1. Kua akaue iora te ariki ko Lamoni i tona au tavini kia tu ki mua ma te akakite mai i te au mea katoatoa ta ratou i kite no teia manamanata.

2. E oti akera ia ratou i te akakitekite i te au mea ta ratou i kite, e kia kite aia i te tu akono meitaki o Amona i te akaora anga i tana mamoe, e pera katoa i tona mana maata i te paruru anga i tei umuumu i te ta iaia, kua poitirere tikai aia ma te na ko e, kua papu tikai e, e maata atu teia i te tangata nei. E ina, kare ainei e, ko te Vaerua Maata teia tei unga mai i te akautunga anga maata ki teia au tangata nei, no ta ratou ta tangata?

3. Kua pau atura ratou ki te ariki na ko atura, me koia te Vaerua maata me e tangata ua, kare matou i kite, ina ra, ko teia ua, kua kite matou e, kare aia e mate i te enemi o te ariki, e kare katoa e rauka ia ratou i te keia i te mamoe a te ariki, mei te mea e tei te pae aia ia matou, no tona karape e te ririnui maata, e no reira kua kite matou e, e taeake aia no te ariki. E teianei e te ariki, kare matou e irinaki e, e tangata tetai ma te mana maata mei te reira, no te mea, kua kite oki matou e, kare e rauka kia tamateia aia.

4. I te rongo anga te ariki i teia tuatua nei, kua karanga atura aia kia ratou e, I teianei kua kite au e, ko te Vaerua Maata teia, e kua aere mai aia ki raro nei i te akaora ia kotou, kia kore oki au e ta ia kotou mei taku i tamate i to kotou au taeake. E ko teia oki te Vaerua Maata ta to tatou ai metua i tuatua ana.

5. E i na, ko te papaanga teia o Lamoni, tana i rauka mai mei ko mai i tona metua e, e Vaerua Maata rai tetai. E kua irinaki oki ratou ki te Vaerua Maata, e kua manako ratou e, ko ta ratou e rave nei e mea tika ïa, i na, kua mataku tikai a Lamoni ko te rave aea aia i te mea tarevake, i te ta anga aia i tona au tavini.

6. E manganui oki tana i ta ia ratou no te mea, kua tuaru to ratou au taeake i tana mamoe mei te ngai o te vai. E no te mea kua akapueurikirikiia ta ratou mamoe, kua taiaia ratou.

7. I na, ko te tu rai ïa o te ngati Lamana, ka tu ki te pae i te vai, o Sepeta ma te akapueurikiriki i te mamoe a te tangata kia maata oki ta ratou ka rauka mai no te apai atu ki to ratou enua tikai kua riro teia ei mea keia no ratou.

8. Kua ui atura te ariki ko Lamoni ki tona au tavini na ko atura e, Teiea teia tangata tei rauka iaia te mana maata?

9. Kua karanga atura ratou kiaia, i na, te angai mai ra aia i toou au oroenua. I na, kua akaue atu te ariki i tona au tavini, i mua ake i te akaainuanga i te mamoe, kia akateateamamao oki ratou i tona au oroenua e te kariota, kia apai atu iaia ki te enua ko Niphai, no te mea e umukai maata tetai ka raveia ki te enua ko Niphai e te metua o Lamoni koia te ariki no te au enua ravarai.

10. I na, i te rongo anga te ariki ko Lamoni e, te akapapa nei a Amona i tona oroenua e tona kariota, kua poitirere tikai aia no te tu mako meitaki o Amona, kua na ko akera aia e, papu tikai e, kare atu e tavini i roto i toku nei au tavini tei aite te akono mei teia tangata e kua akamaara katoa aia i taku nei au akaueanga taku ka akakite atu, kia akono i te reira.

11. Kua kite au i teianei e, ko te Vaerua Maata tikai teia, e te inangaro nei au kia aere mai aia kiaku nei, kua mataku ra au.

12. Kia oti a Amona i te akapapa i te oroenua e te kariota o te ariki e tona au tavini kua aere atu aia ki te ariki, ina ra, kua tuke te akaraanga o te ariki e i reira, kua vaitata tikai aia i te oki ki vao mei mua iaia.

13. Kua karanga atura tetai o te au tavini kiaia e, e Rabana, tei akauriia e mana maata me kore e ariki maata, kua manako ratou i to ratou ariki e ririnui, e ka na ko atu ratou kiaia e, e Rapana, te anoano nei te ariki ia koe kia noo mai.

14. E no reira, kua uri atu a Amona ki te ariki ma te na ko atu kiaia e, eaa koe i inangaro ei kia noo mai au e te ariki? E kare oki te ariki i pau atu ana e tai ora katoa, no te mea kare aia i kite e eaa tana ka pau atu kiaia.

15. Kua tuatua akaou atura a Amona e, eaa taau i anoano iaku? Ina ra, kare te ariki i pau atu ana.

16. E kua ki oki a Amona i te vaerua o te Atua e no reira kua kite aia i te au manako o te ariki. Kua na ko atura aia kiaia, kare aina kua rongo koe e, kua paruru au i to au tavini e to au mamoe katoa, ma te tamate e itu o ratou ki te maka e te koke, ma te tipu i te au rima o tetai pae kia paruru i taau au mamoe e to au tavini katoa, e ko teia ainei tei riro ei umere anga noou?

17. Te karanga atu nei au kia koe e, eaa i maataʼi toou umere? I na, e tangata ua oki au, e ko au oki toou tavini, e ko taau ka anoano, me e tika, ka rave au.

18. I te akarongo anga te ariki i teia au tuatua nei, kua umere akaou aia, no te mea kua kite aia e, ka kite a Amona i tona au manako, kua amama akera te ariki ko Lamoni i tona vaa ma te na ko atu kiaia e, Koai koe na? Ko koe ainei taua Vaerua Maata ra, tei kite i te au mea katoatoa?

19. Kua pau atura a Amona kiaia e, kare e ko au.

20. Kua karanga atura te ariki e, I akapeea koe i kite ei i te au manako o toku ngakau? Kua tuatua mai koe ma te mataku kore, e ma te akakite mai i teia au mea kiaku, e akakite katoa mai koe kiaku e, noea toou mana i taʼi koe ma te tipu i te rima o toku au taeake tei keia i taku mamoe.

21. E teianei, me akakite mai koe kiaku i teia au mea nei, e no atu e eaa taau i anoano, ka oronga atu au e me ka inangaroia, e ka tiaki au ia koe ma toku au vaeau, ina ra, kua kite au e, e maata ake toou mana i te ririnui ia ratou e no atu eaa taau ka anoano iaku ka oronga atu au naau, ka oronga atu au kia koe.

22. I na, e pakari oki a Amona e te apa kore, kua karanga atura aia kia Lamoni, ka akarongo ainei koe ki taku tuatua, me akakite atu au e i akapeea toku mana i raukaʼi i te rave anga i teia au mea nei? E ko teia oki te au mea taku ka inangaro ia koe.

23. Kua pau atura te ariki na ko atura, Ae, ka irinaki au i taau au tuatua. E kua pera aia i te rave anga i te ravenga pakari.

24. I reira, kua akamata iora a Amona i te tuatua ma te mataku kore, e ma te na ko atu kiaia e, te irinaki ainei koe e e Atua tetai?

25. Kua pau atura aia ma te na ko atu e, kare au i kite i te aiteanga o te reira.

26. I reira, kua karanga atura a Amona e, Te irinaki ainei koe e, e Vaerua Maata tetai?

27. Kua karanga atura aia e, Ae.

28. Kua karanga atura a Amona e, ko te Atua te reira. E kua tuatua akaou atura Amona e, Kua irinaki ainei koe e, ko te Vaerua Maata, koia te Atua tei anga i te au mea katoatoa i te enua nei e to te rangi.

29. Kua na ko atu aia e, ae, ae kua irinaki au e, kua anga aia i te au mea katoa i te enua nei, ina ra, kare au kite i to te ao ra.

30. Kua karanga atura a Amona kiaia e, ko te Ao ra, ko te ngai ïa i noo ei te Atua e tana au angela tapu.

31. Kua na ko atura te ariki ko Lamoni e, tei runga ake ainei te reira i te enua nei?

32. Kua karanga atura a Amona e, ae, e te akara mai nei aia ki raro nei ki te au tamariki a te tangata nei, e kua kite aia i te au manako katoatoa e te inangaro o te ngakau, e na tona rima oki i anga i te au mea katoatoa mei muatangana maira.

33. Kua karanga atura te ariki ko Lamoni e, te irinaki nei au i teia au mea katoatoa taau i tuatua mai. E mea ungaia mai ainei koe mei ko mai i te Atua?

34. Kua na ko atura a Amona e, e tangata ua au nei, e i muatangana, kua angaia te tangata ki to te Atua tu, e kua kapikiia au e tona Vaerua Tapu kia apii i teia au mea ki teia au tangata, e kia ariu mai oki ratou kia kite i te au mea tika e te tuatua mou.

35. Tei roto iaku tetai tuanga o taua vaerua ra, ko tei oronga mai kiaku i te kite e te mana kia tau ki toku akarongo e toku inangaro i te Atua.

36. E oti akera a Amona i te tuatua i teia au mea nei, kua akamata aia mei te angaia anga o te ao nei, e pera katoa ki te angaia anga o Adamu, ma te akakite atu i te au mea katoatoa kiaia no te inga anga o te tangata nei, ma te oronga atu ki mua iaia i te au akapapaanga e te tuatua tapu o te tangata nei, tei tuatuaia ana e te au peroveta tapu mei te tuatau i akaruke mai to ratou metua ko Lihai ia Ierusalema.

37. E kua akakite katoa aia kia ratou (ki te ariki e tona au tavini) i te au aereanga o to ratou ai metua i roto i te metepara, e to ratou akakoromakianga i te pongi e te kaki vai, e to ratou teretere anga e tetai atu au mea.

38. Kua akakite katoa atu aia kia ratou i te tu marokiakia o Lamana raua ko Lemuela e te au tamaroa a Isemaela, kua akakite pouroa aia i to ratou marokiakia, e kua akaari katoa aia kia ratou i te au papaanga e te au tataanga mei te taime i akaruke ei a Lihai ia Ierusalema e teia noaʼi.

39. Ina ra, kare e ko teia ua, kua akaari katoa aia kia ratou i te ravenga o te akaoraanga, tei akonoia mei te akatumuangaia mai o te ao nei e kua akakite katoa aia kia ratou i te okianga mai o te Mesia, e te au angaanga katoatoa a te Atua, kua akakite atu aia i te reira kia ratou.

40. E muri ake i tona akakiteanga atu i teia au mea ma te akamarama atu ki te ariki, kua irinaki pouroa te ariki i tana au tuatua.

41. Kua akamata iora aia i te pati atu ki te Atu i te na ko anga e, E te Atu, e aroa mai iaku ki toou aroa maata mei taau i rave ki te iti tangata Niphai, kiaku e toku iti tangata.

42. E oti akera aia i te tuatua, kua topa iora aia ki runga i te one, mei te mea, e kua mate aia.

43. Kua apai atura tona au tavini iaia ki tana vaine, e tuku atura iaia ki runga i te roi, kua takoto aia mei te mea ra e kua mate aia e ko te roa, e rua ra, e rua po, e kua mii tana vaine tana au tamaroa, e tana au tamaine iaia no tona mate mei te tu o te ngati Lamana.