ສາດສະດາໂມໂຣໄນ

ການມີຄວາມຮັກອັນບໍລິສຸດຂອງພຣະເຢຊູຄຣິດ

ໂມໂຣໄນເປັນສາດສະດາຄົນສຸດທ້າຍຂອງຊາວນີໄຟ. ເພິ່ນໄດ້ຕໍ່ສູ້ໃນສົງຄາມໃຫຍ່ ລະຫວ່າງຊາວນີໄຟ ແລະ ຊາວເລມັນ. ຄອບຄົວຂອງເພິ່ນ ແລະ ທຸກຄົນທີ່ເພິ່ນຮູ້ຈັກໄດ້ຕາຍໃນສົງຄາມ. ຜູ້ຄົນໃນແຜ່ນດິນເປັນຄົນຊົ່ວຮ້າຍ. ພວກເຂົາໄດ້ຂ້າທຸກຄົນທີ່ເຊື່ອໃນພຣະເຢຊູຄຣິດ. ໂມໂຣໄນໄດ້ເຊື່ອໃນພຣະເຢຊູ. ເພິ່ນຈະບໍ່ປະຕິເສດວ່າພຣະເຢຊູຄືພຣະຜູ້ຊ່ວຍໃຫ້ລອດ.

ມໍມອນ 8:2–10; ໂມໂຣໄນ 1:2–3

ໂມໂຣໄນເອົາແຜ່ນຈາລຶກໂລຫະໄປ ແລະ ລີ້ຊ່ອນຕົວຢູ່ກັບມັນ ຈາກພວກທະຫານ

ມໍມອນ, ບິດາຂອງໂມໂຣໄນໄດ້ຂຽນປະຫວັດສາດຂອງຜູ້ຄົນຂອງພວກເພິ່ນໄວ້ໃນແຜ່ນຈາລຶກໂລຫະ. ກ່ອນມໍມອນໄດ້ເສຍຊີວິດ, ເພິ່ນໄດ້ມອບແຜ່ນຈາລຶກໃຫ້ໂມໂຣໄນ. ໂມໂຣໄນຕ້ອງລີ້ຊ່ອນຕົວເພື່ອຮັກສາຊີວິດຂອງເພິ່ນ ແລະ ແຜ່ນຈາລຶກ.

ມໍມອນ 6:6; 8:1–5, 13; ໂມໂຣໄນ 1:1–3

ໂມໂຣໄນນັ່ງຢູ່ໃນຖ້ຳ ແລະ ຂຽນໃສ່ແຜ່ນຈາລຶກໂລຫະ

ຊີວິດແມ່ນລຳບາກສຳລັບໂມໂຣໄນ, ແຕ່ເພິ່ນກໍຍັງຊື່ສັດເໝືອນເດີມ. ເພິ່ນໄດ້ຂຽນສິ່ງທີ່ມໍມອນໄດ້ສິດສອນກ່ຽວກັບຄວາມໃຈບຸນ, ຄວາມຮັກອັນບໍລິສຸດຂອງພຣະຄຣິດ. ມໍມອນໄດ້ກ່າວວ່າ ຜູ້ຄົນຄວນອະທິຖານຫາພຣະເຈົ້າ ດ້ວຍສຸດກຳລັງໃນໃຈຂອງພວກເຂົາ ເພື່ອຈະໄດ້ຮັບຄວາມຮັກນີ້. ເພິ່ນໄດ້ກ່າວວ່າພຣະເຈົ້າຊົງມອບຄວາມໃຈບຸນໃຫ້ຜູ້ທີ່ຕິດຕາມພຣະເຢຊູຢ່າງແທ້ຈິງ.

ໂມໂຣໄນ 7:32–33, 40–48; 10:20–21, 23

ຄອບຄົວມີຄວາມສຸກທີ່ໄດ້ຮັບອາຫານ, ແລະ ໂມໂຣໄນກໍຍິ້ມ

ໂມໂຣໄນຮັກຊາວເລມັນເຖິງແມ່ນວ່າພວກເຂົາບາງຄົນໄດ້ຂ້າທຸກຄົນທີ່ເພິ່ນຮູ້ຈັກ ແລະ ຢາກຂ້າເພິ່ນກໍຕາມ. ເພິ່ນໄດ້ຂຽນຫລາຍສິ່ງລົງໃນແຜ່ນຈາລຶກໂລຫະ ເພື່ອຊ່ວຍຊາວເລມັນໃນອະນາຄົດ. ເພິ່ນຫວັງວ່າພວກເຂົາຈະອ່ານບັນທຶກນັ້ນໃນມື້ໜຶ່ງ ແລະ ເຊື່ອໃນພຣະເຢຊູອີກຄັ້ງ.

ມໍມອນ 8:1–3; ໂມໂຣໄນ 1:1–4; 10:1

ໂມໂຣໄນນັ່ງຢູ່ເທິງເນີນຫຍ້າ ແລະ ຂຽນລົງໃນແຜ່ນຈາລຶກໂລຫະ

ໂມໂຣໄນໄດ້ເຊື້ອເຊີນທຸກຄົນທີ່ອ່ານບັນທຶກນັ້ນ ໃຫ້ຄິດກ່ຽວກັບວ່າພຣະເຈົ້າທີ່ຊົງຮັກ ເປັນຫ່ວງເປັນໃຍລູກໆຂອງພຣະອົງຫລາຍຂະໜາດໃດ. ເພິ່ນໄດ້ເຊື້ອເຊີນພວກເຂົາໃຫ້ອະທິຖານ ແລະ ທູນຖາມພຣະເຈົ້າຖ້າຫາກບັນທຶກເປັນຄວາມຈິງຫລືບໍ່. ເພິ່ນໄດ້ກ່າວວ່າ ຖ້າຫາກພວກເຂົາມີສັດທາໃນພຣະເຢຊູ ແລະ ຢາກຮູ້ແທ້ໆ, ພຣະເຈົ້າຈະເຮັດໃຫ້ພວກເຂົາຮູ້ຄວາມຈິງ. ພວກເຂົາຈະຮູ້ໂດຍອຳນາດຂອງພຣະວິນຍານບໍລິສຸດ.

ຄຳນຳຕໍ່ພຣະຄຳພີມໍມອນ; ໂມໂຣໄນ 10:1–5

ໂມໂຣໄນຝັງແຜ່ນຈາລຶກໂລຫະໄວ້ ແລະ ຍ້າຍກ້ອນຫີນໄປໄວ້ເທິງຈຸດບ່ອນເຊື່ອງ

ໂມໂຣໄນໄດ້ສຳເລັດການຂຽນບັນທຶກ. ແລ້ວເພິ່ນໄດ້ຝັງແຜ່ນຈາລຶກໂລຫະໄວ້ໃນດິນ. ພຣະເຢຊູໄດ້ບອກໂມໂຣໄນວ່າ ປະຫວັດສາດທີ່ຖືກຂຽນໄວ້ໃນແຜ່ນຈາລຶກ ຈະເປັນພອນໃຫ້ແກ່ຊີວິດຂອງລູກໆຂອງພຣະເຈົ້າໃນມື້ໜຶ່ງ.

ມໍມອນ 8:4, 14–16

ໂຈເຊັບ ສະມິດ ທີ່ຍັງໜຸ່ມຍ້າຍກ້ອນຫີນ ແລະ ເຫັນແຜ່ນຈາລຶກໂລຫະ ແລະ ເລຍໂຮນາ

ຫລາຍປີຈາກນັ້ນ, ພຣະເຈົ້າໄດ້ສົ່ງໂມໂຣໄນມາ, ໃນຖານະທູດສະຫວັນ, ເພື່ອສະແດງໃຫ້ຊາຍໜຸ່ມຄົນໜຶ່ງຊື່ ໂຈເຊັບ ສະມິດ ເຫັນແຜ່ນຈາລຶກໂລຫະທີ່ຖືກເຊື່ອງໄວ້. ໂຈເຊັບໄດ້ຖືກເອີ້ນຈາກພຣະເຈົ້າໃຫ້ເປັນສາດສະດາ. ພຣະເຈົ້າໄດ້ຊ່ວຍໂຈເຊັບແປແຜ່ນຈາລຶກ ເພື່ອວ່າຜູ້ຄົນຈະສາມາດອ່ານສິ່ງທີ່ຖືກຂຽນໄວ້ໃນນັ້ນ. ບັດນີ້ບັນທຶກນັ້ນຖືກເອີ້ນວ່າ ພຣະຄຳພີມໍມອນ.

ຄຳນຳຕໍ່ພຣະຄຳພີມໍມອນ