“ແອວມາ ແລະ ແອມມິວເລັກຢູ່ໃນຄຸກ,” ເລື່ອງພຣະຄຳພີມໍມອນ (2023)
ແອວມາ ແລະ ແອມມິວເລັກຢູ່ໃນຄຸກ
ສັດທາໃນພຣະຜູ້ເປັນເຈົ້າໃນຊ່ວງເວລາທີ່ຫຍຸ້ງຍາກ
ແອວມາ ແລະ ແອມມິວເລັກໄດ້ສິດສອນພຣະກິດຕິຄຸນຢູ່ໃນເມືອງອຳໂມນໄນຮາ. ບາງຄົນໄດ້ເຊື່ອໃນພຣະຜູ້ເປັນເຈົ້າ ແລະ ກັບໃຈ. ແຕ່ຄົນອື່ນໆຫລາຍຄົນໄດ້ໃຈຮ້າຍໃຫ້ແອວມາ ແລະ ແອມມິວເລັກ ແລະ ຕ້ອງການທີ່ຈະທຳລາຍພວກເພິ່ນ. ຜູ້ຄົນທີ່ໃຈຮ້າຍໄດ້ມັດແອວມາ ແລະ ແອມມິວເລັກ ແລະ ເອົາຜູ້ຊາຍທັງສອງເຂົ້າໄປໃນເມືອງຂອງຫົວໜ້າຜູ້ຕັດສິນ.
ຫົວໜ້າຜູ້ຕັດສິນບໍ່ເຊື່ອວ່າຜູ້ຄົນຂອງເພິ່ນຕ້ອງກັບໃຈ. ຜູ້ຄົນໃຈຮ້າຍໃຫ້ແອວມາ ແລະ ແອມມິວເລັກ. ພວກເຂົາໄດ້ບັງຄັບໃຫ້ພວກຜູ້ຊາຍທີ່ເຊື່ອສິ່ງທີ່ແອວມາ ແລະ ແອມມິວເລັກສິດສອນ ໜີໄປຈາກເມືອງ. ແລ້ວພວກເຂົາໄດ້ໂຍນພວກຜູ້ຍິງ ແລະ ເດັກນ້ອຍທີ່ເຊື່ອໃນພຣະຜູ້ເປັນເຈົ້າ ເຂົ້າໃນກອງໄຟ.
ແອມມິວເລັກມີຄວາມໂສກເສົ້າຫລາຍເມື່ອເພິ່ນໄດ້ເຫັນຜູ້ຄົນເຈັບປວດ. ເພິ່ນໄດ້ຂໍໃຫ້ແອວມາໃຊ້ອຳນາດຂອງພຣະເຈົ້າເພື່ອຊ່ວຍຊີວິດພວກເຂົາ. ແຕ່ແອວມາເວົ້າວ່າ ພຣະວິນຍານຂອງພຣະເຈົ້າບໍ່ອະນຸຍາດໃຫ້ເພິ່ນເຮັດ. ເພິ່ນໄດ້ບອກແອມມິວເລັກວ່າ ພວກຜູ້ຍິງ ແລະ ເດັກນ້ອຍຈະໄດ້ຢູ່ກັບພຣະຜູ້ເປັນເຈົ້າ. ພຣະຜູ້ເປັນເຈົ້າຈະພິພາກສາຜູ້ຄົນທີ່ໄດ້ຂ້າພວກເຂົາ.
ຫົວໜ້າຜູ້ຕັດສິນໄດ້ເວົ້າເຍາະເຍີ້ຍແອວມາ ແລະ ແອມມິວເລັກ ຍ້ອນວ່າພຣະຜູ້ເປັນເຈົ້າບໍ່ໄດ້ປົກປ້ອງພວກຜູ້ຍິງ ແລະ ເດັກນ້ອຍ. ເພິ່ນໄດ້ສົ່ງແອວມາ ແລະ ແອມມິວເລັກເຂົ້າຄຸກ.
ຫລັງຈາກສາມມື້, ຫົວໜ້າຜູ້ຕັດສິນໄດ້ໄປທີ່ຄຸກກັບພວກປະໂລຫິດປອມຂອງເພິ່ນ. ພວກເຂົາໄດ້ຖາມຫລາຍໆຄຳຖາມ. ແຕ່ແອວມາ ແລະ ແອມມິວເລັກບໍ່ໄດ້ຕອບພວກເຂົາ.
ຫົວໜ້າຜູ້ຕັດສິນ ແລະ ພວກປະໂລຫິດຂອງເພິ່ນໄດ້ເຮັດຫລາຍສິ່ງທີ່ບໍ່ດີກັບແອວມາ ແລະ ແອມມິວເລັກ. ພວກເຂົາບໍ່ໄດ້ເອົາເຂົ້າ ຫລື ເອົານ້ຳໃຫ້ແອວມາ ແລະ ແອມມິວເລັກກິນນຳອີກ. ແລະ ພວກເຂົາໄດ້ເວົ້າເຍາະເຍີ້ຍສິ່ງທີ່ແອວມາ ແລະ ແອມມິວເລັກໄດ້ສິດສອນ.
ແອວມາ ແລະ ແອມມິວເລັກໄດ້ຮັບທຸກທໍລະມານເປັນເວລາຫລາຍມື້. ຫົວໜ້າຜູ້ຕັດສິນໄດ້ຄືນມາອີກກັບພວກປະໂລຫິດຂອງເພິ່ນ. ເພິ່ນໄດ້ບອກແອວມາ ແລະ ແອມມິວເລັກວ່າ ຖ້າຫາກພວກເພິ່ນມີອຳນາດຂອງພຣະເຈົ້າ, ແລ້ວພວກເພິ່ນຄວນແກ້ສາຍເຊືອກມັດອອກຈາກຕົວເອງໄດ້. ແລ້ວເພິ່ນຈະເຊື່ອພວກເພິ່ນ.
ແອວມາ ແລະ ແອມມິວເລັກໄດ້ຮູ້ສຶກເຖິງອຳນາດຂອງພຣະເຈົ້າ. ພວກເພິ່ນໄດ້ຢືນຂຶ້ນ. ແອວມາມີສັດທາໃນພຣະຜູ້ເປັນເຈົ້າ ແລະ ໄດ້ທູນຂໍອຳນາດເພື່ອທີ່ຈະແກ້ເຊືອກ.
ແອວມາ ແລະ ແອມມິວເລັກໄດ້ເຮັດໃຫ້ເຊືອກຂາດອອກ. ຫົວໜ້າຜູ້ຕັດສິນ ແລະ ພວກປະໂລຫິດຂອງເພິ່ນເກີດຄວາມຢ້ານກົວ. ພວກເຂົາພະຍາຍາມແລ່ນໜີ, ແຕ່ແລ້ວແຜ່ນດິນເລີ່ມສັ່ນຫວັ່ນໄຫວ.
ຝາຄຸກໄດ້ພັງລົງທັບຫົວໜ້າຜູ້ຕັດສິນ ແລະ ພວກປະໂລຫິດຂອງເພິ່ນ, ແລະ ພວກເຂົາໄດ້ຕາຍໄປ. ແຕ່ພຣະຜູ້ເປັນເຈົ້າໄດ້ຮັກສາແອວມາ ແລະ ແອມມິວເລັກໃຫ້ປອດໄພ. ເມື່ອຜູ້ຄົນໄດ້ຍິນສຽງດັງ, ພວກເຂົາກໍແລ່ນມາເບິ່ງສິ່ງທີ່ກຳລັງເກີດຂຶ້ນ. ພຽງແຕ່ແອວມາ ແລະ ແອມມິວເລັກເທົ່ານັ້ນທີ່ໄດ້ຍ່າງອອກມາຈາກຄຸກໄດ້. ຜູ້ຄົນຢ້ານກົວແອວມາ ແລະ ແອມມິວເລັກຫລາຍ ຈົນວ່າພວກເຂົາໄດ້ແລ່ນໜີໄປ.