“ກະສັດເບັນຢາມິນ,” ເລື່ອງພຣະຄຳພີມໍມອນ (2023)
ກະສັດເບັນຢາມິນ
ການຮັບໃຊ້ຜູ້ຄົນ ແລະ ພຣະເຈົ້າ
ກະສັດເບັນຢາມິນເປັນສາດສະດາຂອງພຣະເຈົ້າ ຜູ້ປົກຄອງແຜ່ນດິນເຊຣາເຮັມລາ. ເພິ່ນເຮັດວຽກໜັກເພື່ອຮັບໃຊ້ຜູ້ຄົນຂອງເພິ່ນ ແລະ ສິດສອນພວກເຂົາກ່ຽວກັບພຣະເຈົ້າ. ດ້ວຍຄວາມຊ່ວຍເຫລືອຈາກສາດສະດາຄົນອື່ນໆຂອງພຣະເຈົ້າ, ເບັນຢາມິນໄດ້ເຮັດໃຫ້ເຊຣາເຮັມລາເປັນບ່ອນສະຫງົບສຸກ ແລະ ປອດໄພທີ່ຈະຢູ່ອາໄສ.
ຄຳຂອງມໍມອນ 1:17–18; ໂມໄຊຢາ 1:1–7
ເບັນຢາມິນເລີ່ມເຖົ້າແກ່ລົງ. ເພິ່ນໄດ້ຂໍໃຫ້ໂມໄຊຢາ ລູກຊາຍຂອງເພິ່ນນຳຜູ້ຄົນໃຫ້ມາເຕົ້າໂຮມກັນ. ເບັນຢາມິນຕ້ອງການຈະບອກພວກເຂົາວ່າ ໂມໄຊຢາຈະເປັນກະສັດອົງໃໝ່ຂອງພວກເຂົາ.
ຜູ້ຄົນຢ່າງຫລວງຫລາຍໄດ້ມາຈາກທົ່ວແຜ່ນດິນ. ພວກເຂົາໄດ້ຕັ້ງຜ້າເຕັນຂອງພວກເຂົາຢູ່ໃກ້ພຣະວິຫານ ເພື່ອຟັງເບັນຢາມິນ.
ເບັນຢາມິນໄດ້ກ່າວຈາກຫໍສູງ ເພື່ອວ່າຫລາຍຄົນຈະສາມາດໄດ້ຍິນເພິ່ນ. ເບັນຢາມິນໄດ້ກ່າວວ່າພຣະເຈົ້າໄດ້ຊ່ວຍເພິ່ນໃນການນຳພາພວກເຂົາ. ໃນຖານະກະສັດ, ເພິ່ນໄດ້ສິດສອນພວກເຂົາໃຫ້ເຊື່ອຟັງພຣະບັນຍັດຂອງພຣະເຈົ້າ. ເພິ່ນບໍ່ໄດ້ຮັບເອົາເງິນຂອງພວກເຂົາ ຫລື ໃຫ້ພວກເຂົາຮັບໃຊ້ເພິ່ນ. ກົງກັນຂ້າມ, ເພິ່ນໄດ້ເຮັດວຽກເພື່ອຮັບໃຊ້ຜູ້ຄົນຂອງເພິ່ນ ແລະ ພຣະເຈົ້າ.
ເບັນຢາມິນໄດ້ບອກຜູ້ຄົນວ່າ ເມື່ອພວກເຂົາຮັບໃຊ້ກັນແລະກັນ, ພວກເຂົາກໍກຳລັງຮັບໃຊ້ພຣະເຈົ້າເຊັ່ນກັນ. ແລ້ວເພິ່ນໄດ້ບອກພວກເຂົາວ່າ ທຸກສິ່ງທີ່ພວກເຂົາມີແມ່ນມາຈາກພຣະເຈົ້າ. ໃນການຕອບສະໜອງ, ພຣະເຈົ້າຕ້ອງການໃຫ້ພວກເຂົາເຊື່ອຟັງພຣະບັນຍັດຂອງພຣະອົງ. ເມື່ອພວກເຂົາໄດ້ເຊື່ອຟັງ, ພຣະເຈົ້າໄດ້ອວຍພອນພວກເຂົາຫລາຍຍິ່ງຂຶ້ນ.
ເບັນຢາມິນໄດ້ບອກພວກເຂົາວ່າ ເພິ່ນບໍ່ສາມາດເປັນກະສັດຂອງພວກເຂົາ ຫລື ຄູສອນຂອງພວກເຂົາອີກຕໍ່ໄປ. ໂມໄຊຢາ ລູກຊາຍຂອງເພິ່ນຈະເປັນກະສັດອົງໃໝ່ຂອງພວກເຂົາ.
ແລ້ວເບັນຢາມິນໄດ້ບອກຜູ້ຄົນຂອງເພິ່ນວ່າ ທູດອົງໜຶ່ງໄດ້ມາຢ້ຽມຢາມເພິ່ນ. ທູດໄດ້ກ່າວວ່າພຣະບຸດຂອງພຣະເຈົ້າ, ພຣະເຢຊູຄຣິດ, ຈະສະເດັດມາສູ່ໂລກ. ພຣະອົງຈະເຮັດການມະຫັດສະຈັນ ແລະ ປິ່ນປົວຜູ້ຄົນ. ພຣະອົງຈະຮັບທຸກທໍລະມານກັບຄວາມເຈັບປວດ ແລະ ຈະສິ້ນພຣະຊົນເພື່ອຊ່ວຍທຸກຄົນໃຫ້ລອດ. ເບັນຢາມິນໄດ້ສິດສອນວ່າ ພຣະເຢຊູຈະໃຫ້ອະໄພທຸກຄົນທີ່ມີສັດທາໃນພຣະອົງ ແລະ ກັບໃຈ.
ຜູ້ຄົນເຊື່ອສິ່ງທີ່ເບັນຢາມິນໄດ້ສິດສອນພວກເຂົາກ່ຽວກັບພຣະເຢຊູ. ພວກເຂົາຮູ້ວ່າພວກເຂົາຕ້ອງໄດ້ກັບໃຈ. ທຸກຄົນໄດ້ອະທິຖານ ແລະ ທູນຂໍໃຫ້ພຣະເຈົ້າໃຫ້ອະໄພແກ່ພວກເຂົາ. ຫລັງຈາກພວກເຂົາໄດ້ອະທິຖານແລ້ວ, ພຣະວິນຍານຂອງພຣະເຈົ້າໄດ້ມາສະຖິດຢູ່ກັບພວກເຂົາ. ພວກເຂົາຮູ້ສຶກດີໃຈ ແລະ ຮູ້ວ່າພຣະເຈົ້າໄດ້ອະໄພໃຫ້ພວກເຂົາແລ້ວ ຍ້ອນສັດທາຂອງພວກເຂົາໃນພຣະເຢຊູ.
ຜູ້ຄົນຮູ້ສຶກແຕກຕ່າງ ແລະ ໃໝ່ພາຍໃນເພາະພວກເຂົາມີສັດທາໃນພຣະເຢຊູ. ບັດນີ້ພວກເຂົາຕ້ອງການທີ່ຈະເຮັດຄວາມດີຕະຫລອດເວລາ. ພວກເຂົາໄດ້ເຮັດຄຳສັນຍາວ່າຈະຮັກສາພຣະບັນຍັດຂອງພຣະເຈົ້າຕະຫລອດຊີວິດຂອງພວກເຂົາ. ຍ້ອນພວກເຂົາໄດ້ເຊື່ອໃນພຣະເຢຊູ ແລະ ໄດ້ເຮັດຄຳສັນຍານີ້, ພວກເຂົາຈຶ່ງຖືກເອີ້ນວ່າ ຜູ້ຄົນຂອງພຣະເຢຊູ.