1. E tae akera ki te rima o te mataiti i to ratou tutaraanga, kua tupu tetai tauetonoanga ki rotopu i te tangata no tetai tangata ko tei karangaia e, ko Amelikai, e tangata kikite oki aia, e tangata kite ra i te pakari o te ao nei, mei te tu rai o te tangata tei tamate ia Kitiona ki te koke, ko tei tamateia kia tau ki te ture.

2. Na roto i tona pakari, kua arataki atu a Amelikai i te au tangata e manganui kia aru ratou iaia, e kua riro ratou ei aronga ririnui, e kua akamata katoa ratou kia akariro ia Amelikai ei ariki no te iti tangata.

3. Kua manamanata oki te au tangata o te akonoanga i teia, e pera te aronga tei kore i taparuparuia ana e te tuatua a Amelikai, kua kite oki ratou e, ka akatinamouia teia au mea ki te reo o te tangata katoatoa kia tau ki ta ratou ture.

4. E no reira, mei te mea ka rauka ia Amelikai te akatika anga a te vaa tangata, no tona tu kino, ka akakore aia i to ratou tikaanga ki roto i te akonoanga, no te mea, ko tona akakoroanga rai ïa, kia takinga kino i te akonoanga a te Atua.

5. Kua akaputuputu mai te au tangata katoatoa o taua enua ra, te tangata e tona uaorai manako no te patoi e, me no te akatika ia Amelikai, e rua ïa pupu, e kua maro tetai ki tetai.

6. Kua uipa mai ratou ki te ngai okotai kia tuatua atu no runga i teia akakoroanga, kua tukuia te reira ki mua i te au akava ra.

7. Kua tae maira te reo patoi o te au tangata ra kia Amelikai, e kare ratou e akatika iaia kia riro aia ei ariki no te iti tangata.

8. Kua riro oki teia ei rekareka anga no te au tangata tei patoi iaia, ina ra, kua akakoko rai a Amelikai i te aronga tei inangaro iaia kia riri atu ki te aronga tei kore i inangaro iaia.

9. E i na, kua uipa ratou ki te ngai okotai ma te iki ia Amelikai ei ariki no ratou.

10. I te riro anga a Amelikai ei ariki no ratou, kua akaue aia ia ratou kia ta atu i to ratou ai taeake, kua rave aia i teia, kia riro mai oki ratou iaia.

11. E kua tuatuaia te au tangata o Amelikai ki te ingoa o Amelikai, e kua kapikiia e ko te ngati Amelikai, e ko te toenga, ko te ngati Niphai ïa, me kore ra, ko te iti tangata o te Atua.

12. E no reira kua kite te ngati Niphai i te ravenga a Amelikai, e kua akapapa ratou i te aravei atu ia ratou, kua akateateamamao ratou i ta ratou koke, e te simetera, e te ana, e te kakao, e te toka, e te maka, e te au tu apinga tamaki ravarai.

13. Kua papa oki ratou i te aravei atu i te ngati Amelikai me aere mai ratou. Kua iki ratou i tetai au rangatira, e te rangatira teitei, e te rangatira anere kia tau ki to ratou au numero.

14. E i pera katoa a Amelikai i te akapapa anga i tona iti tangata ki te au tu apinga tamaki katoatoa. Kua iki katoa aia i tetai au tutara, e te akaaere ki rungao i te tangata ei arataki ia ratou kia tamaki atu i to ratou ai taeake.

15. Kua aere atura te ngati Amelikai ki te tuaivi ra ko Aminihu, i te tuanga itinga i te kauvai ko Sidona, tei tae na te pae enua o Zarahemela, ei reira oki ratou i akamataʼi i te tamaki atu ki te ngati Niphai.

16. I na ko Alama oki te akavanui e te kavana o te iti tangata Niphai, e no reira kua aere atu aia e tona iti tangata, e tona au rangatira, e te rangatira anere kia arataki i tona au vaeau kia tamaki atu i te ngati Amelikai.

17. Ei reira oki ratou i akamataʼi i te tamate atu i te ngati Amelikai i runga i te tuaivi i te itinga o Sidona. E kua tamaki atu rai te ngati Amelikai i te ngati Niphai ma te maroiroi tikai, e maata oki to te ngati Niphai i topa i te ngati Amelikai.

18. E kua akamaroiroi mai te Atua i te rima o te ngati Niphai, kia rauka oki ia ratou i te ta atu i te ngati Amelikai, kua akamata katoa ratou i te oro ke atu mei mua ia ratou.

19. Kua arumaki atura te ngati Niphai i te ngati Amelikai i taua rā katoa ra, e kua ta atura ia ratou, e manganui atura ta ratou i ta i te ngati Amelikai, e tai ngauru ma rua tausani e rima anere e toru ngauru ma rua tangata, e to te ngati Niphai, e ono tausani e rima anere e ono ngauru ma rua tangata i mate.

20. E i na, i te kore anga e rauka akaou ia Alama i te arumaki i te ngati Amelikai, kua akaue atu aia i tona iti tangata kia patia i to ratou au puakapa ki roto i te ō o Kitiona, kua kapikiia teia ō e ko te ō o Kitiona, koia tei taiaia e Nihora, e i roto oki i teia ō nei i patiaʼi te ngati Niphai i to ratou au puakapa no taua po ra.

21. Kua akaunga atura Alama i tetai au tangata ei tutaka i te au akakoroanga o te ngati Amelikai, kia kite oki aia i to ratou au ravenga, kia rauka oki iaia i te paruru atu i tona iti tangata mei ia ratou, e kia kore ratou e takoreia.

22. E ko teia oki tana aronga i akaunga atu ei tutaka i te punanga o te ngati Amelikai, ko Zerama, e ko Amanora, ko Manitai, e Limiera, ko te aronga oki teia tei aere atu i te akara i te nuku o te ngati Amelikai.

23. E i tera mai rā, kua oki viviki atu ratou ki to ratou puakapa ma te mataku maata, e te poitirere maata e te taitaia i te na ko anga e,

24. I na, kua aru matou i te nuku o te ngati Amelikai, e i to matou poitirere maata, i roto i te enua ko Minona, i rungao i te enua o Zarahemela, i te enua o Niphai, kua kite atu matou i tetai nuku tangata maata e ngati Lamana, e kua kapiti mai oki te ngati Amelikai kia ratou.

25. E tei runga katoa ratou i to tatou ai taeake i taua enua ra, e te oro ra ratou na mua ia ratou ma ta ratou au anana, e ta ratou au vaine, e ta ratou au tamariki ki to tatou oire, e mei te mea e oro ke atu tatou ka peke to tatou oire, e ka ta ratou i to tatou au metua, te vaine e te tamariki katoa.

26. Kua rave iora te ngati Niphai i to ratou au puakapa, kua akaruke atura i te o o Kitiona, e kua aere atu ki to ratou oire, koia ko Zarahemela.

27. E i na, ia ratou e tikoti ra i te kauvai ko Sidona, kua aere mai te urupu maata o te ngati Lamana e te ngati Amelikai ki runga ia ratou e mei te one taatai oki ratou i te maata, kua aere mai ratou i te ta mai ia ratou.

28. Ina ra, kua akamaroiroiia mai te ngati Niphai e te rima o te Atua, e ma te pure pakari atu kiaia kia akaora mai ia ratou mei te rima o to ratou au enemi, e kua akarongo mai oki te Atua i ta ratou aue, e kua akamaroiroi mai ia ratou, e kua matemate iora te ngati Lamana e te ngati Amelikai, ki mua ia ratou.

29. Kua tamaki oki a Alama raua ko Amelikai ki te koke, te mata e te mata kua ta raua ma te ririnui tetai ki tetai.

30. E no te mea oki e, e tangata oki a Alama no te Atua, e kua ki aia i te akarongo maata, kua kapiki atu aia ma te na ko e, e te Atu e, akaora mai iaku, kia riro oki au ei rima rave noou kia akaora i teia iti tangata.

31. I na, i te tuatua anga a Alama i teia au tuatua nei, kua ta akaou raua ko Amelikai, kua akamaroiroiia mai aia, e kua tamate atu oki aia ia Amelikai ki te koke.

32. Kua ta katoa atu aia i te ariki o te ngati Lamana, ina ra, kua oro ke atu te ariki o te ngati Lamana mei mua ia Alama e kua unga mai i ona nga tiaki kia ta ia Alama.

33. Ina ra, ko Alama, e tona au tiaki, kua ta atu ratou ko te au tiaki o te ariki o te ngati Lamana e mate rava atura ratou ma te oki ki muri.

34. Kua tāmā aia i te one, me kore ra, te nia kauvai i te tuanga itinga o te kauvai ko Sidona, ma te tiritiri i te au kopapa mate o te ngati Lamana ki roto i te vai i Sidona, kia rava ei te ngai no tona iti tangata i te tikoti ma te ta atu i te ngati Amelikai i te tuanga opunga o te kauvai ra ko Sidona.

35. E pou akera ratou i te tikoti i te kauvai ki Sidona, kua oro atu te ngati Lamana e te ngati Amelikai na mua ia ratou, ma te urupu maata e kare oki e rauka i te tarē.

36. Kua oro atu ratou na mua i te ngati Niphai ki te metepara ki te opunga e te apatokerau, ki te ngai mamao i taua enua ra, e kua arumaki rai te ngati Niphai ia ratou ma to ratou maroiroi, e kua tamate atu ia ratou.

37. Kua aravei ratou ki tera ngai e tera ngai, e kua ta, e kua tuaruia, e purara atura ratou ki te opunga, e te apatokerau, e tae atura ratou ki te metepara tei karangaia e ko Eremotu, e ko te reira tuanga oki o te metepara te ngai i nooiaʼi e te au tu manu taae.

38. E manganui oki tei mate i te metepara no to ratou au putaputa, e kua kaingaia e te au manu taae, e pera katoa, ki te manu taae o te reva, kia kiteaia mai to ratou au ivi, e kua akaputuia ki runga i te one.