“ໂມໄຊຢາ ແລະ ຊີນິບ,” ເລື່ອງພຣະຄຳພີມໍມອນ (2023)
ໂມໄຊຢາ ແລະ ຊີນິບ
ຖືກປົກປ້ອງໂດຍພຣະຜູ້ເປັນເຈົ້າ
ຊາວນີໄຟ ແລະ ຊາວເລມັນໄດ້ມີສົງຄາມຫລາຍຄັ້ງ. ມີມື້ໜຶ່ງ, ພຣະຜູ້ເປັນເຈົ້າໄດ້ບອກຊາວນີໄຟຄົນໜຶ່ງຊື່ ໂມໄຊຢາ ໃຫ້ໜີໄປຈາກແຜ່ນດິນນີໄຟກັບຜູ້ໃດກໍຕາມທີ່ຢາກຕິດຕາມພຣະຜູ້ເປັນເຈົ້າ.
ຊາວນີໄຟຫລາຍຄົນໄດ້ເຊື່ອຟັງພຣະຜູ້ເປັນເຈົ້າ ແລະ ໄດ້ໄປກັບໂມໄຊຢາ. ພຣະຜູ້ເປັນເຈົ້າໄດ້ນຳພາເຂົາເຈົ້າໄປຫາດິນແດນບ່ອນໜຶ່ງທີ່ມີຜູ້ຄົນອາໄສຢູ່ແລ້ວ. ພວກເຂົາຖືກເອີ້ນວ່າ ຊາວເຊຣາເຮັມລາ.
ຊາວເຊຣາເຮັມລາກໍໄດ້ມາຈາກເຢຣູຊາເລັມດົນນານມາແລ້ວເຊັ່ນກັນ. ພວກເຂົາດີໃຈຫລາຍທີ່ພຣະຜູ້ເປັນເຈົ້າໄດ້ສົ່ງຊາວນີໄຟມາພ້ອມກັບແຜ່ນຈາລຶກທອງເຫລືອງ. ຜູ້ຄົນຂອງໂມໄຊຢາໄດ້ເຂົ້າຮ່ວມກັບຊາວເຊຣາເຮັມລາ. ທຸກຄົນໄດ້ເລືອກເອົາໂມໄຊຢາໃຫ້ເປັນກະສັດຂອງພວກເຂົາ. ເພິ່ນໄດ້ສິດສອນພວກເຂົາກ່ຽວກັບພຣະຜູ້ເປັນເຈົ້າ.
ຊາວນີໄຟໄດ້ອາໄສຢູ່ໃນເມືອງເຊຣາເຮັມລາເປັນເວລາດົນນານ ກ່ອນກຸ່ມໃຫຍ່ກຸ່ມໜຶ່ງໄດ້ກັບໄປຫາແຜ່ນດິນນີໄຟ. ພວກເຂົາຖືກນຳທາງໂດຍຊາວນີໄຟຄົນໜຶ່ງຊື່ ຊີນິບ.
ອອມໄນ 1:27–29; ໂມໄຊຢາ 9:3–5
ບັດນີ້ຊາວເລມັນອາໄສຢູ່ໃນແຜ່ນດິນນີໄຟ, ສະນັ້ນຊີນິບຈຶ່ງໄດ້ທູນຖາມກະສັດວ່າ ຜູ້ຄົນຂອງລາວຈະອາໄສຢູ່ນຳໄດ້ບໍ່. ກະສັດກໍຕົກລົງ.
ກະສັດໄດ້ຫລອກຊີນິບ ແລະ ຜູ້ຄົນຂອງລາວ. ເພິ່ນໄດ້ປ່ອຍໃຫ້ພວກເຂົາອາໄສຢູ່ໃນແຜ່ນດິນນີໄຟ ເພື່ອວ່າເພິ່ນຈະສາມາດຍຶດເອົາອາຫານ ແລະ ສັດລ້ຽງຂອງພວກເຂົາໃນພາຍຫລັງ. ຜູ້ຄົນຂອງຊີນິບໄດ້ອາໄສຢູ່ທີ່ນັ້ນດ້ວຍຄວາມສະຫງົບສຸກເປັນເວລາຫລາຍປີ. ພວກເຂົາໄດ້ປູກພືດພັນຢ່າງຫລວງຫລາຍ ແລະ ມີສັດລ້ຽງຈຳນວນຫລາຍ. ແລ້ວຊາວເລມັນໄດ້ບຸກໂຈມຕີ ແລະ ພະຍາຍາມຍຶດເອົາອາຫານ ແລະ ສັດລ້ຽງຂອງພວກເຂົາ.
ຊີນິບໄດ້ສິດສອນຜູ້ຄົນຂອງລາວໃຫ້ໄວ້ວາງໃຈໃນພຣະຜູ້ເປັນເຈົ້າ. ເມື່ອຊາວເລມັນມາຕໍ່ສູ້ກັບພວກເຂົາ, ຊີນິບ ແລະ ຜູ້ຄົນຂອງລາວໄດ້ອະທິຖານຫາພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ມອບພະລັງໃຫ້ພວກເຂົາ ແລະ ຊ່ວຍປົກປ້ອງພວກເຂົາ. ພວກເຂົາສາມາດຂັບໄລ່ຊາວເລມັນໃຫ້ໜີໄປ. ພຣະຜູ້ເປັນເຈົ້າໄດ້ອວຍພອນຊີນິບ ແລະ ຜູ້ຄົນຂອງລາວ ເພາະສັດທາຂອງພວກເຂົາ.