“ແອວມາຢູ່ທີ່ນ້ຳມໍມອນ,” ເລື່ອງພຣະຄຳພີມໍມອນ (2023)
ແອວມາຢູ່ທີ່ນ້ຳມໍມອນ
ການກາຍເປັນຜູ້ຄົນຂອງພຣະເຈົ້າ
ແອວມາເຄີຍເປັນປະໂລຫິດຂອງກະສັດອົງໜຶ່ງຊື່ ໂນອາ. ແອວມາໄດ້ພະຍາຍາມຊ່ວຍຊີວິດອະບີນາໄດ, ສາດສະດາຂອງພຣະເຈົ້າ, ຈາກການຖືກຂ້າໂດຍໂນອາ. ແຕ່ໂນອາໄດ້ໃຈຮ້າຍໃຫ້ແອວມາ ແລະ ຕ້ອງການທີ່ຈະຂ້າແອວມາເຊັ່ນກັນ. ແອວມາໄດ້ແລ່ນໜີຈາກໂນອາເພື່ອຄວາມປອດໄພ. ໃນຕອນກາງເວັນ, ແອວມາໄດ້ລີ້ຢູ່ໃກ້ບ່ອນໜຶ່ງທີ່ເອີ້ນວ່າ ນ້ຳມໍມອນ.
ແອວມາເຊື່ອສິ່ງທີ່ອະບີນາໄດໄດ້ສິດສອນກ່ຽວກັບພຣະເຢຊູຄຣິດ. ເພິ່ນໄດ້ທູນຂໍພຣະເຈົ້າໃຫ້ອະໄພແກ່ບາບ ແລະ ຄວາມຜິດພາດຂອງເພິ່ນ.
ແອວມາໄດ້ພົບກັບຜູ້ຄົນຢ່າງລັບໆ ແລະ ໄດ້ສິດສອນພວກເຂົາກ່ຽວກັບພຣະເຢຊູ. ເພິ່ນໄດ້ສິດສອນທຸກຄົນທີ່ຈະຟັງ.
ຫລາຍຄົນເຊື່ອແອວມາ. ພວກເຂົາໄດ້ໄປທີ່ນ້ຳມໍມອນເພື່ອຟັງແອວມາສິດສອນ.
ຜູ້ທີ່ເຊື່ອຢາກຖືກເອີ້ນວ່າຜູ້ຄົນຂອງພຣະເຈົ້າ, ຊ່ວຍເຫລືອຄົນຂັດສົນ, ແລະ ບອກຜູ້ຄົນກ່ຽວກັບພຣະເຈົ້າ. ສະນັ້ນແອວມາຈຶ່ງໄດ້ເຊື້ອເຊີນພວກເຂົາໃຫ້ຮັບບັບຕິສະມາ. ໂດຍການບັບຕິສະມາ, ພວກເຂົາຈະເຮັດພັນທະສັນຍາ, ຫລື ຄຳສັນຍາ, ກັບພຣະເຈົ້າ ທີ່ຈະຮັບໃຊ້ພຣະອົງ ແລະ ຮັກສາພຣະບັນຍັດຂອງພຣະອົງ. ໃນການຕອບສະໜອງ, ພຣະເຈົ້າຈະອວຍພອນພວກເຂົາດ້ວຍພຣະວິນຍານຂອງພຣະອົງ.
ຜູ້ຄົນດີໃຈຫລາຍ. ພວກເຂົາໄດ້ຕົບມື ແລະ ເວົ້າວ່າພວກເຂົາຢາກຮັບບັບຕິສະມາ. ແອວມາໄດ້ບັບຕິສະມາໃຫ້ພວກເຂົາແຕ່ລະຄົນໃນນ້ຳມໍມອນ. ພວກເຂົາເຕັມໄປດ້ວຍພຣະວິນຍານຂອງພຣະເຈົ້າ ແລະ ຮູ້ສຶກເຖິງຄວາມຮັກຂອງພຣະເຈົ້າຕໍ່ພວກເຂົາ. ພວກເຂົາໄດ້ກາຍເປັນສະມາຊິກຂອງສາດສະໜາຈັກຂອງພຣະຄຣິດ.
ໂນອາໄດ້ເຫັນວ່າຜູ້ຄົນບາງຈຳນວນໄດ້ໜີຈາກແຜ່ນດິນຂອງເພິ່ນ. ເພິ່ນໄດ້ສົ່ງພວກຂ້າໃຊ້ຂອງເພິ່ນໃຫ້ໄປສອດແນມພວກເຂົາ. ພວກຂ້າໃຊ້ໄດ້ເຫັນຜູ້ຄົນໄປຫາແຜ່ນດິນມໍມອນ ເພື່ອຟັງຄຳສອນຂອງແອວມາ. ໂນອາໃຈຮ້າຍຢ່າງແຮງ. ເພິ່ນໄດ້ສົ່ງກອງທັບຂອງເພິ່ນໃຫ້ໄປຂ້າແອວມາ ແລະ ຜູ້ຄົນທີ່ແອວມາກຳລັງສິດສອນ.
ພຣະເຈົ້າໄດ້ເຕືອນແອວມາກ່ຽວກັບກອງທັບ. ດ້ວຍຄວາມຊ່ວຍເຫລືອຈາກພຣະເຈົ້າ, ແອວມາ ແລະ ຜູ້ຄົນຂອງເພິ່ນໄດ້ໜີຈາກແຜ່ນດິນໄປຢ່າງປອດໄພ. ກອງທັບບໍ່ສາມາດຕາມໄປທັນ. ພວກເຂົາໄດ້ຍ່າງໄປເປັນເວລາແປດມື້ໃນຖິ່ນແຫ້ງແລ້ງກັນດານ ແລະ ໄດ້ມາເຖິງແຜ່ນດິນທີ່ສວຍງາມ. ພວກເຂົາໄດ້ສ້າງຕັ້ງບ້ານໃໝ່ຢູ່ທີ່ນັ້ນ. ແອວມາໄດ້ສິດສອນຜູ້ຄົນ, ແລະ ພວກເຂົາໄດ້ຮັກສາຄຳສັນຍາຂອງພວກເຂົາກັບພຣະເຈົ້າ.