1. E oti akera ta Amuleka tuatua anga i teia au tuatua, kua akaruke atura ratou i taua urupu maata ra kua aere atura ki te enua ko Ieresona

2. E oti akera te toenga o te au taeake i te ako anga atu i te tuatua ki te ngati Zoroma ra, kua aere katoa maira ratou ki te enua ra ko Ieresona.

3. E i na, e putuputu maira te au tuanga rongonui o te ngati Zoroma, e kua uriuri no runga i te tuatua tei akoia atu kia ratou, kua riri iora ratou no taua tuatua ra, e kua riro oki ei akakino i ta ratou au angaanga pikikaa no reira i kore ei ratou e akarongo atu ki taua tuatua ra.

4. Kua akaputuputu iora te au tangata katoatoa e pini ua ake te enua, e kua uriuri ratou no runga i te tuatua tei tuatuaia ake nei.

5. I na, kare oki to ratou au tutara, e to ratou au taunga, e to ratou au puapii i akakite mai ki te tangata i to ratou inangaro e no reira, kua kimi uuna ua ratou i te au manako o te au tangata katoatoa.

6. E kitea akera e ratou te manako o te au tangata katoatoa, e ko te aronga i ariki i te tuatua a Alama e tona ra au taeake kua uriia ratou ki vao, e manganui oki ratou, e kua aere atura ratou ki te enua ra ko Ieresona.

7. E kua tauturu atu rai a Alama e tona au taeake ia ratou.

8. Kua riri iora te ngati Zoroma i te au tangata o Amona i Ieresona ra, e te akaaere maata o te ngati Zoroma, e tangata kino oki kua unga aia i te karere ki te au tangata o Amona e kua inangaro oki aia kia tuaru ke atu ratou i te au tangata katoatoa tei aere mai ki to ratou enua mei rotopu atu ia ratou ra.

9. E kua tuku atura aia i te tuatua akamataku maata no ratou. Kare ra te ngati Amona i mataku i ta ratou tuatua, e no reira kare ratou i tuaru atu ia ratou ki vao, ina ra, kua ariki ratou i te au tangata ngere o te ngati Zoroma tei aere mai kia ratou ra, kua angai ia ratou e kua akakakau ia ratou e kua oronga ia kia ratou te enua ei ipukarea no ratou, i na, kua tauturu atu ratou kia tau ki to ratou inangaro.

10. Kua akatupu iora te reira i te riri o te ngati Zoroma ki te au tangata o Amona ra, e kua akamata iora ratou i te kairo atu ki te ngati Lamana e kia akatupu katoa i to ratou riri kia ratou.

11. Kua akamata iora te ngati Zoroma, e te ngati Lamana i te akateateamamao no te tamaki atu ki te au tangata o Amona, e pera katoa ki te ngati Niphai.

12. E ope akera te tai ngauru ma itu o te mataiti i te tutaraanga o te au akava ki rungao i te tangata o Niphai ra.

13. Akaruke atura te au tangata o Amona i te enua ra ko Ieresona, e kua aere atura ratou ki te enua ko Meleka, e kua oronga atura i te enua ra ko Ieresona ki te au nuku o te ngati Lamana, e te nuku o te ngati Zoroma, e kua akamata iora tetai tamaki i rotopu i te ngati Lamana e te ngati Niphai, e i roto i te tai ngauru ma varu o te mataiti i te tutaraanga o te au akava, e ka akakiteia atu te tuatua no to ratou tamakianga a muri atu.

14. E oki maira Alama, e Amona e to raua au taeake, e pera katoa ki nga puke tamaroa a Alama ki te enua ra ko Zarahemela, kua riro oki ratou ei raverave i roto i te rima o te Atu, i te arataki anga mai i te ngati Zoroma kia tataraara e ko ratou tei tataraara, kua tuaru ia ratou mei to ratou enua, ina ra, e enua noo anga to ratou i te enua ko Ieresona, kua rave ratou i te au apinga tamaki ei paruru ia ratou, e ta ratou au vaine, e te tamariki, e to ratou enua.

15. Kua tumatetenga iora a Alama no te ara a tona iti tangata, e no te tamaki, e te akamaringianga toto, e te tauetono i rotopu ia ratou, kua aere aia, e kua tonokia aia ei akakite atu i te tuatua ki te au tangata katoatoa i roto i te oire, e no tei kite aia i te ngakau marokiakia o te tangata ra, e e riri oki ratou i te tuatua tika, e kua tumatetenga tikai tona ngakau.

16. E no reira, kua akaputuputu maira aia i tana au tamaroa ki te ngai okotai kia akakite tataki tai aia kia ratou i te au mea o te tuatua tika ra, e te vai rai te tuatua o tana au aka—ueanga tana i tuku atu kia ratou mei tei tau ki tona akapapaanga.