1. E teianei, ka oki tatou i ta tatou akapapaanga kia Amalikaia, e kia ratou oki tei oro atu ki te metepara, i na, kua rave aia ia ratou tei aru iaia, e kua aere atu ki te enua ko Niphai ki rotopu i te ngati Lamana, e kua akatupu iora aia i to ratou riri ki te ngati Niphai, e kua tuku atura te ariki o te ngati Lamana i tetai tuatua akakite ki roto i tona enua katoatoa, e ki tona au tangata, e kia uipa mai ratou ki te ngai okotai e kia aere akaou e tamaki atu ki te ngati Niphai.

2. E i te tae anga atu te tuatua akakite kia ratou, kua mataku tikai ratou, kua mataku oki ratou i te akariri atu i te ariki, e kua mataku katoa ratou i te tamaki atu ki te ngati Niphai, e ko te mate aea ratou. E i na kare atura te maataanga o ratou i ariki i te akaueanga a te ariki.

3. Kua riri iora te ariki ia ratou no to ratou akarongo kore, e no reira, kua oronga atu aia kia Amalikaia i te akatereanga o te reira tuanga o tona nuku tei akono i tana au akaueanga, ma te akaue atu iaia kia akaue atu ia ratou kia rave i te au apinga tamaki.

4. I na, ko teia te inangaro o Amalikaia, no te mea e tangata pakari aia i te rave i te kino, no reira aia i akatupu ei i roto i tona ngakau i te ravenga e opara atu ei aia i te ariki o te ngati Lamana mei tona terono.

5. E teianei, kua rauka iaia i te akatere i tetai pae o te ngati Lamana tei inangaro i te ariki ra, e kua inangaro atu aia kia rauka mai te tauturu o te aronga i kore i akono, e kua aere tika atu aia ki te ngai tei karangaia e ko Onida, e te reira oki te ngai i oro ei te au tangata Lamana, e kua kite oki ratou i te vaeau e aere mai nei ma te manako e, te aere mai nei ratou i te ta ia ratou, i reira kua oro atu ratou ki Onida ki te ngai vairanga o te au apinga tamaki.

6. E kua akataka oki ratou i tetai tangata ei ariki e ei arataki no ratou, kua papu oki i roto i to ratou ngakau ma te manako ngaueue kore e, auraka ratou kia aere e tamaki atu i te ngati Niphai.

7. E kua putuputu akera ratou ki runga i te take o tetai maunga, tei karangaia e, ko Anitipa e kua papa ratou no te tamaki.

8. E kare oki e ko to Amalikaia manako teia kia tamaki atu ia ratou kia tau ki te akaueanga a te ariki, ina ra, kua inangaro aia kia inangaro te au nuku o te ngati Lamana iaia, e kia riro e koia to ratou upoko, e kia akangere i te ariki i tona terono, e kia rauka iaia te basileia.

9. Kua akaue iora aia i tona au vaeau kia patia i to ratou au puakapa ki roto i te ō i vaitatao i te maunga ko Anitipa.

10. E po akera kua tono atu aia i tetai karere muna ki runga i te maunga ra ko Anitipa kia akakite atu ki te arataki o runga i te maunga ra ko Lehoniti tona ingoa, kia aere mai aia ki raro i te maunga ra, e ka inangaro aia i te tuatua kiaia.

11. I te tae anga taua tuatua ra kia Lehoniti, kua mataku atura aia i te aere ki raro i te maunga ra. E kua tono akaou atura a Amalikaia i te rua o te taime, kare atura i tika ia Lehoniti kia aere mai ki raro, e kua tono akaou atura aia i te toru o te taime.

12. E kite akera a Amalikaia e kare a Lahoniti e inangaro i te aere mai ki raro mei runga mai i te maunga, kua aere tika atu ki runga i te maunga i vaitata atu ki te punanga o Lehoniti, e kua unga akaou atu aia i tana karere i te ā o te taime kia Lehoniti, kia aere mai aia e tona au vaeau tiaki katoa.

13. E aere maira a Lehoniti ki raro e tona au vaeau tiaki katoa kia Amalikaia, kua inangaro a Amalikaia kia arataki mai aia i tona nuku tangata ki raro i te po, e ka koropini ei i te au tangata i roto i to ratou au puakapa i ta te ariki i oronga mai kiaia kia akaaere, e ka tuku atu oki aia ki roto i te rima o Lehoniti me ka akariro aia iaia (ia Amalikaia) ei arataki rua ki rungao i te nuku katoatoa.

14. Kua aere maira a Lehoniti ki raro e tona au vaeau e kua koropini i te au tangata o Amalikaia, e i mua ake ka ara mai ei ratou i te mamaiata i te rā i koropiniiaʼi ratou e te au vaeau o Lehoniti.

15. E kite akera ratou e kua koropiniia ratou, kua pati atura ratou kia Amalikaia kia kore aia e akatika ia ratou kia tamaki atu ki to ratou au taeake, e kia kore ratou e takoreia. E teianei, ko teia te mea ta Amalikaia i inangaro.

16. E kua tuku atura aia i tona au tangata tei kore i akono i te akaueanga a te ariki. E kua inangaro a Amalikaia kia akapera, kia tika iaia kia akatika i tana ravenga e akangere ei te ariki i tona ra terono.

17. Teia te peu a te ngati Lamana, kia mate te arataki mua, kua ikiia te arataki rua ei arataki mua no ratou.

18. E kua akaue a Amalikaia i tetai ona tavini kia akainu i te poitini kia Lehoniti, e kua mate aia.

19. I na, kia mate a Lehoniti, kua iki akera te ngati Lamana ia Amalikaia ei arataki no ratou ei akaaere maata katoa.

20. E kua arataki atura a Amalikaia i tona au nuku (kua tupu oki tona inangaro), ki te enua ra ko Niphai, ki te oire ra ko Niphai, koia te oire maata.

21. E kua aere maira te ariki e tona au vaeau tiaki kia aravei atu iaia, kua manako oki aia e, kua akono a Amalikaia i tana au akaueanga, e kua akaputuputu aia i teia nuku maata kia tamaki atu i te ngati Niphai.

22. E i na, kia aere mai te ariki kia aravei atu iaia, kua akaue atu a Amalikaia i tona au tavini kia aravei atu i te ariki. E kua aere atu ratou e kua tupou atu ratou ki mua i te ariki, mei te mea ra e, te akangateitei atura iaia no tona tu rongonui.

23. Kua akatoro maira te ariki i tona rima kia akangateitei atu ia ratou mei tei tau ki te peu a te ngati Lamana, ei tapao no te au, e peu teia tei raveia mai no ko mai i te ngati Niphai.

24. E i tona akatu anga mai i te tangata mua mei te one maira, i na, kua patia atura aia i te pukuatu o te ariki, inga iora aia ki te one.

25. Oro atura te au tavini o te ariki, kua tu maira te au tavini o Amalikaia, i te na ko anga mai e.

26. I na, kua patia te au tavini o te ariki iaia ki tona pukuatu e kua oro ratou, ka aere mai ana ka akara.

27. Kua akaue atura a Amalikaia i tona ra au nuku kia aere atu e akara i tei tupu ki te ariki ra, e kia tae mai ratou ki taua ngai ra, kite atura i te ariki ra, kua akatutu a Amalikaia mei te mea e, kua riri aia. Kua na ko atura aia e, ko tei inangaro i te ariki, e aere, e arumaki i tona au tavini e ta ia ratou.

28. E akarongo akera ratou ko tei inangaro i te ariki ra i teia tuatua nei, aere atura ratou i te arumaki i te au tavini o te ariki.

29. E kite maira te au tavini o te ariki i te au vaeau i te arumaki anga mai ia ratou, kua mataku akaou akera ratou, oro atura ki roto i te metepara e te oro atura ki te enua ra ko Zarahemela, e kua piri iora ki te au tangata o Amona ra.

30. E oki atura te au vaeau tei aru mai ia ratou e kua popoa to ratou tere, e kua rauka ra ia Amalikaia te ngakau o teia arongo na roto i tana pikikaa.

31. E ao akera, kua tomo atura aia ki roto i te oire ko Niphai e tona au nuku katoa, e kua rave iora aia i te oire.

32. E kite akera te ariki vaine e, kua taiaia te ariki, e na Amalikaia oki i tono atu i te karere kiaia kia akakite kiaia e kua taiaia te ariki e tona uaorai au tavini, e kua arumaki oki aia i tona au tavini, ina ra, kua popoa, kua ora ratou.

33. E kite akera te ariki vaine i taua tuatua ra, kua tono maira aia i te karere kia Amalikaia, kia pati mai kiaia kia akaora i te tangata o taua oire, e kua inangaro katoa aia kia aere mai aia kiaia, e kua inangaro katoa aia kia apai mai a Amalikaia i tetai kite nona no runga i te mate o te ariki.

34. Rave iora a Amalikaia i te tavini tikai tei ta i te ariki ra, e ratou katoa tei piri ki te ariki ra, e kua aere atura ki te ariki vaine ki te ngai i nooia e ïa ra, e kua akakite atura ratou katoa kiaia e, kua taiaia te ariki e tona uaorai au tavini, e kua karanga katoa ratou e, kua oro ratou, kare ainei te reira e akaapa ia ratou? Kua akapumaana atura ratou i te ariki vaine no te mate o te ariki.

35. Kimi atura a Amalikaia i te ravenga kia manako meitaki mai te ariki vaine iaia, e kua rave iora aia iaia ei vaine nana, e kua na reira aia i raukaʼi iaia te basileia, na roto i tana pikikaa, e te angaanga kikite a tona au tavini, i na, kua riro aia ei ariki no te au enua e pini ua ake, e te ngati Lamana katoa, ko ratou ko te ngati Lamana, te ngati Lemuela, e te ngati Isamaela, e ko ratou katoa i aere ke ki te ngati Niphai, mei te tutaraanga mai o Niphai e tae rava mai ki teianei.

36. E teianei, kua aite te kite o taua aronga aere ke ra e to te ngati Niphai ra, kua apiiia ki taua kite o te Atu ra, ina ra, teia te mea umere, i muri akera i to ratou pekapeka anga, kua riro ratou ei aronga ngakau ketaketa e te tataraara kore, te aviri, te kino, e te viivii atu, i te ngati Lamana, e kua ariki oki ratou i te au peu viivii a te ngati Lamana ra e kua riro ei aronga kope e te au tu angaanga kikino katoa, e kua akangaropoina i te Atu to ratou Atua.