“ກະສັດໂນອາ ແລະ ກະສັດລິມໄຮ,” ເລື່ອງພຣະຄຳພີມໍມອນ (2023)
ກະສັດໂນອາ ແລະ ກະສັດລິມໄຮ
ການລັກໜີຈາກຊາວເລມັນ
ກະສັດໂນອາໄດ້ປົກຄອງຊາວນີໄຟກຸ່ມໜຶ່ງ. ເພິ່ນໄດ້ເຮັດຫລາຍສິ່ງທີ່ບໍ່ດີ, ແລະ ບາງຄົນໄດ້ໃຈຮ້າຍໃຫ້ເພິ່ນ. ຊາຍຄົນໜຶ່ງຊື່ ກິດຽນ ໄດ້ຕໍ່ສູ້ກັບໂນອາດ້ວຍດາບ. ໂນອາໄດ້ແລ່ນໜີ ແລະ ປີນຂຶ້ນໄປເທິງຫໍສູງ. ຈາກຫໍສູງ, ເພິ່ນໄດ້ເຫັນກອງທັບຊາວເລມັນກຳລັງມາ. ໂນອາໄດ້ທຳທ່າຢ້ານກົວແທນຜູ້ຄົນຂອງເພິ່ນ, ສະນັ້ນກິດຽນຈຶ່ງປ່ອຍໃຫ້ເພິ່ນມີຊີວິດຢູ່ຕໍ່ໄປ.
ໂນອາ ແລະ ຜູ້ຄົນຂອງເພິ່ນໄດ້ແລ່ນໜີ. ແຕ່ຊາວເລມັນໄດ້ແລ່ນຕາມພວກເຂົາໄປ ແລະ ໄດ້ເລີ່ມໂຈມຕີພວກເຂົາ. ໂນອາໄດ້ບອກພວກຜູ້ຊາຍໃຫ້ໜີປະຄອບຄົວຂອງພວກເຂົາ ແລະ ໄປກັບເພິ່ນ.
ຜູ້ຊາຍບາງຄົນໄດ້ໜີໄປກັບໂນອາ. ແຕ່ຜູ້ຊາຍຫລາຍຄົນໄດ້ເລືອກທີ່ຈະຢູ່ກັບຄອບຄົວຂອງພວກເຂົາ. ລູກຊາຍຂອງໂນອາຊື່ ລິມໄຮ ກໍໄດ້ເລືອກທີ່ຈະຢູ່.
ພວກລູກສາວຫລາຍຄົນຢືນຢູ່ຕໍ່ໜ້າກອງທັບ ແລະ ຂໍບໍ່ໃຫ້ຊາວເລມັນທຳຮ້າຍຄອບຄົວຂອງພວກເຂົາ. ຊາວເລມັນຟັງຄວາມພວກລູກສາວ ແລະ ປ່ອຍໃຫ້ຊາວນີໄຟມີຊີວິດຢູ່ຕໍ່ໄປ. ແທນນັ້ນ, ຊາວເລມັນໄດ້ຍຶດຕົວຊາວນີໄຟ.
ພວກຜູ້ຊາຍທີ່ໜີໄປ ຢາກກັບໄປຫາຄອບຄົວຂອງພວກເຂົາ. ໂນອາພະຍາຍາມຢຸດຢັ້ງພວກເຂົາ, ສະນັ້ນພວກຜູ້ຊາຍຈຶ່ງໄດ້ຂ້າເພິ່ນ. ແລ້ວພວກເຂົາໄດ້ກັບໄປຫາຄອບຄົວຂອງພວກເຂົາ.
ພວກຜູ້ຊາຍດີໃຈຫລາຍທີ່ຄອບຄົວຂອງພວກເຂົາປອດໄພ. ພວກເຂົາໄດ້ບອກກິດຽນເຖິງສິ່ງທີ່ໄດ້ເກີດຂຶ້ນກັບໂນອາ.
ຜູ້ຄົນໄດ້ເລືອກລິມໄຮໃຫ້ເປັນກະສັດອົງໃໝ່ຂອງພວກເຂົາ. ລິມໄຮໄດ້ສັນຍາກັບກະສັດຊາວເລມັນວ່າ ພວກເຂົາຈະຈ່າຍເຄິ່ງໜຶ່ງຂອງທຸກສິ່ງທີ່ພວກເຂົາເປັນເຈົ້າຂອງ ໃຫ້ແກ່ຊາວເລມັນ. ໃນການຕອບແທນ, ກະສັດຊາວເລມັນໄດ້ສັນຍາວ່າ ເພິ່ນຈະບໍ່ທຳຮ້າຍຜູ້ຄົນຂອງລິມໄຮ.
ພວກເຂົາໄດ້ມີຊີວິດທີ່ສະຫງົບສຸກເປັນເວລາຫລາຍປີ. ແລ້ວຊາວເລມັນໄດ້ເລີ່ມຕົ້ນປະຕິບັດຕໍ່ຜູ້ຄົນຂອງລິມໄຮໃນທາງທີ່ບໍ່ດີ. ຜູ້ຄົນຕ້ອງການເປັນອິດສະລະອີກຄັ້ງ. ພວກເຂົາພະຍາຍາມຕໍ່ສູ້ກັບຊາວເລມັນ, ແຕ່ພວກເຂົາບໍ່ຊະນະ. ຜູ້ຄົນໄດ້ອະທິຖານຂໍຄວາມຊ່ວຍເຫລືອຈາກພຣະເຈົ້າ.
ມື້ໜຶ່ງ, ຊາວນີໄຟຊື່ ອຳໂມນ ໄດ້ໄປຢ້ຽມຢາມລິມໄຮ ແລະ ຜູ້ຄົນຂອງເພິ່ນ. ອຳໂມນໄດ້ມາຈາກແຜ່ນດິນຊື່ ເຊຣາເຮັມລາ. ລິມໄຮດີໃຈທີ່ໄດ້ເຫັນອຳໂມນ.
ອຳໂມນສາມາດນຳພາຜູ້ຄົນຂອງລິມໄຮໄປຍັງເຊຣາເຮັມລາ, ແຕ່ພວກເຂົາຕ້ອງໄດ້ລັກໜີຈາກຊາວເລມັນກ່ອນ. ກິດຽນມີແຜນ.
ໃນຕອນກາງຄືນ, ກິດຽນໄດ້ມອບເຫລົ້າແວງພິເສດໃຫ້ທະຫານຍາມ ເພື່ອເຮັດໃຫ້ພວກເຂົາຫລັບໄປ. ຂະນະທີ່ທະຫານຍາມຫລັບຢູ່, ລິມໄຮ ແລະ ຜູ້ຄົນຂອງເພິ່ນທັງໝົດໄດ້ໜີຈາກເມືອງ.
ພວກເຂົາໄດ້ໄປຫາເຊຣາເຮັມລາ ແລະ ເຂົ້າຮ່ວມກັບຊາວນີໄຟຢູ່ທີ່ນັ້ນ. ລິມໄຮ ແລະ ຜູ້ຄົນຂອງເພິ່ນໄດ້ຮຽນຮູ້ຕື່ມອີກກ່ຽວກັບພຣະເຈົ້າ. ພວກເຂົາໄດ້ເຮັດພັນທະສັນຍາ, ຫລື ຄຳສັນຍາພິເສດ, ທີ່ຈະຮັບໃຊ້ພຣະເຈົ້າ ແລະ ເຊື່ອຟັງພຣະບັນຍັດຂອງພຣະອົງ. ພວກເຂົາໄດ້ຮັບບັບຕິສະມາ ແລະ ກາຍເປັນພາກສ່ວນຂອງສາດສະໜາຈັກຂອງພຣະເຈົ້າ. ພວກເຂົາຈື່ຈຳວ່າ ພຣະເຈົ້າໄດ້ຊ່ວຍໃຫ້ພວກເຂົາຫລົບໜີຈາກຊາວເລມັນ.