“ກອງທັບໜຸ່ມ,” ເລື່ອງພຣະຄຳພີມໍມອນ (2023)
ກອງທັບໜຸ່ມ
ພວກລູກຊາຍທີ່ໄວ້ວາງໃຈພຣະເຈົ້າ
ຊາວນີໄຟໄດ້ມີສົງຄາມກັບຊາວເລມັນ ແລະ ຕ້ອງການຄວາມຊ່ວຍເຫລືອ. ຊາວອານໄທ-ນີໄຟ-ລີໄຮຢາກຊ່ວຍເຫລືອ. ແຕ່ພວກເຂົາໄດ້ເຮັດຄຳສັນຍາກັບພຣະຜູ້ເປັນເຈົ້າວ່າຈະບໍ່ຕໍ່ສູ້. ລູກຊາຍໜຸ່ມສອງພັນຄົນຂອງພວກເຂົາບໍ່ໄດ້ເຮັດຄຳສັນຍາ. ກົງກັນຂ້າມ, ພວກລູກຊາຍໄດ້ສັນຍາທີ່ຈະຕໍ່ສູ້ ເພື່ອປົກປ້ອງຄອບຄົວຂອງພວກເຂົາ. ພວກລູກຊາຍເຫລົ່ານີ້ຖືກເອີ້ນວ່າ ກອງທະຫານໜຸ່ມ.
ແອວມາ 53:8, 13–18, 22; 56:1–8
ກອງທະຫານໜຸ່ມໄດ້ເລືອກສາດສະດາຮີລາມັນໃຫ້ນຳພາພວກເຂົາ. ມັນເປັນກຸ່ມນ້ອຍເມື່ອປຽບທຽບໃສ່ກັບກອງທັບຊາວເລມັນ. ແຕ່ຮີລາມັນຮູ້ວ່າກອງທະຫານໜຸ່ມເປັນຄົນສຸດຈະລິດ, ກ້າຫານ, ແລະ ຊື່ສັດ. ໂດຍທີ່ມີຮີລາມັນນຳພາພວກເຂົາ, ພວກເຂົາຈຶ່ງໄດ້ໄປຊ່ວຍເຫລືອຊາວນີໄຟ.
ແອວມາ 53:19–22; 56:9–10, 17, 19
ທະຫານຊາວນີໄຟອິດເມື່ອຍ. ແຕ່ເມື່ອກອງທະຫານໜຸ່ມໄດ້ມາ, ຊາວນີໄຟຈຶ່ງດີໃຈຫລາຍ. ກອງທັບໜຸ່ມໄດ້ໃຫ້ຄວາມຫວັງ ແລະ ຄວາມເຂັ້ມແຂງແກ່ພວກເຂົາ. ນຳກັນ, ພວກເຂົາໄດ້ກຽມພ້ອມທີ່ຈະຕໍ່ສູ້ກັບຊາວເລມັນ. ພໍ່ແມ່ຂອງກອງທະຫານໜຸ່ມກໍໄດ້ຊ່ວຍເຫລືອ ໂດຍການນຳອາຫານ ແລະ ສະບຽງມາໃຫ້ພວກເຂົາ.
ແອວມາ 56:16–17, 19–20, 22, 27
ຊາວເລມັນໄດ້ຍຶດເອົາຫລາຍເມືອງ ແລະ ໃຫ້ກອງທັບຢູ່ໃນເມືອງເຫລົ່ານັ້ນ. ຜູ້ນຳຊາວນີໄຟຕ້ອງການໃຫ້ຊາວເລມັນໜີຈາກເມືອງໜຶ່ງ. ພວກເຂົາໄດ້ວາງແຜນ ແລະ ຂໍຄວາມຊ່ວຍເຫລືອຈາກກອງທະຫານໜຸ່ມ.
ກອງທະຫານໜຸ່ມທຳທ່າວ່າກຳລັງນຳອາຫານມາໃຫ້ຊາວນີໄຟທີ່ອາໄສຢູ່ໃນເມືອງຖັດໄປ. ເມື່ອຊາວເລມັນເຫັນກຸ່ມນ້ອຍ, ພວກເຂົາໄດ້ອອກຈາກເມືອງ ແລະ ໄຫລ່ຕາມກອງທະຫານໜຸ່ມໄປ. ຊາວເລມັນຄິດວ່າຈະຈັບກຸມພວກເຂົາໄດ້ຢ່າງງ່າຍດາຍ.
ກອງທະຫານໜຸ່ມໄດ້ແລ່ນໜີຈາກຊາວເລມັນ. ແລ້ວກອງທັບຊາວນີໄຟໄດ້ເລີ່ມຕົ້ນໄລ່ຕາມຊາວເລມັນ. ຊາວເລມັນຢາກໄປເຖິງກອງທະຫານໜຸ່ມກ່ອນຊາວນີໄຟຈະໄປມາພວກເຂົາ. ຊາວນີໄຟໄດ້ເຫັນວ່າກອງທະຫານໜຸ່ມກຳລັງປະສົບບັນຫາ ແລະ ໄດ້ເດີນຂະບວນໄວຂຶ້ນເພື່ອໄປຊ່ວຍເຫລືອພວກເຂົາ.
ຊົ່ວໄລຍະໜຶ່ງ, ກອງທະຫານໜຸ່ມຫລຽວບໍ່ເຫັນຊາວເລມັນ. ພວກເຂົາເລີ່ມສົງໄສຖ້າຫາກວ່າຊາວນີໄຟໄດ້ໄປເຖິງຊາວເລມັນແລ້ວ ແລະ ກຳລັງຕໍ່ສູ້ກັນ.
ຮີລາມັນເປັນຫ່ວງ. ເພິ່ນຄິດວ່າຊາວເລມັນອາດພະຍາຍາມປິດລ້ອມພວກເຂົາ. ເພິ່ນໄດ້ຖາມທະຫານໜຸ່ມຂອງເພິ່ນ ຖ້າຫາກພວກເຂົາຢາກໄປຕໍ່ສູ້ກັບຊາວເລມັນຫລືບໍ່.
ກອງທະຫານໜຸ່ມຈື່ຈຳສິ່ງທີ່ພວກແມ່ຂອງພວກເຂົາໄດ້ສິດສອນພວກເຂົາ. ພວກແມ່ຂອງພວກເຂົາໄດ້ສິດສອນພວກເຂົາໃຫ້ໄວ້ວາງໃຈພຣະເຈົ້າ ແລະ ບໍ່ສົງໄສ, ເພາະວ່າພຣະອົງຈະຮັກສາພວກເຂົາໃຫ້ປອດໄພ. ພວກລູກຊາຍເຫລົ່ານີ້ໄດ້ເຊື່ອໃນພຣະເຈົ້າ ແລະ ຢາກຊ່ວຍຮັກສາຄຳສັນຍາຂອງພວກເຂົາ ທີ່ຈະປົກປ້ອງຄອບຄົວຂອງພວກເຂົາ. ພວກເຂົາໄດ້ບອກຮີລາມັນວ່າ ພວກເຂົາພ້ອມແລ້ວທີ່ຈະໄປ ແລະ ຕໍ່ສູ້.
ຮີລາມັນປະຫລາດໃຈຫລາຍກັບຄວາມກ້າຫານຂອງພວກເຂົາ. ເພິ່ນໄດ້ນຳພາພວກເຂົາກັບຄືນໄປຕໍ່ສູ້ກັບຊາວເລມັນ.
ກອງທະຫານໜຸ່ມຫລຽວເຫັນຊາວເລມັນກັບຊາວນີໄຟກຳລັງຕໍ່ສູ້ກັນຢູ່. ຊາວນີໄຟເມື່ອຍລ້າ. ພວກເຂົາກຳລັງຈະຜ່າຍແພ້ເມື່ອທະຫານໜຸ່ມໄດ້ມາເຖິງ.
ກອງທະຫານໜຸ່ມໄດ້ຕໍ່ສູ້ດ້ວຍພະລັງຂອງພຣະເຈົ້າ. ຊາວເລມັນຢ້ານກົວພວກເຂົາ ແລະ ໄດ້ຢຸດການຕໍ່ສູ້. ກອງທະຫານໜຸ່ມຊ່ວຍໃຫ້ການສູ້ຮົບໄດ້ຮັບໄຊຊະນະ!
ໃນການສູ້ຮົບ, ຊາວນີໄຟ ແລະ ຊາວເລມັນຫລາຍຄົນໄດ້ຕາຍໄປ. ຮີລາມັນຢ້ານວ່າທະຫານໜຸ່ມບາງຄົນຂອງລາວອາດຕາຍໄປເຊັ່ນກັນ. ແຕ່ຫລັງຈາກການສູ້ຮົບ, ຮີລາມັນໄດ້ນັບຈຳນວນທຸກຄົນ. ເພິ່ນດີໃຈຫລາຍທີ່ເຫັນວ່າ ບໍ່ມີໃຜຈັກຄົນໃນກອງທະຫານໜຸ່ມໄດ້ຖືກຂ້າ. ພຣະເຈົ້າໄດ້ຊ່ວຍປົກປ້ອງພວກເຂົາ.
ມີລູກຊາຍຫລາຍຄົນຕື່ມອີກໄດ້ເຂົ້າຮ່ວມກອງທະຫານໜຸ່ມ. ພວກເຂົາໄດ້ສືບຕໍ່ຊ່ວຍເຫລືອຊາວນີໄຟຕໍ່ສູ້. ໃນການສູ້ຮົບອື່ນໆເຫລົ່ານີ້, ກອງທະຫານໜຸ່ມທຸກຄົນໄດ້ຮັບບາດເຈັບ, ແຕ່ບໍ່ມີໃຜຈັກຄົນໄດ້ຕາຍໄປ. ພວກເຂົາຈື່ສິ່ງທີ່ພວກແມ່ຂອງພວກເຂົາສິດສອນພວກເຂົາ. ພວກເຂົາໄວ້ວາງໃຈພຣະເຈົ້າ, ແລະ ພຣະອົງໄດ້ປົກປ້ອງພວກເຂົາ.