“ຕົ້ນໄມ້ແຫ່ງຊີວິດ,” ເລື່ອງພຣະຄຳພີມໍມອນ (2023)
“ຕົ້ນໄມ້ແຫ່ງຊີວິດ,” ເລື່ອງພຣະຄຳພີມໍມອນ
ຕົ້ນໄມ້ແຫ່ງຊີວິດ
ຄວາມຝັນທີ່ດົນໃຈຂອງລີໄຮ
ມີຄືນໜຶ່ງ, ລີໄຮໄດ້ມີຄວາມຝັນຈາກພຣະຜູ້ເປັນເຈົ້າ. ເພິ່ນໄດ້ບອກຄອບຄົວຂອງເພິ່ນກ່ຽວກັບຄວາມຝັນ.
ໃນຄວາມຝັນຂອງເພິ່ນ, ລີໄຮໄດ້ເຫັນຜູ້ຊາຍຄົນໜຶ່ງໃນຊຸດສີຂາວ. ຜູ້ຊາຍຄົນນັ້ນໄດ້ບອກລີໄຮໃຫ້ຕິດຕາມເພິ່ນໄປ.
ລີໄຮໄດ້ເຫັນວ່າເພິ່ນຢູ່ໃນຄວາມມືດ ແລະ ໃນສະຖານທີ່ເປົ່າປ່ຽວ. ເພິ່ນໄດ້ຍ່າງໄປຫລາຍຊົ່ວໂມງ. ແຕ່ຄວາມມືດບໍ່ໄດ້ຫາຍໄປ. ໃນທີ່ສຸດ, ລີໄຮໄດ້ອະທິຖານເພື່ອຂໍຄວາມຊ່ວຍເຫລືອ.
ເມື່ອລີໄຮອະທິຖານແລ້ວ, ເພິ່ນໄດ້ເຫັນພື້ນທີ່ອັນກວ້າງໃຫຍ່. ໃນພື້ນທີ່ນັ້ນມີກົກໄມ້ຢູ່ຕົ້ນໜຶ່ງເຕັມໄປດ້ວຍໝາກ. ລີໄຮຄິດວ່າໝາກໄມ້ຄົງເຮັດໃຫ້ເພິ່ນມີຄວາມສຸກ, ສະນັ້ນເພິ່ນຈຶ່ງໄດ້ກິນ. ຈິດວິນຍານຂອງເພິ່ນກໍເຕັມໄປດ້ວຍຄວາມຊື່ນຊົມ.
ໝາກໄມ້ມີລົດຊາດດີກວ່າໝາກໄມ້ອື່ນໃດ. ມັນຫວານ ແລະ ແຊບຊ້ອຍ. ລີໄຮຢາກແບ່ງປັນມັນໃຫ້ກັບຄອບຄົວຂອງເພິ່ນ. ເພິ່ນຮູ້ວ່າ ມັນຈະເຮັດໃຫ້ເຂົາເຈົ້າມີຄວາມສຸກເຊັ່ນກັນ. ລີໄຮໄດ້ເຫັນຊາໄຣຢາ, ແຊມ, ແລະ ນີໄຟກຳລັງຢືນຢູ່ໃກ້ແມ່ນ້ຳ. ເຂົາເຈົ້າເບິ່ງຄືຫລົງທາງ. ລີໄຮໄດ້ເອີ້ນໃສ່ເຂົາເຈົ້າແຮງໆ. ເພິ່ນໄດ້ຂໍໃຫ້ເຂົາເຈົ້າມາກິນໝາກໄມ້.
ຊາໄຣຢາ, ແຊມ, ແລະ ນີໄຟໄດ້ມາທີ່ຕົ້ນໄມ້ ແລະ ກິນໝາກໄມ້. ລີໄຮໄດ້ຫລຽວຫາເລມັນ ແລະ ເລມູເອນ. ເພິ່ນຢາກໃຫ້ພວກເຂົາຊື່ນຊົມກັບໝາກໄມ້ເຊັ່ນກັນ. ແຕ່ພວກເຂົາບໍ່ຍອມມາກິນໝາກໄມ້.
ແລ້ວລີໄຮໄດ້ເຫັນເສັ້ນທາງກັບຮາວເຫລັກທີ່ນຳໄປຫາຕົ້ນໄມ້. ເພິ່ນໄດ້ເຫັນຄົນຢ່າງຫລວງຫລາຍກຳລັງຍ່າງມາຕາມເສັ້ນທາງ. ທັນໃດນັ້ນ, ໝອກອັບຕຶບໜາກໍໄດ້ປະກົດຂຶ້ນ. ຄວາມມືດໄດ້ເຮັດໃຫ້ຍາກທີ່ຈະຫລຽວເຫັນ. ທາງດຽວທີ່ຈະໄປເຖິງຕົ້ນໄມ້ນັ້ນແມ່ນການຈັບຮາວເຫລັກໄປ.
ບາງຄົນໄດ້ໜີຈາກເສັ້ນທາງ ແລະ ຫລົງທາງໄປ. ຄົນອື່ນໆໄດ້ຈັບຮາວເຫລັກ ແລະ ມຸ້ງໜ້າຕໍ່ໄປ.
ເມື່ອພວກເຂົາໄປເຖິງຕົ້ນໄມ້, ພວກເຂົາໄດ້ກິນໝາກໄມ້.
ລີໄຮໄດ້ເງີຍໜ້າຂຶ້ນ ແລະ ເຫັນອາຄານໃຫຍ່ເຕັມໄປດ້ວຍຜູ້ຄົນຢ່າງຫລວງຫລາຍ. ພວກເຂົາຫົວເຍາະເຍີ້ຍຜູ້ຄົນທີ່ໄດ້ກິນໝາກໄມ້. ບາງຄົນທີ່ໄດ້ກິນໝາກໄມ້ຮູ້ສຶກບໍ່ສະບາຍໃຈ ເມື່ອຄົນອື່ນຫົວຂວັນພວກເຂົາ, ສະນັ້ນພວກເຂົາຈຶ່ງໄດ້ໜີໄປຈາກຕົ້ນໄມ້. ພວກເຂົາໄດ້ອອກໄປ ແລະ ຫລົງທາງ.
ໃນຄວາມຝັນຂອງເພິ່ນ, ລີໄຮໄດ້ເຫັນຫລາຍຄົນຕື່ມອີກທີ່ຈັບຮາວເຫລັກໄວ້ແໜ້ນໆ. ພວກເຂົາໄດ້ຍ່າງໄປໜ້າເທື່ອລະບາດກ້າວ ຈົນກວ່າພວກເຂົາໄດ້ໄປເຖິງຕົ້ນໄມ້. ແລ້ວພວກເຂົາໄດ້ຄຸເຂົ່າລົງຢູ່ທີ່ຕົ້ນໄມ້ ແລະ ໄດ້ກິນໝາກໄມ້. ພວກເຂົາບໍ່ໄດ້ຟັງຄຳຂອງຜູ້ຄົນໃນອາຄານໃຫຍ່. ພວກເຂົາເລືອກຢູ່ທີ່ຕົ້ນໄມ້.
ເມື່ອລີໄຮໄດ້ຕື່ນຂຶ້ນ, ເພິ່ນເປັນຫ່ວງນຳເລມັນ ແລະ ເລມູເອນ. ພວກເຂົາບໍ່ໄດ້ກິນໝາກໄມ້ຢູ່ໃນຄວາມຝັນຂອງເພິ່ນ. ລີໄຮຮັກເລມັນ ແລະ ເລມູເອນ. ເພິ່ນຫວັງວ່າພວກເຂົາຈະຢູ່ໃກ້ພຣະຜູ້ເປັນເຈົ້າ. ເພິ່ນໄດ້ເຊື້ອເຊີນພວກເຂົາໃຫ້ຮັກສາພຣະບັນຍັດຂອງພຣະເຈົ້າ.