“ອະບີນາໄດ ແລະ ກະສັດໂນອາ,” ເລື່ອງພຣະຄຳພີມໍມອນ (2023)
ອະບີນາໄດ ແລະ ກະສັດໂນອາ
ຂ່າວສານຈາກສາດສະດາ
ກະສັດໂນອາປົກຄອງຊາວນີໄຟທີ່ອາໄສຢູ່ໃນແຜ່ນດິນນີໄຟ. ໂນອາໄດ້ໃຫ້ຜູ້ຄົນຂອງເພິ່ນມອບເງິນຢ່າງຫລວງຫລາຍໃຫ້ເພິ່ນ ແລະ ແລ້ວໄດ້ໃຊ້ມັນກັບສິ່ງດີໆເພື່ອຕົວເອງ. ເພິ່ນໄດ້ເອີ້ນປະໂລຫິດທີ່ທະນົງຕົວຫລາຍຄົນໃຫ້ຊ່ວຍເພິ່ນປົກຄອງ. ໂນອາບໍ່ໄດ້ຮັກສາພຣະບັນຍັດຂອງພຣະເຈົ້າ. ກົງກັນຂ້າມ, ເພິ່ນໄດ້ເຮັດສິ່ງຊົ່ວຮ້າຍຫລາຍຢ່າງ.
ໂນອາໄດ້ນຳພາຜູ້ຄົນຂອງເພິ່ນໃຫ້ເປັນຄົນຊົ່ວເຊັ່ນກັນ. ພວກເຂົາບໍ່ໄດ້ຕິດຕາມພຣະຜູ້ເປັນເຈົ້າ.
ສາດສະດາຂອງພຣະເຈົ້າຊື່ ອະບີນາໄດ ໄດ້ອາໄສຢູ່ໃນແຜ່ນດິນນັ້ນ. ພຣະຜູ້ເປັນເຈົ້າໄດ້ສົ່ງອະບີນາໄດໃຫ້ໄປບອກໂນອາ ແລະ ຜູ້ຄົນຂອງເພິ່ນໃຫ້ກັບໃຈ.
ອະບີນາໄດໄດ້ບອກຜູ້ຄົນວ່າ ພຣະຜູ້ເປັນເຈົ້າຕ້ອງການໃຫ້ພວກເຂົາກັບໃຈ. ຖ້າຫາກພວກເຂົາບໍ່ກັບໃຈ, ພຣະຜູ້ເປັນເຈົ້າຈະປ່ອຍໃຫ້ສັດຕູມາສູ່ແຜ່ນດິນຂອງພວກເຂົາ ແລະ ປົກຄອງພວກເຂົາ. ສັດຕູຂອງພວກເຂົາຈະເຮັດໃຫ້ຊີວິດຂອງໂນອາ ແລະ ຜູ້ຄົນຂອງເພິ່ນລຳບາກຫລາຍ.
ຜູ້ຄົນໃຈຮ້າຍໃຫ້ອະບີນາໄດເພາະສິ່ງທີ່ເພິ່ນເວົ້າ. ພວກເຂົາຢາກຂ້າເພິ່ນ, ແຕ່ພຣະຜູ້ເປັນເຈົ້າໄດ້ຮັກສາອະບີນາໄດໃຫ້ປອດໄພ ແລະ ໄດ້ຊ່ວຍເພິ່ນຫລົບໜີໄປໄດ້.
ໂນອາຢາກຂ້າອະບີນາໄດຄືກັນ. ໂນອາບໍ່ເຊື່ອໃນພຣະຜູ້ເປັນເຈົ້າ. ເພິ່ນກັບຜູ້ຄົນຂອງເພິ່ນບໍ່ໄດ້ກັບໃຈ.
ສອງປີຈາກນັ້ນ, ພຣະຜູ້ເປັນເຈົ້າໄດ້ສົ່ງອະບີນາໄດກັບຄືນໄປເຕືອນຜູ້ຄົນ. ອະບີນາໄດໄດ້ບອກຜູ້ຄົນວ່າ ສັດຕູຂອງພວກເຂົາຈະມາຍຶດເອົາແຜ່ນດິນຍ້ອນພວກເຂົາບໍ່ໄດ້ກັບໃຈ. ຜູ້ຄົນໄດ້ໃຈຮ້າຍໃຫ້ອະບີນາໄດ. ພວກເຂົາເວົ້າວ່າ ພວກເຂົາບໍ່ໄດ້ເຮັດຫຍັງຜິດ ແລະ ຈະບໍ່ກັບໃຈ. ພວກເຂົາໄດ້ມັດອະບີນາໄດ ແລະ ໄດ້ພາເພິ່ນໄປຫາໂນອາ.
ໂນອາກັບພວກປະໂລຫິດຂອງເພິ່ນໄດ້ຄິດຫາແຜນການ. ພວກປະໂລຫິດໄດ້ພະຍາຍາມຫລອກອະບີນາໄດ ໂດຍການຖາມເພິ່ນຫລາຍໆຄຳຖາມ. ແຕ່ອະບີນາໄດໄດ້ຕອບຢ່າງກ້າຫານ. ພວກປະໂລຫິດມີຄວາມປະຫລາດໃຈກັບຄຳຕອບຂອງອະບີນາໄດ. ພວກເຂົາບໍ່ສາມາດຫລອກເພິ່ນ. ອະບີນາໄດໄດ້ບອກພວກປະໂລຫິດວ່າ ພວກເຂົາສົນໃຈກັບເງິນຫລາຍກວ່າການເຮັດສິ່ງທີ່ຖືກຕ້ອງ.
ໂນອາໄດ້ບອກພວກປະໂລຫິດຂອງເພິ່ນໃຫ້ຂ້າອະບີນາໄດ. ແຕ່ອະບີນາໄດໄດ້ເຕືອນພວກເຂົາບໍ່ໃຫ້ແຕະຕ້ອງເພິ່ນ. ໃບໜ້າຂອງເພິ່ນຮຸ່ງເຫລື້ອມດ້ວຍອຳນາດຂອງພຣະເຈົ້າ. ອະບີນາໄດໄດ້ກ່າວວ່າພວກປະໂລຫິດບໍ່ໄດ້ສິດສອນກ່ຽວກັບກົດຂອງພຣະເຈົ້າ. ອະບີນາໄດໄດ້ສິດສອນພວກເຂົາວ່າ ພຣະເຢຊູຄຣິດຈະມາກຳເນີດ, ສິ້ນພຣະຊົນເພື່ອເຮົາ, ແລະ ຈະຟື້ນຄືນພຣະຊົນ. ເພິ່ນກ່າວວ່າພຣະເຢຊູຈະອະໄພໃຫ້ພວກເຂົາຖ້າຫາກພວກເຂົາກັບໃຈ.
ອະບີນາໄດໄດ້ຈົບຂ່າວສານທີ່ພຣະຜູ້ເປັນເຈົ້າໄດ້ສົ່ງເພິ່ນໃຫ້ມາບອກກ່າວ. ໂນອາຍັງໃຈຮ້າຍຢູ່. ເພິ່ນໄດ້ບອກພວກປະໂລຫິດຂອງເພິ່ນໃຫ້ເອົາອະບີນາໄດອອກໄປ ແລະ ຂ້າເພິ່ນເສຍ.
ປະໂລຫິດຄົນໜຶ່ງຊື່ ແອວມາ ໄດ້ເຊື່ອອະບີນາໄດ. ແອວມາໄດ້ພະຍາຍາມຊ່ວຍຊີວິດອະບີນາໄດ. ບັດນີ້ ໂນອາໄດ້ໃຈຮ້າຍໃຫ້ແອວມານຳອີກ ແລະ ບັງຄັບໃຫ້ເພິ່ນໜີໄປ.
ພວກປະໂລຫິດໄດ້ບອກອະບີນາໄດວ່າ ເພິ່ນສາມາດມີຊີວິດຢູ່ໄດ້ຖ້າຫາກເພິ່ນເວົ້າວ່າ ສິ່ງທີ່ເພິ່ນສິດສອນບໍ່ເປັນຄວາມຈິງ. ແຕ່ອະບີນາໄດເວົ້າວ່າ ເພິ່ນໄດ້ສິດສອນຄວາມຈິງ. ໂນອາກັບພວກປະໂລຫິດຂອງເພິ່ນໃຈຮ້າຍຂຶ້ນອີກ. ພວກເຂົາໄດ້ຂ້າອະບີນາໄດດ້ວຍໄຟ. ທະຫານຂອງໂນອາໄດ້ພະຍາຍາມຂ້າແອວມາເຊັ່ນກັນ. ແຕ່ແອວມາໄດ້ລີ້ຢູ່ ແລະ ຂຽນຖ້ອຍຄຳຂອງອະບີນາໄດທັງໝົດໄວ້.