1. I to Alama aereanga mai mei te enua mai ko Kitiona i te tuanga apatonga, ki te enua ko Manitai, i na, kua poitirere aia, no te mea, kua aravei aia i te au tamaroa a Mosaia i te aereanga mai ki te enua ko Zarahemela.

2. I na, ko teia au tamaroa a Mosaia, ko ratou ïa ko Alama i te taime i tae mua mai ei te angela, e kua rekareka tikai a Alama i te aravei anga i tona au taeake, e maata atu tona rekareka no te mea, ko ratou rai tona taeake i roto i te Atu. E kua maroiroi tikai ratou i te kite i te tuatua mou, e aronga tangata marama oki ratou, e kua kimi ana oki ratou i te au irava ma te maroiroi kia kite oki ratou i te tuatua a te Atua.

3. E kare ko teia ua, kua pure pakari ana oki ratou, ma te akakore i te kai, e tei ia ratou oki te vaerua o te totou, e te vaerua o te eeuanga, e me apii atu ratou, ka apii ratou ma te mana e te tikaanga no ko mai i te Atua.

4. E kua apii ana oki ratou i te tuatua a te Atua e tai ngauru ma ā mataiti ki te ngati Lamana, ma te manuia maata i te arataki anga mai i te au tangata e manganui kia rauka te kite i te tuatua mou, e no te mana o ta ratou tuatua kua aratakiia te tangata e manganui ki mua i te atarau o te Atua, ma te kapiki i tona ingoa, ma te aaki i ta ratou au ara ki mua iaia.

5. Ko teia oki te au mea tei tupu kia ratou i to ratou aereanga, no te mea e maata to ratou au tumatetenga. Kua mamae oki ratou, i te pae kopapa e te manako katoa oki, mei te mate pongi, kaki vai, e te roiroi, e pera katoa ki te angaanga maata a te vaerua.

6. I na, ko teia to ratou aereanga, kua akaruke ratou i to ratou metua tane ko Mosaia i te mataiti mua a te au akava, e kua akaruke i te basileia ta to ratou metua ka oronga atu kia ratou, e ko teia oki te inangaro o te au tangata.

7. Kua akaruke atura ratou i te enua ko Zarahemela, e kua rave i ta ratou koke, e ta ratou korare, e ta ratou ana e te kakao, e ta ratou maka, kua rave oki ratou i teia kia rauka mai tetai kai na ratou i roto i te metepara.

8. Kua aere atura ratou ki te metepara ma to ratou pupu tei ikiia e ratou, kia aere atu ki te enua ko Niphai, kia ako atu i te tuatua a te Atua ki te ngati Lamana.

9. E manganui oki te au rā i to ratou aereanga i te metepara, e kua akakore ratou i te kai, ma te pure atu ki te Atua kia tauturu mai ia ratou e kia tuku mai i tona vaerua kia aru ia ratou ma te tiaki mai ia ratou, kia riro oki ratou ei raverave i roto i te rima o te Atua kia akaoki mai i to ratou au taeake, ko te ngati Lamana, ki te kite o te tuatua mou, e ki te kite o te tu mako o te akonoanga a to ratou au metua tei kore i tika.

10. E kua atoro katoa mai te vaerua o te Atu ia ratou, ma te na ko atu kia ratou e, kia pumaana. E kua pumaana ratou.

11. E kua tuatua akera te Atu kia ratou e, E aere atu ki te ngati Lamana, to kotou au taeake e akatinamou atu i taku tuatua, ina ra, kia maru kotou i te akakoromaki i te au tu manamanata, kia rauka oki ia kotou kia akaari atu i tetai akaraanga meitaki kia ratou noku nei, e ka akariro au ia kotou ei raverave noku i te akaoraanga i te au vaerua e manganui.

12. Kua maroiroi tikai te ngakau o te au tamaroa a Mosaia, e te aronga tei piri atu kia ratou. Kua ngakau toa tikai ratou i te aereanga atu ki te ngati Lamana kia akakite atu kia ratou i te tuatua a te Atua.

13. E i to ratou taeanga ki te au kena o te enua o te ngati Lamana kua akataka ke ratou ia ratou tetai mei tetai, ma te irinaki e, ka akaaravei akaou te Atua ia ratou me tae ki te openga o ta ratou angaanga, no te mea kua manako ratou e, e maata tikai te angaanga ta ratou ka rave.

14. E tika rai e maata, no te mea kua akamata ratou i te ako atu i te tuatua a te Atua ki te aronga poiri e te marokiakia, e te kino, te aronga tei inangaro ana i te ta i te iti tangata Niphai, ma te keia e te aru ia ratou, e ko to ratou ngakau tei runga ïa i te au mea e apinga nui ei ratou, e me kore, tei te auro, e te au toka manea, kua manako ratou e, ka na roto i te ta tangata, e te keia e rauka mai ei teia au mea nei, kia kore oki to ratou uaorai rima e angaanga no te reira.

15. E aronga kino tikai ratou, e e manganui oki to ratou tei akamori idolo ana, e kua taumaa oki te Atua ia ratou no te au tu o to ratou ai metua, no ratou katoa ra te taputou a te Atua tei orongaia mai kia ratou, tei runga ra i te tataraara.

16. E no reira, ko te tumu ïa i akamataʼi te au tamaroa a Mosaia kia rave i teia angaanga, penei ake ka rauka ia ratou i te arataki mai ia ratou kia tataraara, e penei ake ka rauka ia ratou i te arataki mai tetai kia kite ratou i te ravenga o te akaoraanga.

17. E no reira, kua akataka ke atu ratou ia ratou, e kua aere tataki tai atu, kia tau ki te tuatua e te mana o te Atua tei orongaia mai kia ratou.

18. Ko Amona oki te akaaere ia ratou, me kore ra, koia tei akono atu ia ratou, e kua akaruke atu aia ia ratou, i muri ake i tona akameitaki anga ia ratou no to ratou au ngai, e ma te akakite atu i te tuatua a te Atua kia ratou, me kore ra, e tuatua atu kia ratou i mua ake i tona aereanga atu, e kua aere rai ratou ki to ratou au tere ki roto i taua enua ra.

19. Kua aere atura a Amona ki te enua ko Isemaela, ko tei tuatuaia ki te ingoa o te au tamariki a Isemaela, tei riro katoa ki te ngati Lamana.

20. E i to Amona taeanga atu ki te enua ko Isemaela, kua opu te ngati Lamana iaia e kua tapekapeka atu, e ko to ratou tu rai ïa, ka tapeka i te au tangata Niphai te ka mou ia ratou, ma te arataki atu ki mua i te ariki, e ka orongaia ki te tika a te ariki kia ta ia ratou me kore ra, kia akariro ia ratou ei tuikaa, me kore, tiria ki vao i to ratou enua kia tau ki tona anoano.

21. Kua apainaia atura a Amona ki mua i te ariki o taua enua ra ko Isemaela, e ko tona ingoa ko Lamoni, e e uanga oki aia no Isemaela.

22. Kua ui atura te ariki kia Amona e, me kua anoano aia i te noo ki roto i taua enua ra o te ngati Lamana koia oki, i rotopu i tona iti tangata.

23. Kua karanga atura a Amona kiaia e, ae, ka inangaro au i te noo ki teia iti tangata no tetai mea tuatau ua, e penei ake, e tae rava atu ki te rā e mate ei au.

24. I reira, kua rekareka tikai te ariki ko Lamoni ia Amona, ma te akaue atu e kia tataraia tona au tapeka, e kua anoano oki aia ia Amona kia rave i tetai tamaine ana ei vaine nana.

25. Ina ra, kua karanga atu a Amona e, kare, ka riro ra au ei tavini noou. E no reira kua riro a Amona ei tavini no te ariki ko Lamoni. E i na, kua tukuia atu aia ma tetai au tavini ona ei tiaki i te anana mamoe a Lamoni, kia tau ki te tu o te ngati Lamana.

26. E i tona raveanga i te angaanga a te ariki e nga rā e toru ra, i tona noo anga ma te au tangata Lamana i te arataki anga i te au mamoe ki te ngai o te vai, tei karangaia e, ko te vai o Sepeta, e e taki ana oki te ngati Lamana i ta ratou au mamoe ki taua vai ra, kia inu.

27. I to Amona e te au tavini o te ariki taki anga i te anana mamoe ki taua ngai o te vai ra, i na, kua aere mai tetai pupu tangata Lamana tei aere katoa mai ma ta ratou au mamoe ki te ngai o te vai, kua tu ratou ma te opuopu i te anana mamoe a Amona e te au tavini o te ariki, kua opuopu ratou e kua oro atu na te au mataara ke ke.

28. I na, kua akamata te au tavini o te ariki i te koumuumu ma te na ko e, aue, ka tamate te ariki ia tatou, mei tana i tamate i to tatou au taeake, no te mea, kua peke tana mamoe ki te aronga kino. E kua akamata ratou i te aue maata, ma te na ko e, aue, kua pueurikiriki takiri ta tatou anana mamoe.

29. No reira, kua aue ratou no te mataku e ka tamateia ratou. I na, i to Amona kiteanga i tei tupu, kua rekareka tikai tona ngakau ma te karanga e, ka akaari atu au i toku mana kia kotou e taku au taeake, me kore, ko te mana e vai nei ki roto iaku, i te akaoki anga mai i teia au mamoe ki te ariki, kia peke oki iaku te ngakau o taku au taeake, e kia arataki oki au ia ratou kia irinaki i taku nei tuatua.

30. E teianei, teia te au manako o Amona i tona kiteanga i te tumatetenga o tana i tuatua e, ei au taeake nona.

31. Kua tamaru atu aia ia ratou ki tana tuatua i te na ko anga e, E aku au taeake, kia rekareka kotou, e ka aere tatou ka kimi i te anana mamoe i ngaro, e ka akaoki mai ki te ngai o te vai, e ka akaoki atu ei ki te ariki, e kare aia e tamate ia tatou.

32. E i reira, kua aere atura ratou i te kimi i te au mamoe, e kua aru rai ratou ia Amona, oro viviki atura ma te vitiviti i te aru anga i te mamoe a te ariki, ma te opu katoatoa mai, e ma te akaoki atu ki te ngai o te vai.

33. Kua tu ua maira taua au tangata i te tuaru akaou i ta ratou mamoe, ina ra, kua karanga atu a Amona ki tona au taeake e takapini i te mamoe kia kore oki ratou e oro ke, e ka aere atu au ka aravei i te aronga tei tuaru i ta tatou au mamoe.

34. No reira kua rave ratou mei ta Amona i akaue atu ia ratou, e kua aere atu aia e kua tuatua atu ki te aronga e tu ra i te pae i te vai o Sepeta e maata oki ratou kare i te iti.

35. E kare rava ratou i mataku ia Amona, e kua manako ratou e, ka mate ua aia i tetai ua atu tangata o ratou, e ka ta iaia mei ta ratou i anoano, e kare ratou i kite e, kua taputou mai te Atua kia Mosaia e ka akaora aia i tana au tamaroa mei roto i to ratou rima, e kare oki ratou e kite i tetai mea no runga i te Atua, no reira kua rekareka ratou i te takinga kino i to ratou au taeake e no reira, kua akaputuputu mai ratou no te tuaru atu i te mamoe a te ariki.

36. I na, kua tu atu a Amona ma te akamata i te pepei toka atu kia ratou ki tana maka, ma te mana ririnui, kua maka atu aia i te toka kia ratou, e kua mate tetai au tangata i tana toka, e kua poitirere ratou i tona ririnui, e kua riri ratou no te mate o to ratou au taeake, e kua inangaro ratou kia inga aia, ina ra, i te kite anga e kare aia e puta i ta ratou toka, kua aere mai ratou ma ta ratou au rakau tamaki.

37. Ina ra, ko te au tangata pouroa tei tāki mai i tana rakau tamaki ki runga, kua tipu pouroaia e Amona, to ratou rima ki tana koke, kua autu pouroa aia ia ratou na roto i te tipuanga i to ratou rima ki te mata o tana koke, e kua poitirere tikai ratou ma te oro ke atu mei mua iaia, e kare oki e toko iti ua, e kua riro e na te ririnui o tona rima i tuaru ia ratou.

38. E ono oki o ratou tei mate i te maka, e kare tetai ke i mate i tana koke, mari ra, ko to ratou arataki, e kua tipu katoa aia i te rima o tei taki i to ratou rima ki runga, e kare oki ratou i te mea iti ua.

39. E kia mamao atu ratou mei iaia, kua oki atu ratou e kua akaainu i te mamoe ma te akaoki ki te koro o te ariki. Kua aere akera ratou ki mua i te ariki ma te akaari atu i te rima tei motu i te koke a Amona, e tei tamata i te tamate iaia, e kua apainaia atu te reira ki te ariki ei kite no te au mea ta ratou i rave.