“ແອວມາ, ແອມມິວເລັກ, ແລະ ຊີເອສຣອມ,” ເລື່ອງພຣະຄຳພີມໍມອນ (2023)
ແອວມາ, ແອມມິວເລັກ, ແລະ ຊີເອສຣອມ
ການເລືອກທີ່ຈະເຊື່ອໃນພຣະເຈົ້າ ແລະ ເຊື່ອຟັງພຣະອົງ
ແອວມາໄດ້ເຫັນວ່າສະມາຊິກຂອງສາດສະໜາຈັກຫລາຍຄົນບໍ່ໄດ້ເຊື່ອຟັງພຣະບັນຍັດຂອງພຣະເຈົ້າ. ສະນັ້ນແອວມາຈຶ່ງໄດ້ໄປຈາກເມືອງໜຶ່ງຫາອີກເມືອງໜຶ່ງເພື່ອສິດສອນພຣະຄຳຂອງພຣະເຈົ້າ. ຫລາຍຄົນໄດ້ກັບໃຈ. ແລ້ວແອວມາໄດ້ມາເຖິງເມືອງໜຶ່ງຊື່ວ່າ ອຳໂມນໄນຮາ. ຜູ້ຄົນຢູ່ທີ່ນັ້ນບໍ່ໄດ້ຟັງເພິ່ນ. ພວກເຂົາຖົ່ມນ້ຳລາຍໃສ່ເພິ່ນ ແລະ ຂັບໄລ່ເພິ່ນອອກຈາກເມືອງ.
ແອວມາຮູ້ສຶກໂສກເສົ້າຂະນະທີ່ເພິ່ນອອກໄປຈາກເມືອງ. ເພິ່ນເປັນຫ່ວງນຳຜູ້ຄົນ. ແລ້ວທູດອົງໜຶ່ງໄດ້ມາຫາເພິ່ນ. ທູດໄດ້ກ່າວວ່າ ແອວມາສາມາດມີຄວາມສຸກໄດ້ ຍ້ອນວ່າເພິ່ນເຊື່ອຟັງພຣະເຈົ້າ. ທູດໄດ້ບອກແອວມາໃຫ້ກັບຄືນໄປເມືອງນັ້ນ ແລະ ເຕືອນຜູ້ຄົນ. ຖ້າຫາກພວກເຂົາບໍ່ກັບໃຈ, ພວກເຂົາຈະຖືກທຳລາຍ. ແອວມາກໍໄດ້ກັບໄປຢ່າງໄວ.
ເມື່ອແອວມາໄດ້ມາເຖິງເມືອງ, ເພິ່ນຫິວເຂົ້າຫລາຍ. ເພິ່ນໄດ້ຖືສິນອົດເຂົ້າເປັນເວລາຫລາຍມື້. ແອວມາໄດ້ຂໍກິນເຂົ້ານຳຊາຍຄົນໜຶ່ງຊື່ ແອມມິວເລັກ.
ແອມມິວເລັກໄດ້ບອກແອວມາກ່ຽວກັບພາບນິມິດທີ່ເພິ່ນໄດ້ເຫັນ. ໃນພາບນິມິດ, ທູດອົງໜຶ່ງໄດ້ບອກແອມມິວເລັກວ່າ ແອວມາເປັນສາດສະດາຂອງພຣະເຈົ້າ. ແອມມິວເລັກຢາກຊ່ວຍແອວມາ.
ແອມມິວເລັກໄດ້ພາແອວມາກັບບ້ານ ແລະ ເອົາເຂົ້າໃຫ້ເພິ່ນກິນ. ແອວມາໄດ້ພັກຢູ່ທີ່ບ້ານຂອງແອມມິວເລັກເປັນເວລາຫລາຍມື້. ພຣະເຈົ້າໄດ້ອວຍພອນແອມມິວເລັກ ແລະ ຄອບຄົວຂອງເພິ່ນ. ຕໍ່ມາ, ພຣະເຈົ້າໄດ້ບອກແອວມາ ແລະ ແອມມິວເລັກໃຫ້ໄປບອກຜູ້ຄົນຢູ່ໃນເມືອງໃຫ້ກັບໃຈ. ແອວມາ ແລະ ແອມມິວເລັກໄດ້ເຊື່ອຟັງ. ພຣະເຈົ້າໄດ້ມອບອຳນາດຂອງພຣະອົງໃຫ້ພວກເພິ່ນເພື່ອຊ່ວຍພວກເພິ່ນສິດສອນ.
ໜຶ່ງໃນຜູ້ຄົນທີ່ໄດ້ຍິນພວກເພິ່ນສິດສອນຊື່ວ່າ ຊີເອສຣອມ. ລາວເປັນຄົນສະຫລາດຫລາຍ ແລະ ຕ້ອງການຫລອກແອວມາ ແລະ ແອມມິວເລັກ. ຊີເອສຣອມໄດ້ບອກແອມມິວເລັກວ່າ ລາວຈະມອບເງິນຢ່າງຫລວງຫລາຍໃຫ້ເພິ່ນ ຖ້າຫາກເພິ່ນເວົ້າວ່າ ພຣະເຈົ້າບໍ່ມີຈິງ. ລາວຕ້ອງການໃຫ້ແອມມິວເລັກເວົ້າຕົວະ ເພື່ອວ່າຜູ້ຄົນຈະບໍ່ເຊື່ອສິ່ງທີ່ແອມມິວເລັກ ແລະ ແອວມາໄດ້ສິດສອນ.
ແອວມາ 10:29–32; 11:21–25; 12:4–6
ແຕ່ແອມມິວເລັກຈະບໍ່ເວົ້າຕົວະກ່ຽວກັບພຣະເຈົ້າ. ເພິ່ນເວົ້າວ່າພຣະເຈົ້າມີຈິງ. ແອມມິວເລັກ ແລະ ແອວມາຮູ້ເຖິງແນວຄິດຂອງຊີເອສຣອມ. ຊີເອສຣອມປະຫລາດໃຈຫລາຍ ແລະ ໄດ້ຖາມຫລາຍໆຢ່າງ. ພວກເພິ່ນໄດ້ສິດສອນຊີເອສຣອມວ່າ ພຣະເຈົ້າມີແຜນສຳລັບທຸກຄົນ. ຊີເອສຣອມໄດ້ເຊື່ອສິ່ງທີ່ແອວມາ ແລະ ແອມມິວເລັກໄດ້ສິດສອນກ່ຽວກັບພຣະເຈົ້າ ແລະ ພຣະເຢຊູຄຣິດ.
ແອວມາ 11:23–46; 12:1–18, 24–34; 14:6–7; 15:6–7
ຊີເອສຣອມເສຍໃຈຫລາຍກັບສິ່ງບໍ່ດີທີ່ລາວໄດ້ເຮັດ. ລາວໄດ້ລົ້ມປ່ວຍ. ແອວມາ ແລະ ແອມມິວເລັກໄດ້ໄປຢ້ຽມຢາມລາວ. ແອວມາໄດ້ເວົ້າວ່າຊີເອສຣອມສາມາດຫາຍດີ ຍ້ອນສັດທາຂອງຊີເອສຣອມໃນພຣະເຢຊູ. ແອວມາໄດ້ຂໍໃຫ້ພຣະເຈົ້າປິ່ນປົວລາວ. ຊີເອສຣອມໄດ້ລຸກຢືນຂຶ້ນ. ລາວໄດ້ຫາຍດີເປັນປົກກະຕິ! ລາວໄດ້ຮັບບັບຕິສະມາ ແລະ ສິດສອນຜູ້ຄົນຕະຫລອດຊີວິດຂອງລາວ.