“ຕົ້ນໝາກກອກເທດ,” ເລື່ອງພຣະຄຳພີມໍມອນ (2023)
ຕົ້ນໝາກກອກເທດ
ຄວາມຮັກຂອງພຣະເຈົ້າຕໍ່ຜູ້ຄົນຂອງພຣະອົງ
ຢາໂຄບໄດ້ເປັນສາດສະດາຂອງພຣະເຈົ້າ. ເພິ່ນຕ້ອງການທີ່ຈະສິດສອນຊາວນີໄຟກ່ຽວກັບວ່າ ພຣະເຈົ້າຮັກຜູ້ຄົນຂອງພຣະອົງຫລາຍຂະໜາດໃດ. ຢາໂຄບໄດ້ເລົ່າເລື່ອງກ່ຽວກັບສວນໝາກກອກເທດ. ເຈົ້ານາຍຂອງສວນອະງຸ່ນ ແລະ ຄົນໃຊ້ຂອງເພິ່ນໄດ້ເຮັດວຽກນຳກັນ ເພື່ອດູແລສວນ.
ເຈົ້ານາຍຂອງສວນມີຕົ້ນໝາກກອກເທດພິເສດຕົ້ນໜຶ່ງ ທີ່ເກີດໝາກຜົນດີ. ຢາໂຄບໄດ້ເວົ້າວ່າ ຕົ້ນໝາກກອກຕົ້ນນີ້ແມ່ນຄືຜູ້ຄົນຂອງພຣະເຈົ້າ, ຫລື ເຊື້ອສາຍອິດສະຣາເອນ. ໝາກໄມ້ປຽບເໝືອນການກະທຳຂອງຜູ້ຄົນ. ເຈົ້ານາຍຂອງສວນໄດ້ດູແລຕົ້ນນີ້ຢ່າງເອົາໃຈໃສ່. ເພິ່ນໄດ້ຊ່ວຍມັນໃຫ້ເຕີບໂຕຂຶ້ນ ໂດຍການຫລໍ່ລ້ຽງຮາກ ແລະ ຕັດສ້ອມກິ່ງງ່າ. ເພິ່ນໄດ້ໃຫ້ທຸກສິ່ງທີ່ມັນຕ້ອງການ.
ບໍ່ດົນຈາກນັ້ນ, ຕົ້ນພິເສດຂອງເພິ່ນກໍເລີ່ມຕາຍ. ເຫລືອພຽງສອງສາມງ່າທີ່ຍັງດີຢູ່. ສິ່ງນີ້ເຮັດໃຫ້ເຈົ້ານາຍຂອງສວນໂສກເສົ້າ. ເພິ່ນຕ້ອງການໃຫ້ມັນເຕີບໂຕເປັນໝາກດີ.
ເພື່ອທີ່ຈະຮັກສາງ່າດີໄວ້, ເຈົ້ານາຍຂອງສວນໄດ້ຕັດເອົາງ່າ ແລະ ຕໍ່ງ່າໃສ່ກັບຕົ້ນອື່ນ. ແລ້ວເພິ່ນໄດ້ຕໍ່ງ່າດີໃສ່ ທີ່ເອົາມາຈາກຕົ້ນອື່ນໆ.
ເວລາຜ່ານໄປດົນນານ. ເຈົ້ານາຍຂອງສວນ ແລະ ຄົນໃຊ້ໄດ້ມາທີ່ສວນເລື້ອຍໆ. ພວກເພິ່ນໄດ້ດູແລຕົ້ນໄມ້ພິເສດຂອງເຈົ້ານາຍຂອງສວນ. ພວກເພິ່ນກໍຍັງດູແລກິ່ງງ່າພິເສດທີ່ກະຈັດກະຈາຍຢູ່ໃນຕົ້ນຕ່າງໆທົ່ວສວນເຊັ່ນກັນ. ໝາກໄມ້ສ່ວນໃຫຍ່ກໍເປັນຜົນດີ. ໝາກໄມ້ດີເຮັດໃຫ້ເຈົ້ານາຍຂອງສວນ ແລະ ຄົນໃຊ້ດີໃຈ.
ຫລັງຈາກຊ່ວງໄລຍະໜຶ່ງ, ແຕ່ລະຕົ້ນກໍເລີ່ມມີໝາກຫລາຍຂຶ້ນ. ແຕ່ບັດນີ້ທຸກໜ່ວຍເກີດເປັນໝາກບໍ່ດີ. ເຈົ້ານາຍຂອງສວນໂສກເສົ້າຫລາຍ. ເພິ່ນບໍ່ຢາກສູນເສຍສວນຂອງເພິ່ນ ຫລື ໝາກໄມ້! ເພິ່ນໄດ້ເຮັດວຽກໜັກເພື່ອຊ່ວຍຕົ້ນໄມ້ຂອງເພິ່ນ. ເພິ່ນສົງໄສວ່າ ມີສິ່ງໃດອີກທີ່ເພິ່ນສາມາດເຮັດໄດ້. ເພິ່ນໄດ້ເວົ້າກັບຄົນໃຊ້ ແລະ ຕັດສິນໃຈພະຍາຍາມຕໍ່ໄປ.
ເພື່ອທີ່ຈະຮັກສາສວນຂອງເພິ່ນ, ເຈົ້ານາຍຂອງສວນໄດ້ບອກໃຫ້ຮວບຮວມກິ່ງງ່າທີ່ເພິ່ນໄດ້ຕັດອອກຈາກຕົ້ນໄມ້ພິເສດ. ເພິ່ນເວົ້າວ່າໃຫ້ຕໍ່ມັນໃສ່ຕົ້ນໄມ້ພິເສດຄືນອີກຄັ້ງ.
ນີ້ແມ່ນຄັ້ງສຸດທ້າຍທີ່ເຈົ້ານາຍຂອງສວນຈະເຮັດວຽກຢູ່ໃນສວນຂອງເພິ່ນ. ເພິ່ນໄດ້ເອີ້ນຄົນໃຊ້ຄົນອື່ນໆໃຫ້ມາຊ່ວຍເຫລືອ. ທຸກຄົນໄດ້ເຮັດວຽກນຳກັນເພື່ອຮວບຮວມ ແລະ ຕໍ່ກິ່ງງ່າ.
ພວກເພິ່ນໄດ້ດູແລຕົ້ນໄມ້ທຸກຕົ້ນ. ພວກເພິ່ນໄດ້ຕັດກິ່ງງ່າທີ່ບໍ່ດີອອກ ແລະ ໄດ້ຮັກສາອັນທີ່ດີໄວ້. ຫລັງຈາກຊົ່ວໄລຍະໜຶ່ງ, ຕົ້ນພິເສດຂອງເຈົ້ານາຍຂອງສວນກໍເປັນໝາກດີອີກຄັ້ງ. ຕົ້ນໄມ້ຕົ້ນອື່ນໆກໍເກີດໝາກດີຄືກັນກັບຕົ້ນພິເສດເຊັ່ນກັນ. ເຈົ້ານາຍຂອງສວນດີໃຈ. ຕົ້ນໄມ້ຂອງເພິ່ນຖືກຮັກສາໄວ້! ທຸກຕົ້ນໄດ້ເກີດໝາກດັ່ງທີ່ເພິ່ນຢາກໃຫ້ມັນເປັນ.
ເຈົ້ານາຍຂອງສວນໄດ້ຂອບໃຈຄົນໃຊ້. ເພິ່ນບອກພວກເຂົາວ່າ ພວກເຂົາໄດ້ຮັບພອນທີ່ເຮັດວຽກໜັກ ແລະ ຮັກສາບັນຍັດຂອງເພິ່ນ. ເພິ່ນໄດ້ແບ່ງປັນໝາກໄມ້ໃຫ້ກັບພວກເຂົາ, ແລະ ມັນເຮັດໃຫ້ພວກເຂົາດີໃຈ. ເປັນເວລາດົນນານ, ເຈົ້ານາຍຂອງສວນໄດ້ຊື່ນຊົມກັບໝາກໄມ້.
ຢາໂຄບໄດ້ເລົ່າຈົບເລື່ອງຕົ້ນໝາກກອກເທດ. ເພິ່ນໄດ້ສິດສອນຜູ້ຄົນວ່າ ພຣະເຈົ້າດູແລພວກເຂົາເໝືອນດັ່ງທີ່ເຈົ້ານາຍຂອງສວນອະງຸ່ນໄດ້ດູແລຕົ້ນໄມ້ຂອງເພິ່ນ. ຢາໂຄບໄດ້ຂໍໃຫ້ທຸກຄົນກັບໃຈ ແລະ ເຂົ້າໃກ້ຊິດກັບພຣະເຈົ້າ. ເພິ່ນໄດ້ສິດສອນພວກເຂົາໃຫ້ຮັກ ແລະ ຮັບໃຊ້ພຣະເຈົ້າ ເພາະວ່າພຣະເຈົ້າຈະເອື້ອມອອກມາຊ່ວຍເຫລືອພວກເຂົາສະເໝີ.