“ລີໄຮ ແລະ ຊາໄຣຢາໜີຈາກເຢຣູຊາເລັມ,” ເລື່ອງພຣະຄຳພີມໍມອນ (2023)
“ລີໄຮ ແລະ ຊາໄຣຢາໜີຈາກເຢຣູຊາເລັມ,” ເລື່ອງພຣະຄຳພີມໍມອນ
ລີໄຮ ແລະ ຊາໄຣຢາໜີຈາກເຢຣູຊາເລັມ
ຄຳເຕືອນຂອງພຣະຜູ້ເປັນເຈົ້າຕໍ່ຄອບຄົວ
ລີໄຮ ແລະ ຊາໄຣຢາໄດ້ອາໄສຢູ່ໃນເຢຣູຊາເລັມກັບລູກໆຂອງພວກເພິ່ນ. ລີໄຮໄດ້ເຫັນພາບນິມິດຈາກພຣະຜູ້ເປັນເຈົ້າ. ເພິ່ນໄດ້ເຫັນວ່າ ພຣະຜູ້ຊ່ວຍໃຫ້ລອດຈະມາສູ່ໂລກໃນມື້ໜຶ່ງ. ພຣະຜູ້ເປັນເຈົ້າກໍໄດ້ສະແດງໃຫ້ເພິ່ນເຫັນອີກວ່າ ເຢຣູຊາເລັມຈະຖືກທຳລາຍ.
ລີໄຮໄດ້ບອກຜູ້ຄົນກ່ຽວກັບພາບນິມິດຂອງເພິ່ນ. ເພິ່ນໄດ້ບອກພວກເຂົາວ່າ ພຣະເຢຊູຄຣິດຈະສະເດັດມາໃນມື້ໜຶ່ງ ເພື່ອຊ່ວຍເຫລືອໂລກ.
ລີໄຮກໍໄດ້ບອກຜູ້ຄົນວ່າເຢຣູຊາເລັມຈະຖືກທຳລາຍ. ເພິ່ນໄດ້ເຊື້ອເຊີນພວກເຂົາໃຫ້ກັບໃຈ.
ຜູ້ຄົນຕ່າງກໍໃຈຮ້າຍ. ພຣະຜູ້ເປັນເຈົ້າໄດ້ກ່າວກັບລີໄຮອີກຄັ້ງໃນຄວາມຝັນ. ລີໄຮໄດ້ຮຽນຮູ້ວ່າ ເພິ່ນ ແລະ ຄອບຄົວຂອງເພິ່ນຈະບໍ່ປອດໄພຢູ່ໃນເຢຣູຊາເລັມ. ພວກເພິ່ນຕ້ອງໄດ້ໜີໄປ.
ລີໄຮ ແລະ ຊາໄຣຢາໄດ້ເຊື່ອຟັງພຣະຜູ້ເປັນເຈົ້າ. ພວກເພິ່ນໄດ້ໜີຈາກນະຄອນກັບຄອບຄົວຂອງພວກເພິ່ນ. ລີໄຮ ແລະ ຊາໄຣຢາມີລູກຊາຍສີ່ຄົນຊື່ວ່າ ເລມັນ, ເລມູເອນ, ແຊມ, ແລະ ນີໄຟ. ພວກເພິ່ນໄດ້ປະຖິ້ມບ້ານເຮືອນ ແລະ ສິ່ງຂອງທີ່ມີຄ່າຂອງພວກເພິ່ນ.
ຄອບຄົວໄດ້ເດີນທາງໄປໃນຖິ່ນແຫ້ງແລ້ງກັນດານຢູ່ໃກ້ທະເລແດງ. ລີໄຮໄດ້ຂອບພຣະໄທພຣະຜູ້ເປັນເຈົ້າທີ່ໄດ້ອວຍພອນຄອບຄົວຂອງເພິ່ນ. ເພິ່ນໄດ້ສິດສອນຄອບຄົວຂອງເພິ່ນໃຫ້ຕິດຕາມພຣະຜູ້ເປັນເຈົ້າ ແລະ ຮັກສາພຣະບັນຍັດຂອງພຣະອົງ.
ເລມັນ ແລະ ເລມູເອນໄດ້ເວົ້າຈົ່ມ. ພວກເຂົາຄິດຮອດບ້ານຂອງພວກເຂົາ ແລະ ທຸກສິ່ງທີ່ພວກເຂົາໄດ້ປະຖິ້ມໄວ້ຂ້າງຫລັງ. ພວກເຂົາບໍ່ເຂົ້າໃຈວ່າເປັນຫຍັງພຣະຜູ້ເປັນເຈົ້າຈຶ່ງຂໍໃຫ້ພວກເຂົາໜີໄປ. ພວກເຂົາບໍ່ເຊື່ອວ່ານະຄອນໃຫຍ່ເຊັ່ນເຢຣູຊາເລັມຈະຖືກທຳລາຍໄດ້.
ເລມັນ ແລະ ເລມູເອນໄດ້ຄິດວ່າລີໄຮມະໂນພາບໄປເອງກ່ຽວກັບພາບນິມິດຂອງເພິ່ນ. ຖ້າຫາກຄອບຄົວຂອງພວກເຂົາຫລົງທາງໄປໃນຖິ່ນແຫ້ງແລ້ງກັນດານຕະຫລອດໄປເດ້ຈະເຮັດແນວໃດ?
ນີໄຟຢາກຮູ້ດ້ວຍຕົວເອງວ່າ ສິ່ງທີ່ລີໄຮໄດ້ເວົ້າໄປນັ້ນເປັນຄວາມຈິງຫລືບໍ່. ເພິ່ນໄດ້ອະທິຖານ ແລະ ໄດ້ທູນຖາມພຣະຜູ້ເປັນເຈົ້າ.
ພຣະຜູ້ເປັນເຈົ້າໄດ້ສົ່ງພຣະວິນຍານບໍລິສຸດມາເພື່ອຊ່ວຍນີໄຟ ໃຫ້ເຊື່ອຄຳເວົ້າຂອງບິດາຂອງເພິ່ນ. ນີໄຟໄດ້ເຊື່ອພຣະຜູ້ເປັນເຈົ້າ ແລະ ໄດ້ແບ່ງປັນສິ່ງທີ່ເພິ່ນໄດ້ຮຽນຮູ້ໃຫ້ກັບພວກອ້າຍຂອງເພິ່ນ. ແຊມໄດ້ຮັບຟັງຄຳຂອງນີໄຟ ແລະ ໄດ້ເຊື່ອເພິ່ນ, ແຕ່ເລມັນ ແລະ ເລມູເອນັ້ນບໍ່ຮັບຟັງ.