“ອຳໂມນ,” ເລື່ອງພຣະຄຳພີມໍມອນ (2023)
ອຳໂມນ
ຂ້າໃຊ້ທີ່ຖ່ອມຕົວ
ອຳໂມນ ແລະ ພວກອ້າຍນ້ອງຂອງລາວຢາກສິດສອນຊາວເລມັນກ່ຽວກັບພຣະຜູ້ເປັນເຈົ້າ. ເຂົາເຈົ້າໄດ້ໄປຫາແຜ່ນດິນບ່ອນທີ່ຊາວເລມັນອາໄສຢູ່. ລະຫວ່າງການເດີນທາງ, ເຂົາເຈົ້າໄດ້ຖືສິນອົດເຂົ້າ ແລະ ອະທິຖານທູນຂໍຄວາມຊ່ວຍເຫລືອຈາກພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ປອບໂຍນເຂົາເຈົ້າ. ພຣະອົງໄດ້ບອກໃຫ້ເຂົາເຈົ້າອົດທົນ ແລະ ເປັນຕົວຢ່າງທີ່ດີ. ເຂົາເຈົ້າແຕ່ລະຄົນໄດ້ໄປບ່ອນຕ່າງກັນເພື່ອສິດສອນ.
ໂມໄຊຢາ 28:1–2; ແອວມາ 17:6–13
ອຳໂມນໄດ້ໄປຫາບ່ອນທີ່ເອີ້ນວ່າ ອິດຊະມາເອນ. ຜູ້ຄົນຢູ່ທີ່ນັ້ນໄດ້ມັດລາວ ແລະ ພາລາວໄປຫາກະສັດລາໂມໄນ. ອຳໂມນໄດ້ບອກລາໂມໄນວ່າ ລາວຢາກອາໄສຢູ່ກັບຊາວເລມັນ. ລາໂມໄນມັກອຳໂມນ ແລະ ໄດ້ປ່ອຍຕົວລາວ. ເພິ່ນຢາກໃຫ້ອຳໂມນແຕ່ງງານກັບລູກສາວຄົນໜຶ່ງຂອງເພິ່ນ, ແຕ່ອຳໂມນໄດ້ເລືອກເປັນຂ້າໃຊ້ຂອງລາໂມໄນແທນ.
ລາໂມໄນໄດ້ບອກອຳໂມນໃຫ້ດູແລຝູງສັດຂອງເພິ່ນ. ມື້ໜຶ່ງ, ອຳໂມນ ແລະ ພວກຂ້າໃຊ້ບາງຄົນໄດ້ພາຝູງສັດໄປກິນນ້ຳ. ຂະນະທີ່ຝູງສັດກຳລັງກິນນ້ຳ, ພວກໂຈນໄດ້ມາ ແລະ ເຮັດໃຫ້ພວກມັນແຕກຕື່ນໜີໄປ. ພວກຂ້າໃຊ້ຄົນອື່ນໆຢ້ານກົວວ່າພວກເຂົາຈະຖືກລົງໂທດເພາະໄດ້ສູນເສຍຝູງສັດຂອງລາໂມໄນ.
ອຳໂມນຮູ້ວ່າມັນເປັນໂອກາດທີ່ຈະສະແດງອຳນາດຂອງພຣະຜູ້ເປັນເຈົ້າ. ລາວໄດ້ບອກພວກຂ້າໃຊ້ຄົນອື່ນໆວ່າບໍ່ຕ້ອງກັງວົນ ແລະ ໄດ້ຊ່ວຍພວກເຂົາຊອກຫາສັດທີ່ເສຍໄປ.
ພວກໂຈນໄດ້ກັບມາເພື່ອເຮັດໃຫ້ຝູງສັດຢ້ານອີກ. ແຕ່ຄັ້ງນີ້, ອຳໂມນໄດ້ບອກພວກຂ້າໃຊ້ຄົນອື່ນໆໃຫ້ເຝົ້າຝູງສັດໄວ້ບໍ່ໃຫ້ພວກມັນແລ່ນໜີໄປ.
ອຳໂມນໄດ້ອອກໄປ ແລະ ສະກັດກັ້ນພວກໂຈນຈາກການເຮັດໃຫ້ຝູງແກະຢ້ານກົວ. ພວກໂຈນບໍ່ຢ້ານອຳໂມນ. ພວກເຂົາຄິດວ່າ ພວກເຂົາແຂງແຮງຫລາຍກວ່າລາວ. ແຕ່ພວກເຂົາບໍ່ຮູ້ວ່າພຣະຜູ້ເປັນເຈົ້າກຳລັງຊ່ວຍອຳໂມນ.
ອຳໂມນໄດ້ຍິງກ້ອນຫີນໃສ່ພວກໂຈນດ້ວຍກະຖຸນຂອງລາວ. ບາງຄົນໃນພວກເຂົາໄດ້ຕາຍໄປ. ສິ່ງນີ້ເຮັດໃຫ້ພວກໂຈນຄົນອື່ນໆໃຈຮ້າຍ, ແລະ ພວກເຂົາຢາກຂ້າອຳໂມນ. ພວກເຂົາປະຫລາດໃຈເພາະວ່າພວກເຂົາບໍ່ສາມາດແກວ່າງກ້ອນຫີນໃຫ້ຖືກອຳໂມນ. ພວກເຂົາບໍ່ຄາດຫວັງວ່າລາວຈະມີພະລັງຫລາຍເຊັ່ນນັ້ນ.
ພວກໂຈນພະຍາຍາມຟາດອຳໂມນດ້ວຍໄມ້ຄ້ອນຂອງພວກເຂົາ. ແຕ່ທຸກຄັ້ງທີ່ພວກເຂົາພະຍາຍາມ, ອຳໂມນໄດ້ຕັດແຂນຂອງພວກເຂົາດ້ວຍດາບຂອງລາວ ຈົນວ່າພວກເຂົາບໍ່ສາມາດຕໍ່ສູ້. ບໍ່ດົນ, ພວກເຂົາກໍຢ້ານເກີນກວ່າຈະຕໍ່ສູ້ ແລະ ໄດ້ແລ່ນໜີໄປ.
ພວກຂ້າໃຊ້ໄດ້ບອກລາໂມໄນວ່າ ອຳໂມນໄດ້ຮັກສາຝູງສັດໄວ້. ລາໂມໄນປະຫລາດໃຈຫລາຍ. ເພິ່ນຄິດວ່າອຳໂມນແມ່ນພຣະວິນຍານທີ່ຍິ່ງໃຫຍ່, ຜູ້ມີອຳນາດອັນຍິ່ງໃຫຍ່ ແລະ ຮູ້ທຸກສິ່ງ.
ລາໂມໄນຢາກເວົ້າກັບອຳໂມນ, ແຕ່ເພິ່ນກັງວົນ.
ອຳໂມນໄດ້ເຂົ້າເຝົ້າລາໂມໄນ, ແຕ່ລາໂມໄນບໍ່ຮູ້ວ່າຈະເວົ້າຫຍັງ. ພຣະຜູ້ເປັນເຈົ້າໄດ້ຊ່ວຍອຳໂມນໃຫ້ຮູ້ຈັກຄວາມນຶກຄິດຂອງລາໂມໄນ. ອຳໂມນໄດ້ເວົ້າວ່າ ລາວບໍ່ແມ່ນພຣະວິນຍານທີ່ຍິ່ງໃຫຍ່. ລາວໄດ້ບອກລາໂມໄນວ່າ ພຣະວິນຍານທີ່ຍິ່ງໃຫຍ່ຄືພຣະເຈົ້າ. ລາໂມໄນຢາກຮຽນຮູ້ຕື່ມອີກກ່ຽວກັບພຣະເຈົ້າ.
ອຳໂມນໄດ້ເວົ້າວ່າພຣະເຈົ້າໄດ້ສ້າງໂລກນີ້ ແລະ ທຸກຄົນໃນນັ້ນ. ແລ້ວອຳໂມນໄດ້ບອກລາໂມໄນວ່າ ພຣະເຈົ້າມີແຜນແຫ່ງຄວາມລອດ. ສ່ວນໜຶ່ງຂອງແຜນນັ້ນ, ພຣະເຢຊູຄຣິດຈະສະເດັດມາ. ລາໂມໄນໄດ້ເຊື່ອສິ່ງທີ່ອຳໂມນເວົ້າ. ລາໂມໄນໄດ້ອະທິຖານ ແລະ ທູນຂໍໃຫ້ພຣະເຈົ້າມີຄວາມເມດຕາຕໍ່ເພິ່ນ ແລະ ຜູ້ຄົນຂອງເພິ່ນ.