“ເອບິດ,” ເລື່ອງພຣະຄຳພີມໍມອນ (2023)
ເອບິດ
ການຊ່ວຍຜູ້ຄົນຂອງນາງໃຫ້ເຊື່ອໃນພຣະເຢຊູ
ເອບິດໄດ້ຮັບໃຊ້ລາຊີນີ ຜູ້ເປັນຊາວເລມັນ. ເອບິດໄດ້ຮຽນຮູ້ກ່ຽວກັບພຣະເຢຊູຄຣິດ ຈາກພາບນິມິດຂອງພໍ່ນາງ. ເປັນເວລາຫລາຍປີ, ນາງໄດ້ເຊື່ອໃນພຣະເຢຊູ ແລະ ຕ້ອງການທີ່ຈະຕິດຕາມພຣະອົງ. ແຕ່ນາງຍັງບໍ່ໄດ້ບອກຊາວເລມັນຄົນອື່ນໆເທື່ອ.
ມື້ໜຶ່ງ, ຊາວນີໄຟຄົນໜຶ່ງຊື່ ອຳໂມນ ໄດ້ມາຍັງອານາຈັກ ເພື່ອສິດສອນຊາວເລມັນກ່ຽວກັບພຣະເຢຊູ ແລະ ພຣະເຈົ້າ. ລາຊີນີ ແລະ ກະສັດໄດ້ເຊື່ອສິ່ງທີ່ອຳໂມນສິດສອນ. ລາຊີນີ ແລະ ກະສັດຮູ້ວ່າ ພຣະເຢຊູຈະເດັດມາສູ່ໂລກ ແລະ ເພື່ອເຮັດໃຫ້ເປັນວ່າທຸກຄົນທີ່ເຊື່ອໃນພຣະອົງຈະສາມາດໄດ້ຮັບການໃຫ້ອະໄພ.
ແອວມາ 17:12–13; 18:33–36, 39–40; 19:9, 13
ລາຊີນີ ແລະ ກະສັດໄດ້ຮູ້ສຶກເຖິງພຣະວິນຍານບໍລິສຸດ ແລະ ດີໃຈຫລາຍຈົນວ່າພວກເພິ່ນໄດ້ລົ້ມລົງຢູ່ກັບພື້ນດິນ. ອຳໂມນ ແລະ ພວກຂ້າໃຊ້ກໍລົ້ມລົງເຊັ່ນກັນ. ເອບິດຄົນດຽວທີ່ຍັງຢືນຢູ່.
ເອບິດຢາກບອກໃຫ້ຜູ້ຄົນຮູ້ກ່ຽວກັບການມະຫັດສະຈັນນີ້. ນາງຫວັງວ່າຜູ້ຄົນຈະເຊື່ອໃນອຳນາດຂອງພຣະເຈົ້າ ເມື່ອພວກເຂົາໄດ້ເຫັນສິ່ງທີ່ໄດ້ເກີດຂຶ້ນ. ສະນັ້ນນາງເອບິດຈຶ່ງໄດ້ແລ່ນຈາກເຮືອນໜຶ່ງໄປຫາອີກເຮືອນໜຶ່ງ. ນາງໄດ້ບອກຜູ້ຄົນໃຫ້ໄປເບິ່ງສິ່ງທີ່ພຣະເຈົ້າໄດ້ກະທຳກັບລາຊີນີ ແລະ ກະສັດ.
ຫລາຍຄົນໄດ້ມາຫາວັງລາຊີນີ ແລະ ກະສັດ. ພວກເຂົາປະຫລາດໃຈເພາະເບິ່ງຄືວ່າລາຊີນີ, ກະສັດ, ແລະ ຂ້າໃຊ້ທຸກຄົນຂອງພວກເພິ່ນຕາຍແລ້ວ.
ຜູ້ຄົນສັບສົນ. ພວກເຂົາຜິດຖຽງກັນກ່ຽວກັບສິ່ງທີ່ໄດ້ເກີດຂຶ້ນກັບລາຊີນີ ແລະ ກະສັດ.
ເມື່ອນາງເອບິດກັບມາ, ນາງໄດ້ເຫັນຜູ້ຄົນກຳລັງຜິດຖຽງກັນ. ນາງໂສກເສົ້າຍ້ອນວ່າພວກເຂົາບໍ່ໄດ້ເຫັນອຳນາດຂອງພຣະເຈົ້າ. ແລ້ວນາງໄດ້ຈັບມືລາຊີນີ, ແລະ ລາຊີນີກໍຢືນຂຶ້ນ ແລະ ສັນລະເສີນພຣະເຢຊູ.
ລາຊີນີໄດ້ຈັບມືສາມີຂອງນາງ, ແລະ ເພິ່ນໄດ້ຢືນຂຶ້ນ. ກະສັດໄດ້ບອກຜູ້ຄົນກ່ຽວກັບພຣະເຢຊູ. ແລ້ວອຳໂມນ ແລະ ພວກຂ້າໃຊ້ຄົນອື່ນໆກໍໄດ້ຢືນຂຶ້ນ. ເຂົາເຈົ້າທຸກຄົນໄດ້ບອກຜູ້ຄົນວ່າ ພຣະເຢຊູໄດ້ປ່ຽນແປງເຂົາເຈົ້າ. ບັດນີ້ເຂົາເຈົ້າຢາກເຮັດສິ່ງທີ່ດີເທົ່ານັ້ນ. ຫລາຍຄົນໄດ້ເຊື່ອເຂົາເຈົ້າ.
ເຊັ່ນດຽວກັບນາງເອບິດໄດ້ມີຄວາມຫວັງ, ຜູ້ຄົນກໍໄດ້ເຫັນອຳນາດຂອງພຣະເຈົ້າ. ຫລາຍຄົນໄດ້ເຊື່ອໃນພຣະເຢຊູ ແລະ ຮັບບັບຕິສະມາ. ພວກເຂົາໄດ້ມີພຣະວິນຍານຂອງພຣະເຈົ້າສະຖິດຢູ່ກັບພວກເຂົາ. ພວກເຂົາຍັງໄດ້ສະຖາປະນາສາດສະໜາຈັກຂຶ້ນໃນແຜ່ນດິນຂອງພວກເຂົານຳອີກ. ພວກເຂົາໄດ້ເຫັນວ່າພຣະເຢຊູຊ່ວຍທຸກຄົນທີ່ກັບໃຈ ແລະ ເຊື່ອໃນພຣະອົງ.