ຊາວໂຊຣຳ

ເພີ່ມຄວາມເຂັ້ມແຂງໃຫ້ແກ່ສັດທາຂອງພວກເຂົາໃນພຣະເຢຊູຄຣິດ.

ແອມມິວເລັກ, ແອວມາ, ໂຄຣິອານທັນ, ຊາວນີໄຟຄົນອື່ນໆເດີນທາງໄປຫາເມືອງໜຶ່ງ

ຜູ້ຄົນຊາວນີໄຟກຸ່ມໜຶ່ງທີ່ເອີ້ນວ່າ ຊາວໂຊຣຳບໍ່ໄດ້ຮັກສາພຣະບັນຍັດຂອງພຣະເຈົ້າ. ສິ່ງນີ້ເຮັດໃຫ້ສາດສະດາແອວມາໂສກເສົ້າ. ເພິ່ນຮູ້ວ່າວິທີທີ່ດີທີ່ສຸດໃນການຊ່ວຍພວກເຂົາ ຄືການສິດສອນພຣະຄຳຂອງພຣະເຈົ້າ. ເພິ່ນໄດ້ໄປກັບແອມມິວເລັກ ແລະ ຄົນອື່ນໆ ເພື່ອສິດສອນພວກເຂົາ.

ແອວມາ 31:2–11

ແອວມາ ແລະ ແອມມິວເລັກເບິ່ງຄືໂສກເສົ້າ, ແລະ ຜູ້ຄົນທີ່ແຕ່ງຕົວດີກໍເມີນເສີຍຈາກຄົນທີ່ຂັດສົນ

ຊາວໂຊຣຳຮູ້ກ່ຽວກັບພຣະເຈົ້າ ແຕ່ໄດ້ປ່ຽນຄຳສອນຂອງພຣະອົງ. ພວກເຂົານະມັດສະການຮູບບູຊາ. ພວກເຂົາຄິດວ່າພວກເຂົາດີກວ່າຄົນອື່ນໆ. ພວກເຂົາກໍຍັງຫຍາບຄາຍກັບຜູ້ຄົນທີ່ບໍ່ມີເງິນນຳອີກ.

ແອວມາ 31:1, 8–12, 24–25; 32:2–3

ຊາວໂຊຣຳທີ່ແຕ່ງຕົວດີຢືນຢູ່ເທິງແທ່ນສູງກາງຝູງຊົນ ແລະ ຍົກມືຂອງພວກເຂົາຂຶ້ນເທິງຟ້າ

ຊາວໂຊຣຳໄດ້ສ້າງບ່ອນສູງເພື່ອຢືນຢູ່ໃນໃຈກາງໂບດຂອງພວກເຂົາ. ພວກເຂົາໄດ້ຂຶ້ນໄປເທື່ອລະຄົນເພື່ອຢືນຢູ່ເທິງນັ້ນ ແລະ ອະທິຖານ. ພວກເຂົາຈະອະທິຖານໂດຍໃຊ້ຄຳດຽວກັນທຸກຄັ້ງ. ໃນຄຳອະທິຖານ, ພວກເຂົາໄດ້ເວົ້າວ່າພຣະເຈົ້າບໍ່ມີພຣະກາຍ ແລະ ພຣະເຢຊູຄຣິດບໍ່ມີຢູ່ຈິງ. ພວກເຂົາໄດ້ເວົ້າວ່າ ພວກເຂົາເທົ່ານັ້ນທີ່ເປັນຜູ້ຄົນທີ່ພຣະເຈົ້າຈະຊ່ວຍໃຫ້ລອດ.

ແອວມາ 31:12–23

ແອວມາ ແລະ ແອມມິວເລັກເວົ້າກັບຊາວໂຊຣຳທີ່ຍາກຈົນ

ແອວມາຮັກຊາວໂຊຣຳ ແລະ ຢາກໃຫ້ພວກເຂົາຕິດຕາມພຣະເຈົ້າ ແລະ ພຣະເຢຊູ. ເພິ່ນໄດ້ອະທິຖານ ແລະ ທູນຂໍໃຫ້ພຣະເຈົ້າຊ່ວຍເຫລືອເພິ່ນ ແລະ ຄົນອື່ນໆ ຜູ້ທີ່ໄດ້ມາກັບເພິ່ນ ເພື່ອສິດສອນຊາວໂຊຣຳ. ແອວມາ ແລະ ຜູ້ທີ່ຢູ່ກັບເພິ່ນທຸກຄົນໄດ້ເຕັມໄປດ້ວຍພຣະວິນຍານບໍລິສຸດ. ພວກເພິ່ນໄດ້ໄປ ແລະ ສິດສອນດ້ວຍອຳນາດຂອງພຣະເຈົ້າ.

ແອວມາ 31:24–38; 32:1

ຊາວໂຊຣຳທີ່ຍາກຈົນຫລາຍຄົນໄດ້ຟັງແອວມາ, ແອມມິວເລັກ, ແລະ ຊີເອສຣອມສິດສອນ

ຊາວໂຊຣຳບາງຄົນໂສກເສົ້າ. ພວກເຂົາບໍ່ໄດ້ຖືກອະນຸຍາດໃຫ້ເຂົ້າໄປໃນໂບດຂອງພວກເຂົາ ເພາະພວກເຂົາບໍ່ມີເສື້ອຜ້າທີ່ສວຍງາມ. ພວກເຂົາຢາກນະມັດສະການພຣະເຈົ້າ ແຕ່ບໍ່ຮູ້ຈະເຮັດແນວໃດ ຖ້າພວກເຂົາບໍ່ສາມາດເຂົ້າໄປໃນໂບດ. ພວກເຂົາໄດ້ຖາມແອວມາວ່າພວກເຂົາຄວນເຮັດແນວໃດ. ແອວມາໄດ້ສິດສອນພວກເຂົາວ່າ ພຣະເຈົ້າໄດ້ຍິນຄຳອະທິຖານຂອງພວກເຂົາ ບໍ່ວ່າພວກເຂົາຈະຢູ່ບ່ອນໃດກໍຕາມ.

ແອວມາ 32:2–12; 33:2–11

ແອວມາມີເມັດພືດນ້ອຍໆເມັດໜຶ່ງໃນມື ແລະ ຊີ້ໃສ່ຕົ້ນດອກໄມ້ໃຫຍ່ ແລະ ສວຍງາມດ້ວຍມືອີກເບື້ອງໜຶ່ງ

ແອວມາໄດ້ເວົ້າວ່າພຣະເຈົ້າຢາກໃຫ້ຜູ້ຄົນມີສັດທາ. ເພິ່ນໄດ້ປຽບທຽບຄຳສອນຂອງພຣະເຈົ້າໃສ່ກັບເມັດພືດ. ຖ້າຜູ້ຄົນຈະປູກຄຳສອນຂອງພຣະເຈົ້າໄວ້ໃນໃຈຂອງພວກເຂົາ, ເມັດພືດນັ້ນຈະເຕີບໂຕ ແລະ ພວກເຂົາຈະຮູ້ວ່າຄຳສອນຂອງພຣະເຈົ້າເປັນຄວາມຈິງ. ເພິ່ນໄດ້ກ່າວວ່າພວກເຂົາພຽງແຕ່ຕ້ອງມີຄວາມປາດຖະໜາທີ່ຈະເຊື່ອເທົ່ານັ້ນ ເພື່ອເລີ່ມຕົ້ນການໃຊ້ສັດທາຂອງພວກເຂົາ.

ແອວມາ 32:12–43

ແອມມິວເລັກກ່າວ, ແລະ ຢູ່ທາງຂ້າງແມ່ນຮູບຂອງພຣະເຢຊູຄຣິດກຳລັງສິດສອນຜູ້ຄົນ

ແລ້ວແອມມິວເລັກໄດ້ສິດສອນຜູ້ຄົນກ່ຽວກັບແຜນຂອງພຣະເຈົ້າສຳລັບລູກໆຂອງພຣະອົງ. ເພິ່ນໄດ້ບອກພວກເຂົາວ່າຜ່ານທາງພຣະເຢຊູພວກເຂົາທຸກຄົນສາມາດໄດ້ຮັບການໃຫ້ອະໄພຈາກບາບຂອງພວກເຂົາ. ເພິ່ນກໍຍັງໄດ້ສິດສອນພວກເຂົາໃຫ້ອະທິຖານຫາພຣະເຈົ້ານຳອີກ ແລະ ກ່າວວ່າພຣະເຈົ້າຈະຊ່ວຍ ແລະ ປົກປ້ອງພວກເຂົາ.

ແອວມາ 34

ທະຫານຍາມເບິ່ງຊາວໂຊຣຳຫລາຍຄົນທີ່ຍາກຈົນໜີຈາກເມືອງ

ຊາວໂຊຣຳຫລາຍຄົນທີ່ຍາກຈົນໄດ້ເຊື່ອສິ່ງທີ່ແອວມາ ແລະ ແອມມິວເລັກສິດສອນ. ແຕ່ຜູ້ນຳຂອງຊາວໂຊຣຳໃຈຮ້າຍ. ພວກເຂົາໄດ້ບັງຄັບໃຫ້ຜູ້ທີ່ເຊື່ອທຸກຄົນໜີຈາກເມືອງ.

ແອວມາ 35:1–6

ຊາວອານໄທ-ນີໄຟ-ລີໄຮຕ້ອນຮັບຊາວໂຊຣຳທີ່ຍາກຈົນ

ຜູ້ທີ່ເຊື່ອໄດ້ໄປອາໄສຢູ່ກັບຊາວອານໄທ-ນີໄຟ-ລີໄຮ. ຊາວອານໄທ-ນີໄຟ-ລີໄຮໄດ້ປະຕິບັດສາດສະໜາກິດຕໍ່ພວກເຂົາ, ຫລື ຮັບໃຊ້ພວກເຂົາ, ໂດຍການໃຫ້ອາຫານ, ເຄື່ອງນຸ່ງຫົ່ມ, ແລະ ແຜ່ນດິນແກ່ພວກເຂົາ.

ແອວມາ 35:9