko, e kua rakeiia oki ratou ki te kakau petetue.

20. E kare oki te nuku o Zarahemena i akapapaia mei te reira te tu, e ko ta ratou apinga ua, teia ua, ko te koke, te simetera, e ta ratou ana e te kakao, e ta ratou toka, e ta ratou maka e kua taaka ua ratou mari ua ra kua tatuaia to ratou taukupu ki te kiri puaka, kua taaka ua te katoatoa mari ua ra ko te ngati Zoroma, e te ngati Amaleki.

21. Kare ra ratou i aao i te paruru umauma e te paruru tamaki, no reira ratou i mataku ravaʼi i te nuku o te ngati Niphai no to ratou au rakei tamaki katoa oki e maata atu oki to ratou numero i to te ngati Niphai.

22. I na, kua mataku ratou i te tamaki atu ki te ngati Niphai i te kotinga i Ieresona e no reira kua akaruke atu ratou i te enua ko Anitionamu e kua aere atu ratou ki te metepara, e kua aaere ua i te metepara na te kapuaanga o te kauvai ko Sidona kia tae ki te enua ko Manitai, e kia rave i taua enua ra, kare oki ratou i manako e ka kite te au nuku o Moronai e teiea te ngai i aere ei ratou.

23. E i to ratou tae anga ki roto i te metepara, kua tono atura a Moronai i tetai au tangata ki roto i te metepara kia akara i to ratou au puakapa e kua kite katoa oki a Moronai i te au totou a Alama, e kua tono atura aia i tetai au tangata kiaia, ma te pati atu kiaia kia ui atu ki te Atu e, ka aere te nuku o te ngati Niphai kiea kia paruru ia ratou mei te ngati Lamana.

24. E kua tae maira te tuatua a te Atu kia Alama, e kua akakite atura a Alama ki te au karere a Moronai na ko atura, te aere atura ratou na roto i te metepara, kia tae atu oki ratou ki te enua ko Manitai, e kia akamata ratou i te tamaki atu ki te tuanga apikepike o te tangata. Kua aere iora taua au karere ra e kua akakite maira i taua tuatua ra kia Moronai.

25. I na, kua akaruke iora a Moronai i tetai apa o tona nuku ki te enua ko Ieresona ko te aere mai aea tetai pae o te ngati Lamana ki taua enua ra e rave i te oire, e kua rave iora aia i te toenga o tona nuku e kua aere atura ki te enua ra ko Manitai.

26. E kua akaue atura aia kia akaputuputu mai te tangata katoatoa i taua enua ra kia tamaki atu i te ngati Lamana, kia paruru i to ratou enua, e to ratou basileia to ratou ture e to ratou tiama, no reira ratou i akapapaʼi no te taeanga mai o te ngati Lamana.

27. E kua uuna iora a Moronai i tona ra nuku ki roto i te ō i vaitatao ki te nia o te kauvai ko Sidona i roto i te metepara.

28. E kua tono iora a Moronai i tetai au tangata tutaka ki roto i te enua kia kite oki ratou i te taeanga mai o te ngati Lamana.

29. Kua kite oki a Moronai i te akakoroanga o te ngati Lamana, e ko to ratou akakoroanga oki kia tamate i to ratou au taeake me kore kia opu ia ratou e kia apai mai ia ratou ei tuikaa e kia akatinamou ratou i tetai basileia no ratou tikai ki runga i te enua katoatoa.

30. E kua kite oki aia e, kua inangaro tikai te ngati Niphai kia paruru i to ratou enua, e to ratou tiama, e ta ratou akonoanga, e no reira kua manako aia e kare i te ara kia paruru aia ia ratou na roto i tetai ravenga vavare e no reira kua kiteaia e ïa na roto i tona au tangata tutaka i te ngai ka aereia e te ngati Lamana.

31. No reira kua akataka ke aia i tona nuku e kua arataki atura aia i tetai pae ki roto i te ō e kua uuna atura ia ratou ki te pae i te itinga o te ra e ki te apatonga oki i te tuaivi ra ko Ripara.

32. E kua uuna atura aia i te toenga ki roto i te ō i te opunga o te ra, i te opunga o te kauvai ko Sidona, e ki te kotinga o te enua ra ko Manitai.

33. E kua uuna oki aia i tona nuku mei tei tau ki tona ra inangaro, e kua papa oki aia i te aravei atu ia ratou.

34. E kua tae maira te ngati Lamana ki te pae i apatokerau i taua tuaivi ra i uunaiaʼi tetai pae o te nuku o Moronai.

35. I to te ngati Lamana aereanga na te pae i te tuaivi ra ko Ripara e tae atu ei ki roto i te ō ma te akamata i te tikoti atu i te kauvai ko Sidona, i na, ko te au vaeau tei uunaia ki te pae apatonga o te tuaivi, e tei aratakiia e tetai tangata ko Lihai, e kua arataki mai aia i tona au vaeau e kua koropini i te ngati Lamana i te pae i te itinga o te ra i te pae i muri ra.

36. E kite akera te ngati Lamana e tei muri te ngati Niphai ia ratou kua uri maira ratou e kua tamaki maira i te nuku o Lihai.

37. Kua akamata akera te angaanga e mate ei te tangata i nga nuku e rua ra, ina ra, e kino atu te tua o te ngati Lamana, e no to ratou taaka ua oki kua ngoie ua te rutu a te ngati Niphai ki runga ia ratou ma ta ratou koke e ta ratou simetera, e kua viviki te mate.

38. E i tetai tua, taki ua te tangata i mate i rotopu i te ngati Niphai i ta ratou koke e te maringianga toto, kua paruruia oki te au ngai e mate ngoie ei te kopapa me putaia mei te rutu a te ngati Lamana, i na, kua paruruia ki to ratou paruru umauma, e te paruru rima, e te paruru upoko katoa, e kua na reira te ngati Niphai i te akatupu anga i te angaanga tamate tangata i rotopu i te ngati Lamana ra.

39. Tupu akera to te ngati Lamana mataku, no te mate maata i rotopu ia ratou ra, i reira, kua akamata atura ratou i te oro atu ki te kauvai ko Sidona.

40. E kua opuia ratou e Lihai e tona au tangata, e kua oparaia ratou e Lihai ki roto i te vai ko Sidona, e kua tikoti atu ratou i te vai ko Sidona. E kua akanoo a Lihai i tona au vaeau ki runga i te nia o te kauvai ko Sidona kia kore ratou e tikoti i te vai.

41. E kua aravei atu a Moronai e tona nuku vaeau i te ngati Lamana i roto i te o i tetai tua mai o te kauvai ko Sidona, e kua aru atura ia ratou ma te ta atu.

42. E kua oro akaou atu te ngati Lamana mei mua ia ratou, ki te enua ko Manitai, e kua aravei akaouia ratou e te nuku o Moronai.

43. I na, kua ta te ngati Lamana ma te ririnui tikai, e kare rava i kiteaia ana teia tu maroiroi e te ngakau toa e te mataku kore, kare rava oki e mei muatangana mai.

44. E kua akamaroiroiia ratou e to Zoroma e ki to Amaleki katoa, e ko ratou oki to ratou rangatira e te akaaere, e na roto ia Zerahemena, to ratou rangatira maata, me kore ra, te akaaere maata i na, kua ta ratou mei ta te taae rai, e manganui oki to te Niphai i taiaia e to ratou rima, kua ngaangaa i rotopu to ratou paruru upoko e manganui, e kua patia katoa ratou i to ratou paruru umauma e manganui, e kua tipu atu ratou i to ratou au rima e manganui, e kua na reira te ngati Lamana i te ta anga atu ia ratou ma to ratou riri otooto.

45. Kua akamaroiroiia te ngati Niphai e tetai mea meitaki ake, kare oki ratou i tamaki atu no te akatereanga e te mana, ina ra, kua tamaki atu ratou no to ratou ngutuare, e to ratou rangatiraanga, e ta ratou au vaine e te tamariki, e ta ratou au apinga katoatoa, e no to ratou tu akamorianga e ta ratou akonoanga.

46. Te rave ra ratou i te mea ta ratou i manako e, kua tau i te Atua ra, kua tuatua mai oki te Atu kia ratou, e pera katoa ki to ratou ai metua e, mei te mea e kare kotou i apa i te taime mua, kare katoa rai i te rua o te taime, kare kotou e tuku ua ia kotou kia taiaia e to kotou au enemi.

47. E kua tuatua akaou mai te Atu e, e paruru kotou i to kotou ngutuare e tae roa atu ki te akamaringianga toto, no reira te ngati Niphai i tamaki atu ei i te ngati Lamana kia paruru ia ratou uaorai e to ratou au kopu tangata, e to ratou enua, e to ratou au, e ta ratou akonoanga.

48. E kite akera te au tangata o Moronai i te riri otooto o te ngati Lamana, kua vaitata ratou i te emi e te oro ke atu mei ia ratou. E kite akera Moronai i to ratou au manako, kua akamaroiroi akera aia i to ratou ngakau ki teia nei au manako, koia oki, te au manako no to ratou au enua, to ratou tiamaanga, e te rangatiraanga mei te tuikaaanga.

49. E kua ariu atura ratou ki te ngati Lamana, e kua kapiki atura ma te reo okotai ki te Atu to ratou Atua, kia tiama ratou e kia rangatira mei te tuikaaanga.

50. Kua tu atura ratou ki mua i te ngati Lamana ma te ririnui, e i taua ora rai i kapiki atu ei ratou ki te Atua no to ratou au, kua akamata te ngati Lamana i te oro atu mei mua ia ratou, e kua oro atu ratou e tae rava atu ki te vai i Sidona.

51. E manganui tikai te ngati Lamana, koia ia, kua ta rua akera to ratou numero i to te ngati Niphai, kua tuaruia ratou e kua akauipaia iora ratou ki te ngai okotai i roto i te ō i te nia i te pae i te kauvai ko Sidona.

52. No reira, kua koropini te vaeau o Moronai ia ratou ki nga tua ravarai e rua o te kauvai, e i na, e tei te itinga oki te au tangata o Lihai.

53. E kite atura a Zerahemena i te au tangata o Lihai i te pae i te itinga o te ra i te pae i te kauvai ra ko Sidona, e te au nuku katoa o Moronai i te opunga o te ra i te kauvai i Sidona, e kua koropiniia oki ratou e te ngati Niphai, kua rokoia iora ratou e te mataku maata.

54. E kite akera a Moronai i to ratou mataku maata, kua akaue atura aia i tona au tangata kia akamutu ratou i te akamaringi i to ratou toto.