“ສັດທາຂອງລາຊີນີ,” ເລື່ອງພຣະຄຳພີມໍມອນ (2023)
“ສັດທາຂອງລາຊີນີ,” ເລື່ອງພຣະຄຳພີມໍມອນ
ສັດທາຂອງລາຊີນີ
ການຊອກຫາຄວາມຊື່ນຊົມໃນພຣະເຢຊູຄຣິດ
ລາຊີນີຂອງຊາວເລມັນໄດ້ປົກຄອງກັບສາມີຂອງເພິ່ນ, ກະສັດລາໂມໄນ. ກະສັດໄດ້ຂໍໃຫ້ຊາວນີໄຟຄົນໜຶ່ງຊື່ ອຳໂມນ ສິດສອນເພິ່ນກ່ຽວກັບພຣະຜູ້ເປັນເຈົ້າ. ກະສັດເຊື່ອສິ່ງທີ່ອຳໂມນໄດ້ບອກເພິ່ນ. ກະສັດໄດ້ຄຸເຂົ່າລົງເພື່ອອະທິຖານ ແລະ ທູນຂໍໃຫ້ພຣະຜູ້ເປັນເຈົ້າອະໄພໃຫ້ເພິ່ນ. ຂະນະທີ່ເພິ່ນອະທິຖານຢູ່ນັ້ນ, ກະສັດໄດ້ລົ້ມລົງຢູ່ກັບພື້ນດິນ. ເບິ່ງຄືວ່າເພິ່ນຕາຍແລ້ວ.
ຂ້າໃຊ້ຂອງກະສັດໄດ້ພາເພິ່ນໄປຫາລາຊີນີ. ພວກເຂົາວາງເພິ່ນໄວ້ເທິງຕຽງຂອງເພິ່ນ. ເພິ່ນນອນຢູ່ແນວນັ້ນ ແລະ ບໍ່ເໜັງຕີງເປັນເວລາສອງມື້ ແລະ ສອງຄືນ.
ລະຫວ່າງເວລານັ້ນ, ລາຊີນີ ແລະ ລູກໆຂອງເພິ່ນໂສກເສົ້າຫລາຍ. ພວກເພິ່ນໄດ້ຢູ່ກັບກະສັດ ແລະ ຮ້ອງໄຫ້. ບາງຄົນເວົ້າວ່າກະສັດຄວນຖືກເອົາໄປຝັງ. ແຕ່ລາຊີນີຕ້ອງການເວົ້າກັບອຳໂມນກ່ອນ. ເພິ່ນໄດ້ຍິນວ່າລາວມີອຳນາດຂອງພຣະເຈົ້າ. ຂ້າໃຊ້ຂອງລາຊີນີໄດ້ຂໍໃຫ້ອຳໂມນໄປເຂົ້າເຝົ້າລາຊີນີ.
ລາຊີນີໄດ້ບອກອຳໂມນວ່າ ເພິ່ນໄດ້ຍິນວ່າລາວເປັນສາດສະດາຂອງພຣະເຈົ້າ. ເພິ່ນຂໍໃຫ້ອຳໂມນໄປເບິ່ງກະສັດ. ອຳໂມນຮູ້ວ່າກະສັດຍັງມີຊີວິດຢູ່. ມັນແມ່ນອຳນາດຂອງພຣະເຈົ້າທີ່ເຮັດໃຫ້ກະສັດຫລັບຢູ່. ອຳໂມນໄດ້ບອກລາຊີນີວ່າ ສາມີຂອງນາງຈະຕື່ນຂຶ້ນໃນມື້ອື່ນ.
ລາຊີນີໄວ້ວາງໃຈອຳໂມນ ແລະ ມີສັດທາອັນແຮງກ້າໃນພຣະເຈົ້າ. ເພິ່ນເຊື່ອວ່າສາມີຂອງເພິ່ນຈະຕື່ນຂຶ້ນໃນມື້ອື່ນ. ອຳໂມນເວົ້າວ່າເພິ່ນໄດ້ຮັບພອນຍ້ອນສັດທາອັນແຮງກ້າຂອງເພິ່ນ. ລາວໄດ້ບອກລາຊີນີວ່າ ເພິ່ນມີສັດທາຫລາຍກວ່າຜູ້ຄົນຂອງລາວເອງ. ລາຊີນີໄດ້ຢູ່ໃກ້ ແລະ ຄອຍເຝົ້າເບິ່ງສາມີຂອງເພິ່ນໝົດຄືນ.
ມື້ຕໍ່ມາ, ກະສັດໄດ້ຕື່ນຂຶ້ນ. ເພິ່ນໄດ້ບອກລາຊີນີວ່າ ເພິ່ນໄດ້ເຫັນພຣະເຢຊູຄຣິດ. ລາຊີນີ ແລະ ກະສັດຮູ້ວ່າ ພຣະເຢຊູຮັກພວກເພິ່ນຫລາຍຂະໜາດໃດ, ແລະ ພວກເພິ່ນເຕັມໄປດ້ວຍຄວາມຊື່ນຊົມ.